2ነ ቆሮ. 10

ጳውሎስ የዠረን መልስ

1እያ ጳውሎስ ባኹ ይፍቴ ታነ ይቅመጭ ቧንም፤ ታኹ ትንትቤተር ጭን ኤነጠረቅ ቧንም፤ እያም በክርስቶስ ፋራነትም ርነት ኧጨስኹ። 2ኧጨስኹም ያኽዌንየ ትንቸን ደፈርም ኧዝረኸማ ባታመሮኔው፤ የዝ አለም ሰብ አሳብኸማ ንረብነቃር ኤፐቦም ቢያዞንደ ባታት ሰብ ይፍቴ ጭን ደፈርም ኧዝረ ይኸኒ። 3ይናም በዝ አለም ብነብነም ንትዋካነ የዝ አለም ሰብ ኸማ አንኸረ። 4ይና ንትዋካኔም ግብረንዳ የዝ አለም ግብር ኸማ አንኸረ፤ ይና ግብረንዳ የሼጣን ወረ ባነሮም ይወጎዌ ይኸሎ ይእግዘር ደረግ ያነቦ ቃርሎ። 5እግዘር ባኻሮት ር ቈፋ ኸሮም ይትረሶ ሸርም ትቢትም ናጠፋነቴ፤ በሰብ ቀልብ ያነ አሳብ እንም ማነኽነም የክርስቶስ ይታዘዝ ኸማ ናሜነቴ። 6አኹ በውረም ትታዘዞ ኸማ በኻነ ጋ ሟኒም ኤታዘዝታ ንቀጣኔዬ ተረሳነም።

7አኹ ታዞ ቦጤ ቢትየ ዘንጋው፤ ሟኒም ሰብ «እያ የክርስቶስን» ባረም ቢያስብ ይናም የትም ኸማ የክርስቶስ ወኽረንዳ የኻር። 8ታ ኢየሱስ ባበንደ ዳነት ንቃር ብንትሸመርወም ኤያቅመጬ፤ ዝኽ ዳነት ያውንደ ያኹ ናትቋምኔኩዌው ባንኸሬ ንብራጭኔኩዌ አንኸረ። 9ጣፍም በራኽንኩ ደብዳቤ አሽራንፍኹ ቃር ኤምሰርኹ። 10አታተና «ጳውሎስ ጣፈም ይረኽኖ ቃር ይረዞም ትወ ዘንጋሎ፤ ቲና ጋ ቲኸር ጭን ጨነው፤ ቲዝረም ይቈርጪ» ይብሮ ይኽርሸ። 11ይና በረቌ ኸነም በጣፍኔም ታኹ ጋ በርብ ኸነም ትንቾትኔ ቃር እማትም ችርነት ኤነን ኸማ ኽኖ የኻሮ።

12ቢኸርም ገገና ቲያዞ አታት ሰብ ጋ ገገንዳ ናዝኔ ዌም ገገንዳ ናትዋናኔ አንደፍነ፤ ኽኖ ጭን ገግ ተገገና ጦም ኽኖም ተኽኖም አትዋኖም ይፈርዶ የኸሬ ይቤስሮ ሰብ አንኸሮ። 13ይና ጭን ያኹዌ ዳር ቸነነም ኑድኔኩዌ እግዘር ጣም ባበንደ ሜናንዳ ንትሸመነ ባንኸሬ ታቅም በር አንትሸመነ። 14አኹም ያነኹ በሜናንዳ ደን የኸሬ የክርስቶስ ቃር ዩድ ወኼ ወሬ ኑድኔ ያኹዌ በቸነኔ ተኽ ውጤ አምጣነ። 15ዝም የኸሬ እግዘር ይና ጣም ታበንደ መደር ወጣነም ብንጐድ ሰብ ሜና አንትሸመነ፤ ይርቅመታ አኹም ባመርኹ ትትረቆዌ ይናም ሜናንዳ እግዘር ጣም ባበንደ መደር ባኹ ግብት ይርቅ ይትረቄ ተስፋ ናሜነ። 16ኼታ ብንጐድ ሰብ የሜና መደር ገፓነም አወተርም በቾቺ ሜና ታንትሸመነ ታኹ ገን በኸች ወነም የክርስቶስ ቃር ዩድ ወኼ ወሬ ኑድኔ ይኸርንደ።

17ቢኸርም «ይትሸመር ሰብ ብእግዘር የትሸመር።» 18ሰብ ያዥዬ ይሰራ እግዘር ቲያዝኑ ባንኸሬ ገግ በገገታ ቲያዝ አንኸረ።

Currently Selected:

2ነ ቆሮ. 10: መቅጉ

Highlight

Copy