ରୋମୀ 6
6
ଖ୍ରୀସ୍ତ୍କି ଦ୍ୱାର୍ନୁ ପାପ୍ଘି ବନ୍ଧନ୍ତି ମୁକ୍ତି
1ତା ନାମ୍ ଏନ୍ଦେର୍ ତେଙ୍ଗତ୍? କା ନାମ୍ ପାପ୍ କାମ୍ତେରତ୍ ତାକା ପାର୍ମେଶ୍ୱାର୍ସ୍କି କ୍ରିପା ବାଢ଼୍ର୍ତେ ରୋ? 2ବିଲ୍କୁଲ୍ ମାଲ୍ଲା! ଯଦି ନାମ୍ ପାପ୍ଘି ଚାଲ୍ତେ କେଚ୍ଚକାତ୍ କେର୍କାଦାତ୍ ଆରୁ ପାପ୍ଘି ସମ୍ବନ୍ଧତୀ ପୁରାପୁରୀ ଭିନେ ମାନ୍ଚ୍କାତ୍ କେର୍କାଦାତ୍ ତା ନାମ୍ ଏସ୍କେ ପାପ୍ କାମିକିରି ଉଜ୍ଜାଅଙ୍ଗତ୍? 3ଆରୁ ନିମ୍ ବାଲ୍ଦାର୍ କାଁଏ କା ନାମ୍, ଯେତ୍କ ଆଲାର୍ ଯୀଶୁ ଖ୍ରୀସ୍ତ୍କି ଆସ୍ନାନ୍ ଅଚ୍ଚକାଦାତ୍, ଆସ୍କି ମରନ୍ଘିହି ଆସ୍ନାନ୍ ଅଚ୍ଚକାଦାତ୍। 4ହୁଦ୍ଘିଲାଗାନ୍ ଆସ୍କି ମରନ୍ଘି ଆସ୍ନାନ୍ ହାଖ୍ଖନାଘି ଦ୍ୱାର୍ନୁ ନାମ୍ ଆସ୍ଗାନେ କେଚ୍ଚକାତ୍ କେର୍କାତ୍ ତାକା ଏସ୍କେ ଯୀଶୁ ଖ୍ରୀସ୍ତ୍ ପାର୍ମେଶ୍ୱାର୍ସ୍କି ମାହିମାତି କେଚ୍ଚକାନ୍ତି ଉଜ୍ଜତାକେରା, ଆନ୍ନେନ୍ ନାମ୍ହି ପୁନା ଜୀବନ୍ ଲେଖା ଚାଲ୍ରତ୍। 5ଯେତ୍କବାକେନ୍ ନାମ୍ ଆସ୍କି ମରନ୍ନୁ ଆସ୍ଗାନେ ରାଚ୍କାତ୍ ତା ଏସ୍କିନ୍ଭି ଆସ୍ ଲେଖା ଜୀଉଠ୍ର୍ରିକିରି ଉଜ୍ଜତ୍। 6ନାମ୍ ଆହ୍ଦାତ୍ କା ନାହ୍ମାଏ ଆଘ୍ଲିନ୍ତା ପାପ୍ କାମ୍ନାଘି ସାଭାବ୍ ଯୀଶୁ ଖ୍ରୀସ୍ତ୍ସ୍ଗାନେ କ୍ରୁଶ୍ନୁ ଆର୍ଗ୍ତାଚା କେରା ତାକା ପାପ୍ ନାହ୍ମା ଜୀଆନୁ ଶାସନ୍ ମା କାମ ଆରୁ ନାମ୍ ପାପ୍ଘି ଗୁତ୍ତିୟା ମା ମାନତ୍। 7ଏନ୍ଦେର୍ଗେକା ଏକାସ୍ ଯୀଶୁ ଖ୍ରୀସ୍ତ୍ଗାନେ କେଚ୍ଚାସ୍କେରାସ୍, ଆସ୍ ପାପ୍ତି ଛୁଟ୍କାରା ହାଖ୍ଖୀକିରି, ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ଠାହ୍ରାବାକେରା। 8ଖ୍ରୀସ୍ତ୍ସ୍ ମରନ୍ତି ଜୀଉଠ୍ରାସ୍ ହୁଦ୍ଘିଲାଗାନ୍ ଆସ୍ ଏକ୍ଲାହି ମା ଖିଦାସ୍। ଆରୁ ନାହ୍ମା ବିଶ୍ୱାସ୍ ରାଇ ତା ନାମ୍ ଆସ୍ଗାନେ ଉଜ୍ଜତ୍ହି। 9ଏନ୍ଦେର୍ଗେକା ନାମ୍ ଆହ୍ଦାତ୍ କା ଖ୍ରୀସ୍ତ୍ସ୍ କେଚ୍ଚ୍କାସ୍ତି ଉଜ୍ଜିୟାସ୍ କେରାସ୍ ଇସ୍ ଏକ୍ଲାହି ମା ଖିଦାସ୍। ଆସ୍କି ମିଆଁ ଆରୁଅହନ୍ ମରନ୍ଘି ହକ୍ ମାଲ୍ଲାଦିନ୍। 10ପାପ୍ଘି ହିସାବ୍ ଚୁକାବାନାଘି ଲାଗାନ୍ ଖ୍ରୀସ୍ତ୍ସ୍ ଅହ୍ନାସାରେନ୍ କେଚ୍ଚାସ୍କେରାସ୍ ଆରୁ ଆକ୍କୁନ୍ ଆସ୍ ପାର୍ମେଶ୍ୱାର୍ସ୍କି ଲାଗାନ୍ହି ଉଜ୍ଜଦାସ୍। 11ଇଦ୍ଘି ଲେଖା ନିମ୍ ନିଜର୍ ଲାଗାନ୍ହି ସୋଚା କା ନିମ୍ ପାପ୍ଘି ଚାଲ୍ତେ କେଚ୍ଚକାର୍ କେର୍କାଦାର୍ ଆରୁ ପାପ୍ଘି ସମ୍ବନ୍ଧତି ପୁରାପୁରୀ ଭିନେ ମାନ୍ଚ୍କାର୍ କେର୍କାଦାର୍। ଆରୁ ଖ୍ରୀସ୍ତ୍ ଯୀଶୁସ୍କିନୁ ପାର୍ମେଶ୍ୱାର୍ସ୍କି ଲାଗାନ୍ ଉଜ୍ଜତ୍।
12ହୁଦ୍ଘିଲାଗାନ୍ ନିହ୍ମାଏ ନାଶ୍ ମାନ୍ନାବାଲା ଶରୀର୍ନୁ ପାପ୍ବନ୍ ଶାସନ୍ କାମାଗେ ଆମା ଚିଆ। ତାକା ନିମ୍ ପାପ୍ଘି ଇଚ୍ଛାନୁ ଏକ୍ଲାହି ଆମା ଚାଲ୍ରା। 13ନିହ୍ମାଏନୁ ପାପ୍ଘି ଶାସନ୍ ମା ମାନି ଏନ୍ଦେର୍ଗେକା ନିମ୍ ନିୟମ୍ଘି ଅଧିନ୍ନୁ ମାଲ୍ଲା ଉଜ୍ଜୁର୍ ବରନ୍ ପାର୍ମେଶ୍ୱାର୍ସ୍କି କ୍ରିପାଘି ଅଧିନ୍ନୁ ଉଜ୍ଜାଲ୍ଦାର୍। 14ପାପ୍ ଆରୁ ନିହ୍ମା ଅଧିନ୍ନୁ ମାଲ୍ଲାଦିନ୍ ନିମ୍ ନିୟମ୍ଘି ଅଧିନ୍ନୁ ଆରୁ ମା ରାଦାର୍ ଆଦ୍ଘି ବାଦ୍ଲା ନିମ୍ ପାର୍ମେଶ୍ୱାର୍ସ୍କି କ୍ରିପାଘି ଅଧିନ୍ନୁ ରାଦାର୍।
ପାର୍ମେଶ୍ୱାର୍ସିନ୍ ରୀଜ୍ଝୁ କାମ୍ନାବାଲା ନାଲ୍ଖୁ କାମ୍ତେ ରା
15ନାମ୍ ନିୟମ୍ଘି ଅଧିନ୍ନୁ ମାଲ୍କାତିନ୍, ଲେକିନ୍ ପାର୍ମେଶ୍ୱାର୍ସ୍ କ୍ରିପାଘି ଅଧିନ୍ନୁ ରାଦାତ୍? ତା ନାମ୍ ପାପ୍ କାମତ୍ କାଁଏ? ବିଲ୍କୁଲ୍ ମାଲ୍ଲା! 16ନିମ୍ ବାଲ୍ଦାର୍ କାଁଏ ଯଦି ଅଣ୍ଟାସ୍ ଗୁତ୍ତିୟା ମାନାଗେ ଚାହଁଦାସ୍ ତା ଆସ୍ ତାଙ୍ଘା ମାଲିକ୍ସ୍କି କାତ୍ଥାନ୍ ମାନ୍ଦାସ୍। ଯଦି ନିମ୍ ପାପ୍ଘି କାତ୍ଥାନ୍ ମାନ୍ଦାର୍ ତା, ନିମ୍ ପାପ୍ଘି ସେବକ୍ ମାନ୍ଦାର୍ କାଦାର୍ ତା ପାପ୍ ନିମାନ୍ ମରନ୍ ତାରା ହୋଇକାଇ। ଆରୁ ନିମ୍ ପାର୍ମେଶ୍ୱାର୍ସ୍କି କାତ୍ଥାନ୍ ମାନ୍ଦାର୍ ତା ଆଦ୍ ପାର୍ମେଶ୍ୱାର୍ସ୍କି ନଜର୍ନୁ ବାନେ ଜୀବନ୍ ଉଜ୍ଜନାତାରା ହୋଇକାଇ। 17ପାର୍ମେଶ୍ୱାର୍ସ୍କେ ଧାନ୍ୟାବାଦ୍ ଚିଦାନ୍! କା ନିମ୍ ଜାମାର୍ ଏକାର୍ ଆଘ୍ଲି ପାପ୍ଘି ଗୁତ୍ତିୟା ରାଚ୍କାର୍ ଲେକିନ୍ ଆକ୍କୁନ୍ ପୁରାପୁରୀ ଜୀଆତି ଆ ଶିକ୍ଷାଘି ପାବୁନୁ ଏକାଲ୍ଦାର୍ ଏକାନ୍ ନିମାନ୍ ଚିଆ କେର୍କିଚି। 18ନିମାଗେ ପାପ୍ଘି ବନ୍ଧନ୍ତି ଛୁଟ୍ର୍କାରା ହାଖ୍ଖରା ଆରୁ ନିମ୍ ପାର୍ମେଶ୍ୱାର୍ସ୍କି ନଜର୍ନୁ ବାନେ ନାଲ୍ଖୁଘି ସେବକ୍ ମାନ୍ଚ୍କାର୍ କେର୍କାଦାର୍। 19ଏନ୍ ନିହ୍ମାଏ ଶରୀର୍ଘି କମ୍ଜୋରିଘି ଲାଗାନ୍ ମୁନୁଷ୍ଘି ରିତୀନୁ ତେଙ୍ଗାଲ୍ଦାନ୍। ନିମ୍ ଆଘ୍ଲି ଏସ୍କେ ନିହ୍ମା ମେଦୁନ୍ ବେଭିଚାର୍ ଆରୁ ଦୁସ୍ରା-ଦୁସ୍ରା ଖାରାପ୍ ନାଲ୍ଖୁଘି ଅଧିନ୍ନୁ ଉଇକାଚ୍କାର୍, ହୁଦ୍ଘିଲାଗାନ୍ ନିନ୍ ପାପ୍ନୁ ଡୁବ୍ରା କେର୍କିଚା ହନ୍ନେନ୍ ଆକ୍କୁନ୍ ନିମ୍ ନିହ୍ମା ମେଦୁନ୍ ଧାର୍ମିକ୍ତାଘି ଅଧିନ୍ନୁ ଉଇନା କାତ୍ଥା ଏସ୍କେ କା ଆଦ୍ ପାବିତାର୍ ମାନକୋ।
20ଯେତ୍କବାକେନ୍ ନିମ୍ ପାପ୍ଘି ବନ୍ଧନ୍ନୁ ରାଚ୍କାର୍, ହତ୍କବାକେନ୍ ନିମ୍ ପାର୍ମେଶ୍ୱାର୍ସ୍କି ନଜର୍ନୁ ନିମ୍ ବାନେ ନାଲ୍ଖୁ କାମା ପଲ୍ଲକାଚ୍କାର୍। 21ନିମ୍ ନିହ୍ମା ଆଘ୍ଲିନ୍ତା କାମ୍ଚ୍କା ନାଲ୍ଖୁଘି ଲାଗାନ୍ ଏନ୍ଦେର୍ ଫଲ୍ ହାକ୍କାର୍? ଏକାଘି ଲାଗାନ୍ ଆକ୍କୁନ୍ ଲାଜରାଲ୍ଦାର୍ ଆରୁ ଏକା ନାଲ୍ଖୁନ୍ ନିମ୍ କାମ୍ଚ୍କାଦାର୍ ଆଦ୍ ସବୁଦିନ୍ତା ମରନ୍ଘି ତାରା ହୋଇକାଇ। 22ଲେକିନ୍ ଆକ୍କୁନ୍ ନିମ୍ ପାପ୍ତି ଛୁଟ୍କାରା ହାକ୍କାର୍କେର୍କାଦାର୍ ଆରୁ ପାର୍ମେଶ୍ୱାର୍ସ୍କି ଗୁତ୍ତିୟା ମାନ୍ଚ୍କାର୍ କେର୍କାଦାର୍ ଆରୁ ଆକ୍କୁନ୍ ନିମ୍ ଏକାନ୍ କାମାଲ୍ଦାର୍ ଆଦ୍ ନିମାନ୍ ପାବିତାର୍ କାମିଦ୍ ଆରୁ ସବୁଦିନ୍ତା ଜୀବନ୍ ତାରା ହୋଇକାଇ। 23ଅଣ୍ଟା ଆଲାସ୍ ମେହ୍ନତ୍ କାମସ୍ତା ମଜ୍ରୀ ହାଖ୍ଖସ୍। ହନ୍ନେନ୍ ଏକାସ୍ ପାପ୍ କାମ୍ତେ ରସ୍ତା ଆଦ୍ଘି ମଜ୍ରୀ ସବୁଦିନ୍ତା ମରନ୍ଦ୍, ଲେକିନ୍ ପାର୍ମେଶ୍ୱାର୍ସ୍ତି ଏକାନ୍ ହାକ୍କାଦାସ୍ ଆଦ୍ ସବୁଦିନ୍ତା ଜୀବନ୍। ଆରୁ ଇଦ୍ ନାହ୍ମାଏ ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ଦ୍ୱାର୍ନୁ ନାମାଗେ ସବୁଦିନ୍ତା ଜୀବନ୍ ହାଖ୍ଖର୍କିଚି।
Currently Selected:
ରୋମୀ 6: xis
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
