Faaruu Ermiyaas 4
4
Rakkina Yerusaalem Irra Ga'e Himuu Isaa
1Attamitti warqeen gurraacha'ee,
warqee qullaa'aan bifa geddarate!
Attamittis dhagoonni mana qulqullummaa
wal ga'ii karaa gurguddaa
hundumaa irratti bitimfaman!
2Ilmaan Xiyoon warri dur
akka warqee qullaa'aatti
ilaalamaa turan,
amma attamitti akka qodaa suphee
isa harki namaa hojjete ta'an!
3Waangonni illee ilmaan isaanii
harma in hoosisu,
sabni koo garuu akka guchii lafa onaa keessa jirtuu
gara-jabeeyyii in ta'an*.
4Mucaan harma hodhu dheebotee arrabni isaa in goga;
ijoollonni buddeena in kadhatu,
garuu kan isaaniif kennu hin jiru;
5warri dur nyaata ba'eessa nyaachaa turan,
amma karaa irratti in gaggabu;
warri dur uffata mimiidhagaa
uffachaa turan,
amma tuullaa kosii keessa in ciisu.
6Yakki saba kootii
Sodoom ishee cubbuu hojjettee,
harki nama tokko illee utuu itti hin bu'in
battala tokkotti badde sana irra in caala*.
7Gurguddoonni ishee cabbii caalaa qullaa'oo,
aannan caalaas adii turan;
dhagni isaanii callee gati-jabeessa
caalaa diimaa ture,
maddiin isaaniis calaqqisaa
akka Safiiros ture.#3 Iyo 39:13-18 6 Uma 18:20; 19:24-25; His 16:48
8Amma garuu bifni isaanii
cilaattii caalaa in gurraacha'e,
karaa irratti namni yoo isaan arge iyyuu
isaan beekuu hin danda'u;
gogaan isaanii shuntuuree
lafee isaaniitti in maxxane,
akka mukaas in goge;
9warra beelaan rukutamanii
muka iji isaa nyaatamu illee
maasii keessaa dhabanii dhuman irra,
warra billaadhaan dhuman wayya;
10badiisi saba kootti yommuu dhufe
dubartoonni gara-laafeyyiin iyyuu
mucoolii isaanii harka isaaniitiin
affeelanii in nyaatan*.
11Waaqayyo dheekkamsa isaa saba koo irratti
gad in dhiise,
aarii isaa isa boba'aas
isaan irratti in dhangalaase;
Xiyoonitti ibidda qabsiisee,
hamma hundee isheetiitti ishee in gube*.
12Mootonni lafa irraa fi
sabni lafa irraa hundinuu,
diinonnii fi warri ishee jibban
dallaa Yerusaalem keessa
lixuu akka danda'an hin amanne;
13haa ta'u iyyuu malee,
sababii cubbuu raajota isheetii fi
yakka luboota isheetii isa isaan
dhiiga nama qajeelaa
ishee keessatti dhangalaasaniif
kun in ta'e*.
14Amma isaan akka jaamotaa
karaa keessa in jooru,
dhiiga dhangalaasuudhaan
waan xuraa'aniif,
namni uffata isaaniitti illee
bu'u hin jiru;
15namoonnis,<<Isin
warra xuraa'oo nana, sokkaa!
Sokkaa waan tokkotti iyyuu hin bu'inaa!>>
jedhanii isaanitti in iyyu;
yommuu isaan baqatanii sokkan immoo
saba lafa irraa keessaa gar-tokko,
<<Isaan kun itti fufanii
as jiraachuu
hin danda'an>> isaaniin in jedhu*.#10 2:20 11 Kes 32:22; Er 7:19-20 13 Er 2:8; His 22:26-28 15 Lew 13:45
16Waaqayyo ofii isaatii isaan in tamsaase,
deebi'ees isaan arguu hin barbaanne;
namoonnis lubootaaf
ulfina hin kennine,
jaarsoliittis faara hin tolle*.
17Iji keenya akkasumaan
gargaarsa eeggachuutti dadhabe,
sabni nuyi abdachaa turres
nu oolchuu hin dandeenye*.
18Isaan gara nuyi itti adeemnu hundumaatti,
nu gaadaa waan turaniif,
karaadhuma irra iyyuu akka itti adeemnu in dhabne;
raawwatamuun keenya waan ga'eef,
dhumni bara keenyaa dhi'aateera,
guyyoonni keenyas lakkoobsatti galaniiru.
19Warri nu ari'an
joobira qilleensa keessa balali'u caalaa fiigu;
isaan tulloota irra nu ari'anii,
lafa onaa keessas dhokatanii nu eeggatan*;
20inni Waaqayyo nuuf dibe,
inni nuyi,<<Hafuura jireenya keenyaa ti,
gaadidduu isaatiin illee saba warra kaan gidduu
in jiraanna>> jennee yaanne,
boolla isaan nuuf qotan
keessatti in qabame*.
21Yaa namoota mandara Edoom,
warra biyya Uz keessa jiraattanii,
gammadaa ililchaa!
Garuu xoofoon dheekkamsaa kun
isinittis immoo in darba;
isa keessaas dhugdanii machooftanii
qullaa in buuftu*.
22Egaa yaa namoota Edoom!
Waaqayyo sababii yakka keessaniitiif
isin in adaba,
cubbuu keessanis bakkeetti in baasa;
yaa namoota Xiyoon, adabni
sababii yakka keessaniitiif
isinitti dhufe raawwatameera;
Waaqayyo si'achi biyyaa isin hin baasu*.#16 5:12; 2:20 17 Er 37:3-8; His 29:6-7 19 2Mot 25:5; Oba la 14 20 1Sam 8:19-20; 2Mot 25:6-7 21 3:64; Far 137:7; Er 25:15; 49:12 22 Isa 40:2; 34:8-10; His 35:14-15; Oba la 10-15
Currently Selected:
Faaruu Ermiyaas 4: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
