KALAQAMA 42

YOOSEEFI RODUUWI GIDE HIDHITARA GIBITSE HADHU

1Yaiqoobi Gibitsete gidu noota macciishshe oososi, «Mayira mimmito'ne calla la'inanni? 2Gibitsete gidu noota macciishshoommona, hude shitannonkekki gede hakkiinni gide hirtine abbenke» yiinsa. 3Kunnira tonnu Yooseefi roduuwi gide hidhitara Gibitse hadhu. 4Yaiqoobi, «Miteekke mite gawajjo iillitannosi» yee waajjinohura, Yooseefi amaha Biiniyaami kayinni roduuwisi ledo disoyino. 5Kana"aani gobbara hude batidhino daafira, Yaiqoobi oosono wolu manni gede gide hidhitara Gibitse hadhu.

6Hatte yannara Yooseefi gobba gashshe no; gobba baalatenni daanno mannira gide hirannohuno isooti. Yooseefi roduuwino hakkiira iillite uminsanni baatto kissanni iso keere haadhusi. 7Yooseefino roduuwasi lae ewelummansa bade afi; ikkollana, alba ho'le kaajjadu qaalinni coyi'ranninsa, «Ki'ne hiikkiinni dagginoonnireeti?» yee xa'minsa.

Insano, «Kana"aani gobbanni gide hidhinammora dangoommoreeti» yitu.

8Yooseefi roduuwasi ikkitinota afirono, insa kayinni rodoonsa ikkinota badde diaffino. 9Yooseefi insa afita insa daafira haaqii'rino haaqee qulli yiteennasi, «Ki'ne dooyyaanote; gobbankera mayi fooqinoro la'ine hadhinara dagginoonnireeti» yiinsa.

10Insa kayinni, «Mootichanke, ninke hattoore di"ikkinoommo; ninke soqqamaanokki gide hidhinammoralla dangoommo. 11Ninke baalunku mittu manchi oosooti; huluullammannire diafi'noommo; dooyyineemmoreno di"ikkinoommo» yitusi.

12Isi qole, «Dee'ni! Gobbankera mayi fooqinoro la'inaralla dagginoonni» yiinsa.

13Insano, «Ninke soqqamaanokki tonaa lamu roduuwi Kana"aani gobbara mittu manchi oosooti; maa'ninke anninke ledo no; mittu kayinni baino» yitu.

14Yooseefino, «Yuummo'nente gede ki'ne dooyyaanote. 15Halaalaasine ikkitinoonnita afeemmo gede, hadhine maa'ne rodoo'ne haadhine abbe; hakkunni ka'a kayinni Feriooni halaali afanna kawiinni milli diyitinanni. 16Coyidhinoonniri halaalehoro anfannina, ki'ne giddonni mitto sokkine rodoo'ne abbisiisse; gattinoonniri kayinni usurantine agarre. Hakkunni ka'a kayinni Feriooni halaali afanna ki'ne dooyyaanote» yiinsa. 17Insano sase barra usuru mine keeshshiishi.

18Sayikki barra Yooseefi, «Ani Magano waajjeemmohona, gattinanni gede ani yeemmo'neta asse. 19Coyi'ne addahoro ki'ne giddonni mittu rodii'ne konniicho usurame agarona, gattinoonniri hadhine gide hudi'rinohura mini'ne mannira massidhe. 20Coyi'ne ammanameenna reyotenni gattinanni gede, maa'ne rodoo'ne haadhine amme» yiinsa. Insano yiinota sumuu yitu. 21Qolteno mimmitinsara, «Ninkera eegamanna lubbosi qarrantanna la'nanni hee'nenni macciishsha gimbe, halaalintanni rodiinke aana sao assinoommo; kuni qarri amadinonkehu iseraati» yitu.

22Roobeeli qole, «Beettu aana sao assitinoonte diyoommo'ne? Ani yoommota ki'ne kayinni dimacciishshitinoonni. Kuneeti xa mundeesi hassanni noonke» yiinsa. 23Wolu tiranna hasaawisinonsa daafira, Yooseefi qaalensa egenninoha dilawinonsa. 24Isino albinsanni shawwu yee wi'li. Galfatihu gedensaanni galagale hige coyishshiishinsa. Simiooni ku'uriwiinni bade insa la'anna usuri.

YOOSEEFI RODUUWI KANA"AANI HIGGU

25Yooseefi ogorransara gide wonshine, mittu mittunku birra uminsa ogorira qolle worranni gedenna doogote ikkanno sinqe uyinanninsa gede hajaji. Insano yiino gede assineennansa, 26gide harrensara hogophite hadhu.

27Insa giddonni mittu galtinowa harrichoho itannore aara ogorosi fananno woyite afooho noo birra afi. 28Roduuwisira, «Birri'ya galagale higino; isino kune ogori'yara no» yiinsa. Wodaninsa maseenna, huxidhanni insa insanaawa, «Maganu togo mayira assinke?» yitu.

29Anninsa Yaiqoobiwa Kana"aani gobba iillite, iillinonsa coye baalanka kultusi. 30«Gobba gashshino manchi kaajjado coye coyi're, gobba dooyyinammora marroommore asse kiirinonke. 31Ninkeno, ‹Ninke huluullammannire diafi'noommo; dooyyaanono di"ikkinoommo. 32Ninke anninke ooso tonaa lame roduuwaati; mittu albaanni baino; maa'nu Kana"aani gobbara xa anninke ledo no› yinoommo. 33Manchuno, ‹Coyi'ne addahoro afeemmona, mitto rodoo'ne anewa agurtine, hudi'rinohura mini'ne mannira gide haadhine hadhe. 34Dagginanni woyite maa'ne rodoo'neno haadhine amme; halaalaasine ikka'ne hakkawoyite afeemmo; konne nooha rodoo'neno qoleemmo'ne; ki'neno gobbankera dadda'litinanni hee'ra dandiitinanni› yiinonke» yite kultusi.

35Hakkunni gedensaanni ogorransa fantanno woyite, mittu mittunku ogori giddo birrinsa gurdame nooha affu; insano anninsano gurdame noo birra la'e waajjitu. 36Anninsa Yaiqoobino, «Ilaweelo assitine gatissinie; Yooseefi dino; Simioonino dino; Biiniyaamino anewiinni haadhine hadhinaraati; kuni manchiti baalu anella amadanno» yiinsa.

37Roobeeli annisira, «Biiniyaami qole atewa abba hoogummoro, lamenta labballi ooso'ya shii; galagalche haa're abbeemmona, Biiniyaami aneralla uyi» yii.

38Yaiqoobino, «Beetti'ya ate ledo diha'ranno; amasi beetti rodiisi reenna isi callu gatino; doogote aana miteekke mite gawajjo iillitusiro, manchitunni kainohunni rahe geedhe waamma e"eemmo gede assitinaeraati» yii.

Currently Selected:

KALAQAMA 42: QulMax

Highlight

Copy