Macaafa Iyoob 19
19
Iyoob Ammas Biildaadiif Deebii Kennuu Isaa
1Yommus Iyoob deebisee,
2<<Hamma yoomiitti lubbuu koo dhiphiftu>>
Hamma yoomiittis dubbiidhaan
lafee koo cabsitu>>
3Isin deddeebitanii na arrabsitan,
isa dabaa ana irratti hojjettaniifis hin yeellaane.
4<<Ani utuman dhuguma karaa irraa kaadheera ta'e iyyuu,
balleessaa kootti anuma duwwaatu gaafatama;
5isin anatti yoo of gurguddiftan,
rakkina anatti dhufe kanas sababii
yoo godhattan,
6Waaqayyo anatti akka balleesse,
kiyyoo isaas naannessee
akka anatti xaxe beekaa!
7Ilaa,<<Humnaan ana irratti ka'e>> jedhee
yoon iyyadhe, deebii hin argadhu;
yoon dhageessifadhes firdiin qajeelaan hin jiru*.
8Akkan hin darbineef karaa
anatti cufeera,
daandii koo irras dukkana dhaabeera*;
9inni ulfina koo ana irraa fuudhee,
gonfoo koos mataa koo irraa buuseera.
10Karaa hundumaan na caccabse,
anis badduu ba'eera;
abdii koos akkuma mukaa buqqiseera*;
11dheekkamsa isaa ana irratti bobeesse,
akka diina isaattis na ilaale*;
12loltoonni isaa wal duukaa dhufanii,
karaa anatti baafatanii,
naannoo dunkaana kootii in buufatan.#7 30:20; Anb 1:2 8 3:23; Faru 3:7,9 10 14:7 11 13:24; 33:10
13<<Inni obboloota koo anattii fageesse,
warri ana beekanis
orma akka anatti ta'an godhe*;
14aantiin koo anattii citaniiru,
firoonni koo warri anatti dhi'aatanis
na irraanfataniiru*;
15warri ani mana kootti keessumsiise
na irraanfataniiru,
xomboreewwan koos akka ormaatti na ilaalan,
isaan birattis alagaan ta'e.
16Ani hojjetaa koo nan waame,
inni garuu na jalaa in dide;
afaanii baasee isa kadhachuun na barbaachise.
17Hafuurri koo haadha manaa kootti in xiraa'e,
obbolaan koos ana irraa in baqatan.
18Ijoolleen illee na tuffatu,
yommuun ka'u isaan ana irratti in dubbatu.
19Firoonni koo warri ani amanadhu hundinuu na ciigga'an,
warri ani isaan jaalladhus
ana irratti in ka'an;
20gogaan koo foon kootti, lafee koottis in goge;
foon ilkaan kootii duwwaatu
iddoo jira*.
21Harki Waaqayyoo na rukuteeraatii,
anaaf gaddaa,
isin yaa firoota ko, anaaf gaddaa!
22Akkuma Waaqayyo na ari'atu
maaliif isinis na ari'attu>>
Isin amma iyyuu na kukkutattanii hin quufnee ree?#13 Far 31:11 14 Far 38:11 20 16:8; 33:21
23<<Maaloo, wanti ani dubbadhu
kun caafamee,
macaafatti utuu galfamee!
24Maaloo, bara baraan akka yaadatamaniif,
sibiilaa fi dilaliidhaan kattaa irratti
utuu qirixamanii!
25Furiin koo jiraataa akka ta'e,
guyyaa booddeettis lafa irratti
dhugaa baasuudhaaf
akka inni ka'u ani beeka*.
26Gogaan dhagna kootii ana irraa qunca'ee,
foonis dhagna koo irra hin jiru
yoo ta'e iyyuu,
ani Waaqayyoon arguuf jira.
27Ani ofii kootii isa nan arga;
anumatu ija kootiin
isa arga malee,
kan biraa miti;
ani garuu isa yaaduu irraa kan ka'e nan gaggabe*.
28<<Hundeen dubbichaa ana biratti
waan argamuuf,
isin immoo,
nuyi maaliif isa ari'anna?>> in jettu;
29dheekkamsi, billaadhaan adabamuu
waan fiduuf,
isin ofii keessaniif billaa sana sodaadhaa!
Firdiinis akka jiru beekaa!>> jedhe.#25 Far 56:10; 140:12; Isa 50:8 26-27 42:5; Far 119:81-82; Mat 5:8
Currently Selected:
Macaafa Iyoob 19: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
