MACAAFA FAARFANNAA 59
59
Harka Diinotaa Ooluuf Waaqayyotti Boo'uu
(Geggeessituu warra faarfatootaaf; kun akka qooqa faarfannaa isa <<Hin balleessin>> jedhamuutti faarfatame; kan Daawit, isa afaan Ibrootaatti<<Mikitaam>> jedhamuu dha; faarfannaa kanas yeroo Saa'ol isa ajjeesuudhaaf namoota ergee mana isaatti isa eegsise faarfate)
1Diinota koo jalaa na baasi, yaa Waaqayyoo ko!
Iddoo warri ana irratti ka'an
ana hin qaqqabnettis na eegi;
2warra jal'ina hojjetan jalaa na baasi,
warra dhiiga namaa dhangalaasanis na oolchi!
3Ilaa isaan lubbuu koo baasuudhaaf riphanii ana eeggatu,
ani immoo namatti hin darbine
yookiis hin yakkine, yaa Waaqayyo!
Warri humna namatti argisiisan garuu
ana irratti wal ga'an.
4Ani balleessaa hin qabu,
isaan immoo anatti fiiganii dhaabannaa in tolfatu;
ka'i, anatti adeemii ana ilaalis!
5Ati yaa Waaqayyo gooftaa maccaa,
Waaqayyo isa kan Israa'el,
saba lafa irraa hundumaatti ilaaluudhaaf ka'i!
Warra amanamuu didanii
jal'ina hojjetan hundumaatti
araara hin argisiisin!
6Isaan galgala galgala deebi'anii,
akka saree gururi'aa mandaricha keessa in naanna'u.
7Kunoo, afaan isaanii keessaa dubbii hin taane in baasu,
arrabni isaaniis immoo akka billaa ti;
<<Silaa kan nu dhaga'u hin jiru>> jechuun
yaada isaanii keessa ture.
8Ati garuu yaa Waaqayyo, isaanitti in kolfita,
saba lafa irraattis in ga'ifta.
9Yaa Waaqayyo aangoo ko, ati da'oo koo waan taateef,
ani sin eeggadha*,
10Waaqayyo koo gaarummaa isaatiin gara koo in dhufa;
Waaqayyo warra na gaadan asii gad ilaale,
akka ani gammadu in godha.#9 9:9-10
11Namoonni koo akka hin irraanfannetti,
tokkichumaan isaan hin ajjeesin!
Humna keetiin isaan joorsi,
lafatti gad isaan deebisi,
yaa gooftaa, yaa gaachana keenyaa!
12Warri sun in abaaru, sobas in dubbatu;
dubbiin arraba isaanii,
cubbuu afaan isaanii keessaa ba'u waan ta'eef,
of gurguddisuu isaaniitiin haa qabaman;
13dheekkamsa keetiin badduu isaan baasi,
badduu baasi, akka isaan hin argamnes godhi!
Waaqayyo, ijoollee Yaaqoob irratti
hamma andaara lafaattis
mootii ta'uu isaa haa beekan!
14Isaan galgala galgala deebi'anii,
akka saree gururi'aa mandaricha keessa in naanna'u.
15Nyaataaf asii fi achi in jooru,
yoo quufuu dadhaban immoo of in nyaatu.
16Ani garuu waa'ee aangoo kee nan faarfadha,
gaarummaa keetiifis ganama ganama
sagalee gammachuu nan dhageessisa.
ati anaaf da'oo taateetta,
guyyaa rakkinni ana irra ga'ettis
iddoo baqannaa anaaf taateetta.
17Yaa Waaqayyo aangoo ko,
mi'a garaa garaatiin sin faarfadha,
ati da'oo koo ti,
Waaqayyo koo isa gaarummaa anatti argisiisuu dhas!
Currently Selected:
MACAAFA FAARFANNAA 59: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
