Acts 25

Павел кесарь сўт вохәԓ

1Фест, щи мўв щуӈа йŏхәтмаԓ кемән, ԋӑԓмет хӑтәԓән Кесария эԓты Иерусалима мӑнәс.

2Щӑԓта Турма йир верты ŏх ху пӑ иудейәт эԓты ԓӑтәӈа уԓты йох ԓўв хŏщайәԓ Павел эԓты нўр кӑшты йŏхәтсәт пӑ ԓўв пеԓайәԓ эвԓа-йŏԓа пŏтәртсәт,

3щит вохман, Фест ԓывиԓаԓа йӑм ат верәс, Павел Иерусалима ат вохсәԓы; пӑ йуш хŏща ԓўвеԓ веԓты нŏмәс версәт.

4Туп Фест йŏхԓы йастәс, мӑтты Павел Кесарияйән ԉаԉ йŏхән эԓт тӑйԓа пӑ йэшавәԓ ԓўв тŏхи мӑнәԓ.

5«Щиӈәԋща,» ԓўв йастәс, «нын кущайԓән, ма пиԓэмән ат мӑнԓәт, пӑ мŏԓты вер тӑм хŏйат хŏща уԓ ки, ԓўвеԓ ат нўрмәԓтԓэԓ».

6Ԓыв хŏщайэԓ ԋийәԓ мўй йаӈ хӑтәԓ кем уԓмаԓ йўпийән, Кесарияйа йŏхԓы йŏхтәс, пӑ кимет хӑтәԓ, сўт ху омәсты тӑхайа омасмаԓ кемән, Павел туты партсәԓы.

7Хун ԓўв этәс, Иерусалим эԓты йŏхтәм иудейәт керәтман ԓойсәт, Павел артан пӑ ԓавәртан нўрмәԓтты питсэԓ, туп ԓыв щи нўрәт тŏрԓы аԉты ӑт верәтсәԓаԓ.

8Ԓўв пӑ, ԓўвеԓ ӑратыман, йастәс: «Ма нэмәԓты атәм ӑнта иудейәт Закона, ӑнта Турәм Хота, ӑнта кесарьа ӑт версәм».

9Фест, иудейәта йӑм верты ԓӑӈхаман, Павел пеԓа йŏхԓы йастәс: «Иерусалима мўй мӑнты ԓӑӈхаԓән, тӑм верәт урәӈән, щита ма уԓман, нӑӈ ат сўтәтсайән?»

10Павел йастәс: «Ма кесарь сўт йэщаԓт ԓойԓәм, хŏта мӑ сўтәтты верэм уԓ. Иудейәта ма нэмәԓтты атәм ӑт версәм, хŏты нӑӈ па йӑма уйәтԓэн.

11Ма закон шŏппи ўшсэм ки пӑ сŏрәм ԓӑта мŏԓтты версәм ки, пӑрты эԓты шӑшән ӑт ўратԓәм; нэмәԓты ки щит ӑнтом, мўй урәӈән тӑметән мӑ нўрмәԓтԓайәм, нэмәԓты хŏйат мӑнэм ԓывиԓаԓа мӑты ӑт верәтәԓ. Кесарь сўт такан вохԓәм».

12Щишән Фест, нŏмәс мӑты хŏйатәт пиԓән пŏтремәмаԓ йўпийән, йастәс: «Нӑӈ кесарь сўт вŏхсән, кесарь хŏща щи мӑнԓән».

Павел Агриппа хон пӑ Вереника хŏща туԓа

13Кӑмәтса хӑтәԓ хӑщәм йўпийән, Агриппа хон Вереника пиԓән Кесария воша Фест кущайа мойԓәпса йасәӈ йастәты йŏхтәс.

14Ԓын ар хӑтәԓ щита хӑйсәтән, пӑ Фест хон пиԓән Павел вер эԓты пŏтәртәс: «Тӑта, касна хотән, Феликсән хӑйәм хŏйат уԓ.

15Хун ма Иерусалимән уԓмемән, иудейәт Турма йир верты ŏх икет пӑ уна уԓты икет ԓўвеԓ нўра павәтты йŏхәтсәт. Ԓыв ԓўвеԓ сўтәтты партсэԓ.

16Ма ԓывиԓаԓа йастәсәм, Рим хŏйатәт ӑԓ ишән мӑтты хŏйат сŏрма павәтты вер ӑт тӑйԓәт, щи унты хун ԓўвеԓа нўрмәԓтты ŏтԓаԓ пиԓән уйтантыты пӑ ԓўвеԓ ӑратыты щирән мӑԓа.

17Хун пӑ ԓыв ты йŏхәтсәт, кимет хӑтәԓ мŏхты ма сўт ху омәсты тӑхай омәсәм пӑ щи хŏйат ты туты партсэм.

18Ԓўвеԓ лӑп нӑпәтман, нўрмәԓтты ŏтәт и нўр ӑт аԉсәт, мўй хŏрпи нўрәт уԓты ма нумәссәм;

19Туп ԓыв ԓўв пиԓәԓән иудейәт Турма эвәԓты верэԓ эԓты пӑ а хŏй пӑрәм Иисус эԓты ўра вортсәт, Хŏй эԓты Павел такан пŏтәртәс, мӑтты Ԓўв ԓыԓәӈ.

20Ма ӑт уйәтсэм, хŏты мӑнэм щи вер ԓэрапты, пӑ ԓўвеԓ иԋщәссэм, ԓўв ԓӑӈхаԓ мўй ӑнтом Иерусалима мӑнты пӑ щита сўт йэщаԓт ԓойты.

21Туп Павел такан партсәԓы, ԓўв кесарьән ватты кеша ат хӑйса, ма пӑ ԓўвеԓ кесарь киттэм унты ԉаԉ йохәта эԓт тӑйты партсэм».

22Агриппа пӑ Фест пеԓа йастәс: «Ма па щи хŏйат хуԓәтты кашем ус». «Хӑԓэвәт щи хуԓԓэн» - Фест йŏхԓы йастәс.

23Кимет хӑтәԓ, хун Агриппа пӑ Вереника ун ԓӑтәӈ щирән йŏхәтсәтән пӑ сўт верты тӑхайа щŏрәс ԉаԉ йŏх кущайәт пӑ ԓӑтәӈа уԓты вошәӈ хŏйатәт пиԓән ԓŏксәтән, Фест партәм хўватән Павел туса.

24Щӑԓта Фест йастәс: «Агриппа хон пӑ хŏԓ тӑта уԓты йох! Нынан тўм хŏйат ныԓа, хŏй эԓты аратәԓ хŏԓ иудейәт мӑ хŏщайэм Иерусалимән пӑ тӑта, поләщ тўвман пӑ нўр кӑшман, йŏхтыԓысәт пӑ ўвсәт, ԓўвеԓа йэԓԓы уԓты ӑт мосәԓ.

25Туп ма уйәтсэм, сŏрәм ԓӑта ԓўв немәԓты ӑт верәс; пӑ хŏты ԓўв Август эԓты сўт вер такан вохәс, ма ԓўв хŏщайәԓа ԓўвеԓ китты нŏмәс версәм.

26Ма ԓўв эԓтэԓ нэмәԓты тŏрԓы вер кущайэма хӑшты ӑт тӑйԓәм; щишән ԓўвеԓ нын хŏщайән, мет шопәӈ Агриппа хон, нӑӈ хŏщайэна тусэм, ватты йўпийән, мӑнэм мŏԓтты хӑшты урәӈән.

27Ма нумәстэмән, ŏшԓы щир щит, касна хота опсәм ŏт, ԓўв нўрәԓ ӑт аԉман, хон хŏща китты».

Currently Selected:

Acts 25: ХБ

Highlight

Copy