Moa Tïïc Nyïïatwieli 7
7
Kanya Ö Ectipen Na Dwøk Luubö Jï Kwääc Laam
1Kanyøgø Kwääy Lam Mana Dwøŋ aköö jï Ectipen, ni «?Luupögø acaanï møn?»
2'Ba Ectipen aköö, «Nyie, nyïïmera ki wëëga, cegu ïthu ki luumma. Jwø ajiem ree anyoodhe jï kwarø ma Eeberam, kanya bëëde yi Mecöpatemia, ni eni poot kär ci yi Aaren. 3Ni kööe jïgø, ni ‹Dagï kany ni weyï pou ki tuuŋu, ni ciï paano nyoodha jïrï.›#Wïlöölö 12:1 4Kanyøgø ena put daa ni wec po jø Kaldia, ni daa yi Aaren. 'Ba køør thøw wänni, ena daak Jwøki kaace ni käl gø paani ni bëëdu yie ennø. 5'Ba eni poot kär mooc Jwøki ki ŋøøm, këël nyi kany mo thiinh mo caala kar tier dhaanhø. 'Ba ena buŋ Jwøki ni eni di mooø ki ŋøøm ma moe ki nyïïkwaaye moo ööi køøre, këël na bëëde ni bäŋ nyilaal jïre. 6'Ba acaan Jwøki na ennønø jïre, ni ‹Nyïïkwaayï otïmö ni path po jø møøk, ni ö jøøgø ni tïïcge ge na laaŋe ni caange ge ki cwiiri ma dïpe aŋween.› 7'Ba Jwøk aköö, ni ‹Jø paano tïnyge, oŋøla wøk. 'Ba noo näk køøre geno ö wøk ni wøørge aani kany.›#Wïlöölö 15:13-14; Bwøth Wøk 3:12 8Ni wëëk Eeberam daŋ na ŋïï mar luubö mana tuut. 'Ba Eeberam wääde ma Aydhak anywøle, ni daŋ gø kanya tïm nïre na abära wøk. Ni ö Aydhaki ni nywøl wääde ma Jeekap. Ni ö Jeekapi ni nywøl kwäre na näk apaar kurriiø.
9«'Ba kwäre moøgø gena keeyø kiper o wääge ma Jocep, ni gathge eni baŋ jø Ijep. 'Ba Jwøk abëëdö buute, 10ni piem gø yïth gïïa leth bëët na pïï dëëre, ni døøc wï gø mo leer nyïm Peerø nyeny Ijep, ni wëëk Peerø mëëyö ki gø, ni put gø tïïc na kwäärö bäät Ijep, ki bäät paare bäre. 11'Ba kanyøgø Ijep ki Keenan bäre ajïtö ki meel mo päl, ki gïï mo leth døc. Ni tïm kwäyø ni bäŋ cam mo maarge joot. 12'Ba Jeekap na wïny gø ni da beel Ijep, kwäyø ajääŋŋe tietge mana dïkwøŋ. 13'Ba na cäŋge døøgø, Jocep ree anyoodhe jï uutwänni. Ni ö tuuŋ Jocepi ni tïmge ni ŋäc Peerø. 14Ni ö Jocepi ni jääk baŋ wänni ma Jeekap ni cwöl gø baŋe, ki tuuŋge bëët, ni gena jiy ma pïërabïriiø kurbïïc. 15Køøre Jeekap aci Ijep, ni thøø kunöce, eni ki kwäyø bëët. 16Ni ö rïŋ dëëtge ni dwøgi Cekam, ni pïëlge geni yi kään kïdi mana näk oŋeew Eeberammi ki gwel baŋ wäät Eemör yi Cekam.
17«'Ba na cään kanya wäŋŋi na näk obuuö na wëëk Jwøki Eeberam, jø pøø athöönhnhö ni meetge rege yi Ijep, 18gøøc mana ö nyeya mørri mo Jocep kuue na thïïŋi Ijep. 19Ni tïïc jø pøø ka amala, ni mak kwäyø ki teek nee nyïïge wetge, kiper nee ba bëëtge ni kwøw. 20'Ba kaagø Modhe alwaarø ki gø, ni eni mïërö jï Jwøk. Ni bëëde köör menni ki dwäde adäk yi øt wänni. 21'Ba køøre na kïthi wøk, ena käl nyi Peerø ni tïïc gø na wääde. 22Ni ö Modhe ni pwönynyi ki gïïa ŋäc jø Ijepi bëët, ni tïme ni teek ki tïïc ki cäänö.
23«'Ba kanya døøŋŋe ni cwiiye pïëraŋween, gïr nyïïmenni ma wäät Icriel apïï cwïnye ki man lïïmme baŋge. 24'Ba na neen dhaanhø aciel dïge ni di caarø, ŋata caari acwaae, ni put nyï Ijep 'näk ni coola kwör ŋatøgø. 25Ni ee caarø ni doo ŋäc jø poge ni geno piem Jwøki ki køøre. 'Ba kärge caarø. 26'Ba na tïme na aruunnø man, jø Icriel ariiø acwäne ni ge wëër, ni thääk ge ni manynya man dwal geni, ni kööe, ‹Nyie jaay, uuna nyïïmëëe. ?Aŋø ni raanynyu røgu keeru en?› 27'Ba ŋata bääyö yïthakic jøøgø na ariiø yøø, Modhe athanye, ni kööe, na ‹?Aŋø, ïïno tïïya ŋa na kwäärö wala dïŋut luup bäätwa? 28?Ï manynya gø naa 'nägï kaawat nyï Ijep mana awääre na 'nägï?›#Bwøth Wøk 2:14 29'Ba Modhe na wïny gïnögø, aput päär wøk, ni put bëëte wøgø yi ŋööm Midien. Ni nywøl wääte ariiø paanøce.
30«'Ba na tïme na køør cwiiri ma pïëraŋween, nyïïatwiel maal mør ree anyoodhe jïre paap buut Kïn Caynay, ya abuŋŋö mo liel ki maac. 31'Ba na neeni ya Modhe yie athäŋŋö ki gïna joode. 'Ba na nyiik buut gø kany mo cään kiper nee neene døc, dwør Wuuö Jwøk awïnynye ni köö, 32ni ‹Aana Jwø kwäyï, na näk Jwø Eeberam, ki Aydhak, ki Jeekap.›#Bwøth Wøk 3:6 'Ba Modhe dëëre atïmö ni miel, ni lwäye ki man cäŋ gø neennø. 33'Ba Wuuö Jwøk aköö ki eni, ni ‹Käl war wøk tietï, kiper kany ni cuŋŋï yie en, ena kur keere na mar Jwøk. 34Ka adïëri møn, aani, gïïa reyø ni wø tïïc dëët jiya na en yi Ijep aneena døøc, ni wïnynya cooyø marge, ni beeye ni ööa piny en nee ge piema. 'Ba ennø, ööï nø, niï jääŋŋa Ijep.›#Bwøth Wøk 3:5, 7, 8, 10
35«'Ba Modhe manøgø na kwøŋ jø Icrielli kwier, na köge ki eni, ni ‹?Ïïno tïïya ŋa na kwäärö wala dïŋut luup bäätwa?› beeye na jääŋ Jwøki na kwäärö ni näk pïëmi, ki køør nyïïatwiel maal mana nyooth dëëre jïgø ya abuŋŋö. 36Ni bwøth jø Icriel wøk ni tïïe ki gïï mo rëëma ec ki ŋïïce yi Ijep, ki bäät Naama Kwaar, ki dï paap ki yïth cwiiri ma pïëraŋween. 37Ni beeye Modhe manøgø na köö jï jø Icriel, ni ‹Jwøk uuno thïïŋŋe ki nyikuŋ Jwøk røk nyïïmëëgu, kaawat mana thïïŋ aani.›#Tiet Ciik 18:15 38Ni beeye eni na nut ya acooŋ Jwøk dï paap, ge ki kwäyø, ki nyïïatwiel maal na cäänö ki eni bäät Kïn Caynay, ni beeye ŋata wëëk luup mo kwøw eni nee mëëk øøni. 39'Ba kwäyø gena kweer ki man leŋge mare, ni køøge gø kur keere, ni cwïnyge poot manynya Ijep. 40Ni köge ka Aran, ni ‹Tïmï jïïø ki juu nee cääthge nyïmmø. Kiper Modhe manøgø na käl øøni wøk ki yi ŋööm Ijep, gïna tägö dëëre kuuø.›#Bwøth Wøk 32:1 41Ni tïmge ki kït gïn wø lam mo caala nyirøøa yïth nïrögø ni cïpge ko olämme jïgø, ni mïn yïthge kiper gïïa tïïcge ki ceŋge. 42'Ba Jwøk ree aløøe ni wëëk geni lam gïïa thööth na en maal, kaawat mana gööri yi wëël nyïïkuk Jwøk,
«na ‹?Aŋø, u na jø Icriel, olämme ki muuce moa cïïmmu
ki yïth cwiiri moa näk pïëraŋween dï paap, cïpu jïra na bëëde?
43'Ba beeye oduŋkaany jwøa cwøl ni Möløk na kääru,
ki cëërö mar jwøu ma Reepan,
ni beege gïïa tïïyu nee wøørru.
'Ba uuno daaa ŋää Babiløn.›#Amøc 5:25-27
44«'Ba kwäyø oduŋkaany wø køp gïr Jwøk ena jïge dï paap, keda mana caani ya Wuuö Jwøki jï Modhe nee tïïe ki køør gïna neene. 45Ni ö kwäyø ni läwge gø kälö ki Jøcua, kanya macge mïëri moa näk wëëkge oriem Jwøki wøk nyïmge. Ni put bëëte na enøgønø gøøc yïth nïr Deebit, 46ŋata mëër Jwøki ki gø, na pëëö nee tïïe ki kar bëëtö jï Jwø Jeekap. 47'Ba beeye Cølöman na gëëdö ki øtø jïgø. 48'Ba Jwøa Dwøŋ ni en Maal bäŋ wø bëëdö yïth uudi mo geer ka ceŋ, keda mana caani ki dhi nyikuŋ Jwøk,
49«ni Wuuö Jwøk aköö, ni ‹Maalø beeye wälu mara,
ni ö pinynyi ni näk køøm tieta.
?A øda ŋø na dou geerø jïra?
?Wala a kanya ŋø na daa jwöm raa yie?
50?Aŋø, paa cera na tïïc japøgø bëët?›#Aydheea 66:1-2
51«U jø wïthu teek en, nou patha odaŋø ki yïth cwïnynyu ki ïthu en, cooth u wø kweeyø ki Jwïëc Jwøk na en kur keere. Keda mana kwøŋ kwäyu tïïc, beeye eni ni tïïyu en thuwø. 52?A nyikuŋ Jwøk mane na kär caar kwäyu? Geni, jøøa køp ööny ŋata mare beer kanya poode anäkge, 'ba uuni nø, ŋatøgø acïbu ceŋ nyïïmän ni 'nägu gø, 53u na wëëk ciik Jwøk uuni na öö ki køør nyïïatwiet maal, ni käru gø gwøø.»
Kanya Këër Ectipen Ki Kïte
54'Ba na wïnyge gïïögø, gena gootø døc ni kaacge lakge kipere. 55'Ba Ectipen na cwïnye päŋ ki Jwïëc Jwøk na en kur keere, maal anëëne ni joot ajiem Jwøk, ni Jecu cuŋŋa bäät cwïï Jwøk. 56Ni kööe, ni «Neennu, maal ajooda ni ree ee jabø, ni Wär Dhaanhø cuŋŋa bäät cwïï Jwøk» 57'Ba gena rëëdö døc ki dwøl mo päl ni mecge ïthge ni läätge bäät gø bëët. 58Ni peege gø wøk ŋää paac ni këërge gø ki kïte. 'Ba jøøa këër gø, abïïkge awiige buut nyen ma wøp mo nyeŋŋe Cøøl. 59'Ba kanya pootge ni ge këëra Ectipen, Ectipen alämö, ni kööe, ni «Kwäärö Jecu, lwør jwïëya.» 60Ni këël cøŋŋe piny ni kööe ki dwøl mo päl, ni «Kwäärö, kär gïn ni baacge en wiiï bäätge.» 'Ba na nø caan gïnögø, ena thøw.
Currently Selected:
Moa Tïïc Nyïïatwieli 7: AnyuB
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Ethiopia
Moa Tïïc Nyïïatwieli 7
7
Kanya Ö Ectipen Na Dwøk Luubö Jï Kwääc Laam
1Kanyøgø Kwääy Lam Mana Dwøŋ aköö jï Ectipen, ni «?Luupögø acaanï møn?»
2'Ba Ectipen aköö, «Nyie, nyïïmera ki wëëga, cegu ïthu ki luumma. Jwø ajiem ree anyoodhe jï kwarø ma Eeberam, kanya bëëde yi Mecöpatemia, ni eni poot kär ci yi Aaren. 3Ni kööe jïgø, ni ‹Dagï kany ni weyï pou ki tuuŋu, ni ciï paano nyoodha jïrï.›#Wïlöölö 12:1 4Kanyøgø ena put daa ni wec po jø Kaldia, ni daa yi Aaren. 'Ba køør thøw wänni, ena daak Jwøki kaace ni käl gø paani ni bëëdu yie ennø. 5'Ba eni poot kär mooc Jwøki ki ŋøøm, këël nyi kany mo thiinh mo caala kar tier dhaanhø. 'Ba ena buŋ Jwøki ni eni di mooø ki ŋøøm ma moe ki nyïïkwaaye moo ööi køøre, këël na bëëde ni bäŋ nyilaal jïre. 6'Ba acaan Jwøki na ennønø jïre, ni ‹Nyïïkwaayï otïmö ni path po jø møøk, ni ö jøøgø ni tïïcge ge na laaŋe ni caange ge ki cwiiri ma dïpe aŋween.› 7'Ba Jwøk aköö, ni ‹Jø paano tïnyge, oŋøla wøk. 'Ba noo näk køøre geno ö wøk ni wøørge aani kany.›#Wïlöölö 15:13-14; Bwøth Wøk 3:12 8Ni wëëk Eeberam daŋ na ŋïï mar luubö mana tuut. 'Ba Eeberam wääde ma Aydhak anywøle, ni daŋ gø kanya tïm nïre na abära wøk. Ni ö Aydhaki ni nywøl wääde ma Jeekap. Ni ö Jeekapi ni nywøl kwäre na näk apaar kurriiø.
9«'Ba kwäre moøgø gena keeyø kiper o wääge ma Jocep, ni gathge eni baŋ jø Ijep. 'Ba Jwøk abëëdö buute, 10ni piem gø yïth gïïa leth bëët na pïï dëëre, ni døøc wï gø mo leer nyïm Peerø nyeny Ijep, ni wëëk Peerø mëëyö ki gø, ni put gø tïïc na kwäärö bäät Ijep, ki bäät paare bäre. 11'Ba kanyøgø Ijep ki Keenan bäre ajïtö ki meel mo päl, ki gïï mo leth døc. Ni tïm kwäyø ni bäŋ cam mo maarge joot. 12'Ba Jeekap na wïny gø ni da beel Ijep, kwäyø ajääŋŋe tietge mana dïkwøŋ. 13'Ba na cäŋge døøgø, Jocep ree anyoodhe jï uutwänni. Ni ö tuuŋ Jocepi ni tïmge ni ŋäc Peerø. 14Ni ö Jocepi ni jääk baŋ wänni ma Jeekap ni cwöl gø baŋe, ki tuuŋge bëët, ni gena jiy ma pïërabïriiø kurbïïc. 15Køøre Jeekap aci Ijep, ni thøø kunöce, eni ki kwäyø bëët. 16Ni ö rïŋ dëëtge ni dwøgi Cekam, ni pïëlge geni yi kään kïdi mana näk oŋeew Eeberammi ki gwel baŋ wäät Eemör yi Cekam.
17«'Ba na cään kanya wäŋŋi na näk obuuö na wëëk Jwøki Eeberam, jø pøø athöönhnhö ni meetge rege yi Ijep, 18gøøc mana ö nyeya mørri mo Jocep kuue na thïïŋi Ijep. 19Ni tïïc jø pøø ka amala, ni mak kwäyø ki teek nee nyïïge wetge, kiper nee ba bëëtge ni kwøw. 20'Ba kaagø Modhe alwaarø ki gø, ni eni mïërö jï Jwøk. Ni bëëde köör menni ki dwäde adäk yi øt wänni. 21'Ba køøre na kïthi wøk, ena käl nyi Peerø ni tïïc gø na wääde. 22Ni ö Modhe ni pwönynyi ki gïïa ŋäc jø Ijepi bëët, ni tïme ni teek ki tïïc ki cäänö.
23«'Ba kanya døøŋŋe ni cwiiye pïëraŋween, gïr nyïïmenni ma wäät Icriel apïï cwïnye ki man lïïmme baŋge. 24'Ba na neen dhaanhø aciel dïge ni di caarø, ŋata caari acwaae, ni put nyï Ijep 'näk ni coola kwör ŋatøgø. 25Ni ee caarø ni doo ŋäc jø poge ni geno piem Jwøki ki køøre. 'Ba kärge caarø. 26'Ba na tïme na aruunnø man, jø Icriel ariiø acwäne ni ge wëër, ni thääk ge ni manynya man dwal geni, ni kööe, ‹Nyie jaay, uuna nyïïmëëe. ?Aŋø ni raanynyu røgu keeru en?› 27'Ba ŋata bääyö yïthakic jøøgø na ariiø yøø, Modhe athanye, ni kööe, na ‹?Aŋø, ïïno tïïya ŋa na kwäärö wala dïŋut luup bäätwa? 28?Ï manynya gø naa 'nägï kaawat nyï Ijep mana awääre na 'nägï?›#Bwøth Wøk 2:14 29'Ba Modhe na wïny gïnögø, aput päär wøk, ni put bëëte wøgø yi ŋööm Midien. Ni nywøl wääte ariiø paanøce.
30«'Ba na tïme na køør cwiiri ma pïëraŋween, nyïïatwiel maal mør ree anyoodhe jïre paap buut Kïn Caynay, ya abuŋŋö mo liel ki maac. 31'Ba na neeni ya Modhe yie athäŋŋö ki gïna joode. 'Ba na nyiik buut gø kany mo cään kiper nee neene døc, dwør Wuuö Jwøk awïnynye ni köö, 32ni ‹Aana Jwø kwäyï, na näk Jwø Eeberam, ki Aydhak, ki Jeekap.›#Bwøth Wøk 3:6 'Ba Modhe dëëre atïmö ni miel, ni lwäye ki man cäŋ gø neennø. 33'Ba Wuuö Jwøk aköö ki eni, ni ‹Käl war wøk tietï, kiper kany ni cuŋŋï yie en, ena kur keere na mar Jwøk. 34Ka adïëri møn, aani, gïïa reyø ni wø tïïc dëët jiya na en yi Ijep aneena døøc, ni wïnynya cooyø marge, ni beeye ni ööa piny en nee ge piema. 'Ba ennø, ööï nø, niï jääŋŋa Ijep.›#Bwøth Wøk 3:5, 7, 8, 10
35«'Ba Modhe manøgø na kwøŋ jø Icrielli kwier, na köge ki eni, ni ‹?Ïïno tïïya ŋa na kwäärö wala dïŋut luup bäätwa?› beeye na jääŋ Jwøki na kwäärö ni näk pïëmi, ki køør nyïïatwiel maal mana nyooth dëëre jïgø ya abuŋŋö. 36Ni bwøth jø Icriel wøk ni tïïe ki gïï mo rëëma ec ki ŋïïce yi Ijep, ki bäät Naama Kwaar, ki dï paap ki yïth cwiiri ma pïëraŋween. 37Ni beeye Modhe manøgø na köö jï jø Icriel, ni ‹Jwøk uuno thïïŋŋe ki nyikuŋ Jwøk røk nyïïmëëgu, kaawat mana thïïŋ aani.›#Tiet Ciik 18:15 38Ni beeye eni na nut ya acooŋ Jwøk dï paap, ge ki kwäyø, ki nyïïatwiel maal na cäänö ki eni bäät Kïn Caynay, ni beeye ŋata wëëk luup mo kwøw eni nee mëëk øøni. 39'Ba kwäyø gena kweer ki man leŋge mare, ni køøge gø kur keere, ni cwïnyge poot manynya Ijep. 40Ni köge ka Aran, ni ‹Tïmï jïïø ki juu nee cääthge nyïmmø. Kiper Modhe manøgø na käl øøni wøk ki yi ŋööm Ijep, gïna tägö dëëre kuuø.›#Bwøth Wøk 32:1 41Ni tïmge ki kït gïn wø lam mo caala nyirøøa yïth nïrögø ni cïpge ko olämme jïgø, ni mïn yïthge kiper gïïa tïïcge ki ceŋge. 42'Ba Jwøk ree aløøe ni wëëk geni lam gïïa thööth na en maal, kaawat mana gööri yi wëël nyïïkuk Jwøk,
«na ‹?Aŋø, u na jø Icriel, olämme ki muuce moa cïïmmu
ki yïth cwiiri moa näk pïëraŋween dï paap, cïpu jïra na bëëde?
43'Ba beeye oduŋkaany jwøa cwøl ni Möløk na kääru,
ki cëërö mar jwøu ma Reepan,
ni beege gïïa tïïyu nee wøørru.
'Ba uuno daaa ŋää Babiløn.›#Amøc 5:25-27
44«'Ba kwäyø oduŋkaany wø køp gïr Jwøk ena jïge dï paap, keda mana caani ya Wuuö Jwøki jï Modhe nee tïïe ki køør gïna neene. 45Ni ö kwäyø ni läwge gø kälö ki Jøcua, kanya macge mïëri moa näk wëëkge oriem Jwøki wøk nyïmge. Ni put bëëte na enøgønø gøøc yïth nïr Deebit, 46ŋata mëër Jwøki ki gø, na pëëö nee tïïe ki kar bëëtö jï Jwø Jeekap. 47'Ba beeye Cølöman na gëëdö ki øtø jïgø. 48'Ba Jwøa Dwøŋ ni en Maal bäŋ wø bëëdö yïth uudi mo geer ka ceŋ, keda mana caani ki dhi nyikuŋ Jwøk,
49«ni Wuuö Jwøk aköö, ni ‹Maalø beeye wälu mara,
ni ö pinynyi ni näk køøm tieta.
?A øda ŋø na dou geerø jïra?
?Wala a kanya ŋø na daa jwöm raa yie?
50?Aŋø, paa cera na tïïc japøgø bëët?›#Aydheea 66:1-2
51«U jø wïthu teek en, nou patha odaŋø ki yïth cwïnynyu ki ïthu en, cooth u wø kweeyø ki Jwïëc Jwøk na en kur keere. Keda mana kwøŋ kwäyu tïïc, beeye eni ni tïïyu en thuwø. 52?A nyikuŋ Jwøk mane na kär caar kwäyu? Geni, jøøa køp ööny ŋata mare beer kanya poode anäkge, 'ba uuni nø, ŋatøgø acïbu ceŋ nyïïmän ni 'nägu gø, 53u na wëëk ciik Jwøk uuni na öö ki køør nyïïatwiet maal, ni käru gø gwøø.»
Kanya Këër Ectipen Ki Kïte
54'Ba na wïnyge gïïögø, gena gootø døc ni kaacge lakge kipere. 55'Ba Ectipen na cwïnye päŋ ki Jwïëc Jwøk na en kur keere, maal anëëne ni joot ajiem Jwøk, ni Jecu cuŋŋa bäät cwïï Jwøk. 56Ni kööe, ni «Neennu, maal ajooda ni ree ee jabø, ni Wär Dhaanhø cuŋŋa bäät cwïï Jwøk» 57'Ba gena rëëdö døc ki dwøl mo päl ni mecge ïthge ni läätge bäät gø bëët. 58Ni peege gø wøk ŋää paac ni këërge gø ki kïte. 'Ba jøøa këër gø, abïïkge awiige buut nyen ma wøp mo nyeŋŋe Cøøl. 59'Ba kanya pootge ni ge këëra Ectipen, Ectipen alämö, ni kööe, ni «Kwäärö Jecu, lwør jwïëya.» 60Ni këël cøŋŋe piny ni kööe ki dwøl mo päl, ni «Kwäärö, kär gïn ni baacge en wiiï bäätge.» 'Ba na nø caan gïnögø, ena thøw.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Ethiopia