NAHOOMI 1
1
NENNEWE AANA DAANNOHA KAALIIQI HANQO
1Nennewe diigama daafira Elqoshichu Nahoomi coyi'rino qaalinna laino ajuuja aante noote:
2Kaaliiqi Maganu wole maganna
magansidhannore wore dila"anno.
Diinnasinna hettissannosire baala qorichishanno;
hanqosi aanansa dirrisanno.
3Wolqasi jawa ikkituro nafa,
Kaaliiqi hanqoho dimuddamanno.
Ikkollana sao assinoha qorichishikkinni diaguranno.
Kaaliiqira hombobolattete bubbenna,
dambalu mereero nafa doogo noosi.
Gomichuno Kaaliiqi qaafanno woyite ka'anno bukooti.
4Isi hajajonni, baarunna xashshu baalunku moolanno.
Baasaaninna Qermeloosi Ilaallara noo mu'ro duuchanti qoortanno;
Libaanoosi daraarono giggiltanno.
5Kaaliiqi albaanni ilaalla huxidhanno,
gaarrano daaqqanno.
Kaaliiqi daanno yannara,
baatto shashshafantanno.
Kalqenna aanase noori baalu huxi'ranno.
6Isi hanqanno woyite,
albasiinni uurra dandaannohu ayeti?
Hanqisi giirate gede buwanno yannara,
gata dandaannohu nooni?
Giirate gede buwannohu hanqisi dirranno yannara,
kinna daddadhante billaallitanno.
7Kaaliiqi shaqqadoho,
qarru yannarano mannisira dancha kaajjado maaxammanni dargaati.
Isiwa eeggo e'annore baalanka agarannonsa.
8Diinnasi#1:8 diinnasi woy dargasi yaa dandiinanni. lolahu egemmanno gede assanno.
Gibbannosire dhi'mote tunsichiwa qole shorranno.
9Kaaliiqira gano gantiniro,
isi ki'ne co'o asse hunanno'ne.
Layinkita iso hettissinara horontanni didandiitinanni.
10Isiniiwa xaaxamino utinna,
moola hayisso giirante ba'annonte gede,
ki'ne dimbaanono giirantinanni.
11Nennewe! Kaaliiqi aana gano ganannohunna,
busha mala malanno manchi ate giddonni fulino.
12Kaaliiqi mannisira Yihudaho,
«Asoori gosa wolqaataamenna,
kiironsa bati'ra ikkiturono,
nookki gede ikkite ba'anno.
Manna'ya, kunni albaanni qarra batisoommo'neha ikkiro nafa,
kunni ka'a hatto diasseemmo'ne.
13Asoori gosa duhisiissino'neha gadadu gashshoote hooleemmo'ne;
lekka'ne usurroonnita siwiilu cagaage tattayiseemmo» yii.
14Kaaliiqi ki'ne Asoorootaho yiino yoo, «Kunni ka'a su'ma'ne woshshiishanno sirchi dihee'ranno. Maganna'ne mine noota bonce seekkinoonni misillanna daashshine seekkinoonnita kaphu maganna huneemmo. Ki'ne lowo geeshsha bushuulle ikkitinoonnihura, waammate bale umeemmo'ne» yitannote. 15Kuneeti dancha duduwo kulannohu, keereno lallawanno soqqamaanchi ilaallate aanaanni hige daanni no. Yihudu manna, bushuullu diinnakki co'o yite gooffinona, kunni ka'a gobbakki horonta dihorritanno. Kunni daafira, diru ayyaannakki hagiirrunni ayirrisi'ri. Xanokkino Kaaliiqira uyi'ri.
Currently Selected:
NAHOOMI 1: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
