ROOMU SOKKA 1

PHAAWULOOSI SOYINO KEERE

1Tini sokka, Maganunniha Dancha Duduwo kulate bandoonnihu Soqqamaasincho ikkara woshshaminohu Kiristoosi Yesuusi borojjichi Phaawuloosi soyinote. 2Kuni Danchu Duduwi, Maganu himanaanosi widoonni qole Qullaawa Borro giddo balaxe uyino hexxooti. 3Kuni Danchu Duduwi Maganu Beetti mannimmate danisinni, Daawiti sirchinni ilaminota kulanno. 4Mootichinke Yesuusi Kiristoosi, qullaawa ikkasi ayyaaninni reyotenni ka"asinni, Maganu Beetto ikkasi wolqatenni leeltino. 5Kiristoosi widoonninna isi su'mi daafira, manna daga baalate giddonni amma'nate hajajama widira qoleemmo gede, Maganu soqqamaasinchimmate elto uyinoe. 6Ki'neno Yesuusi Kiristoosire ikkitinanni gede, dagate giddonni Maganu woshshino'ne. 7Tini sokka, Phaawuloosi Maganu baxino'neriranna qullaawoota ikkitinara woshshantinoonnirira Roomaho heedhinannirira baalaho soyinote:

Maganu Anninkenna Mootichu Yesuusi Kiristoosiwiinni eltonna keeru iillo'ne!

PHAAWULOOSI ROOMU MANNA LA"ATE QUQQUXAMI

8Amma'na'ne duduwi gobba baalate duduwaminohura, ki'ne baalunku daafira, Yesuusi Kiristoosinni Magano'ya galaxxeemmosi. 9Wo'manka woyite huuccatto'yanni qaageemmo'netera, Beettisiha Dancha Duduwo kulanni wo'mu wodani'yanni soqqameemmosi Magani naqaashshe'yaati. 10Maganu yiiro, ki'newa daate doogo fanannoe gede, wo'manka woyite huucci'ranni noommo. 11Amma'natenni kaajjishanno'neha ayyaanaamo afansha beehammo'nera hasi'roommo daafira la"ammo'nera quqquxamoommo. 12Hatto yaa'yano ani ki'ne ammananni, ki'neno ane amma'nanni mimmitonke jawaachinsheemmo gedeeti.

13Roduuwa'ya, wole daga rosiise giddonsanni lowo ammanaasine afi'roommo. Ki'ne mereerinnino ammanaano afi'rate hasi'roommo. Ikkollana, ki'newa daate batinye hige hedeenna injaa hoogeennae gatoommota affinara hasi'reemmo. 14Qajeeltinorenna qajeeltinokkire, egenno afidhinorenna afidhinokkire rosiisate asalu nooe. 15Kunnira, ki'ne Roomaho heedhinannirirano Dancha Duduwo kulate quqquxamoommo.

DANCHU DUDUWI MAGANU WOLQAATI

16Danchu Duduwi amma'nitinore baala balaxe Ayihude, aancheno daga gatisate Maganu wolqaati. Kunnira, ani Danchu Duduwinni disaalfateemmo. 17«Keeraanchu amma'natenni heeshsho afi'ranno» yine borreessinoonninte gede, Danchu Duduwi Maganu manna uminni kayise goofimarchu geeshsha amma'natenni keereensannota kulanno.

MANNU BAALU CUBBAATAAMOHO

18Bunshensanni halaalu leellannokki gede assanno mannira, cubbinsanna bunshensanni kainohunni Maganu hanqi gordunni dirranno. 19Hatto ikkannohuno, Magano afate hasiisannonsa geeshshire Maganu xawise kulinonsa daafiraati. 20Alame kalaqantuhunni kayise mannaho leellannokkihu Maganu dani, hegere wolqasinna Maganimmasi, isi kalaqino kalaqami aana xabbe leeltanno. Kunnira, affanni heedhe assitanno bunshera ku'lite gattannori dinonsa. 21Insa Magano affe heedhenni, Maganimmasira malino ayirrinyenna galata diuyitinosi. Hedonsa haafa ikkite gattu; jallaagu wodaninsano tunsi. 22«Ninke egennaammaho» yitanni heedhenni gowwoota ikkitu. 23Hegere Magano ayirrisa agurte, mannu, ceatenni, saadatenninna godowunni ha'ranno kalaqami suudinni seekkinoonni misillara ba'annotera ayirrinye uyitu.

24Kunnira insa insanaawa manninatinsa aana saalsiisanno coye assitara, Maganu battaabbino hamaande giddo heedhanno gede facci asse agurinsa. 25Hatto assinohu, Maganu halaale kaphunni soorritinohura, kalaqinoha agurte kalaqamaho kumbuultinohuranna soqqantino daafiraati. Maganu kayinni hegere geeshsha galataminoho! Hamii'ni.

26Konne coye assitinohura, Maganu saalsiissanno yorto giddo facci asse agurinsa. Meentinsa nafa siimu xaadooshshira rosamino gara agure ronsoonnikki gara ikkanno. 27Labballuno rosaminoha labbaahunna meyate xaado agure, insa insanaawa siimu xaadooshshe assate yortonni giirantu. Kunnira labballu labballu ledo saalsiisanno coye assitu; assitino so'rorano bisinsara malino qoricha adhitanno.

28Mannu Magano afate hasi'rinokki daafira, saalsiisanno coye assanno gede, tidhitinokki hedo giddo facci asse agurinsa. 29Giddonsa beebba, bunshe, hafuurre, xagarro, dhiibbe, manna shaa, gibbo, awaawura, woleho busha mala, heme, 30mannu su'ma huna, Magano giwa, xono, boo'na, naaxxa, bunshe hasa, annahonna amate hajajama giwa, 31mayinae hooga, wodho diiga, baxama giwanna mararro hooga wo'mitino. 32Togoore assitannorira baalaho reyo maltinonsata kulannoha Maganu Seera affanni heedhenni, konne coye assitanno. Konne coye assitanni nooreno jawaachishshanno.

Currently Selected:

ROOMU SOKKA 1: QulMax

Highlight

Copy