LAYINKI QORONTOOSI 11

PHAAWULOOSINNA KAPHAANO SOQQAMAASINE

1Shiima gowwimma'ya cincitinannie yee hexxeemmo. Eeggatena cince"e! 2Mitte seemo beetto seemimmasenni adhannohura huuccinanninte gede, anino ki'ne Kiristoosira huuccoommo'ne daafira, ki'nera ayyaanaame laala nooe. 3Hamashshu Heewani xagare so'risiisinte gede, miteekkite ki'ne hedono ba'eenna Kiristoosira noo'neta taalonna xalala ammanama'ne agurtinanni yee waajjeemmo. 4Mittu manchi ki'newa daye, ninke kulloommo'neha agure wole Yesuusa kuli'nero, woy adhitinoonni Ayyaana agurtine wole adhitiniro, woy adhitinoonniha Dancha Duduwo agurtine wole adhitiniro, sammi yitine qeelantinoonni yaate. 5Ani kayinni hakkuri bayirraaddu soqqamaasinenni mitturinnino xeoommoha dilawannoe. 6Coyi hayyora fullahoommoha ikka hoogummoro nafa, egenno dixe'inoe. Konne coye batinye hinge addi addi doogonni xawinse kulloommo'ne.

7Ani Maganunniha Dancha Duduwo woxe baantiekkinni calla kula'yanna ki'ne gotti assate anenee shollisha'ya miteekkite cubbu gede kiirantue ikka? 8Ki'nera soqqamammora yee wole beetekiristaannawiinni kaa'lo adhanni insa buujjoommo. 9Ki'ne ledo hee'reenna qarru iillie yannara Meqedooniyunni daggino roduuwi hasiisannoere baala uyitinoe daafira ayerano duha di"ikkoommo. Xaa geeshsha ki'nerano mitturinnino duha di"ikkoommo'ne. Albillitteno duha di"ikkeemmo'ne. 10Kiristoosi halaali ane giddo noo daafira, adawadheemmokki gede assannoehu Akayaho ayino dino. 11Hatto yeemmohu baxeemmo'nekkihuraatini? Baxeemmo'neta Maganunku afino.

12Hakkuri wolootu soqqamaasine, «Ninkeno insa gede loonseemmo» yitanni adawadhitannori coye hunate xa asseemmore albillitteno asseemmo. 13Hattoo manni Kiristoosi soqqamaasine lawate insanaa soorritannoreeti; kaphaasine soqqamaasineetinna awaawuraasine loosaasineeti. 14Kuni maala'linanni coye di"ikkino; Sheexaanu nafa xawaabbu sokkaasincho lawate isonoo soorranno. 15Sheexaanu soqqamaanono keeraanchimmate soqqamaano labbara insanaa soorrituro maala'linannire diafi'rino; goofimarchoho loosinsata mixxitanno.

PHAAWULOOSIRA SOQQAMAASINCHIMMASINNI IILLINOSI QARRA

16«Ayerano ani gowwoommoha lawoonkesi» yee lede coyi'reemmo. Gowwa lawummo'nero nafa shiima geeshsha naaxxeemmo gede gowwu gede assitine kiirre"e. 17Togo ikke naaxxe coyi'reemmo woyite, coyi'ranni noommohu Mootichu hedo garinni ikkikkinni gowwu gede ikkeeti. 18Lowo manni maalu coyinni naaxxanno daafira anino naaxxeemmo. 19Ki'ne wodanaamma ikkitinoonnihura gowwoota hagiirrunni dandiitinanninsa. 20Hattonni ayino borojje assi'ri'nero, ayino miici'nero, ayino mogi'nero, ayino malxifati'nero, ayino baqqaalla qawaadi'nero cincitinanni. 21Saalsiisanno coye ikkiro nafa, konne coye assate wolqa afi'noommokkita egensiiseemmo'ne.

Ayino mittu coyinni adawadhannoha ikkiro kayinni anino adawadheemmo; togo yeemmohu xaano gowwu gede ikkeeti. 22Insa Ibiraawootahoni? Anino Ibiraawichaho. Insa Israeelootahoni? Anino Israeelichaho. Insa Abirihaami sirchootini? Anino Abirihaami sirchooti. 23Insa Kiristoosi soqqamaasineeti? Ani insanni roore Kiristoosi soqqamaasinchooti. Togo yeemmo woyite, macharaaraamu gede ikke coyi'ranni noommo. Insanni roore lowo yanna loosunni daafuroommo; batinye hige usuramoommo; batinye hige ganamoommo; batinye hige reyote afiinni gatoommo. 24Ayihude sajjiina honse, sajjiina honse higge lichetenni onte goowa gantinoe. 25Sase hinge siqqotenni gannoonnie. Mitte hinge kinnatenni awwaalloonnie. Sase higge markaawe hiiqqantinoe. Mitto hashshanna mitto barra baaru giddo gale hosoommo. 26Doogote xeertinyinni wayinna lolahu, hattono mulqidhannori qarrissinoe. Gosa'yanna daga bala tugginoe. Katamaho, halallitte gobbaranna baaru aana qarru iillinoe. Kaphaasine ammanaanono bala tugginoe. 27Lowo loosinna daafuru amadinoe; batinye hige goxicho hoogoommo. Hudenna goo'ro shetissinoe. Batinye hige qatumoommo; qiidunna kallimma amaddinoe. 28Wole coye baala kiirummokkinni, barru barrunkunni beetekiristaannate daafira yaadanni lowo geeshsha dadilloommo. 29Mitu daafureenna anino ledosi daafuroommokki woyiti nooni? Mitu cubboho uweenna ani giiramoommokki yanna nooni?

30Naaxxa hasiissoommero, ani naaxxeemmohu wolqiweelle'ya leellishanno coyinniiti. 31Hegere geeshsha maassaminohu Mootichinke Yesuusi Kiristoosi Anni Maganu kapheemmokkita egennino. 32Demaasiqote Katamira noommo waro, moote Aretaasira woroonni noo gashshaanchi amadaera hasi're, katamu waalchuwa agaraasine wore agarsiisino. 33Mannu kayinni gimboolaho wore huxxu masikoote giddoonni qole dirriseennae angasinni gate fuloommo.

Currently Selected:

LAYINKI QORONTOOSI 11: QulMax

Highlight

Copy