Röm 6

Øøna Cäŋ Kwøw Ki Krictø

1?Agïnaŋø noo caanø nø? ?Aŋø, ø doo puta bëëtö yïth raay, nee met yi Jwøk pälle? 2Ba doo løny. ?Øøni na näk othøw ni teek raay bäŋgø bäätø këët, øøna døø poodø ni ø bëëdö yïth raay nidïï? 3?Kuyu ni øøni bëët na näk olwøø na nyuudhi dëër Krictø Jecu, ø lwøk na nyuudhi yi thøwe? 4Kiper manøgønø, øøna koony ki eni na aciel ki køør lwøk marø na lwøk øøni na nyuudhi yi thøwe, kiper nee jöör kwøw mana nyään caadhø, kaawat mana ö Krictø na tïŋi maal ki yi thøø ki køør ajiem Wuuö Jwøk.

5'Ba ni näk øøno dwätö ki eni, ni thøøø kaawat mana thøøe, ka adïëri møn, øøno dwäti ki eni thuwø ki duunne wøk ki yi thøø kaawat mare. 6Ŋääø ni gïïa kwøŋ en cwïnynyø anäk bäät jaadha no odëëdö ki eni na aciel, kiper nee dëël mana päŋ ki raay nee ränynye, nøø tïmø ni ø patha laaŋe jï raay këët. 7Kiper ŋat mo othøw, bäŋ teek raay bääte këët. 8'Ba ni näk mo øøno thøw ki Krictø, yøø ŋäädhö ni øøno kwøw ki eni thuwø. 9Kiper ŋääø ni Krictø na tïŋ maal ki yi thøø ba cäŋ thøwø këët bäre bäre, kiper thøø jïre bäŋ teek bääte këët. 10'Ba thøwa thøøe ki gø, thøw kaper raay ni yie aciel, ni bäŋ mør këët. Ni kwøw mana kwøe ki gø, kwøwa jï Jwøk. 11Kaawat manøgø uuni thuwø, wär dëëtu caarru ni uuno thøw ni raay bäŋ teek bäätu këët, ni cäŋu kwøwø jï Jwøk ki ri Krictø Jecu.

12Kiper manøgønø, käru nou wëëga raay jïtö ki teek bäät dëëtu ni bëën thøø enø, ki man wëëkge uuni leŋ gïïge na reyø wø nieŋge køørge. 13Ni käru nou wëëga thäk dëëtu raay ni gena gïï wø tïïc gïï mo reyø. 'Ba cïpu dëëtu jï Jwøk ni uuna jiy mo okäl wøk ki yi thøø, ni cäŋge kwøw. Ni cïpu thäk dëëtu jï Jwøk na gïï wø tïïc gïï mo beyø. 14Kiper raay ba doo tïmö na kwäärö bäätu, kiper mana tïme nou ba bëën ciik Jwøk, 'ba u bëënna met yi Jwøk.

Uuna Laaŋe Mo Gïïa Beyø

15?Agïnaŋø nø? ?Ø doo bääö kiper mana bëënnø met yi Jwøk ni ø ba bëën ciik Jwøk këët? Ba doo løny. 16?Aŋø, kuyu ni ni näk dëëtu you cïbö jï ŋat mør ni uuna laaŋe mo leŋa luupe, u puta tïmö ni uuna laaŋe jï ŋata dwøre leŋŋu? 'Ba ni näk mou leŋa dwør raay, cuŋŋe beeye thøø, 'ba ni näk mou leŋa dwør Jwøk, cuŋŋe beeye bëënynyö. 17'Ba pwøc en jï Jwøk kiper uuni na kwøŋ bëëtö na laaŋe mo raay, uuna tïmö nou leŋa pwöc ki cwïnynyu bäre, mana cïp jïïu, 18ni uuna pät ceŋ raay, ni tïmu ni uuna laaŋe mo gïïa beyø. 19'Ba man caana en, a cäänö keda man wø caan dhaanhe, kiper mana tïme ni teek jïïu ki man laar ci cwïnynyu. 'Ba kawaane cïpu thäk dëëtu jï gïïa beyø nee tïmge ni ena kur keerge na mo Jwøk, kaawat mana kwøŋu thäk dëëtu cïp jï gïï mo patha adïëri ki rääö mo raac døc.

20Kiper kanya poodu ni uuna laaŋe mo raay, u ba bëën gïïa beyø. 21?'Ba kanyøca nø, agïnaŋø na duu japøka ni wïthu olää ki ge kawaane yøø? Cuŋ japøgø beeye thøø. 22'Ba kawaane na nø pät uuni ceŋ raay, ni tïmu na laaŋe mo Jwøk, gïna duue jïïu, uuna tïmö nou ena kur keeru na mo Jwøk, ni cuŋŋe beeye kwøw mana näk adïëri mo bäŋ cuŋŋe. 23Kiper gïï wø mak cer raay beeye thøø, 'ba muuy mana cïp Jwøki beeye kwøw mana näk adïëri mo bäŋ cuŋŋe ki ri Krictø Jecu na näk Kwääyø.

Currently Selected:

Röm 6: AnyuB

Highlight

Copy

Compare