LAYINKI QORONTOOSI 6
6
1Maganu ledo mitteenni loonsanni hee'neenna, adhitinoonni elto mullawa huntinannikki gede huucci'neemmo'ne. 2Maganu,
«Injiitino yannara macciishshoommohe;
gatote barrano kaa'loommohe»
yaanno daafira, kuneeti injiitino yanna xaati; gatote barrino techooti.#Isa 49:8 lai. 3Soqqanshonke mishantannokki gede ayerano guficho di"ikkineemmo. 4Qarra, mitiimmanna shetto cincinanni baalunku raginni Maganu soqqamaano ikkanke leellinsheemmo. 5Ganamatenni, usurunni, wodahamatenni, loosu daafurinni, goxano hoogatenni, hudetenni; 6fayyaaleessimmatenni, buuxatenni, cincatenni, shooshanqetenni, Qullaawu Ayyaani hoode ha'ratenninna doga nookki baxillinni; 7halaalaanchu qaalinni, Maganu wolqanni, gura qiniitira ikkannoha keeraanchimmate bagado amaxxatenni; 8ayirrinyunnino shollinyunnino, danchu su'minnino bushu su'minnino ninkenee qixxeessineemmo. So'risiisaanote yininkerono, ninke halaalanyootaho. 9Afinonsahu dino yininkerono, egennammoommoreeti; reyinoommoha lambanni hee'nenni, kuneeti lubbote hee'noommo. Gawajjammummorono direyineemmo. 10Dadillu amadinkerono, wo'manka woyite hagiirraammaho. Buxane ikkine hee'nenni, lowo manna duroonsineemmo. Noonkerino hoogiro, baalunkuri ninkeho.
11Ki'ne Qorontoosi manna, ninke ki'nera afoonke fanne coyi'neemmo; wodaninkeno hala'le no. 12Ninke ki'nera alba diho'linoommo'ne; ki'ne kayinni giddo ruukkitinoonni. 13Ooso'ya ikkitinoonni daafira yeemmo'nena, ki'neno wodana hala'le.
AMMANTINOKKIRI LEDO MAXXAGANTINOONTE
14Ammantinokkiri ledo maxxagantinoonte. Keeraanchimmanna bunshe mittimma afidhinoni? Xawaabbahonna tunsichoho mayi xaadi no? 15Kiristoosiranna Belihoorira mayi namoomi no? Woy ammaninohuranna ammaninokkihura mayi guti no? 16Maganunnihu Qullaawu Mini kaphu magani ledo mayi lase afi'rino? Ninke heeshshote Magani hee'ranno Mine Qullaawaho. Maganuno,
«Insa giddo hee'reemmo;
mereeronsa ha'rameemmo.
Ani Maganonsa ikkeemmo;
insano gosa'ya ikkitanno» yiino.
17Kunnira Mootichu,
«Giddonsanni fultine,
baxxitinoonnire ikke.
Batte ikkinoricho kissinoonte;
anino haa'reemmo'ne.#Isa 52:11 lai.
18Ani anna ikkeemmo'ne;
ki'neno anera meyaanna labbaa ooso ikkitinannie» yiino.
Wo'manka Dandaanno Mootichi hatto yiino.#2Sam 7:14; 1Dud 17:13; Isa 43:6; Erm 31:9 lai.
Currently Selected:
LAYINKI QORONTOOSI 6: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
