Mathiew 17

Kanya Ö Kït Dëër Jecu Na Wiil Ree

(Maak 9:2-13; Luk 9:28-36)

1'Ba kanya tïme na køør nïne abïciel, Jecu, Piter ki Jeemeth ki coki ma Jøøn akäle ni kïth ge wï kïdi mo bäär na ge keerge. 2Ni røøe nyïmge, ni ö täärnyïme ni tïme ni paŋŋi kaamar cäŋ. Ni tïm abïïe moe ni tar døc. 3Kanyøgø Modhe ki Ilaaja dëëtge anyoothge jïge, ni cäänge ki Jecu.

4Ni kö Piterri jï Jecu, ni «Kwäärö, beer døc kiree na enø kany. 'Ba ni näk miï manynya gø, a doo tïïö ka abïle adäk kany, na aciel kiperï, na aciel kiper Modhe, ni maya kiper Ilaaja.»

5'Ba kanya poode ni cäänö, pöölö mo tar anijïïm bäätge. Ni ö dwølli ki yi pööllögø, ni caana gø, ni «Man beeye Wääda na mëëra ki gø, na met yia ki mare. Wïnynyu luumme.» 6'Ba kanya ö bääge na wïnyge gïnögø, rege aputge gøø piny ni geno lwäyö døc.

7'Ba Jecu aöö ni guun geni, ni kööe, ni «Ööu maal. Käru lwäyö.» 8'Ba na tïŋge wïthge maal, bäŋ dhaanhø mo ege joodø, 'ba beeye Jecu keere.

9'Ba kanya duuge piny ki bäät kïdi, gena kööm Jecu ni kööe, ni «Kär dee ŋat caannu gïna jootu en jïgø, këël mano tïŋ Wär Dhaanhø maal ki yi thøø.»

10Ni ö bääge ni pëënyge gø, na «?Aŋø ni wø kö dïpööye mo ciik Jwøk ni Ilaaja doo kwøŋa öö turu?»

11Ni dwøk gø jïge, ni «Ilaaja kwøŋa öö møn, ni beeye eni noo dwøk jammi bëët kwörge. 12'Ba a cäänna uuni, ni Ilaaja anø öö, ni kärge gø ŋiiø. 'Ba gïïa met yïthge ki ge atïïcge dëëre. Kaawat manøgø thuwø Wär Dhaanhø gïï mo leth ojwøre ceŋge.»

13Kanyøgønø, aci cwïny bääŋi ni eni cäänö kaper Jøøn na näk dïlööy na nyuudhi.

Kanya Ö Jecu Na Køny Nyilaal Mo Ree Da Cet

(Maak 9:14-29; Luk 9:37-43)

14'Ba kanya öge baŋ lwaak, nyen mør aö baŋ Jecu, ni këël cøŋŋe piny nyïme, ni kööe, 15ni «Kwäärö, køny wääda, kiper ree da cet, ni eno ööl ki öölö mo raac døc. Kiper cooth eni wø pätha yi maac, ni päth yi naam. 16'Ba ena käla baŋ bääŋi moï, ni käre løny jïge ki man kønyge gø.»

17Ni løgi ya Jecu, ni «?U na beenhnhø mo bäŋ ŋäädhe jïïu en ni wïthu teek, a këël kany mo nyïëdi nø noo beeda ki uuni? ?Naa këël kany mo nyïëdi noo maa cwïnya ki uuni? Kälu eni baŋa kany.» 18Kanyøgø anäŋŋögø akööm Jecu, ni ö anäŋŋögø wøk. Ni put dëër nyilaalli døø kare.

19Køøre bääŋi aö baŋ Jecu ge keerge, ni köge, na «?Aŋø na ba lønye jïwa ki man riemwa anäŋŋögø wøk?»

20Ni kööe jïge, ni «Kiper ŋäädhe maru thiinh. Adïëri møn, a caana gø jïïu, doo na jïïu da ŋäädhe mo caala nyi waŋ kunhnhö mo thiinh døc, u doo köö jï kïnni, ni ‹Daa riï kaace,› ni dee ree daaø. Ni doo na bäŋ gïn mo dhäthi jïïu en.»#17:20 Täk luubö man nut ki dhi Gïrïïk yïth weet Mathiew møøk moa cääŋŋe: 21 'Ba teeŋ anäŋŋögø bäŋ wø ö wøk jaak, 'ba ö wøk ka lam-wödö keere.

Kanya Ö Jecu Na Caan Thøø Mare Jï Bääge

(Maak 9:30-32; Luk 9:43-45)

22'Ba kanya ö Jecu ki bääge na cooŋge rege kanya ciel dï Galili, ena köö jïge, ni «Wär Dhaanhø ocïp ceŋ jiy, 23ni 'näkge gø. 'Ba ki ri dää nïne eno tïŋ maal ki yi thøø.» Ni ö bääge ni päth cwïnyge døc.

Kanya Ö Jecu Na Cïp Ajwäk Mar Øt Jwøk

24'Ba kanya öge Kapernaam, jø wø jwäk jiy kiper Øt Jwøk Mana Dwøŋ gena ö baŋ Piter, ni köge, na «?Aŋø, dïpööy maru bäŋ wø cïpi ka ajwäk kiper Øt Jwøk?»

25Ni kööe jïge, ni «Wø cïpö.»

'Ba kanya ö Piterri yi øtø, Jecu akwøŋ cäännö ki eni, ni kööe, ni «?Cayman, agïnaŋø na caarï? ?A jøøe ni wø ö nyeye mo piny ni wø lwørge ajwäk baŋge? ?Ge wø käda baŋ wäätge wala baŋ jøøa path?»

26'Ba kanya ö Piterri na dwøk gø, ni «Baŋ jøøa path,» Jecu aköö jïre, «Ni näk ma ennønø, wäätge ege wiiø ni ba jwäkge. 27'Ba kiper nee cwïnyge ba raanynyø, ci naam ni lëëŋŋï ko obïth, ni lwørï rëëyo kwøŋï mak, ni japï dhee. 'Ba ïïno jïtï ki gwel dhee. Gwetøgø wär kälï, ni mëëgï gø geni na kara ki karï.»

Currently Selected:

Mathiew 17: AnyuB

Highlight

Compare

Copy