FULO 27

KAKKALOTE UDUUNNICHO

(Ful 38:1-7)

1«Seendille 5 cigile, godowa 5 cigilenna hojja 3 cigile ikkannoha kakkallanni darga waaccote haqqinni seekki. 2Shoolente maddera umoho buudda wori; buuddano kakkallanni dargi ledo mitteenni seekkite aanaho camo xalli. 3Buluulo worranni midaanna, buluulo fushshinanniricho, kerra, qarabbanna giira worranni bacceno qixxeessi; baalanka uduunne camotenni seekki. 4Buluulo sayisannoha meemmaamo uduunnicho camotenni seekki; hakko uduunnichira shoolente maddera camote kasa wori. 5Buluulo sayisanno uduunnicho kakkalote uduunnichira mereeroho goorosira woroonni qolte wori. 6Kakkalote uduunnicho dunkanni dawaayye waaccotenni seekkite aanaho camo xalli. 7Kakkalote uduunnicho dunkanni yannara, dawaayyu lamenka widoonni hee'ranno gede, kassate giddoonni qolte sayisi. 8Ilaalu aana leellishummohente gede, kakkalote uduunnicho seekkite giddoyido fano assi.

DUKKANU NAFARA

(Ful 38:9-20)

9«Dukkanaho nafaru hee'rona; wodiidi widoonni mittu ragira fila shalonni seekkinoonnita seendille 100 cigile ikkitanno dukko wori; 10camotenni seekkinoonniti 20 tuuqqanna 20 lekkuwa heedhosina; tuuqqate dereersuwanna farquwa birrunni seekkinona. 11Aliyye widoonnino hatto assi. 12Galchimi widoonni seendille 50 cigile ikkitanno dukkuwara, 10 tuuqqanna 10 lekkuwa heedhonsana. 13Nafaru soojjaati ragaanni godowa 25 qaafo ikkona. 14E'nanniwa mitto widoonni noo dukkuwa godowa 15 cigile assineenna, 3 tuuqqanna 3 lekkuwa heedhonsana. 15Wole widoonni noo dukkuwano godowa 15 cigile assineenna, 3 tuuqqanna 3 lekkuwa heedhonsana. 16Nafaru waalchirano bule, xiillittenna duume fila shalonni seesiinse seekkinoonniti 20 cigile dukko heedhosina; dukkoteno, 4 lekka afidhinoti 4 tuuqqa heedhosena. 17Nafaru qooxeessira noo tuuqqa baalantera birru dereersuwa, birru farquwanna camote lekkuwa heedhonsana. 18Nafaru hojja 50 qaafo, godowa 25 qaafo ikkona; dukkote hojja 5 cigile ikkitona; tini dukkono fila shalonni seekkinoonnitanna lekkuwaseno camonnita ikkitona. 19Dukkanu giddo noo uduunni baalu, dukkanunnitinna nafari ciffa baala camotenni seekkinoonnita ikkitona.

CAABBICHO XAWINSANNI GARA

20«Caabbichu wo'manka woyite xawanno gede huuncine ximbiimboonnita ejersu zayite haa're abbanno gede Israeelete mannira kuli. 21Xaadu Dukkanira Gondooru Taabooti albaanni noo dukkora gobbaanni Aarooninna oososi caabbicho hawarrinni kayise sooda geeshsha ane albaanni xawanno gede assitona; Israeelete mannirano ilamate ilama geeshsha woga ikkonsana.

Currently Selected:

FULO 27: QulMax

Highlight

Copy