Bwøth Wøk Luubö Mo Cäänö Kaper Wëël Bwøth Wøk
Luubö Mo Cäänö Kaper Wëël Bwøth Wøk
Luup moa no ogöörö yi wëël Bwøth Wøk ena nyïm luup moa no ogöörö yi wëël Wïlöölö. Luupögø tägi ka køør cwiiri mo jïtö ki dïpe aŋween. 'Ba ki yïth cwiiri moøgø, nyïïkwaac Jeekap, ni beeye Icriel, gena nyaay yi ŋööm Ijep ni tïmge ni thööth døc, këël mana tïm jø Ijepi ni lwäär ki geni ni tïïc geni na laaŋe.
Wëël Bwøth Wøk cäänö kaper gïïa tïïc Jwøki kiper jø Icriel kanya käl geni wøk ki yi ŋööm Ijep, ni beeye paac mana bëëtge yie ni gena laaŋe; ni cäänö kaper gïïa tïïc Jwøki kiperge kanya täkge ki man cääthge dï paap ni ge cøøa paac mana buuk Jwøki jïge. 'Ba ŋata cwøl Jwøki ki man käl geni wøk ki yi ŋööm Ijep beeye Modhe, ni beeye Modhe na bwøth geni kanya cääthge dï paap.
Jø Icriel kanya cääthge dï paap, gena gwøk Jwøki ni cïpe ki cam jïge mo cwøl ni meena, ni kän wøk ki pïï jïge ki yi kïdi, ni cïpe ki rïŋö jïge thuwø mo camge.
'Ba kanya pïïcge tier Kïn Caynay, Jwøk luumme ki ciik moe acaane jï jø Icriel ki ri dhaanhnhe ma Modhe. Ciik moa näk apaar, ki ciik møga bëët, ki pwöc ma teeŋi acaan Jwøki jïge ki ri Modhe. Ni ö luum oduŋkaara thuwø na näk kar bëëtö mar Jwøk, ni beeye kar lam kiper jø Icriel, ni caani ya Modhe jïge ki køør mana caan Jwøki jïre.
'Ba kanya en Modhe bäät kïdi ni wïnynya pwöc mar Jwøk, jø Icriel atïïö ki gïn lamge mo tïïc ka warkey, ni kälge ajäla mo dwøŋ bäätge keerge. 'Ba ki køør kwac mar Modhe, bääyö marge awëën Jwøki.
Køøre jø Icriel oduŋkaara atïïcge kaawat mana caan jïge, ni ö Jwøki ni nyooth ajiem mare jïge yo oduŋkaara.
Luup moa no ogöörö yi wëël Bwøth Wøk beege ii:
Kanya bëët jø Icrielli ni gena laaŋe Ijep (Tielø 1)
Kanya lwaarø ki Modhe ki kanya døøŋŋe (Tiel 2)
Kanya ö Jwøki na cwøl Modhe ni jääŋ gø baŋ Peerø nyeny Ijep (Tiel 3-6)
Kanya ö Jwøki na tïïc gïï mo rëëma ec na ajäla bäät Peerø ki jø Ijep (Tiel 7—10)
Luum Cäŋa Pööth Thøøe Yie, ki kanya ö jø Icrielli wøk ki yi ŋööm Ijep (Tiel 11—13)
Luup gïïa tägö kanya ö jø Icrielli wøk ki yi ŋööm Ijep këël mana pïïcge tier Kïn Caynay (Tiel 14—18)
Kanya ö Jwøki na cïp ciik moa näk apaar ki ciik møga (Tiel 19—23)
Kanya ö Jwøki na tude ki luubö ki jø Icriel (Tiel 24)
Luum oduŋkaara na näk kar bëëtö mar Jwøk (Tiel 25—31)
Kanya ö jø Icrielli na tïïcge warkey na kït nyirøøa ni lamge gø (Tiel 32)
Kanya ö Modhe na dwøk jø Icriel kanya ciel ki Jwøk, ni ö Jwøki ni cäŋ luumma tuude ki geni tïïyö ni nyään (Tiel 33—34)
Kanya ö jø Icrielli na tïïcge oduŋkaara mar Jwøk, ni ö Jwøki ni nyooth ajiem mare yi gø (Tiel 35—40) ø
Currently Selected:
Bwøth Wøk Luubö Mo Cäänö Kaper Wëël Bwøth Wøk: AnyuB
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Ethiopia