Acts 2
2
Йэмәӈ Ԓыԓ йо̆хәтты вер
1Ветйаӈ хӑтԓәп хӑтәԓ#2:1 Ветйаӈ хӑтԓәп хӑтәԓ - словарьән ванты; питмаԓән ԓыв хŏԓыйэ и нŏмәсән йӑха усәт.
2Щӑԓта шӑмкапан турәм эԓты сый тыйәс, ищи мӑтты такан пŏԓты вот иты, пӑ хот, хŏта ԓыв усәт, лӑп ўса.
3Пӑ ԓыв хŏщайэԓ лакки ортәсты тўт ԋаԓмәт хŏрпи ŏтәт этсәт, пӑ ԓыв нўмпиԓаԓа ԓӑтәԓ щирән итән, итән вŏԓыԓысәт.
4Пӑ хŏԓыйэ Йэмәӈ Ԓыԓән тэкәтсайәт, щӑԓта па йасӈәтән пŏтәртты питсәт, хŏты Ԓыԓ ԓывиԓаԓа пŏтәртты щир мӑс.
5Иерусалимән пӑ иудейәт усәт, Турма эвәԓты хŏйатәт, ар сыр мир кўт эԓты турәм иԓпийән уԓты ŏтәт.
6Хун щи сый тыйәс, мир ӑктәщәс пӑ нŏмәсԓаԓ ԓыԓԓәсәт, кашәӈ хŏйат ԓывиԓаԓ хуԓәс, хŏты щитәт ԓыв ўӈәԓ пўншәм йасәӈԓаԓән пŏтәртсәт, щишән.
7«Пӑ хŏԓыйэ ӑԓ пакнысысәт, ԓыв кўтэԓән пŏтәртман: 'Тӑм пŏтәртты ŏтәт мўй ӑнта хŏԓ Галилея мŏхет?'
8Мўй щирән мўӈ, кашәӈ хŏйат ԓўв ўӈәԓ пўншәм йасӈәԓ, хуԓԓув.
9Парфия пӑ Мидия хŏйатәт, пӑ Элам хŏйатәт, Месопотамияйән, Иудеяйән пӑ Каппадокияйән, Понтән пӑ Асияйән уԓты хŏйатәт,
10Фригияйән пӑ Памфилияйән, Египетән пӑ Киринея пўӈәԓән ŏԓты Ливия мўв йирәтән уԓты хŏйатәт, пӑ Рим эԓты йŏхтәм ŏтәт, иудейәт пӑ прозелитәт#2:10 прозелитәт - словарьән ванты,
11Крит пӑ Аравия хŏйатәт, ԓывиԓаԓ мўӈ йасәӈԓувән Турәм вŏԓаӈ верәт эԓты пŏтәрттэԓ хуԓԓув»?
12Пӑ хŏԓ ӑԓ пакнысысәт пӑ, ощатыман, кўтԓаԓән иԋщәссәт: «А мўй щит»?
13Тухԓәт пӑ, ԋӑха ԋӑхман, пŏтәрсәт: «Ԓыв эпԓәӈ ўна йищсәт».
Петра по̆тәр
14Петра пӑ, ихŏщйаӈәԓ пиԓән ԓойман, сыйәӈ тўрән ԓывиԓаԓа йастәс: «Иудей йох, пӑ хŏԓ Иерусалимән уԓты ŏтәт! Тӑм вер нын ат уйәтԓәԓән, пӑ ма йасәӈԓама хуԓәнтаты:
15Ԓыв ӑнта кўтщәмәт, хŏты нын нумәсԓәты, ин хӑтәԓ хуԓмет щос ӑт уԓ;#2:15 хӑтәԓ хуԓмет щос - щит еврей йох щирән йӑртйаӈ щос; аԓәӈсӑхат ўна ӑт йищԓәт;
16туп тӑми Турәм айкеԓ туты хŏйатән, Иоиԉән, йастәм айкеԓ:
17'Пӑ йухәт хӑтԓәтән питәԓ, Турәм пŏтәртәԓ, Ма Ԓыԓэм эԓты хŏԓ хŏйатәта шошәмԓәм, щӑԓта нын пŏхԓән нын эвиԓән Турәм айкеԓ туты питԓәт; пӑ нын энәмты йохԓән вантәпса ватты питԓәт, пӑ нын ун икиԓән уԓмәт ватты питԓәт.
18Щӑԓта Мӑнэма рупитты йохԓама, пӑ Мӑнэма рупитты нэԓама щи хӑтԓәтән Ма Ԓыԓэм эԓты шошәмԓәм, пӑ Турәм айкеԓ туты питԓәт.
19Щӑԓта вантыԓԓаӈәԓ верәт нумән турәм хӑрийән пӑ йэмәӈ посәт иԓән мўвән, ўр пӑ тўт пӑ пусәӈ пŏлыйәпса этәԓтәԓәм.
20Най пӑтлама йиԓ, пӑ тыԓәщ ўр иты йиԓ, йэԓпи хун Турәм Куща вŏԓаӈ пӑ вŏрԓәты хӑтәԓ йŏхәтәԓ.
21Щӑԓта питәԓ: кашәӈ хŏй Турәм Куща нэм вохԓәԓԓы, нŏх пайәтԓа'.
22Израиль йох! Тӑм йасӈәт хуԓәнтаԓән: Иисус, Назарет вош хŏйат, Турәм эԓты нынана йурәӈ пӑ вантыԓԓаӈәԓ верәт пӑ йэмәӈ посәт сӑхат ватәԓтәм Ху, щитәт Турәм Ԓўв мŏхтэԓ нын кўтәнән верәс, хŏты нын щи уйәтԓәԓән,
23Тӑми, Турәм нŏмәс пӑ йэԓпи вантәм вер хўват мийәм Ŏт, нын ўсԓән пӑ, Турма ӑт эвәԓты хŏйатәт йошән картԓўкән пернайа сэкман, веԓсәԓән;
24Туп Турәм , сŏрәм мухләт лакки мӑшман, Ԓўвеԓ нŏх ԓыԓӈатсәԓы, сŏрәм Ԓўвеԓ иԓ катәԓты ӑт верәтсәԓы, щишән.
25Давид Ԓўв эԓтэԓ пŏтәртәԓ: 'Ма Турәм Куща ма йэԓпемән иса ватсәм, Ԓўв ма эԓтэм йӑм пеләк сӑхат уԓ, ма ӑт ат нŏмәнԓысәм#2:25 нŏмәнԓысәм - кӑт нŏмәс кўтән уԓты;.
26Щит эԓты ма сӑмем амтәс пӑ ԋаԓмем кашәӈа йис; хŏԓна пӑ эԓ ԋŏхем, щи пеԓа нŏмәс пŏнман, уԓты питәԓ:
27Нӑӈ ма ԓыԓэм хӑԓайәт кўтән ӑт хӑйԓэн пӑ Нӑӈ йэмәӈ ŏтэна шимты вер шийаԓәты ӑт мӑԓэн.
28Нӑӈ мӑнэм уԓәпса йуш аԉсән, ма сӑмем амәтэн тэкәнәԓ, хун Нӑӈ веншен шийаԓәԓәм'.
29Хӑнам йох! Нынана Давид опращев эԓты тŏрԓы йастәты эсәԓты ат питԓа, ԓўв пӑрәс пӑ иԓ ԓэщатса, пӑ ԓўв ԓэԓтŏтәԓ мўӈ хŏщайэв тӑм хӑтәԓ унты уԓ.
30Турәм айкеԓ туты хŏйата уԓмаԓән пӑ уйәтман, Турәм так йасәӈ мийман, ԓўвеԓа йастәс, ԓўв ўрәԓ-ԓантәԓ эԓты Христос хŏйата тыйәԓтԓәԓы пӑ ԓўв хон омәсты тӑхайәԓа опсәԓтԓәԓы,
31ԓўв Христос нŏх ԓыԓәӈԓәты вер эԓты йэԓпи йастәс, мўй Ԓўв ԓыԓәԓ хӑԓайәт кўтән ӑт хӑйԓа, пӑ Ԓўв мотавтәԓ шимты щир ӑт ватәԓ.
32Турәм Тӑм Иисус нŏх ԓыԓӈатсәԓы, щит хŏща мўӈ хŏԓ вантәм хŏйатәта усув.
33Щиӈәԋща, Ԓўв, Турәм йурәӈ йошән турма нŏх пайәтман уса пӑ Ащеԓ эԓты аԉәм Йэмәӈ Ԓыԓ вана ўйман, щит шошемәс, мўй нын ин ватԓәты пӑ хуԓԓәты.
34Давид опԉа нŏх ӑт мӑнәс; туп ԓўв пŏтәртәԓ: "Турәм Куща ма Турәм Кущайэма йастәс: Ма йӑм пелкема опса,
35щи унты, хун Нӑӈ кўрнатэна нӑӈен нўрмәԓтты ŏтԓан иԓ ӑт пŏнԓәԓам".
36Щишән Израиль хот тэԓ такан ат уйәтԓәԓы, Тӑм Иисус, Хŏй нын пернайа сэксәԓән, Турәм Ԓўвеԓ Турәм Кущайа пӑ Христоса пŏтсәԓы!»
37Щит хўԓмеԓ кемән, ԓыв сӑмԓаԓән ԋŏхԓәсәт пӑ Петрайа пӑ па апостоләта йастәсәт: «Хӑнам йох, мўй мўӈева верты»?
38Петра пӑ ԓывиԓаԓа йастәс: «Кӑрэкԓән эԓты шӑнша керԓаты, пӑ нын эԓтан кашәӈ ŏт Иисус Христос нэм хўватән йиӈка ат ԓŏӈәԓтыса кӑрэкәт йŏрэмәты урәӈән; пӑ Йэмәӈ Ԓыԓ мойԓәпсайа ўйаԓән.
39Аԉәм вер нын йўканәна пӑ нын ԋаврэмԓән пӑ хŏԓ йэԓта мŏхет урәӈән уԓ, хŏй Турәм Кущайән мўӈ Турмевән вохԓа».
40Пӑ ар па хŏрпи йасӈәтән ԓўв пŏтәртәс пӑ пойкәс, йастәман: «Тӑм атәм хŏйат рут эԓты хŏԓт пайтәсаты».
41Щиӈәԋща, ԓўв йасӈәԓ вана ўйәм ŏтәт йиӈка ԓŏӈәԓтысайәт, пӑ щи хӑтәԓ эвәԓты хŏйатәт хŏща хуԓәм щŏрәс кем хŏйата арамәс.
42Щӑԓта ԓыв ван кўтԓы апостоләт утәԓтәты вер хŏща хуԓәтман, ԋаԋ морәтман#2:42 ԋаԋ морәтман - Словарьән ванты;, пŏтремәман пӑ пойәкщәман йӑха уԓԓысәт.
43Кашәӈ сӑмән пӑԉщәм ус; щӑԓта ар вантыԓԓаӈәԓ верәт пӑ йэмәӈ посәт Иерусалимән апостоләт мŏхты тыйсәт.
44Хŏԓ пӑ эвәԓты мŏхет йӑха усәт пӑ мўй иса и сура тӑйсэԓ.
45Пӑ хотԓаԓ пӑ тащԓаԓ–вещԓаԓ тыныԓԓаԓ, пӑ хŏйатәта хŏԓ ортԓыԓԓаԓ, ватман, хŏйа мўй арат мосәԓ.
46Щӑԓта кашәӈ хӑтәԓ, и нŏмәсән уԓман, Турәм Хотән уԓԓысәт пӑ, хотәтән ԋаԋ морәтман, амтәтԓыман пӑ вещкат сӑмән уԓман, ԓэсәт,
47Турәм ишәкман пӑ мирән сӑмәӈа тӑйман. Турәм Куща пӑ кашәӈ хӑтәԓ нŏх пайтәм мŏхет эвәԓты хŏйатәт хŏща йŏхтәптысԓы.
Currently Selected:
Acts 2: ХБ
Highlight
Share
Copy
Want to have your highlights saved across all your devices? Sign up or sign in
Institute for Bible Translation, Finland
