Macaafa Ermiyaas Raajichaa 20
20
Hidhamuu Ermiyaas
1Yeroo sana Phashhur lubichi ilmi Iimer geggeessituu hojii mana qulqullummaa inni ture, Ermiyaas raajii kana utuu dubbatuu in dhaga'e; 2Phashhur lubichi Ermiyaas raajicha qabsiisee, reebee mana hidhaa isa karaa balbala Benyaamiin isa bukkee mana qulqullummaa gara oliitiin jiru keessatti miilla isaa jirma lama gidduu galchee in hidhe*. 3Borumtaa isaa Phashhur lubichi Ermiyaasin hidhaadhaa yommuu hiike, Ermiyaas raajichi Phashhuriin,<<Waaqayyo,<<Maagor Miisaabiib>> jedhee si moggaase malee,<<Phashhur>> siin hin jenne>> jedhe; [<<Maagor Miisaabiib>> jechuun,<<Isa karaa hundumaa bir'achiisu>> jechuu dha]*. 4Waaqayyo kunoo!<<Ofii kee, firoota kees bir'achiisuuf akka taatu ani nan godha; firoonni kee utuu ati ilaaltuu billaa diinota isaaniitiin in dhumu; ani guutummaa biyya Yihudaa harka mootii Baabilonitti dabarsee nan kenna, innis warra kaan achumatti billaadhaan in fixa; kaan immoo booji'ee biyya Baabilonitti in geessa. 5Guutummaa badhaadhummaa mandarattii kanaa, waan isheen argattu, mi'a gati-jabeessa, qabeenya mootota Yihudaa hundumaas harka diinota isaaniitti dabarsee nan kenna; isaan waan hundumaa saamanii fudhatanii gara biyya Baabilonitti in geessu*. 6Atis yaa Phashhur, warra mana kee keessa jiraatan hundumaa wajjin booji'amtee gara biyya Baabilonitti in geeffamta; firoota kee warra raajii sobaa isaaniif dubbatte hundumaa wajjinis achitti duutee achumatti in awwaalamta>> jedhe.#2 29:26; HoE 16:24 3 6:25; 20:10; Far 31:13 5 Isa 39:6
Ermiyaas Waaqayyo Irratti Guungumuu Isaa
7Yaa Waaqayyo! Ati na gowwoomsite,
anis nan gowwoomfame;
ati jabaa waan taateef
humna na caalte;
namoonni hundinuu anatti in ga'isu,
guyyaa hundumaas anatti in kolfu*;
8jal'innii fi nama miidhuun
isaan keessa akka jiru,
yeroo hundumaa sagalee koo ol fuudhee
isaanitti nan hima;
isaan garuu dubbii kee kanaaf jedhanii
na arrabsu anatti in ga'isus.
9Ani garuu,<<Maqaa Waaqayyoo hin dha'u,
maqaa isaatiinis waan tokko illee
namatti hin himu>>
yoon jedhe,
dubbiin kee lafee koo keessa lixee,
garaa koo keessatti akka ibidda boba'uu waan ta'eef,
ani isa ittisuu yoon yaale iyyuu homaa hin danda'u*.
10Isaan keessaa baay'een hasaasanii,
<<Bir'annaan iddoo hundumaa jira, isa hammeessaa!
Kottaa isa in hammeessinaa!>> in jedhu;
warri firoota koo ta'an illee,
<<Inni amma kufa;
tarii inni gowwoomee wanta hin taane yommuu dubbatu,
isa qabnee ijaa in baafanna>> jedhanii na eegu*.#7 1:5-7; Faru 3:14 9 5:14; 6:11; Iyo 32:18-20; Amo 3:8; 1Qor 9:16 10 6:25; 18:18; Mar 3:2,6
11Waaqayyo garuu akka loltuu jabaa fi sodaachisaatti
anaa wajjin waan jiruuf,
warri na ari'atan in kufu malee,
ana hin mo'an;
wanti isaan yaadan
isaaniif ta'uu waan dideef in yeella'u,
salphinni isaaniis raawwatee hin irraanfatamu*.
12Yaa Waaqayyo gooftaa maccaa,
ati isa qajeelaa
qortee in ilaalta,
golee garaa namaa keessas in argita;
ani rakkina koo sitti himadheera'o,
isaan irratti ijaa baasii na argisiisi*!
13Waaqayyo warra gadadamoo
harka warra hamootaa keessaa
waan baaseef,
isa faarfadhaa, isa jajadhaas*!#11 1:8,19; Far 40:14-15 12 11:20 13 15:21; Far 9:12
14Guyyaan ani itti dhaladhe
abaaramaa haa ta'u!
Guyyaan haati koo itti na deesses hin eebbifamin*!
15Namni abbaa kootiin,
<<Ilma godhatteetta>> jedhee
misraachoo itti himes
abaaramaa haa ta'u!
16Namni sun akka mandara
ishee Waaqayyo oo'a malee
gara galchee haa ta'u!
Ganama iyya haa dhaga'u,
guyyaa saafaas waci lolaa
isatti haa ka'u*!
17Waaqayyo gadameessa haadha koo keessatti
ana ajjeeseera utuu ta'e,
silaa isheen iddoo awwaalaa
anaaf in taati;
gadameessi ishees
awwaala guddaa anaaf ta'ee
in hafa ture.
18Ani rakkinaa fi gidiraa
arguudhaaf jedhee,
maaliifan gadameessa haadha koo
keessaa ba'e>>
Bara koos maaliifan yeelloodhaan fixa*?#14 15:10; Iyo 3:3-11; 10:18 16 Isa 6:11; Uma 19:24-25; Amo 4:11 18 12:1; Iyo 3:20
Currently Selected:
Macaafa Ermiyaas Raajichaa 20: MacQul
Highlight
Copy
Compare
Share
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
