LEEWAAWOOTA 4
4
ANFIKKINNI LOONSOONNI CUBBIRA SHIQINSHANNI KAKKALO
1Kaaliiqi Muse, 2«Israeelete mannira togo yite kulinsa: Aye manchino afikkinni cubbo loosiro, ani Kaaliiqi assitinoonte yoommohu giddonni mitto coye nafa sairo, 3qeesootu qarino cubbo loose mannu aana sao abbiro, loosino cubbira mitto muso afi'rinokki middicha abbe cubbisi daafira, anera kakkalo asse shiqishona. 4Booto Dukkanu xullichira abbe, angasi bootu umi aana wore, alba'yaanni gorrona. 5Hakkunni gedensaanni, qeesootu qari shiima bootu mundee haa're, Dukkanu giddora eona. 6Qullaawa Holge uddanotenni dukkinoonni dukkora albaanni uurre, mundee qubbichisinni kisanni ane albaanni 7 hige wixona. 7Qoleno, shiima mundee haa're, Dukkanu giddo hixaana giirranni uduunnichira shoolente maddera nootera shoolente buudda aana coccossona. Gattino mundee Dukkanu xullichi hunda shilqinshanni kakkalo darga dunona. 8Cubbu daafira, kakkalote shiqanno booti cooma baala, godowiru cooma, 9mulenna aanasi noo cooma, hattono qaccete afale fushshona. 10Qeesootu roorrichi, mittimmate kakkalora shiqinshanni garinni shiqishe, shilqote kakkalo shiqinshanni dargira haa're massona. 11Ikkollana kayinni, bootu goga, maala baala, umonna daduwe, godowire baala helleete ledo, 12kakkalote seeri garinni, qachaho gobbaanni langoonni darga buluulo tunganniwa masse gamba yiino buluuli aana haqqe wore giirona.
13«Israeelete songo baalanti affukkinni cubbo loossuha ikkiro, hajajo'ya giddonni mitte xeisse sao assituro, 14sao assansa buuxxanno yannara, cubbu kakkalora mitto middicha Xaadu Dukkani albira shiqishshona. 15Gosate geerri angansa middichu umi aana worte ka'e, ane albaanni gorritona. 16Qeesootu roorrichino middichunnita shiima mundee haa're, Xaadu Dukkani giddora e"e, 17uddanotenni dukkinoonni dukko albaanni uurre mundee qubbichunni kisanni 7 hige ane albaanni wixona. 18Qoleno, shiima mundee haa're Xaadu Dukkani giddo ane albaanni nootera hixaana giirranniwa shoolente maddera noo budda aana coccossona. Gattino mundee gudise Xaadu Dukkana e'nanniwa shilqote kakkalo shiqinshanni dargira woroonni dunona. 19Cooma baalanka haa're, shilqote kakkalo dargira shiqishona. 20Konne middicha cubbu daafira shiqinshanni kakkalo garinni shiqinshona; gosate cubbi aguramanno gede, qeesootu qari kakkalo kunni garinni shiqishona. 21Hakkunni gedensaanni, middicha qachaho gobbaanni fushshe, umisi cubbira shilqishi middichi gede asse shilqishona. Tini gosate cubbo hoolate shiqinshanni kakkalooti.
22«Mittu gosate sooreessi afikkinni cubbo loose hajajo'ya giddonni mitte hunatenni sao assiro, 23cubbo loosasi buuxihu gedensaanni, muso afi'rinokkiha mitto meichu goco umisi kakkalo asse shiqishona. 24Angasino gocu umi aana wore, kakkallannihura aliyyeenni shilqinshanni kakkalora gorrinanniwa masse gorrona. Tinino cubbo hoolate kakkalooti. 25Qeesichuno kakkalote mundee qubbichunni haa're, shilqote kakkalo shiqinshanni darga shoolente maddera noo buudda baalate kisiisona. Gattino mundee kakkallanni dargira woroonni dunona. 26Mittimmate kakkalora shiqinshinte gede, cooma baalanka kakkallanni darga shilqishona. Kunni garinni qeesichu kakkalino kakkalo gosate sooreessi cubbo hooltanno.
27«Mereerimu manni giddonni mittu afikkinni cubbo loose, hajajo'ya giddonni mitte xeisatenni sao assiro, 28sao assasi buuxihu gedensaanni, muso afidhinokki meicho loosino cubbira umisi kakkalo asse shiqishona. 29Angasino shiqishino meicho umi aana wore, kakkallannihura aliyyeenni shilqote kakkalora gorrinanniwa masse gorrona. 30Qeesichuno shiima mundee qubbichunni haa're, shilqote kakkalo shiqinshannitera shoolente maddera noo buudda baalate kisiisona. Gattino mundee kakkallanni dargira woroonni dunona. 31Mittimmate kakkalora shiqinshanni saada cooma baala assinanninte gede bade fushshe, anera tashshi yitanno kakkalo asse kakkallanni darga shilqishona. Qeesichu kunni garinni kakkaleenna manchoho cubbisi aguramannosi.
32«Manchu afikkinni loosino cubbi daafira ge'recho shiqishannoha ikkiro, muso afidhinokkita ikkitona. 33Angasi ge'rechote umi aana wore, shilqote kakkalo kakkallanni dargira aliyyeenni masse gorrona. 34Qeesichuno shiima mundee qubbichunni haa're, shilqote kakkalo shiqinshanni darga madde baalate kisiisona. Gattino mundee kakkallanni dargira woroonni dunona. 35Mittimmate kakkalora shiqinshanni garinni, ge'rechote cooma baala bade fushshe, kakkallanni darga anera uyinanni fushshaati sagalennihu ledo shilqishona. Qeesichu kunni garinni kakkaleenna manchoho cubbisi aguramannosi.
Currently Selected:
LEEWAAWOOTA 4: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
