1ነ ተሰ 2
2
የጳውሎስ የናቸርነት ሜና በተሰሎንቄ
1ጐፔቸም ኧተቾ ያኹዌ ተኖተንዳ ከንቱ አነፐረ ኸማ አኹም ትሮ። 2አኹም ትሮ ኸማ የዝ ይፍቴ በፊሊጶስ ከተማ ታነነ መከራም ስዴበም ሰናብንደም ባነ፤ ቢኸርም ንቅ መራክስ ቢሰራብንደም ዳር ይእግዘር ወኼ ወሬ ኑድኔ እግዘረንዳ ድፍረት አበንደም። 3ይና ያኹ የመከኔኩ በስተት ዌም በሰነኸ ዘንጋ ተመራነም ታነ አንኸረ፤ ያኹም ናታልልኔኩዌም አንሸነ። 4ይርቅመታ እግዘር ወንጌለታ ይና ባደራ ያበንዳ ቢና ተመመረም የኸሬ ይናም የታመረ ሰብ ኸነም ንዝረነ፤ የነንዳ ቃር ይር እግዘር ይሽኔ ባነም ታነው ባንኸሬ ሰብ ይሽኔ ባነም ታነ አንኸረ። 5በቅማምሮት ዌም የዋጋ ንማጀ ንቤተንደ ዋጋ ንበራኔኩዌ ስርም አንዝረነ ኸማ አኹም ገጋኹ ትሮ፤ እግዘርም ምስክረንዳው። 6ታኹም ኸረም ትንጐድም ተሟኒም ሰብ ክብር አንሽነ። 7የክርስቶስ ናቸረነም በኸነሜ ባነንዳ ዳነት ንትጨርኔብኩዌ ይኸርንደ ባነ፤ ቢኸርም የዴንታ ትጬፕሮ አዶት ኸማ ያኹ ሜራ ኸነም። 8የኽክም ንቃር የረመድኔኩዌ ተርቅ ንማጀንዳ የቸነ ያኹ እማት ይእግዘር ወንጌል ኦዶት ቴኸር ነብሰንዳ ኒብኔኩዌ ይሽርንደ ባነ። 9ጐፔቸም ኧተቾ፥ መምር የቾትነም የጥነም ኸማ አኹም ትሮ፤ ይእግዘር ወንጌል ያኹ ትኑድነ አትማኹ ባናጀግኔ ዋናም ምሳረ በሜና ንጥነ ባነ።
10ይናም ባኹ ክርስቶስ ባመርኹ ሰብ ግብት ታነነ በቅድስናም በፅድቅም ጥየ ቃር በቶቶት አት ባጢር ኤባር የረፐነ ኸማ አኹም እግዘርም ምስክርንኹ። 11አብ የዴንታ ያሜሮም ኸማ ይናም ያኹ ያመነኔንኩ ኸማ አኹም ትሮ። 12እንም ጋ ትመኽኔኩም ትናትቋምርኔኩም ይእግዘር መንግስትም ክብርም ትትሸዶዌ የጠናናኹ እግዘር ቢሽን ኤነት ትረብሮዌ አደራ የባኔኩ ኸማ ትሮ።
13አትም ያኹ ቃር እንም ጋ ይእግዘር ሽኩር ንብኔ ቃር ነረንደ፤ ቲና የሰማኹዊ ይእግዘር ቃር በትፐርኹ ግዝየ ባኹ ክርስቶስ ባመርኹ ሰብ ይቾት ዝኽ ቃር የትፐርኹዊ የሰብ ቃርኸማ ቴኸርም ይእግዘር ቃርኸማ አመነኹም ተፐርኹም፤ ዝም ቃር ውረም ይእግዘር ቃሩ። 14ጐፔቸም ኧተቾ በይኹዳ ገነ ያነቦ በኢየሱስ ክርስቶስ ይእግዘር ቤተክርስቲያን የኸሮኽኖ መሰርኹም፤ ኽኖም በይኹዳ ሰብ መከራ የትፐሮም ኸማ አኹም በገጋኹ ገነ ሰብ መከራ ተፐርኹም። 15የይኹዳ ሰብ የታ ኢየሱስም የነቢም የቀጠሮ ይናም አሳደዶም ተገነ ያወጦንደኽኖሎ፤ ኽኖም እግዘር ያትማተቦ የሰብ እንም ይጠሮ ቃሎ። 16አረማዊ ሰብ ተባጢረና ይተርፎ ቃር ኑድኔዮዌ ዳር ይኸሮንዴ ያትባቅሮ፤ በዝ ኤነት በባጢር ር ባጢር በድብሮት ይረብሮ፤ በኽ የቸነ ይእግዘር ማት በቀጥወ ቸነቦም።
ጳውሎስ የተሰሎንቄ ሰብ ያዤ ተመኛት የረረንኸማ
17ጐፔቸም ኧተቾ የቀሪ ዳር ታኹ የትቤተኔ ያኹ ያነንደ ተመኛት ንቃር የኸሬ ተራከብነም ቤነንዳ ናዥኔኩዌ ሸነም። 18ይናም ያኹዌ ንቸኔ ኤላነም ባነ፤ እያ ጳውሎስማ ያኹዌ ኧቸኔ ብዘ ጋ ተረሳም ባነ፤ ቢኸርም ሼጣን ቈፋ ኸረብንደም። 19ኧጋ ተስፋንዳም ብንተንዳም ታንዳ ኢየሱስ ክርስቶስ ቢቸንወ ከረ ቢፍተቴ ንሟቅጥኔ የሞት አክሊለንዳ አኹ ባንኸርኹ እንጐድ ሟኑ? 20በውረም ክብረንዳም ብንትመንዳ አኹትንኹ።
Currently Selected:
1ነ ተሰ 2: መቅጉ
Highlight
Share
Copy
Want to have your highlights saved across all your devices? Sign up or sign in
