Macaafa Yo'el Raajichaa 2
2
Guyyaan Waaqayyoo Inni Sodaachisaan Akka Dhi'aate Fakkeenyaan Himuu Isaa
1Xiyoon gaara koo isa qulqulluu irratti
fiinoo afuufaa,
sagalee nama dammaqsu dhageessisaa!
Guyyaan Waaqayyoo waan dhufuuf,
ammuma iyyuu waan dhi'aateef,
warri biyyicha keessa jiraatan hundinuu haa hollatan*!
2Guyyichi guyyaa dukkanaa fi
guyyaa ifa hin qabnee dha,
guyyaa duumessaa fi
guyyaa dukkana limixii ti;
inni akka boruu tulloota irra darbee
bal'achaa adeemuu ti;
sabni baay'eenii fi jabaan
kan akka isaa dur kan hin turin,
si'achis kan akkasii
kan hin argamne in dhufa*.#1 1:15 2 1:6
3Fuula isaanii duraa arrabni ibiddaa
gubaa in adeema;
isaan booddeedhaanis
ibiddi waxalaan gubaa in adeema;
biyyi fuula isaanii duraa
iddoo dhaabaa Eden fakkaata,
biyyi isaan booddee immoo
lafa onaa barbadaa'aa fakkaata;
kan isaan jalaa ba'us
tokko illee hin jiru*.
4Isaan farda fakkaatu,
akka farda lolaas in kaatu;
5isaan akka konkolaataa fiiguutti,
akka ibidda yommuu
qarmii gubu xaaxa'uutti,
akka loltoota jajjaboo
lolaaf of qopheessaniitti,
sagalee isaanii dhageessisaa,
fiixee tullootaa irra in quruphisu*.
6Sabni lafa irraa
yommuu isaan argan in rom'u,
namoonni hundinuus na'anii
fuula in badu;
7isaan akka namoota jajjabootti in fiigu,
akka loltootaattis
masaraa in yaabu;
hundumti isaaniis karaa isaanii irraa
utuu hin jal'atin,
tarreetti in yaa'u.
8Tokkon tokkon isaanii karaadhuma isaanii irra adeemu malee,
inni tokko isa kaanitti hin bu'u;
tarree isaanii utuu wal irraa hin kutin,
humnaan cabsatanii
waraana gidduu in darbu;
9fiiganii mandarattii irra in ba'u,
masaraa irra in fiigu,
manneetii in yaabbatu,
akka hattuus qaawwa manaatiin
ol in lixu*.#3 1:19; Amo 7:4 4-5 Mul 9:7-9 9 Bau 10:4-6
10Lafti isaan ga'an
fuula isaanii duraa in rom'iti,
waaqnis in socho'a;
aduunii fi jiini in dukkanaa'u,
urjoonnis ifa hin kennan*.
11Waaqayyo fuula macca isaa duratti
sagalee isaa in dhageessisa;
humni waraanaa isaa sonaan baay'ee dha;
warri isaaf abboomamanis jajjaboo dha;
guyyaan Waaqayyoo guddaa dha, sodaachisaa dhas;
eenyutu fuula isaa dura dhaabachuu danda'a ree*?#10 2:31-32; Mul 6:12; 8:12; Isa 13:10; Amo 8:9; Mat 24:29 11 Far 29:3-9; Isa 10:5-6; His 38:4; Mul 6:17
Gara Yaada Garaa Geddarannaatti Waamamuu Isaanii
12Waaqayyo garuu,
<<Ammuma iyyuu garaa keessan guutuudhaan,
soomuudhaan, boo'ichaan, gadduudhaanis
gara kootti deebi'aa!>> jedha.
13Egaa garaa keessan tarsaasaa malee,
uffata keessan hin tarsaasinaa!
Gara Waaqayyo gooftaa keessaniitti deebi'aa!
Inni araara-qabeessaa fi oo'a-qabeessa waan ta'eef,
dheekkamsatti hin ariifatu,
gaarummaan isaas baay'ee dha,
wanta hamaa namatti erguu irraas of in qusata*.
14Maaltu beeka,
tarii Waaqayyo gooftaan keessan
isa yaade in dhiisa, in oo'as;
kennaa midhaanii fi kennaa dhugaatii
akka isaaf dhi'eessuu dandeessanitti,
isin in eebbisa ta'a*!#13 1Mot 21:27; 2Mot 19:1; 'z 9:3; Er 41:5; Bau 34:6 14 1:9-10; Amo 5:15; Yon 3:9; Sef 2:3
15Xiyoon keessatti fiinoo afuufaa,
soomii qulqullaa'aa labsaa!
Wal ga'ii qulqullaa'aas waamaa*!
16Namoota walitti qabaa,
waldaa qulqulleessaa!
Maanguddootaa fi ijoollee,
daa'imota harma hodhanis
walitti sassaabaa!
Dhirsi misirroo mana isaa keessaa
gad haa ba'u,
misirroonis diinqa ishee keessaa
gad haa baatu!
17Luboonni warri Waaqayyoof hojjetan,
buusaa mana qulqullummaa fi
iddoo aarsaa gidduutti haa boo'an!
Isaan,<<Yaa Waaqayyo saba keetiif oo'i,
saba kee warra dhuunfaa kee ta'an,
saba warra kaan gidduutti
nama ga'oo fi nama mammaaksaa hin godhin!
Maaliifis isaan namoota
warra kaan gidduutti,
<<Waaqayyoon isaanii eessa jira?>> jedhu ree?>> haa jedhan*!#15 1:14 17 Far 79:10
Waaqayyo Saba Isaatiif Deebii Kennuu Isaa
18Waaqayyo biyya isaatiif in hinaafa,
saba isaatiifis in oo'a*.
19Waaqayyo saba isaatiif deebisee,
<<Kunoo ani midhaan, waynii haaraa fi
dhadhaa ejersaa isiniif nan kenna,
isin in quuftu;
si'achis saba lafa irraa gidduutti
akka isin yeellaatan hin godhu*;
20loltoota warra gara bitaa jiranis
isinittii nan fageessa,
warra fuula duraa,
gara galaana ba'a-biiftuutti,
warra dugda duubaa immoo,
gara galaana lixa-biiftuutti,
gara lafa gogaa fi onaatti isaan nan oofa;
sababii isaan of gurguddisuudhaan
wanta akkasii isin irratti hojjetaniif,
ani isaan nan balleessa,
reeffi isaanii in xiraa'a, in ajaa'as.#18 Zak 1:14; 8:2 19 1:9-10; 2:26-27
21<<Ani Waaqayyo dhugumaan
wanta guddaa isaa waanan godhuuf,
yaa lafaa hin sodaatin!
Gammadi, ililchis!
22Bakkeedhaa iddoon dheedumsaa lalisaa,
mukkeetiin ija naqachaa,
mukti harbuuf dhaabaan waynii,
baay'inatti ija kennaa waan jiraniif,
isin yaa horii bakkee keessaa hin sodaatinaa!
23<<Isin yaa ijoollee Xiyoon!
Waaqayyo qajeelummaa isaa irraa kan ka'e
bokkaa isa duraa isiniif kenneera;
bokkaa isa duraa, isa booddees
akkuma kanaan duraatti
waan isiniif kennuuf,
Waaqayyo gooftaa keessanitti gammadaa, ililchaas*!#23 Kes 11:14; Er 5:24
24<<Oobdiin midhaaniin in guuta,
iddoon waynii itti cuunfanis
daadhii wayniitii fi
dhadhaa ejersaatiin in guuta.
25Isa gurmuun hawaannisaa,
ilmaan hawaannisaa,
geeriin hawaannisaa, qorophisii fi
loltoonni jajjaboonni
ani isinitti erge sun
dur isin duraa fixan,
amma iddootti isiniif nan deebisa*.
26Yommus isin nyaattanii in quuftu;
maqaa ana Waaqayyo gooftaa keessanii
isa dinqii isiniif hojjetees in jajattu;
isin sabni koo
si'achi deebitanii hin yeellaasifamtan*.
27Yommus ani Israa'el keessa
akkan jiru,
Waaqayyo gooftaa keessan akkan ta'e,
ana malees kan biraa akka hin jirre in beektu;
isin sabni koos si'achi deebitanii
hin yeellaasifamtan>> jedhe*.#25 1:4; 2:1-11 26 Er 36:13-15; Kes 8:10 27 His 34:30
Guyyaan Waaqayyoo Inni Sodaachisaan Akka Dhufu Himuu Isaa
28Waaqayyo ammas,
<<Bara booddeetti ani hafuura koo
nama hundumaa irratti nan dhangalaasa;
ilmaan keessanii fi intaloonni keessan
raajii in dubbatu,
maanguddoonni keessan
abjuu in abju'atu,
dargaggoonni keessanis
mul'ata in argu;
29bara sanatti, ani hojjetoota koo
warra dhiirotaa fi
warra dubartootaa irratti iyyuu
hafuura koo nan dhangalaasa.
30Waaqa irratti, lafa irrattis milikkita,
dhiigaa fi ibidda, utubaa aaraas nan argisiisa.
31Guyyaan koo inni guddaanii fi sodaachisaan sun
utuu hin dhufin dura,
aduun dukkanatti,
jiinis dhiigatti in diddiiramu.
32Maqaa Waaqayyoo warri waammatan
hundinuu garuu in oolu;
akkuma ani Waaqayyo jedhee ture,
warri ani waame tulluu Xiyoon irratti,
Yerusaalem keessattis
hafanii in fayyu>> jedhe*.#28-32 Lak 11:25-29; HoE 2:17-21; Mat 24:29; Mul 6:12-13; Rom 10:13
Currently Selected:
Macaafa Yo'el Raajichaa 2: MacQul
Highlight
Share
Compare
Copy
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
