Macaafa Saamu'el Isa Lammaffaa 1
1
Daawit Du'uu Saa'ol Mootichaa Dhaga'uu Isaa
1Saa'ol erga du'ee booddee, Daawit Amaaleqoota rukutee mo'e; achii deebi'ee, mandara Siiqlaag guyyaa lama in taa'e*. 2Guyyaa sadaffaa isaatti, namni tokko gadda irraa kan ka'e uffata isaa tarsaasee, awwaara mataatti firfirfatee iddoo buufata Saa'ol keessaa gara Daawit in dhufe; namichi yommuu dhi'aate, ulfina Daawitiif hamma lafa ga'utti in qoomma'e. 3Daawit immoo,<<Ati eessaa dhufte?>> jedhee isa in gaafate; innis deebisee,<<Iddoo buufata namoota Israa'el keessaan baqadhee dhufe>> jedheen. 4Kana irratti Daawit,<<Maaltu ta'e>> Wanta ta'e anatti himi!>> ittiin jedhe; namichi immoo,<<Loltoonni keenya lafa waraanaatii baqatanii, baay'een isaaniis rukutamanii kukkufanii du'aniiru; Saa'ol mootichii fi Yonaataan ilmi isaa ajjeefamaniiru>> jedhee itti in hime.#1 1Sam 30:1
5Daawit yommus,<<Saa'ol mootichii fi Yonaataan ilmi isaa akka du'an ati attamitti beekta?>> jedhee namicha isatti hime sana in gaafate. 6Namichi oduu kana isatti himes deebisee,<<Ani dhimma utuun hin qabaatin, tulluu Giilbo'aatti ol ba'ee Saa'ol eeboo isaatti hirkatee utuu jiruu, warri konkolaataan adeemanii fi abboonni fardeenii warri isa ari'aa jiran immoo isa qaqqabuuf akka jedhan nan arge*. 7Saa'ol gara galee yommuu na arge ana in waame; anis,<<Kunoo, asan jira>> nan jedheen. 8Inni immoo,<<Ati eenyu?>> jedhee na gaafate; anis deebise,<<Ani nama Amaaleq>> nan jedhe; 9inni immoo,<<Ani laafee du'uudhaaf nan jedha, garuu lubbuun koo ana keessaa ba'uu in didde; kanaaf kottuutii ana ajjeesi!>> naan jedhe. 10Inni erga kufee booddee jiraachuu akka hin dandeenye waanan beekeefan dhaqee isa ajjeesee, gonfoo mataa isaa irra tureef bitawoo harka isaatti ture ittii baasee si gooftaa kootiif fideera>> jedhe*.#6 1Sam 31:1-3 10 1Sam 31:4
11Kana irratti Daawit, namoonni isaa wajjin turan hundinuus gadda irraa kan ka'e uffata isaanii of irratti in tarsaasan*. 12Kana malees Saa'ol, Yonaataan ilmi isaa, loltoonni Israa'el saba Waaqayyoo ta'anis billaadhaan waan dhumaniif, Daawit, namoonni isaa wajjin turanis hamma galgalaatti isaaniif jedhanii in wawwaatan, in boo'an, in sooman*. 13Daawit ergasii,<<Ati nama eessaa ti?>> jedhee namicha oduu kana isatti hime sana in gaafate; inni immoo,<<Ani ilma nama Amaaleqootatti gale tokkoo ti>> jedhee in deebiseef. 14Kana irratti Daawit,<<Ati attamitti nama isa Waaqayyo dibee moosise sana harka keetiin ajjeesuudhaaf ija jabaatte?>> jedhee isa in gaafate*; 15Yommusuma namoota isaa keessaa tokko waamee,<<Dhaqii namicha kana rukutii lafaan dha'i!>> jedhee isa in abboome; kana irratti inni namicha rukutee in ajjeese*. 16Namichi utuu hin ajjeefamin, Daawit,<<Ati afaanuma keetiin,<<Nama isa Waaqayyo dibee moosise nan ajjeese>> jettee of irratti dhugaa waan baateef, dhiigni kee mataa kee irraa haa barbaadamu!>> jedhee itti in dubbate.#11 1Sam 4:12 12 1Sam 31:13 14 1Sam 24:6; 26:9 15 4:12
Daawit Waa'ee Du'uu Saa'oliif Waa'ee Du'uu Yonaataaniif Faaruu Dhageessisuu Isaa
17Ergasii Daawit Saa'olii fi Yonaataan ilmi Saa'ol waan du'aniif, 18akka kanatti fufee jirutti in faarse; namoonni Yihudaa immoo faarfannaa <<Iddaa>> jedhamu kana akka barsiifamaniif in abboome; faarfannaan kun macaafa warra qajeelotaa isa <<Yaashaar>> jedhamu keessatti caafamee jira*.
19Faarfannichi,
<<Ulfina Israa'el warri ta'an,
iddoowwan ol ka'oo irraa lafaan in dha'aman;
warri jajjaboonnis attam kukkufan!
20Intaloonni Filisxeemotaa
akka hin gammannetti,
intaloonni warra dhagna hin qabatiniis
akka hin ililchinetti,
isin mandara Gaatitti kana hin himinaa!
Karaa gurguddaa mandara Ashqalon keessattis
kana hin labsinaa!#18 Iya 10:13
21<<Isin yaa tulloota Giilbo'aa,
gaachanni warra jajjaboo isin irratti waan xuraa'eef,
gaachanni Saa'ol dhadhaa ejersaatiin waan hin dibaminiif,
fixeensi yookiis bokkaan isin irratti hin bu'in!
Lafti midhaan kennaaf dhi'aatu
baasus hin argamin!
22Iddaan Yonaataan
dhiiga namaa utuu hin dhangalaasin,
moora warra jajjaboos utuu hin waraanin
gad qabamee hin beeku;
billaan Saa'olis waa utuu hin rukutin deebi'ee hin beeku.
23<<Saa'olii fi Yonaataan yommuu jiran,
walii wajjin turan,
namoonni isaan in jaallatu,
isaanitti in gammadus turan;
yeroo du'anittis immoo
wal irraa gargar hin baane;
isaan joobira caalaa fiigu, leencota caalaa jabaatu.
24<<Isin yaa intaloota Israa'el,
Saa'ol isa uffata dhiilgee
dhagna namaatti tolu isinitti uffise,
uffata keessan warqeedhaan
isiniif miidhagseef boo'aa!
25Namoonni jajjaboonni
attam lafa lolaatti kukkufanii du'an!
Yonaataan iddoowwan ol ka'oo irraa
lafaan in dha'ame in du'e.
26Yaa Yonaataan obboleessa ko,
ani siif nan gadda;
baay'ee na mararta turte,
jaalalli ati na jaallatte,
jaalala dubartootaa caalaa
dinqisiisaa ture*.#26 1Sam 18:3
27<<Namoonni jajjaboonni attamitti kukkufan!
Warri akka mi'a waraanaatti ilaalamanis badaniiru>> jedha.
Currently Selected:
Macaafa Saamu'el Isa Lammaffaa 1: MacQul
Highlight
Share
Copy
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
