YOONAASI 1
1
YOONAASI KAALIIQIRA HAJAJAMA GIWI
1Mitto barra, Kaaliiqi Amiitayi beetti Yoonaasira, 2«Ka'e jawa katama Nennewe mari; hakko katami manni loosino bunshe afoommona, qoonqokki naggi assite lallawi» yii. 3Yoonaasi kayinni Kaaliiqiwiinni miliqe, Terseesi ha'rate kai; Iyophe dirre Terseesi hadhanno markaawe afi'ri. Hasiisanno woxe baaxxe markaawete giddora ei; Kaaliiqiwiinni miliqe markaawete giddo noori ledo Terseesi ha'rate kai.
4Kaaliiqi kayinni baaru aana jawaata bubbe kayisi; baaru aana wolqaataamu dambali kaino daafira, markaawe hiiqqamate gamba yitu. 5Markaawete giddo noo manni waajjino daafira, baalunku umi umisi maganiwa hige raari; markaawete hogowi shotanno gede hogophitinore fushshite baaru giddo tuggu. Yoonaasi kayinni markaawete woriidi kifile dirre goxe bae no.
6Markaawete hajajaanchino isiwa shiqqi yee, «Tenne yannara mayira goxootto? Miteekke marare gatisannonkeha ikkannona, ka'e maganokki huuccinke» yitu.
7Markaawete giddo noori mimmitoho, «Kunni qarri giddo umbeemmo gede kaima ikkinonkehu ayetiro afate, amme hixa ga'ninona» yitu. Ga'nitino hixino Yoonaasi aana uwi. 8Kunnira, «Hanni kulinke! Kunni iillinonke qarrira kaimu ayeti? Atehu loosikki maati? Maminni dayottoho? Gobbakki hiikkooti? Gosakki mamaati?» yite xa'mitusi.
9Yoonaasino, «Ani Ibiraawichaho; baattonna baara kalaqinoha gordu Magano Kaaliiqa magansi'reemmo» yee dawari. 10Balaxe kulinonsa garinni Yoonaasi Kaaliiqiwiinni miliqe ba"anni nooha ikkinota affe lowo geeshsha waajjitino daafira, «Konne busha coye mayira loositto?» yitusi. 11Dambalu lowo geeshsha wolqa lexxanni ha'rino daafira markaawete giddo noo manni, «Dambalu uurranno gede ate ma assinummoro woyyannoha lawannohe?» yee xa'misi.
12Yoonaasino, «Kuni dambali ki'ne aana dayinohu ane saonni ikkinota afoommona, ane fushshitine baaru giddo tugge; hakkunni gedensaanni dambalu uurranno» yiinsa.
13Markaawete giddo noo manni kayinni, afi'rino wolqa baalatenni laaqi'ranni qacce fulate olami; ikkollana, dambalu wolqisinonsa daafira didandiitino. 14Kunnira, «Kaaliiqa, kunni manchi lubbo hunnoommo daafira guddootinke; ati hasi'roottore assoottona, keeraancho mancho shinoommohu gede assite kiirtootinke» yite huuccidhu. 15Hakkunni gedensaanni Yoonaasi fushshite baaru giddo tuggu. Dambaluno hakkawoyintenni sammi yii. 16Markaawete giddo noo manni Kaaliiqa lowo geeshsha waajjino daafira kakkalo shiqishi'ri; xanono xa'ni.
17Kaaliiqi, mittu jawu qulxu'michi Yoonaasi egemmanno gede hajaji; Yoonaasino qulxu'michu godowi giddo 3 barranna 3 hashsha keeshshi.
Currently Selected:
YOONAASI 1: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
