QOLASIYAASI SOKKA 2

1Ki'neranna Lodooqiyaho hee'ranno mannira, hattono ane afe egenninokki manni baalaho mageeshshi geeshsha sharrameemmoro affinara baxeemmo. 2Sharrameemmohuno wodaninsa diggi yaaranna baxillunni usurante, wo'ma wodancha afi'ratenni Maganu daho ikkinoha Kiristoosa affanno gedeeti. 3Hayyotenna egennote jiro dahaabbe noohu Kiristoosiwaati.

4Togo yeemmohu ayino awaawurshunni doganno'nekki gede hasi'reeti. 5Ki'newiinni fafe hee'rummoro nafa, Qullaawu Ayyaaninni ledo'ne noommo. Dancha amanyoote'nenna Kiristoosira noo'neta jawaata ammana'ne lae hagiidhoommo.

KIRISTOOSINNI AFI'NANNITA WO'MA HEESHSHO

6Xa kayinni Mooticha Yesuusa Kiristoosa amma'nitinoonni garinni isinni heedhe. 7Isi aana rumuxxitine uurritine, rossinoonni garinni ammanatenni kaajje. Galati'neno hala'lo.

8Kiristoosi aana ikkikkinni, mannu kalaqino budinna haafu woga gobbannite aana rumuxxitinotenni mannu hayyonninna awaawurshunni ayino woshshaadanno'nekki gede agadhe. 9Maganimmate wo'milli baalu Kiristoosi manninati giddo leelle hee'ranno. 10Ki'neno gashshatenna roorrete umo ikkinohu Kiristoosi widoonni wo'mille afidhinoonni.

11Iso amma'na'nenni barcimtinoonni, tini barcima'ne cubbaataame mannimma'ne suude hunatenni Kiristoosinni assinoreeti ikkinnina mannu assinore di"ikkino. 12Cuuantini yannara Kiristoosi ledo waamantinoonni; isi ledo reyotennino ka'inoonni; reyotenni ka'inoonnihu Kiristoosa reyotenni kayisi Magani wolqa ammana'nenniiti.

13Cubbi'nenninna cubbaataame mannimma'ne barcima hoogatenni kainohunni reyitinoonnireeti. Xa kayinni Maganu Kiristoosi ledo heeshshonnire assino'ne. Sao'ne baalano agurino'ne. 14Qoxxissannonketanna gibbannonketa, seeru giddo noota asalu borro hunino. Masiqalu aana ladde ninke aaninni hoolino. 15Wolqaataammanna roorroota masiqalu wolqanni qeele qodhonsa tirihu gedensaanni, qafadante reqecci yite leeltanno gede assino.

16Kunni ka'a itunni woy agunni, ayyaanna woy aganu fulanno ayyaana woy Fooliishshote Barra ayirrisate daafira ayino bushiishoonke'ne. 17Kuri baalu albillittete daara noo coyira caalu gedeeti. Halaalu leellannohu kayinni Kiristoosinniiti. 18Dogate joongillinninna sokkaasine magansi'ratenni adawadhannohu ayino mullawa gatisanno'nekki gede qorophe. Hattoo manchi, la"anno ajuujanni isonoo seekki'ranni kaphu hedo umisitenni naaxxanno. 19Tenne assanno manchira umo ikkinohu Kiristoosi ledo mittu xaadooshshino dinosi. Mannimma baala xaadise diimmichunni gamba asse amadisiise, maddarannohu umoho. Maganu mannimma baalate wo'ma lopho aannohu kunni garinniiti.

SO'RISIISANNO ROSO QOROPHE

20Kiristoosi ledo reyitine tenne gobbara gallanni gari seera wonshatewiinni baxxitinoonnire ikkitinina, xa gobbate seerinni baxxitinokkiri gede ikkitine tenne labbanno hajajora mayira gashshantinanniyya? 21Hajajo, «Amaddooti, qammassooti, kissooti» yitannote. 22Kuri baalu mannu kalaqino hajajonna rosi aana xintaminore ikkino daafira, loosu aana hosihu gedensaanni ba"annoreeti. 23Mannu hedonni kalaqantino magansi'ranninna dogate joongillinni, mannimma qarrisa egenno labbanno. Mannimma qawaaxxidhannokki gede maalu halcho hoola kayinni mittoreno dikaa'litanno.

Currently Selected:

QOLASIYAASI SOKKA 2: QulMax

Highlight

Copy