Macaafa Ermiyaas Raajichaa 38
38
Ermiyaas Boolla Keessa Buufamuu Isaa
1Shefaaxiyaan ilmi Maataan, Gedaaliyaan ilmi Phashhur, Yukaal ilmi Shelemiiyaa akkasuma Phashhur ilmi Malkiiyaa isa ani Ermiyaas sabatti dubbadhe hundumaa in dhaga'an*. 2Waaqayyo,<<Warri mandara kana keessatti hafuu barbaadan hundinuu billaadhaan, beelaan, dhukkubaanis in dhumu; warri gara warra Baabilonitti baqatan garuu jalaa in ba'u, du'as in oolu*. 3Mandarattiin kun harka loltoota mootii Baabilonitti dabarfamtee in kennamti, isaan ishee in qabatu; ani Waaqayyo kana dubbadheera>> jechuu isaa isaanitti nan hime.#1 21:1 2 21:9
4Isa ani akkas jedhe kanaaf warri gurguddoonni mootichaan,<<Namichi kun wanta akkasii dubbachuu isaatiin loltoota keenya warra mandara keessatti hafanii fi saba hundumaa humna in buusa; saba kanaaf wanta hamaa malee, wanta gaarii hin hawwu waan ta'eef, isa ajjeesi!>> jedhan*. 5Zedeqiiyaan mootichis,<<Kunoo! Inni harka keessan keessa waan jiruuf, isin akka barbaaddan yoo isa gootan ani isin dhowwuu hin danda'u>> jedhee, isaaniif in deebise. 6Kana irratti isaan ana fuudhanii funyoodhaan boolla bishaanii isa kellaa mana mootummaa keessa jiru, isa kan Malkiiyaa ilma mootichaa keessa ana in buusan; boollichi dhoqqee malee bishaan hin qabu ture; dhoqqichis gad na nyaate.#4 Amo 7:10-11
7Xu'aashichi Ebeed-Melek jedhamu namni sanyii Kuush inni mana mootummaa keessaa hojjetu garuu jarreen sun boolla bishaanii keessa akka ana buusan in dhaga'e; mootichi yommus karra Benyaamiin bira in taa'a ture*; 8Ebeed-Melek mana mootummaa keessaa ba'ee iddoo inni jirutti isa bira dhaqee, 9<<Yaa mootii! Wanti jarreen kun Ermiyaas raajicha irratti hojjetan hundinuu wanta jal'aa dha; isaan darbatanii boolla bishaanii keessa isa buusaniiru, mandarattii keessa immoo buddeenni waan hin jirreef, inni achitti beelaan in du'a>> jedhe. 10Mootichi kana irratti Ebeed-Melek nama sanyii Kuushitti,<<Namoota soddoma asii fudhadhuu dhaqiitii utuu inni achi keessatti hin du'in boollicha keessaa isa baasi!>> jedhee in dubbate. 11Ebeed-Melek jarreen sana fudhatee mana mootummaa keessaa gara kutaa isa mana mi'aa jalaa dhaqee, achi keessaa uffata moofaa bubbututaa fuudhee funyoodhaan gara kootti gad in buuse. 12Ebeed-Melek namni sanyii Kuush,<<Funyoon kun akka si hin murretti moofaa bubbututaa kana bobaa kee jala keeyyadhu!>> jedhee anatti in dubbate; anis akkuma inni jedhe nan godhe. 13Isaanis funyoodhaan ol na harkisanii boollicha keessaa ana in baasan; kana booddees kellaa mana mootummaa keessatti nan eegame*.#7 39:15-18 13 15:21
Zedeqiiyaan Dhoksaatti Ermiyaasii Wajjin Dubbachuu Isaa
14Yommus Zedeqiiyaan mootichi, gara ana Ermiyaasitti namoota ergee gara karra mana qulqullummaa isa sadaffaatti ana fichisiisee,<<Yaa Ermiyaas! Ani amma wanta tokko sin gaafadha atis utuu ana hin dhoksin dubbii dhugaa anatti himi!>> naan jedhe. 15Ani immoo Zedeqiiyaadhaaf deebisee,<<Amma ani dubbii dhugaa sitti yoon hime ati immoo ana in ajjeefta; yoon si gorses ati anaaf hin dhageessu>> nan jedhe. 16Yommus Zedeqiiyaan mootichi,<<Dhugaa Waaqayyo isa jiraataa isa jireenya nuuf kennee, ani si hin ajjeesu, warra si ajjeesuu barbaadanittis dabarsee si hin kennu>> jedhee, dhoksaatti anaaf in kakate*. 17Kana irratti ani Zedeqiiyaatti dubbadhee,<<Waaqayyo gooftaan maccaa, Waaqayyo inni kan Israa'el,<<Ati dhugumaan gurguddoota mootii Baabilonitti harka yoo kennite du'a in oolta, mandarattiin kun hin gubamtu, atii fi maatiin kee hundinuus in jiraatu*; 18ati garuu gurguddoota mootii Baabilonitti harka kennuu yoo dhiifte, mandarattiin kun harka warra Baabilonitti dabarfamtee in kennamti, ibiddaanis in gubamti, atis isaan jalaa ba'uu hin dandeessu>> jedha>> nan jedhe.#16 38:4-5 17 38:2
19Zedeqiiyaan mootichi immoo deebisee,<<Ani Yihudoota warra Baabilonitti galan nan sodaadha; warri Baabilon isaanitti dabarsanii yoo ana kennan isaan immoo gar-malee ana in miidhu>> jedhe. 20Ani immoo deebisee,<<Lakkii, isaanitti dabarsanii si hin kennan; dubbii Waaqayyoo isa ani sitti himu kanaaf yoo abboomamte, wanti hamaan si irra hin ga'u, lubbuu kees in oolfatta; 21ati garuu isaanitti harka hin kennitu yoo ta'e, inni Waaqayyo anatti mul'ise in raawwatama. 22Kunoo! Dubartoonni mana mootii Yihudaa keessatti hafan hundinuu gad baafamanii gurguddoota mootii Baabilonitti yommuu kennaman waa'ee keef,
<<Firoonni kee warri ati amanatte
humna si caalanii karaa irraa si kaachisan;
miillan kee dhoqqee keessa
lixanii in qabaman,
firoonni kee si dhiisanii
in baqatan>> jedhanii
in boo'u>> nan jedhe.
23Itti fufees,<<Dubartoonni kee fi ijoolleen kee hundinuu harka namoota Baabilonitti in kennamu, mootiin Baabilon si in booji'a malee, isa jalaa ba'uu hin dandeessu; mandarattiin kunis ibiddaan in gubamti>> nan jedhe*. 24Ergasii Zedeqiiyaan, yaa Ermiyaas,<<Akka hin ajjeefamnetti wanta amma dubbanne kana namatti hin himin! 25Gurguddoonni biyyaa akka ani sii wajjin haasa'e dhaga'anii gara kee dhufanii,<<Mootichaa wajjin maal haasofte>> Innis maal siin jedhe>> Nu hin dhoksin! Yoo ati nu dhoksite nuyi immoo si ajjeefna>> yoo siin jedhan, 26ati immoo deebisii,<<Mootichi gara mana Yonaataanitti na ergee achitti akkan hin duunefan isa kadhadhe>> jedhiin!>> jedhe*. 27Achumaan gurguddoonni biyyaa hundinuu gara koo dhufanii na gaafatan; anis immoo akkuma mootichi na abboometti isaaniif nan deebise; wanta ani mootichaa wajjin haasa'e namni tokko illee waan hin dhaga'iniif, isaan waan godhan wallaalanii calluma jedhanii na biraa in adeeman. 28Akkasittan hamma gaafa Yerusaalem qabamteetti kellaa mana mootummaa keessatti eegamaa ture*.#23 32:4; 34:3 26 37:15 28 37:21
Currently Selected:
Macaafa Ermiyaas Raajichaa 38: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
