እን 2
2
እግዘር የእንባቆ የዠረለ መልስ
1ቀራተነ ቢቅየወ መደር ተጨራ ይቅየኸማ ስርም ደን ታናርጥ እግዘር ይብሬ ቃርም የምጥጥመና ይዠፕኒ መልስ ኧቅየቴ።
2እግዘርም «አትየሽኸ እራይ ጣፍ፤ ቲያረ ቤያጀግሬ ይትየኸማ ጣን። 3ትንቢትታ ይኸርወ ግዝየ አንሰና፤ የኽርምታነ ትንቢትታ ይኸርወ ግዝየ ይሰራቴ፤ ኦጀ ኺተ ኤቄ፤ ያቴር ቃር ቢመስርም ኤያቴር፤ ውረም ይቸን የኸሬ በፍረኾት ቈየን፤ 4የትንቢት ቃር ‹ነታ ይረዝን አል የምበሮት ተስፋ ኤነን፤ ቅዱስ ሰብ ጭን በመሮተታ ኧያም ኸረም ይረብር› ይብርቃሩ» ቲብር ዠፐረኒም።
የጥጥ ሰብ ውጣ
5የዱንያ ወብዛ ሰብ ያታልል፤ የዱንያ ዘግዘግ ይብሮ ሰብ ትቢተነሎ፤ ባትመደር አተቦ ኤቾኖ፤ ሞትም ገማም ወጣኒም ኤብሮም ኸማ ኽኖም ይጣኒሸ ቤተቦ ኤሮ፤ የመንግስት ይወጎም ሰብም ይማንኾ በዝኽ የቸነው። 6የትማነኾ ሰብ የማነኾዮ ኽኖ ይቀርጦ፤ ዝክም ይብሮዮቴ፤ «አንጥኹ ዱንያ ትስበስቦ፤ ከስ ያነቦ ሰብ ዋጋ በግፍ በንጥቆት ደንገነ ትኸሮ እንማኹ ግርዳኹ! ዝኽ እንም ታመሮ መቸ ስኑ?»
7አኹ ከስ ነረብኹ፥ ባኹም ትታጨንቆዮ የረፐሮ ሰብ ጠነቃር ተሸተቦ ከስ ያነብኹ አኹትንኹ በበሮት ትከሶኸማ ያመሮኩቴ፤ ዱንያኹ እንም ይትራቶኩቴ። 8አኹ የብዘ ሰብ ዱንያ ተራታም ባነ፤ ተሞት የተነፎ ኽኖ ጭን ያኹም ባጋና ይትራቶኩቴ፤ አኹ የብዘ ሰብ ደም ዀኹም፤ ባለም እንም ባነቦ ከተማ ቢረብሮ ሰብ ግፍ ቾትኹም!
9በግፍ በትሰበሰበ ዱንያ ቤታኹ የሜናኹ፥ አደጋም ኤሰራብኹ ኸማ ትረብሮ ቤት በከፍተነ ቈቶ ያረሸኹ ግርዳኹ! 10ብዘ ሰብ በተንኮል ባጥፎታኹ የገዛ አበሩሳኹ ይትዋለዶኸማ ኤፐኹም፤ በገግማኹ ጥጥ አቸነኹም። 11ብምር የሸኰቾዮ ግምብ ቴተርፍ በአኹ ይምሰክሮብኩ፤ የርዮ ኧጨም ዝኸታ ዩዶ።
12ከተማ በግፍ ትቾቶም የሰብ ደም ዀኹም ቤት ታረሶ ሰብ ግርዳኹ 13የኸልቅ እንም ታ እግዘር ዝኸታ ያሜዬ አንጠወም፤ የኽየኸሬ ሰብ ይቾተዊ እንም ብሳት ያርቅቴ፤ የመንግስትም ጭነር እንም በብላሽ ኸረም ይቄቴ? 14ባር ብኻ ይሜና ኸማ አለም እንም ይእግዘር ንቅነት ይርቴ።
15ተዋለደም የገምያምሰየታ ቲትመንጥ ታዤ፥ የሰብ ጥጥ ቃር ኸናኸወም ያሰኽር መጠጥ ታሰጭም ይሰኽር ኸማ ታሜ አኸ ግርዳኸ! 16አኸም ባጋኸ በክብር ሟሬ ውርደት ይሰራብኸቴ፤ አኸ ገግማኸ ሰጨኸም በስኽሮት ያዦርኸቴ፤ እግዘር መከራ ይሰራብኸ ኸማ ባምሮት ይቀጣኸቴ፤ ክብርማኸ ውርደት ይኸርቴ፤ 17የሊባኖስ ኧጨ ያንጥኸኸማ አኸም ትታንጥቴ፤ የድብር አዊ በግፍ ጃፐርኸኖም ባነ፤ ኧዃም በኸረ ኽኖ ያኸ ባትሽራንት ያትጨንቆከቴ፤ ዝኽ እንም ይሰራብኸ ያነ የብዘ ሰብ ደም የዀኼም ባለም እንም ባነቦ ከተማ ግፍ የቾትኼው።
18ኧጋ ቅሪነ ጥቅመታ ምቃሩ? ታ በሰብ ኧጅ የሸኰቺቃሩ፤ ኤነ ቃር ፍጥሮት ባንኸሬ ተት እንጐድ ቃር ኤረኽዊ፤ ኧጋ ት የሸከተም ሰብ አትምቃር ዘንጎት ቤዀለ በዝ ባለም ቅሪነ ወትመመር ምር ያኔው? 19ተጨ ኧርም የሸኰቺ ቃር «ቃንዣ በር» ትምርም ፈቈም የሸኰቺታ «ተሳ» ትብር አኸ ግርዳኽ፤ የኽርምታነ ቅሪነ ሽቸር የኸረ ቃር ዮዴ ይዀለዌ? ቅሪነ በብርም ቦርቅም አረጠረም የሸኰቺው፤ ኧያም የኸረ አንፏት ስርም ኤነን። 20እግዘር ቅዱስ በኸረ መቅደሰታ ነረ፤ ዝም የኸሬ ያለም ሰብ እንም ቢፍተቴ ስ የበር።
Currently Selected:
እን 2: መቅጉ
Highlight
Share
Copy
Want to have your highlights saved across all your devices? Sign up or sign in
