Bwøth Wøk 21

1Wuuö Jwøk acäŋ cäänö ki Modhe ni kööe, ni «Moi beege ciik moo peedhï nyïm jø Icriel.

Ciik Kiper Bëët Laaŋe

(Tiet Ciik 15:12-18; Ciik Kiper Dïlämme 25:39-55)

2«Ni näk wadu ma ŋat Ibaru ŋeewï ŋeew na laŋŋø, ï dee tïnynyö ki cwiiri abïciel; 'ba noo tïme na bïriet cwiiri eni doo wiiø ni aae jaak ni bäŋ gïn mo manynyi bääte. 3Ni näk mo ööa eni ki dëëre keere, eni doo aay keere; 'ba ni näk ma dhaanhø mo ööi ka cïïe, eni doo aay ki dhaagø mare. 4'Ba ni näk mo laŋŋø manøgø onyööm kwääye ki dhaagø, ni geno nyöödö ko obwöre ma cwøw wala ma mään, dhaagø manøgø ko obwöre moe doo dööŋ jï kwääye, ni ö eni ni aae keere.

5«'Ba ni näk mo laŋŋø manøgø mare caane caanø ki cwïnye bäre ni kööe, ni ‹Aani a mëër ki kwäärö mara ki dhaagø mara ko obwöre 'moa, naa ba many aay kaamar dhaanhø mo owiiø jaak,› 6kanyøgø nø, eni wär lwør kwääye ni käl gø nyïm jø ŋøl luup. Køøre dee dwøga paac, ni wëëk gø cuŋŋö ro odhuulu wala ri jaath dhi øtø, ni ö kwääye ni thuth ïth gø ki muda; køøre nø, eno put tïnynyö na bäre bäre.

7«'Ba ni näk mo da dhaanhø mo ŋeewa nyaare na ŋat tïïc jï dhaanhø mør, eni ba doo wiiø nee aae jaak kaamar laaŋe moa näk cwøw. 8Ni näk mo dhaaŋŋøgø ojøøl waŋ kwääye na jier gø kiper dëëre, eni dhaaŋŋøgø dee wëëga wïïl wøk. Eni dhaaŋŋøgø ba dee ŋeeø ki jiy mo wëëlle mo path, kiper wï gø akwøŋ maaŋŋø. 9'Ba ni näk mo mare mïëk jï wääde, dee gwøø ki køør kööŋŋö man wø tïïc dhaanhe kiper nyaare. 10Køøre ni näk mo ŋatøgø cäŋa nyöömmö ki dhaagø mør, cere ba doo teek ki man mooc dhaaŋŋa dïkwøŋ ki cam, ka abïï, wala ba dee wiiø ni ba ci baŋ gø na dhaagø. 11'Ba ni näk mo ŋatøgø gïïögø na adäk yøø ba tïïe jï dhaagø manøgø, dhaagø manøgø doo aay jaak, ni bäŋ gwel mo dwøgi.

Ciik Kiper Wëëye

12«Ŋato gøøc dhaanhø mør ni thøøe, ka adïëri møn, eni doo nääö. 13'Ba ni näk mo ba kame, ni gïno wär Jwøki jaak, kanyøgønø, a na Wuuö Jwøk, aano nyuuthi ki kany reŋ ŋatøgø yie. 14'Ba ni näk mo dhaanhø cwïnye ränynyö, ni 'näk wati ki riek waŋ, ŋatøgø këël ree ee kan buut gïn wø cïp olämme bääte mana näk mara cøøn, eni doo lwørø ni nääi.

15«Ŋato gøøc wänni wala menni, ka adïëri møn, eni doo nääö.

16«Ŋato kwal dhaanhø nee ŋeee wala joota cere jaak, ka adïëri møn, eni doo nääö.

17«Ŋato jaany wänni wala menni, ka adïëri møn, eni doo nääö.

18«Ni näk mo jiy ariiø wëër, ni ö dhaanhø acielli dïge ni këël dhaanhø maya ki kïdi, wala gøøya gø ni cere ee miiø, ni kär ŋatøgø thøw, 'ba eni bëëdö ni tuu no obut piny, 19kanyo thëëm dëëre ni ö maal ni caath tiete ni kwömö ka athøra, kanyøgønø ŋata gööyö enøgø dööŋ wøk ni bäŋ gïn mo tïïc dëëre. 'Ba kar kanya beet ŋatøgø piny ni kär tïïö dee coolø, ni tuu gø këël mano jöön dëëre na bäre bäre.

20«Ni näk mo dhaanhø laŋŋø mare ma dïcwøø wala ma dhaagø di pwödö ka athøra ni thøø cere, ŋata pöödö enøgø, bääte da kwör. 21'Ba ni näk mo ŋata pwöt enøgø obëëdö ki dïcäŋ aciel wala nïne ariiø ni kär thøw, ŋatøgø bääte bäŋ kwör; kiper beeye nyeŋ gwete.

22«Ni näk mo jiy ariiø këëdö, ni ö dhaanhø acielli dïge ni cöör dhaagø mo ŋëëte ena maal, ni ö nyilaalli mana en ec ni bwön wøk, këël na bäŋe gïn mo leth mo otägö dëër nyijøøgø, ka adïëri møn, ŋata cöör nyijøøgø enø doo cudö ki jammi moo many cø dhaagø manøgø bääte; ni cool gïïögø ki køør mano ŋøl jø wø ŋøl luup. 23'Ba ni näk mo da gïn mør mo otägö dëër mïïö, doo coolø ki køør mana tägö, kiper jwïëy cool ka jwïëy, 24ni waŋ cool ka waŋ, ni lëëö cool ka lëëö, ni cenø cool ka cenø, ni tielø cool ka tielø, 25ni waaŋ mar maac cool ka waaŋ mar maac, ni gïn mo ena dëël mo leth cool ka gïn mo ena dëël mo leth, ni pöödö cool ka pöödö.

26«Ni näk mo dhaanhø waŋ laŋŋø mare ma dïcwøø wala ma dhaagø ee gøø, ni løy waŋ laŋŋø manøgø, ŋatøgø laŋŋø mare dee wiiø nee aae jaak na kar waŋe na løy. 27Ni näk mo lëëc laŋŋø mare ma dïcwøø wala ma dhaagø ee tëëŋ wøk, eni laŋŋø mare dee wiiø nee aae jaak na kar lëëö mare.

Ciik Kiper Dhieŋ Mo Cööbö

28«Ni näk dhieŋ da dhaanhø ma dïcwøø wala ma dhaagø mo ee cwøbø, ni thøw ŋatøgø, ka adïëri møn, dhieŋ manøgø doo këërö ki kïte ni thøøe; ni ö rïŋŋe ni ba cami. 'Ba wää dhieŋŋi manøgø doo wiiø ni bäŋ gïn mo tïïc dëëre. 29'Ba ni näk mo dhieŋ manøgø wïnni ni cööbö dïkwøŋ cøøn, no ocar jiyi jï wänni nee koore na wøp, ni käri ya ŋatøgø tïïö, ni näk mo dhieŋ manøgø ocööpö ki dhaanhø ma dïcwøø wala ma dhaagø ni thøøe, dhieŋ manøgø doo këërö ki kïte ni thøøe, ni ö wää dhieŋŋi manøgøøni thuwø ni nääi. 30'Ba ni näk mo manynya jap cuut kwör bääte, eni jap cuut kwör moa manynyi bääte yøø, këël thööth ni nyïëdi cøøn, dee cïbö na kar jwïëy moe. 31Ni näk mo dhieŋ manøgø cwøpa nyilaal ma dïcwøø wala ma dhaagø, luubö manøgø doo ŋøla bäät wää dhieŋ manøgø ki køør ciik manøgø na aciel enø. 32Ni näk mo dhieŋ manøgø cwøpa laŋŋø ma dïcwøø wala ma dhaagø, wää dhieŋ manøgø doo cïpö ki gwel ma pïëradäk mo gwel-bïrö jï kwääc laŋŋø manøgø, ni ö dhieŋŋi manøgø ni këëri ki kïte ni thøøe.

33«Ni näk mo dhaanhø buur di jabø, wala mare koony ki buur ni wec gø jaak ni käre uumö, ni ö dhieŋ wala arëën ni päth yi buur manøgø, 34wää buurri manøgø doo cudö; eni doo cïpö ki gwel jï wää lääyi, ni ö dëër mana no othøw ni dööŋ jïre.

35«Ni näk mo da dhieŋ mar dhaanhø ni cwøp dhieŋ mar dhaanhø mør ni thøøe, dhieŋ mano kwøw enø dege dwøga pwödhö ni pääŋge gwete ni röömi; ni pääŋge dëër dhieŋ mana no othøw thuwø. 36'Ba ni näk mo dhieŋ manøgø ŋäc ni wïnni ni cööbö dïkwøŋ cøøn, ni käri ya wänni koorø na wøp, ka adïëri møn, wää dhieŋŋi manøgø doo cudö ki dhieŋ na kar dhieŋ, ni ö dëër mana no othøw ni dööŋe jïre.

Currently Selected:

Bwøth Wøk 21: AnyuB

Highlight

Copy

Compare