FULO 13

KAALIIQI ISRAEELE UMIHA BAALANKA ISIRA UYITANNOSI GEDE HAJAJI

1Kaaliiqi Muse, 2«Israeelete manni giddonni umo ilaminohunna saadate giddonnino umo qalaminohu baalu aneha ikkanno gede badie» yiisi.

TIMU AYYAANA AYIRRISATE UYINOONNI SEERA

3Muse mannaho, «Kaaliiqi wolqasinni Gibitsete gobbanni borojjimmatenni gatise fushshino'ne barri konneetina habbinoonte. Kunni barrinni shiishino tima ittinoote. 4Ki'ne kunni barrinni diroho umi agani Abiibi yinannihunni Gibitse agurtine fultinanni heedhinoonni. 5Kana"aanootunnita, Hitootunnita, Amooraawootunnita, Hiwootunnitanna, Iyaabuusootu baatto ragisiisanno'ne gede Kaaliiqi akaakka'nera xaarino; tenne malawunna ado wo'mitino baatto haa're massanno'ne yannara, diru dirunkunni umi aganira konne ayyaana ayirrissinanni. 6Lamala barra wo'ma shiishinokki tima ittinanni; lamalki barra Kaaliiqi ayyaana ayirrissinanni. 7Lamalu barri geeshsha shiishino tima kisidhinoonte; shiishshino sagaleno gobba'nera heedhoonke. 8Ayyaana ayirrissinanni yanna baalantera, togo assitinannihu Kaaliiqi Gibitsetenni fultini waro assino'ne danchumma qaagate ikkinota ooso'nera kullensa. 9Kuni ayyaanino, anga'nera usudhitinoonnihunna albi'nera wodhitinoonni malaati gede ikko'ne; Kaaliiqi Gibitsete gobbanni jawa wolqasinni fushshino'ne daafira, seerisi wo'manka woyite afii'nenni fafikkinni marro higgine buuxxinanni gede qaagiissanno'ne. 10Kunni daafira, diru dirunkunni tenne yannara konne ayyaana ayirrisse.»

UMO ILAMINOHUNNA UMO QALAMINOHU KAALIIQIHO

11«Kaaliiqi ki'neranna annuwa'nera uyino'ne hexxo garinni Kana"aanootu gobba haa're masse, baattonsa ragisiisanno'ne yannara, 12bayira beetto Kaaliiqira uyitinanni; saada'neti umi qallono Kaaliiqita ikkitanno. 13Harrete qallo ikkituro, gocunni woxxitinanni; woxxitinannikkiha ikkiro kayinni haxo hiiqqe. Labbaaha bayira beetto baala woxxe. 14Kunni ka'a ooso'ne, ‹Konne mayira assinanni?› yite xa'mitu'nero, ‹Gibitsete gobbara borojjimmatenni hee'neemmore Kaaliiqi jawa wolqasinni fushshinonke. 15Gibitsete moote wodanasi dilleesse agura giwinke yannara, Kaaliiqi Gibitsennita umi ilanna umi qallo baala shee gudino; umi qallo kakkalleemmohu kunniraati; bayirraadda labballi oosonke kayinni woxxineemmo. 16Tini wogano angankera usudhinoommohunna albinkera wodhinoommo malaati gede qaagiissitannonke; Kaaliiqi jawaata angasinni Gibitsete gobbanni fushshinonketa qaagiissitannonke› yitine kullensa» yii.

GOMICHUNNITANNA GIIRATE HEELLIICHO

17Gibitsete moote Israeele hadhara aguri yannara, Filisxeemete gobba widoonni hige ha'ra mulimma roorte heedheennanni, hakkaanni higge hadhanno gede diassinonsa. Hakkaanni higge hadhannokki gede hoolinonsahu, albaanni noo diininni xaadduro waajjite galagalte Gibitse higganno yeeti. 18Kunni daafira, Duumu Baari widoonni halallitte gobba giddoonni qole haa're ha'rinsa; Israeeleno olaho qixxaawinohu gede ikkite Gibitsetenni fultu.

19Israeele Yooseefi miqqa agurte hadhannokki gede xaartino garinni, Muse Yooseefi miqqa haa're ha'ri. Togo assinohu Yooseefi, «Kaaliiqi gatise fushshanno'ne waro miqqa'ya tenne gobbanni haadhine fushshe» yiino daafiraati.

20Israeele Sukootinni ka'e halalli qaccera Etaami yinanniwa marte baxxisidhu. 21Hashshanna barra hadhanno gede, Kaaliiqi barra gumichu heelliichonni, hashsha giirate heelliichonni massaginsa. 22Kunni garinni gomichu heelliicho barra, giirate heelliicho hashsha wo'manka woyite albansaanni hadhu.

Currently Selected:

FULO 13: QulMax

Highlight

Copy