MAATEWOOSI 15

ALBI MANNI SEERA

(Maq 7:1-13)

1Hakkunni gedensaanni Yerusaalametenni daggino Farisootinna Muse Seeri rosiisaano Yesuusiwa shiqqe, 2«Rosaanokki albi manni woga mayira diigganno? Anga hayishshidhukkinni sagale ittanno!» yitu.

3Yesuusi qole, «Ki'nena, woga'ne agadhitinara yitine Maganu hajajo mayira diigginanniyya? 4Maganu, ‹Annakkinna amakki ayirrisi! Annanna ama xonannohu reyo› yee hajajino.#Ful 20:12; 21:17; Mar 5:16; Lew 20:9 lai. 5Ki'ne kayinni, mittu manchi annasinna amasi, ‹Anewiinni afidhinanni ba'raa'ra Maganoho uyi'reemmo› yiiro, 6‹Hakku manchi annasi#15:6 annasi yaannohu darga mite mite angatenni borreessinoonnitera keeshshitino borro giddo anna woy ama yaanno. ayirrisa dihasiissannosi› yitinanni. Kunninni, bude'ne kaajjishi'rate yitine Maganu Seera diigginanni. 7Ki'ne lawisiisaano, Isayaasi ki'nere,

8‹Tini gosa afuunni ayirrissannoe;

wodaninsanni kayinni anewiinni faffe no.

Magansidhannoehuno woga wonshateeti.

9Mannu woganna bude,

seeru gede assite rosiissanni,

kaphunni magansidhannoe›

yee himanino himani halaaleho» yii.#Isa 29:13 lai.

MANNA LAGEESSANNO COYE

(Maq 7:14-23)

10Yesuusi manna isiwa woshshe, «Macciishshitine huwatte! 11Manna lageessannohu mannu afiinni fulanno coyeti ikkinnina, afuu giddora eannore di"ikkino» yiinsa.

12Hakkunni gedensaanni rosaanosi Yesuusiwa shiqqe, «Konne coyi'ritto coye macciishshite Farisootu so'rantinota afoottoni?» yite xa'mitusi.

13Isi kayinni, «Gordu Anni'ya kaasinokki kaashshi baalu buqqisamanno. 14Insa illiweelte heedhe illiweeloota massaggannoreetina agurre. Illiweelu illiweelo massagiro lamunku balete ubbanno» yiinsa.

15Pheexiroosi Yesuusa, «Maammaashshu tiro kulinke» yii.

16Yesuusino, «Ki'ne xaa geeshsha dihuwattinoonni? 17Afuu giddora eannohu baalu godowa mare hakkaanni hige gobbara fulannota dibuuxxinoonni? 18Afuunni fulannohu kayinni wodanu giddonni fulanno; manna lageessannohuno hakkonneeti. 19Hakkuri: busha hedooti, manna shaate, foorrete, baashaawate, moorate, beebba coyi'rate, mannu su'ma hunate; kuri baalu mannu wodani giddonni fulanno. 20Manna lageessannori koreeti ikkinnina hayishshi'noonnikki anganni ita dilageessitanno» yii.

KANA"AANITTE MANCHO AMMA'NA

(Maq 7:24-30)

21Yesuusi hakkiinni kae, Xiroosinna Sidoonu katamma ha'ri. 22Hakkiicho mitte Kana"aanitte mancho Yesuusiwa dagge, «Daawiti Beetto Mooticha, beetto'ya bushu ayyaani amadeenna shette noona ballo mararie!» yite huuccidhu.

23Isi kayinni mittoreno didawarinose. Rosaanosi isiwa shiqqe, «Tini mancho hoodenke hadhanni cancitanni noona ballo ha'risi!» yite huuccitusi.

24Isino, «Ani soqqame dayommohu Israeelete giddonni ge'reewu gede ikke ballehino manniraatilla» yee dawari.

25Mancho kayinni shiqqi yite lekkasira ubbe, «Mooticha ballo, eeggatena kaa'lie» yitu.

26Yesuusi qole, «Oosote sagale haa'ne woshshaho tuga digaraho» yii.

27Ise qolte, «Mooticha, hatti halaaleho; ikkirono woshshuno mootoollesi ittanna uwino giggilo xinqi'rannowe» yitu.

28Hatte yannara Yesuusi, «Tee mancho, amma'nakki jawate; kunni daafira hasi'roottari ikkohe» yiise. Beettoseno hakkawoyintenni hurtu.

YESUUSI LOWO DHIWAMAASINE HURSI

29Yesuusi hakkiinni kae Galiilu Baari mulira daye, ilaalu iimira fule ofolli. 30Lowo manni naafoota, illiweeloota, laanshaawoota, danqitinorenna wole dhiwamaanono haa're Yesuusiwa abbe lekkasi mule wori. Isino hursinsa. 31Mannuno danqitinori coyidhanna laanshaabbinori hurtanna, naafootu qaaffe hadhanna, illiweelootu la'anna afe dhaggeeffate Israeelete Magano galati.

YESUUSI SHOOLE KUME MANNA ITISE DUUSHSHI

(Maq 8:1-10)

32Yesuusi rosaanosi woshshe, «Mannu ane ledo sase barra keeshshino; ittanno sagaleno nookki daafira mararoommonsa. Ha'ranni doogote shaqqe uwannokki gede itikkinni diha'riseemmo» yii.

33Rosaanosi kayinni, «Hatto ikkina, tenne halallitte gobbara kageeshshi mannira ikkitanno sagale maminni abbinanni?» yitu.

34Yesuusi qole, «Meu timi noo'ne?» yiinsa.

Insano, «Lamalu timinna boodu shiimmaaddu qulxu'mi noonke» yitusi.

35Hakkunni gedensaanni, Yesuusi mannu uulla ofollanno gede hajaji. 36Lamalanka timanna qulxu'me haa're, galatu huuccatto assi. Hiiqqaqqe rosaanosira uyi; insano mannaho iillishshu. 37Mannu baalu ite duuwi; rosaano gatino hambaa gamba assite lamala soro kayissu. 38Itino manni meentonna ooso kiirrikkinni shoole kumeeti. 39Yesuusi manna ha'risihu gedensaanni yowolote ofolle Megedooni yinanni gobba ha'ri.

Currently Selected:

MAATEWOOSI 15: QulMax

Highlight

Copy