LEEWAAWOOTA 6
6
1Kaaliiqi Musera, 2«Aye manchino maaxasira uyino jajja ho'latenni, woy mooratenninna hanaaqe adhatenni, 3woy bainoricho afe hee're, diafoommo yee xaaratenni sao assiro, kakkalo shiqishona. 4Aye manchino hattoo coye assiro, umisiha ikkinokkire baala qola hasiissannosi. 5Sao assinota afanno barra, adhinore baala ontunni mitte anga aanaho lede annaho qolona. 6Assino saora saadasi giddonni mitto muso afi'rinokkiha ge'rechu woy meichu goco abbona; woy fushshitanno waaga gobbate wodho garinni hendeenna woxe oona. 7Qeesichuno cubbisi daafira kakkalo shiqisheenna manchoho assino cubbi baalu aguramannosi» yii.
GUDINSE SHILQINSHANNI KAKKALO
8Qoleno Kaaliiqi Musera, 9«Aarooniranna oososira kunnira woroonni nooha shilqote kakkalo seera kulinsa: Shilqote kakkalo hashsha wo'ma kakkallanni darga worreenna giirano bubbanni galtona. 10Layinki soodo qeesichu shaalado uddano, waajjo uddano giddoyidite ledo uddi're, shilqinshoonni kakkalo giira itte gudduhu gedensaanni, buluulo fee kakkallanni dargira woroonni dunona. 11Hakkunni gedensaanni uddanosi soorri're, hakkonne buluulo haa're qachu gobbaanni lagote bayicho masse dunona. 12Kakkallanni darga noo giira horonta xoa dihasiissanno. Qeesichuno soodanno kiiro haqqe woranni, shilqote kakkalo qixxeesse mittimmate kakkalora cooma shilqishona. 13Giirano xo'ukkinni wo'manka woyite kakkallanni darga bubbona.
GIDU FUSHSHAATE
14«Gidu fushshaate shiqinshanni seeri kunninni aane nooho: Aarooni sircho ikkino qeesichi gidu fushshaate kakkallanni dargira albaanni albi'yara haa're shiqishona. 15Qeesichuno gidu fushshaatita hoowo liiqo bullee, zayitetenna hixaanu baalu ledo qaaggote fushshaate shilqote kakkalo dargira shiqishona. Tenne kakkalo foolino anera tashshi yaannoha ikkanno. 16-17Hakkiinni gatinoha qeesootu ittona; tima shiishikkinni ganneenna, Xaadu Dukkani qooxeessira ofolte ittona. Ani konne gidu fushshaati gede qeesootaho qeechansa asse oommo. Kunino lowo geeshsha qullaawaho. 18Dagganno ilamara, ayino Aarooni sircho ikkinohu labbaahu baalu konne tima ita dandaanno. Tini anera shilqinshanni kakkalooti; qeesoota agurranna konne kisannohu baalu lagaawanno» yii.
19Kaaliiqi Musera, 20«Aarooni sirchi qeesimmate buuramanno barra, anera wo'manka woyite gidu fushshaatira shiqinshanni geeshshita mitte kiilo liiqo bullee, darate soodo, darate hawarro shiqishona. 21Zayite karsine mixashshote aana gannona; raihu gedensaanni, hiiqqaqqe gidu fushshaate asse anera shiqishona. Kunni fushshaati foolino anera tashshi yaannoha ikkanno. 22-23Qeesimmate buuraminohu Aarooni sircho ikkinohu baalau, konne seera wonsha, kunni aaninni ayino itannokki gedenna fushshaatu baalunku shilqino gedeenni buuxa hasiissannosi» yii.
CUBBU KAKKALO
24Qoleno Kaaliiqi Musera, 25«Aarooni sirchira togo yite kulinsa: Kuni cubbu fushshaati daafira uyinoonni seeraati; cubbu fushshaatira gorrinanni saada, shilqinshanni kakkalora gorrinanni dargira aliyyeenni gorrinona. Kunino lowo geeshsha qullaawaho. 26Kakkalo shiqishanno qeesichi intara fajjinoonniha Xaadu Dukkani gaangaawira tenne hajora bandoonni darga masse itona. 27Hakkonne maala kisannohu baalu lagaawanno; tini mundee kissino uddano baalanta masse qullaawa darga hayishshi'rona. 28Qeesichu maala ganfoonni midaancho hiiqqona; camotenni seekkinoonni uduunnicho ikkiro kayinni, seekke rige wayinni hayishshona. 29Qeesootu sircho ikkinohu labbaahu baalu konne fushshaate itona. Kunino lowo geeshsha qullaawaho. 30Cubbo agursiisate yine mundee Qullaawu Minira eessinoonniha ikkiro, maala ita dihasiissanno; tenne kakkalo gudinse shilqisha hasiissanno.
Currently Selected:
LEEWAAWOOTA 6: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
