ରୋମୀ 3
3
1ହାଲେ ୟାହୁଦୀ ମାନ୍ନାଘି ଏନ୍ଦେର୍ ଫାଏଦା, ଚାହେ ଖାତ୍ନା କାମ୍ଚ୍କାଘି ଏନ୍ଦେର୍ ଲାଭ୍? 2ଜାମାର୍ଘିନ୍ତି ପହ୍ଲେ ତା ପାର୍ମେଶ୍ୱାର୍ସ୍ ୟାହୁଦୀ ଜାମାର୍ଘି ଲାଗାନ୍ ମୁଶାସ୍କି ନିୟମ୍ ଚିଚ୍ଚାସ୍, ହୁଦ୍ଘିଲାଗାନ୍ ୟାହୁଦୀ ମାନିକିରି ଆବ୍ଡ଼ାର୍ଗେ ଜାମା ପ୍ରକାର୍ତି ବାଗ୍ଗେ ଫାଏଦା ମାନିଦ୍। 3ଯଦି ଆବ୍ଡ଼ାସ୍ତିହି କେତ୍କ ବିଶ୍ୱାସ୍ଘାତ୍ ମାନ୍ଚାର୍ କେର୍କାନାଏତାହି ଏନ୍ଦେର୍ ମାନ୍ଚା? ଏନ୍ଦେର୍ ଆବ୍ଡ଼ାର୍ଘି ବିଶ୍ୱାସ୍ ଘାତ୍ବନ୍ ପାର୍ମେଶ୍ୱାର୍ସ୍କି ବିଶ୍ୱାସ୍ ଲାଇଗ୍ବନ୍ ବେକାର୍ କାମଚୋ? 4ବିଲ୍କୁଲ୍ ମାଲ୍ଲା! ଯଦିଭି ଜାମା ଆଲାର୍ ଠାକ୍ନାଏ ଲେକିନ୍ ପାର୍ମେଶ୍ୱାର୍ସ୍ ସତ୍ତୁସ୍: ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ନିମ୍ ନିଜର୍ କାତ୍ଥାନୁ ଧାର୍ମିକ୍ ବୁଲି ଆହ୍ତାରର୍, ଆରୁ ବିଚାର୍ କାମ୍ନା ସାମାୟନୁ ଜିତର୍।” 5ଯେତ୍କବାକେନ୍ ନାମ୍ ଅଧର୍ମ କାମ୍ଦାତ୍ ଆଦ୍ ସାଫା-ସାଫା ଏଥ୍ରିକାଇ କା ପାର୍ମେଶ୍ୱାର୍ସ୍ହି ଠିକ୍ସ୍, ତା ଏନ୍ ଆଲାର୍ ଲେଖାଇନ୍ ତେଙ୍ଗାଲ୍ଦାନ୍ ଏନ୍ଦେର୍ ପାର୍ମେଶ୍ୱାର୍ସ୍ ଅନ୍ୟାୟ ମା କାମ୍ଦାସ୍, ଯେତ୍କବାକେନ୍ ଆସ୍ ନାମାଗେ ଦଣ୍ଡ୍ ଚିଦାସ୍? 6ବିଲ୍କୁଲ୍ ମାଲ୍ଲା! ଯଦି ପାର୍ମେଶ୍ୱାର୍ସ୍ ଅନ୍ୟାୟୀ ରସ୍ନେ ତା ଆସ୍ ଜାମା ମୁନୁଷ୍ ଜାତିୟାର୍ଘି ନ୍ୟାୟ ଏସ୍କେ କାମାଅଙ୍ଗସ୍? 7ଯଦି ଏଙ୍ଘା ଠାକ୍ନାଘି ଲାଗାନ୍ ପାର୍ମେଶ୍ୱାର୍ସ୍କି ସତ୍ତୁ ଆସ୍କି ମାହିମାଘି ଲାଗାନ୍, ବାଗ୍ଗେ କାମିକିରି ପ୍ରକଟ୍ ମାନିଦ୍ ତା ହାଲେହି ଏନ୍ଦେର୍ଗେ ପାପୀର୍ଘି ଲେଖା ଏନ୍ ଦଣ୍ଡ୍ଘି ଲାଇଗ୍ ଠାହ୍ରା ରାଦାନ୍? 8ଯଦି ଏନ୍ନେ କାତ୍ଥା ରାଇ, ତା ନାମ୍ ଖାରାପ୍ ନାଲ୍ଖୁ ଏନ୍ଦେର୍ଗେ ମା କାମତ୍, ଆସ୍ତି ବାନେ ନାଲ୍ଖୁ ପ୍ରକଟ୍ ମାନୋ। କେତ୍କ ଆଲାର୍ ଏଙ୍ଗାନ୍ ବଦ୍ନାମ୍ କାମ୍ନାଏ କା ଏନ୍ ଏନ୍ନେ ଶିଖାବାଦାନ୍ କା ବାଗ୍ଗେ ପାପ୍ କାମର୍ ତା ଠିକ୍ ରଦ୍ନେ, ଏନ୍ନେ ଆଲାର୍ ପାର୍ମେଶ୍ୱାର୍ସ୍କି ଦଣ୍ଡ୍ଘି ଲାଇଗ୍ ରାନାଏ।
ଜାମା ଆଲାର୍ ପାପୀର୍ ନେଦ୍ହି ଧର୍ମିକ୍ ମାଲ୍କାରିନ୍
9ତା ହାଲେହି ନାମ୍ ଏନ୍ଦେର୍ ତେଙ୍ଗତ୍? ଏନ୍ଦେର୍ ନାମ୍ ୟାହୁଦୀ ଆଲାତ୍, ବିନାୟାହୁଦୀର୍ସ୍ତି ବାନେ ରାଦାତ୍ କାଁଏ? ବିଲ୍କୁଲ୍ ମାଲ୍ଲା! ଏନ୍ଦେର୍ଗେକା ନାମ୍ ଇବନ୍ ଏଦ୍କାଦାତ୍ କା ୟାହୁଦୀ ଆରୁ ବିନାୟାହୁଦୀର୍ହି ଜାମାତ୍ ପାପ୍ଘି ଫାନ୍ଦାନୁ ରାଦାତ୍। 10ପାବିତାର୍ ଶାସ୍ତ୍ରନୁ ଲେଖଚ୍କା ରାଇ କା ନେଦ୍ହି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାଲ୍କାରିନ୍, ଅଣ୍ଟାହି ମାଲ୍ଲା।
11ଏନ୍ନେ ଅଣ୍ଟାହି ମାଲ୍କାରିନ୍ ଏକାର୍ କା ସତ୍ତୁଦ୍ ଏନ୍ଦେଦ୍ ଆବନ୍ ବୁଝ୍ରା ଅଙ୍ଗର୍; ନେଦ୍ହି ପାର୍ମେଶ୍ୱାର୍ସିନ୍ ଆହାଗେ ମା ବେଦ୍ଦନାଏ।
12ଜାମାର୍ ପାର୍ମେଶ୍ୱାର୍ସ୍ତି ଗେଚ୍ଛା ବୁଙ୍ଗେଇ ଚିଚ୍ଚକାନାଏ। ଜାମାର୍ ଭୁଲ୍ ପାବୁନୁ କାଲ୍ନାଏ। ନେଦ୍ହି ବାନେ ନାଲ୍ଖୁ କାମୁର୍ ମାଲ୍କାରିନ୍ ଅଣ୍ଟାହି ମାଲ୍ଲା।
13ଖୁଲା ରାନା ମାସ୍ଣାନ୍ତି ଏସ୍କେ ବାସ୍ନା ବାରିଦ୍ ହନ୍ନେ ଆବ୍ଡ଼ାର୍ଘି ଥୁମ୍ଣାନ୍ତି ଖାରାପ୍ କାତ୍ଥା ଉର୍ଖିଦ୍ ଆବ୍ଡ଼ାର୍ଘି ତାଥାଦ୍ ଝୁଟ୍ଟୁ କାତ୍ଥାତି ନିନ୍ଦିୟାକେର୍କିଚି ଆବ୍ଡ଼ାର୍ଘି ଚଲଦ୍ ବିଷ୍ ରୁ ନେର୍ରୁ ଲେଖା ରାଇ ଆବ୍ଡ଼ାର୍ ଯେତ୍କ ତେଙ୍ଗ୍ନାଏ, ଆବ୍ଡ଼ାଦ୍ ଆଲାରିନ୍ ଦୁଃଖୁ ଚିଦ୍।
14ଆବ୍ଡ଼ାର୍ଘି ଥୁମ୍ଣାନ୍ତି ସାର୍ପାନା ଆରୁ ହାଁଣ୍ନାତି ନିନ୍ଦିୟାକେର୍କିଚି।
15ଆବ୍ଡ଼ାର୍ ଜାମାବାକେନ୍ ଲାଡ଼ାଗେ ତିଆର୍ ରାନାଏ, ଆବ୍ଡ଼ାର୍ ଦୁସ୍ରାରିନ୍ ପିଟାଗେ ଚାହଁନାଏ।
16ଆବ୍ଡ଼ାର୍ ଏକାତାରା କାନାଏ ଆଇୟା ଦୁସ୍ରାର୍ଘି ନାଶ୍ କାମ୍ନାଏ ଆରୁ ଦୁଃଖୁ ଚିନାଏ,
17ଆବ୍ଡ଼ାର୍ ବାଲ୍ନାଇନ୍ କା ଏସ୍କେ ଶାନ୍ତିନୁ ରାନା କାତ୍ଥାଦ୍।
18ପାର୍ମେଶ୍ୱାର୍ସ୍କି ମାଇନ୍ ଆବ୍ଡ଼ାର୍ସାନ୍ ବିଲ୍କୁଲ୍ ମାଲ୍ଲାଦିନ୍। 19ଆକ୍କୁନ୍ ନାମ୍ ଇବନ୍ ଆହ୍ଦାତ୍ ମୁଶାସ୍କି ନିୟମ୍ନୁ ଯେତ୍କ ତେଙ୍କାରାଇ ଆବ୍ଡ଼ାଗୁଠିନ୍ ଏକାର୍ ନିୟମ୍ଘି ଅଧିନ୍ନୁ ରାନାଏ ଆବ୍ଡ଼ାରିନ୍ ତେଙ୍କାରାଇ ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ଘି ଆଘ୍ଲି ଏନ୍ଦେର୍ହି ବାହାନା କାମା ପଲ୍ଲନାଇନ୍ ଆରୁ ଗୋଟା ଦୁନିଆଁଦ୍ ପାର୍ମେଶ୍ୱାର୍ସ୍କି ଦଣ୍ଡ୍ଘି ଲାଇଗ୍ ମାନଦ୍। 20ଏନ୍ଦେର୍ଗେକା ନିୟମ୍ବନ୍ ମାନ୍ଚ୍କୁନ୍ ନେଦ୍ହି ପାର୍ମେଶ୍ୱାର୍ସ୍କି ଆଘ୍ଲି ନିର୍ଦ୍ଦୋଷ୍ ମା ମାନ୍ନାଏ। ନାମ୍ ନିୟମ୍ଘି ଦ୍ୱାର୍ନୁ ଆହ୍ଦାତ୍ କା ନାମ୍ ପାପୀତ୍।
ପାର୍ମେଶ୍ୱାର୍ସ୍ ଏସ୍କେ ଆଲାରିନ୍ ନିଜର୍ ନଜର୍ନୁ ନିର୍ଦ୍ଦୋଷ୍ ଠାହ୍ରାଚାସ୍
21ଲେକିନ୍ ଆକ୍କୁନ୍ ପାର୍ମେଶ୍ୱାର୍ସ୍ ଆଲାର୍ଗେ ଇବନ୍ ଏଦ୍କାଦାସ୍ କା ନିୟମ୍ବିନା ତାଙ୍ଘାଗାନେ ଆଲାର୍ଘି ସମ୍ୱନ୍ଧ ଠିକ୍ ରାଇଦ୍। ହୁଦ୍ଘି ବାରେନୁ ମୁଶାସ୍କି ନିୟମ୍ନୁ ଆରୁ ନାବୀର୍ଘି ବହିନୁ ଲେଖ୍ଚ୍କା ରାଇ। 22ଏକା ଆଲାର୍ ଯୀଶୁ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ନାଏ ଆବ୍ଡ଼ାରିନ୍ ପାର୍ମେଶ୍ୱାର୍ସ୍ ନିଜର୍ ନଜର୍ନୁ ନିର୍ଦ୍ଦୋଷ୍ ଗନ୍ତି କାମ୍ଦାସ୍। ପାର୍ମେଶ୍ୱାର୍ସ୍ ନେକାନ୍ହି ଭେଦ୍ଭାବ୍ ମା ଉଇଦାସ୍। 23ଏନ୍ଦେର୍ଗେକା ୟାହୁଦୀ ଚାହେ ବିନାୟାହୁଦୀଜାମାର୍ ପାପ୍ କାମ୍ଚ୍କାନାଏ। ଆରୁ ପାର୍ମେଶ୍ୱାର୍ସ୍ଗାନେ ଏକା ମାହିମା ପହ୍ଲେ ରାଚା ଆଦ୍ ଆକ୍କୁନ୍ ଆବ୍ଡ଼ାର୍ ଗାନେ ମାଲ୍ଲାଦିନ୍। 24ଲେକିନ୍ ପାର୍ମେଶ୍ୱାର୍ସ୍ ତାଙ୍ଘା କ୍ରିପାଘି ବିନାଦାମ୍ତି ନାମାନ୍ ନିଜର୍ ନଜର୍ନୁ ନିର୍ଦ୍ଦୋଷ୍ ଠାହ୍ରାଚ୍କାଦାସ୍ ଇବନ୍ ଆସ୍ ଯୀଶୁ ଖ୍ରୀସ୍ତ୍କି ବଲୀ ଦ୍ୱାର୍ନୁ କାମ୍ଚାସ୍। ଯୀଶୁ ଖ୍ରୀସ୍ତ୍ ନାହ୍ମା ପାପ୍ଘି ଲାଗାନ୍ କ୍ରୁଶ୍ନୁ ବଲୀ ମାନ୍ଚାସ୍ ଆରୁ ନାମାନ୍ ପାପ୍ତି ବାଛାବାଚାସ୍। 25ପାର୍ମେଶ୍ୱାର୍ସ୍ ଯୀଶୁ ଖ୍ରୀସ୍ତ୍ସିନ୍ ନାହ୍ମା ଜାମା ଆଲାର୍ଘି ଲାଗାନ୍ ବଲୀ କାମ୍ଚାସ୍। ଯେତ୍କବାକେନ୍ ଆବ୍ଡ଼ାର୍ ଯୀଶୁ ଖ୍ରୀସ୍ତ୍କି ବଲୀଦାନ୍ ଆରୁ ହେଁସୁଘି ମିଆଁ ବିଶ୍ୱାସ୍ କାମ୍ଚାର୍ ହତ୍କବାକେନ୍ ଆଲାର୍ଘି ପାର୍ମେଶ୍ୱାର୍ସ୍ଗାନେ ସମ୍ବନ୍ଧ ଠିକ୍ ମାନ୍ଚା। ପାର୍ମେଶ୍ୱାର୍ସ୍ ଏନ୍ନେ ତାଙ୍ଘା ନ୍ୟାୟଘି ସାକ୍ଷୀ ଚିଚ୍ଚାସ୍ କା, ଆସ୍କି ସାହ୍ନାଘି ଶକ୍ତି ରାଇ ଏନ୍ଦେର୍ଗେକା ଆସ୍ ଏକାର୍ ଆଘ୍ଲି ପାପ୍ କାମ୍ଚ୍କାଚାର୍ ଆବ୍ଡ଼ାର୍ଗେ ଦଣ୍ଡ୍ ମା ଚିଚ୍ଚାସ୍ 26ଇନ୍ନାହି ପାର୍ମେଶ୍ୱାର୍ସ୍ ତାଙ୍ଘା ନ୍ୟାୟବନ୍ ଏଦ୍ନାଘି ଲାଗାନ୍ ଏନ୍ନେ କାମ୍ଚାସ୍। ଆସ୍ ନ୍ୟାୟ କାମୁସ୍, ଆରୁ ଏକା ଆଲାର୍ ଯୀଶୁ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମ୍ନାଏ ଆବ୍ଡ଼ା ଆଲାର୍ଘିହି ନ୍ୟାୟ କାମ୍ନାବାଲା ଆ ପାର୍ମେଶ୍ୱାର୍ସିନ୍ ରାଦାସ୍।
27ହୁଦ୍ଘିଲାଗାନ୍ ନେକାହି ନିଜର୍ ମିଆଁ ବଡ଼୍ପଣି କାମ୍ନାଘି ହକ୍ ମାଲ୍ଲାଦିନ୍। ଏକା ନିୟମ୍ଘି କାରଣ୍ ଇ ହକ୍ ଠାହ୍ରାବାକାଇ? ଇବଦ୍ ମୁଶାସ୍କି ନିୟମ୍ ପାଲନ୍ କାମ୍ନାଘି କାରଣ୍ତି ମାଲ୍ଲା, ବରନ୍ ଯୀଶୁ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମ୍ନାଘି କାରଣ୍ତି ମାନ୍ଚା। 28ହୁଦ୍ଘିଲାଗାନ୍ ଆଲାର୍ ନିୟମ୍ବନ୍ ବାନେକିରି ପାଲନ୍ କାମ୍ନାତି ମାଲ୍ଲା ଲେକିନ୍ ଯୀଶୁ ଖ୍ରୀସ୍ତ୍କି ମିଆଁ ବିଶ୍ୱାସ୍ କାମ୍ନାତି ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନାଅଙ୍ଗର୍। 29ପାର୍ମେଶ୍ୱାର୍ସ୍ ଖାଲି ୟାହୁଦୀର୍ଘି ପାର୍ମେଶ୍ୱାର୍ସ୍ ରାଦାସ୍ କାଁଏ? ମାଲ୍ଲା! ବିନାୟାହୁଦୀ ଜାମାର୍ଘି ପାର୍ମେଶ୍ୱାର୍ସ୍ହି ମାଲ୍ଦାସ୍ କାଁଏ? ହଁ ଏସ୍କିନ୍ଭି ଆସ୍ ଇ ଦୁନିଆଁନୁ ଯେତ୍କ ଆଲାର୍ ରାନାଏ ଜାମାର୍ଘି ପାର୍ମେଶ୍ୱାର୍ସ୍। 30ଏନ୍ଦେର୍ଗେକା ଅଣ୍ଟା ଖାଲି ପାର୍ମେଶ୍ୱାର୍ସ୍ ରାଦାସ୍ ଏକାସ୍ କା ୟାହୁଦୀର୍ଘି ଇ ଯୀଶୁ ଖ୍ରୀସ୍ତ୍କି ମିଆଁ ବିଶ୍ୱାସ୍ତି ଆରୁ ବିନାୟାହୁଦୀରିନ୍ହି ବିଶ୍ୱାସ୍ତି ନିଜର୍ ନଜର୍ନୁ ନିର୍ଦ୍ଦୋଷ୍ ଠାହ୍ରାବସ୍। 31ତା ଏନ୍ଦେର୍ ନାମ୍ ନିଜର୍ ବିଶ୍ୱାସ୍ଘି ଦ୍ୱାର୍ନୁ ନିୟମ୍ବନ୍ ହାଟାବାଦାତ୍ କାଁଏ? ବିଲ୍କୁଲ୍ ମାଲ୍ଲା! ସତ୍ତୁନିନ୍ ନାମ୍ ନିଜର୍ ବିଶ୍ୱାସ୍ଘି ଦ୍ୱାର୍ନୁ ନିୟମ୍ବନ୍ ଆରୁ ବାଗ୍ଗେ ମଜ୍ବୁତ୍ କାମାଲ୍ଦାତ୍।
Currently Selected:
ରୋମୀ 3: xis
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
