Macaafa Fakkeenyaa 21
21
Gorsi Solomoon Ittuma Fufuu Isaa
1Yaadni mootii harka Waaqayyoo keessa jira,
inni akka bishaaniitti
gara jaallateetti isa in deebisa.
2Namatti karaan ofii isaa hundinuu
qajeelaa in fakkaata,
Waaqayyo garuu yaada isaa in miijana*.
3Wanta qajeelaa fi
wanta dhugaa hojjechuun,
aarsaa caalaatti Waaqayyo biratti fudhatamaa dha*.
4Waan guddaatti of ilaaluun,
of bokoksuun,
wanti jal'oonni hojjetan hundinuus cubbuu dha.#2 16:2 3 1Sam 15:22; Far 51:17; Er 7:22-23; Hos 6:6
5Yaadni warra dhimmee hojjetuu bu'aa qaba,
wanti ariitiidhaan hojjetamu hundinuu
hiyyeessa nama godha.
6Qabeenyi dubbii sobaatiin walitti qabame,
akkuma hurrii tokkichumaan lafa inni bu'e dhabanii ti,
akka kiyyoo nama ajjeesuu tis;
7warri jal'oonni
wanta qajeelaa hojjechuu
waan didaniif,
humnaan nama irratti ka'uun isaanii
isaanuma in balleessa.
8Karaan nama balleessaa qabuu jajal'aa dha,
hojiin nama balleessaa hin qabne garuu qajeelaa dha.
9Haadha manaa qocoltuu wajjin
mana tokko keessa taa'uu irra,
golee bantii manaa irra taa'uu wayya*.#9 19:13
10Namni jal'aan wanta hamaa hawwa,
namaafis garaa hin laafu.
11Yommuu namni ga'isaan adabamu,
inni wallaalaan ogummaa in argata;
namni ogeessi
yommuu karaan isatti argisiifamu,
beekumsa in argata*.
12Waaqayyo inni qajeelaan,
wanta mana jal'ootaa keessatti hojjetamaa jiru
yaadaan in qaba,
warra jal'oota gad gara in galcha,
isaan in balleessas.
13Nama, hiyyeessa rakkate
gargaaruudhaaf iyyuuf,
inni dhaga'uu didu,
yommuu inni ofii rakkatee
gargaarsaaf iyyus immoo hin dhaga'amuuf;
14kennaan dhoksaadhaan kennan
dheekkamsa gab godha,
gabbarsuun dhoksaadhaan
harka keessa kaa'anis
aarii in qabbaneessa*.#11 19:25 14 1Sam 25:18-35
15Wanti dhugaan yommuu hojjetamu,
warra qajeelota in gammachiisa,
warra jal'oota garuu in naasisa.
16Namni karaa hubannaa irraa jal'atu,
walga'ii warra du'anii
keessa in bu'a.
17Namni qananii jaallatu in deega,
namni daadhii waynii fi
dhadhaa ejersaa jaallatu
raawwatee hin sooromu*.
18Namni jal'aan wanta hamaa
nama qajeelaadhaaf qopheessetti in darba,
namni hin amanamnes
wanta hamaa nama amanamaadhaaf
qopheessetti in gala*.
19Dubartii qocoltuu fi aartuu
wajjin jiraachuu irra,
lafa onaa keessa jiraachuu wayya*.#17 23:20-21 18 11:18 19 19:13
20Mana ogeessaa keessa qabeenyii fi
urgooftuun dibataa
fo'amoon guutuu dha;
gowwaan garuu wanta qabu hundumaa nyaatee in fixa;
21namni qajeelummaa fi
gaarummaa duukaa bu'u,
jireenyaa fi qajeelummaa,
ulfinas in argata;
22namni ogeessi
mandara warra humna-qabootaa in qabata,
da'oo isaan amanatanis in diiga;
23namni afaan isaa fi arraba isaa eeggatu,
rakkinatti akka hin galleef
of in eega*.
24Namni waan guddaatti of ilaaluudhaan
of jajee of bokoksuun
amala ta'eef,
<<Nama ga'isaa>> in jedhama.#23 13:3
25Namni dhibaa'aan sababii
hojii hojjechuu dhiisuuf,
kajeellaadhaan in du'a*.
26Inni ittuu caalchisee argachuuf
guyyaa guutuu in kajeela,
namni qajeelaan immoo
harka keessa utuu hin qabatin in kennaaf.
27Aarsaan namni jal'aan dhi'eessu,
Waaqayyo duratti jibbamaa erga ta'ee,
aarsaan namni yaada hamaatiin dhi'eessu immoo
caalaatti hammam ciigga'amaa haa ta'u ree*!
28Namni sobaan dhugaa ba'u in bada,
dubbiin namni
irratti yaadee dubbatu garuu,
in fudhatama*.
29Namni jal'aan ija-jabinaan in falma,
garuu namni yaada qajeelaa qabu
karaa isaatti jabaatee in dhaabata.#25 13:4 27 15:8 28 19:5,9
30Ogummaan yookiis hubannaan
yookiis mareen,
Waaqayyoon mormee dhaabachuu
danda'u hin jiru*.
31Fardi guyyaa lolaatiif qophaa'aa dha,
mo'icha kan namaa kennu garuu Waaqayyoo dha*.#30 Far 33:10-11 31 Far 33:16-17
Currently Selected:
Macaafa Fakkeenyaa 21: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
