FULO 34

LAYINKIMEESHSHO SEEKKINOONNITA BOCAME KINNA

1Kaaliiqi Musera, «Hiiqqite hunittori aana noo hajajo borreesseemmona, 2 bocame kinna albiri gede assite seekki. 2Qixxaabbe galte, soodo guto ane ledo xaadate Siina Ilaali birxe fuli. 3Ledokki mittuno dayonke; mittuno ilaalu aana leelloonke; mitte saadano hayisso ittara ilaalu hundira shiqqoonke» yiisi. 4Museno albiri gede asse 2 bocame kinna seekki; soodimaroho gute Kaaliiqi yiisinte gede lamenta bocame kinna haa're Siina Ilaala fuli.

5Kaaliiqi gomichu giddoonni hige dirre hakko isi ledo uurre, ani Kaaliiqaati#34:5 ani Kaaliiqaati yaannohura Ful 3:14 lai. yee qullaawa su'masi kulisi. 6Kaaliiqi albasiinni hige sa"anni Musera, «Ani Kaaliiqi maareemmohonna hanqoho muddameemmokkiho; mararaancho Maganooti; ammanama'yanna bagamannokkihu baxilli'ya bati'raho. 7Bagamannokkihu baxilli'ya kumunni kiirranni ilamara iillanno; sao, sarxonna cubbo agureemmo; ikkirono, sao assinoha horonta dikeereenseemmo; annuwate cubbira ooso sasenna shoole ilama geeshsha qorichisheemmo Maganooti» yee kulisi.

8Museno rahe umosi heeshshi asse Kaaliiqira kumbuuli, 9«Mooticha'ya ballo, baxattoeha ikkiro, kuni manni mokkookka ikkirono, ledonke fulatto gede huucci'reemmohe; cubbonkenna saonke agurte mannakki assi'rinke» yii.

GONDOORU HAAROO'MA

(Ful 23:14-19; Mar 7:1-5; 16:1-17)

10Kaaliiqi Musera, «Kuneeti ani ki'ne ledo gondooro e"eemmo; manni'ne baalu albaanni, baattote aana noo manni mereero anfe egenninoonnikki maalale asseemmo; ani mulekki asseemmo coyi waajjishannohona, kuni ledo nootto mannino dhagge'ya la"anno. 11Techo barrinni hajajeemmohe hajajo agadhi; anino Amooraawoota, Kana"aanoota, Hitoota, Ferizoota, Hiwootanna, Iyaabuusoota albi'nenni shorreemmo. 12Woshshaadote giddora eessanno'nena, martinanni gobba manni ledo namoontinoonte. 13Kakkalote darguwansa hiiqqaqqe; magansidhanno sooddiyye cancanne; Asheera yinanni maganota kakkalote mokkollo murmurre. 14Ani Kaaliiqi hinaasaancho Maganootina, wole magano magansidhinoonte. 15Magannansa ledo foortanno woyitenna kakkalo shiqishidhanno woyite ki'neno woshshite kakkalote sagale itissanno'nena, hatte gobba manni ledo namoontinoonte. 16Ooso'nera insa seenne haadhiniro, kaphunnita magannansa magansidhanno gede asseenna, anera ammanantannokkire ikkitanno. 17Magansi'rate yitine siwiila daashshitine misilla seekkidhinoonte.

18«Timu Ayyaana ayirrisse; Gibitsetenni fushshoommo'ne barra ikkino daafira, hajajoommo'ne garinni Abiibi aganira 7 barra shiishinokki tima itte. 19Umo ilamino beettinna umo qalantino saada baala anete. 20Umo qalamino harricho ge'rechu wilii'lichinni woxxe; woxxa hoogginiro kayinni haxo hiiqqe. Labballi ooso'ne baala woxxe. Ane albira ayino mulla anganni shiqoonke.

21«Lee barra loosidhe; lamalki barra kayinni fooliishshidhe; wixi'nanninna mixxinanni yannara nafa lamalki barra fooliishshidhe. 22Umi qamade gamba assidhinanni yannara, Gide Gamba Assi'rate Ayyaana ayirrisse; diru goofimarchira laalo gudhitinanni yannano ayirrisse. 23Labbaahu baalu ane Israeelete Magano Kaaliiqa magansi'rate dirunni 3 hige shiqona. 24Daga albi'nenni hooleemmo; gobba'neno halashsheemmo; dirunni 3 higgine ane Magani'ne Kaaliiqi albira shiqqinanni yannara, baatto'ne ayino diyoranno.

25«Saada kakkaltinanni yannara, shiishshino sagale ledo shiqishshinoonte; Mararrote Ayyaanira gorrinoonni saada maala soodora gashshitinoonte. 26Baatto'ne laalcho umiha ane Magani'ne Kaaliiqi minira abbe. Wilii'licho amate adonni gaffinoonte» yiisi.

27Kaaliiqi lede Musera, «Atenna Israeelete ledo gondooro e"eemmohu kunni garinniitina, kulummohere baala borreessi» yiisi. 28Hakkiicho Muse itikkinninna agikkinni Kaaliiqi ledo 40 barranna 40 hashsha keeshshi. Tonnenta gondooru hajajono bocame kinna aana borreessi.

MUSE SIINA ILAALI AANINNI DIRRI

29Muse Siina Ilaalinni dirri yannara, tonnenta hajajo borreessinoonniti lamenti bocame kinna angasi no; Kaaliiqi ledo hasaawanni keeshshino daafira, dirri woyite albisi xawanni no; isi kayinni xawanni noota diafino. 30Aarooninna Israeelete manni baalu Muse la"anno woyite albisi xawanni noo daafira, mulisira shiqqi yaa waajji. 31Muse kayinni woshsheennansa, Aarooninna gosate roorrooti baalu isiwa daggu; isino hasaawisinsa. 32Hakkunni gedensaanni Israeelete manni baalu shiqeenna, Kaaliiqi Siina Ilaalira uyinosi hajajo baala kulinsa. 33Muse insa ledo hasaawa gudihu gedensaanni albasi diphi. 34Kaaliiqi ledo hasaawara Dukkanu giddora eanno yanna baalantera guggu'linoricho aaninni hoo'lanno; hakkiinni fulanno woyite, Kaaliiqi hajajinosire baala Israeelete mannira kulanno. 35Israeelete manni xawinoha Muse alba la"anno; isi qole Kaaliiqi ledo hasaawara ha'ra geeshsha albasi diphanno.

Currently Selected:

FULO 34: QulMax

Highlight

Copy