FILIPHISIYUSI SOKKA 2

KIRISTOOSI JOONGILLI NINKERA DANCHA LAWISHSHAATI

1Kiristoosinni heedhinanni heeshsho jawaachishshanno'ne; baxillisino sheshifachishanno'ne; Qullaawu Ayyaani ledo mittimma afidhinoonni; mimmiti'nera mararronna shaqqillu noo'ne. 2Maahoyyena, xa mitte hedonni, baxillunni, ayyaanunninna gawalotenni sumuu yitine hagiirre'ya wonshe. 3Umo'ne roorsidhine haafu adawarshinni mittore nafa assitinoonte. Hatteentenni wolu manni ki'nenni roorinohu gede assitine hedde. 4Mittu mittunku woleho woyyannore hedo ikkinnina, umisira woyyannore calla laoonke. 5Kiristoosi Yesuusira nooti tini hedo ki'nerano heedho'ne:

6Isi Maganu dana afi're hee'renni,

afi'rino wolqa ku'le,

Maganu ledo taalamara dihasi'rino.

7Hattenne agure,

umosi mullicho asse,

borojjichu daniha ikke,

manna lawe ilamino.

8Mannu gedeeha ikki yannara,

umosi heeshshi assino.

Dawete aana sutame,

reyate nafa hajajaminoha ikkino.

9Kunni daafira,

Maganu wo'munkura aliidi darga worisi.

Su'ma baalaho rooriidi su'mano uyisi.

10Kunninni kainohunni,

gordoho, baattotenna baattote woroonni noori baalu,

Yesuusi su'mi ayirrinyira, guluphitanno.

11Arrawu baaluno,

«Yesuusi Kiristoosi Mootichaho» yee farci'ranni,

Magano Annaho ayirrinye aanno.#Isa 45:23 lai.

BEEDDAHETE GEDE XABBE

12Kunnira, ki'ne baxillaasine'ya! Ani ledo'ne noommo yannara wo'ma woyite hajajantinanni heedhinoonni. Xa ki'newiinni fafe hee'reenna kayinni albinni roore hajajantinanni gede qaagiisseemmo'ne. Waajjatenninna huxi'ratenni gato'ne wo'ma ikkitanno gede assidhe. 13Hatto assitinannihu, dancha hedosi daafira, heddinannireno ikko assitinannire ki'ne giddo loosannohu Magano ikkinohuraati.

14Loossinannire baala gungummenna moronsho nookkiha asse. 15Hatto ikkiro, bushanna shokkashsho ilama mereero saalsiisannorinna mishiishannori nookkiha fayyaaleeyye Maganu ooso ikkitine gobba baalate aana beeddahimma xabbinanni.#Mar 32:5 lai. 16Kuni ikkannohuno, heeshsho afi'nanniha Dancha Duduwo agurtinikkinni farcidhinirooti. Kunni garinni dodansho'yanna daafuri'ya mullawa gatannokki gede, Kiristoosi galagale daanno Barra hexxeemmo coyi hee'rannoe. 17Maganoho ammanatenni shiqishshinanni kakkalonna soqqansho gede, ane mundee lexxite du'nantoommero nafa, ki'ne baalunku ledo hagiidheemmo. 18Ki'neno hagiidhitine aneno hagiirri'ne beeqqaancho assitinannie.

XIMOOTEWOOSINNA EPHAFIRODITUSI

19Ki'ne heedhinoonni gara macciishshe hagiidhate, rahe Ximootewoosi ki'newa soyemmo gede Mooticha Yesuusa hexxeemmo. 20Ki'ne daafira ane gede ikke yaadannohu iso agurranna wolu dinoe. 21Wolootu baalu, Yesuusi Kiristoosire ikkikkinni uminsa qiniite calla shorritannoreeti. 22Ximootewoosi kayinni egennineennasi, ane ledo annunna beettu gede ikkineenna ledo'ya Danchu Duduwi looso loosanni hee'rinota affinoonni. 23Kunnira, ikkeemmota afummohu gedensaanni, iso rahe ki'newa soyate hedoommo. 24Ani umi'yano rahe dayemmo gede Mooticha hexxeemmo.

25Ane kaa'lara sokkinoonniha, ledo'ya olamaancho, ane ledo loosannoha, rodoonke Ephafiroditusi qole ki'newa soya woyyitanno yee hedoommo. 26Iso ki'newa soyemmohu, ki'ne sinsinnaawinohuranna dhiwamasi macciishshitinoonnita afe dadillino daafiraati. 27Addinta lowo geeshsha dhiwame ree hoogino. Maganu kayinni marare hursinosi. Dadillu aana dadillu lexxannoekki gede, Maganu iso gatisatenni aneno mararinoe. 28Kunnira, roorse halchoommohu, ki'ne iso la'ine hagiidhitinanninna ane yaaddono aaninni hawacci yitannoe gedeeti. 29Mootichunni rodoo'ne ikkinota affine hagiirrunni haadhesi. Isi gedee manna baala ayirrisse. 30Isi, ki'ne mule'ya heedhine kaa'la dandiitinannikki coye assaera yee, Kiristoosi loosi daafira lubbosi mararikkinni reyote geeshsha iille gatino.

Currently Selected:

FILIPHISIYUSI SOKKA 2: QulMax

Highlight

Copy