ରୋମୀ 15
15
ନିଜ୍କେନିଜ୍ବନ୍ ମାଲ୍ଲା ଦୁସ୍ରାରିନ୍ ଖୁସ୍ କାମା
1ନାମ୍ ଏକାତ୍କା ବିଶ୍ୱାସ୍ନୁ ମଜ୍ବୁତ୍ ରାଦାତ୍, ବିଶ୍ୱାସ୍ନୁ କମ୍ଜୋରି ରାନାବାଲାରିନ୍ ସାହତ୍। ଲେକିନ୍ ନାମ୍ ଏକାନ୍ ଚାଁହତ୍ ଆବନ୍ ଖାଲି ଆମ୍ବତ୍ କାମା। 2ଆରୁ ନାମ୍ ନାହ୍ମା ବିଶ୍ୱାସୀ ଭାଇ ବୁହୁଣୀରିନ୍ ବିଶ୍ୱାସ୍ନୁ ମଜ୍ବୁତ୍ କାମାଗେ ଆବ୍ଡ଼ାର୍ଘି ଲାଗାନ୍ ଏକାଦ୍ ବାନେଦ୍ ଆବନ୍ କାମିକିରି ଆବ୍ଡ଼ାରିନ୍ ଖୁସୀ କାମ୍ନାକାତ୍ଥା। 3ଏନ୍ଦେର୍ଗେକା ଖ୍ରୀସ୍ତ୍ହି ନିଜ୍କେନିଜ୍ବନ୍ ଖୁସୀ କାମ୍ନାଘି ଲାଗାନ୍ ଜୀବନ୍ ମାଲ୍ଲା ବିତାବୁସ୍। ଲେକିନ୍ ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ। “ହେ ବାଙ୍ଗ୍ ନିଙ୍ଗାନ୍ ନିନ୍ଦା କାମ୍ନାବାଲାର୍ହି ଏଙ୍ଘାଏହି ନିନ୍ଦା କାମ୍ଚ୍କାନାଏ।” 4ପାବିତାର୍ ଶାସ୍ତ୍ରନୁ ଯେତ୍କ କାତ୍ଥା ଆଘ୍ଲିନ୍ତି ଲେଖ୍ଚ୍କା ରାଇ, ଆଦ୍ ନାମାନ୍ ଶିଖାବାଗେ ଲାଗାନ୍ ଲେଖ୍ଚ୍କା ରାଇ, ଏକାତି କା ନାମାଗେ ଧିରାଜ୍ ଆରୁ ଦିଲାସା ହାଖ୍ର୍ତେରୋ ଆରୁ ଇଦ୍ଘି ଲେଖା ନାମ୍ ନିଜର୍ ଆଶ୍ରା ଉୟତ୍। 5ନାମାଗେ ଧିରାଜ୍ ଆରୁ ଶାନ୍ତି ଚିନାବାଲା ପାର୍ମେଶ୍ୱାର୍ସାନ୍ ଏନ୍ ବିନ୍ତି କାମାଲ୍ଦାନ୍ କା ଯୀଶୁ ଖ୍ରୀସ୍ତ୍କି ଶିକ୍ଷାଘି ଲେଖା ନିମ୍ ଏକ୍ ଦୁସ୍ରାର୍ଗାନେ ଶାନ୍ତିନୁ ରା ଅଙ୍ଗର୍। ଆଦ୍ଘି ଲାଗାନ୍ ଆସ୍ ନିମାନ୍ ମଦେତ୍ କାମ୍ନାସ୍। ଏନ୍ଦେର୍ଗେକା ଖ୍ରୀସ୍ତ୍ ଯୀଶୁସ୍ହି ଏନ୍ନେନ୍ କାମ୍ଚାସ୍। 6ତାକା ନିମ୍ ଜାମାର୍ ମେଶ୍ରିକିରି ଆରୁ ଏକ୍ମତ୍ ମାନିକିରି ନାହ୍ମା ପ୍ରାଭୁ ଯୀଶୁ ଖ୍ରୀସ୍ତ୍ସ୍କି ବାଙ୍ଗ୍, ପାର୍ମେଶ୍ୱାର୍ସ୍କି ସ୍ତୁତି କାମର୍।
ୟାହୁଦୀ ଆରୁ ବିନାୟାହୁଦୀ ଜାମାର୍ଘି ଲାଗାନ୍ ସୁସାମାଚାର୍ ରାଇଦ୍
7ହେ ଏଙ୍ଘା ପ୍ୟାରେ ଭାଇ ବୁହୁଣୀରୋ, ପାର୍ମେଶ୍ୱାର୍ସିନ୍ ମାଇନ୍ ଚିୟାଗେ ଖ୍ରୀସ୍ତ୍ ନିମାନ୍ ଗ୍ରହନ୍ କାମ୍ଚାସ୍ ହନ୍ନେ ନିମ୍ହି ଏକ୍ ଦୁସ୍ରାରିନ୍ ଗ୍ରହନ୍ କାମା। 8-9ଏନ୍ଦେର୍ଗେକା ନିମାନ୍ ତେଙ୍ଗାଲ୍ଦାନ୍ କା ପାର୍ମେଶ୍ୱାର୍ସ୍ ୟାହୁଦୀ ଜାମାର୍ଘି ପୁର୍ଖାର୍ଗେ ଏକା କାତ୍ଥା ଚିଚ୍କାଚାସ୍ ଆ କାତ୍ଥା ଚିଚ୍କାବନ୍ ଆସ୍ ପୁରା କାମ୍ଚାସ୍। ଇବନ୍ ଏଦାଗେ ଖ୍ରୀସ୍ତ୍ ୟାହୁଦୀ ଜାମାର୍ଘି ଅଣ୍ଟା ସେବକ୍ସ୍କି ରୁପ୍ନୁ ବାର୍ଚାସ୍। ତାକା ବିନାୟାହୁଦୀ ଆଲାର୍ହି ପାର୍ମେଶ୍ୱାର୍ସ୍କି କ୍ରିପାଘିଲାଗାନ୍ ମାହିମା କାମର୍। ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା “ଏନ୍ ବିନାୟାହୁଦୀର୍ଘି ମାଝାନୁ ନିଙ୍ଗାନ୍ ଧାନ୍ୟାବାଦ୍ ଚିଅନ୍। ଆରୁ ନିଙ୍ଘା ସ୍ତୁତି କାମନ୍।” 10ଆରୁହି ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା, “ହେ ବିନାୟାହୁଦୀ ଆଲାରୋ ନିମ୍ ପାର୍ମେଶ୍ୱାର୍ସ୍କି ଚାଜ୍ଜକା ୟାହୁଦୀ ଆଲାର୍ ଗାନେ ଖୁସୀମାନାବା।” 11ଆରୁ ହେ “ଜାମା ବିନାୟାହୁଦୀ ଆଲାରୋ ପ୍ରାଭୁସ୍କି ସ୍ତୁତିବାଡ଼ାଇ କାମା ଆରୁ ଜାମା ଜାତିନ୍ତା ଆଲାର୍ ପାର୍ମେଶ୍ୱାର୍ସ୍କି ସ୍ତୁତି କାମା।” 12ପାବିତାର୍ ଶାସ୍ତ୍ରନୁ ଇଶାୟାହ୍ସ୍ହି ତେଙ୍ଗ୍ଦାସ୍ କା, “ଯିଶୟସ୍କି ବାଉଁଶାନୁ ଅଣ୍ଟା ରାଜାସ୍ ଜନମ୍ ମାନସ୍। ଆରୁ ଆସ୍ ବିନାୟାହୁଦୀରିନ୍ ଶାସନ୍ କାମସ୍। ଆରୁ ଆସ୍କି ମିଆଁ ଜାମା ବିନାୟାହୁଦୀର୍ ଆଶ୍ରା ଉଇୟର୍। 13ଏନ୍ ବିନ୍ତି କାମାଲ୍ଦାନ୍ କା ପାର୍ମେଶ୍ୱାର୍ସ୍ ଏକାସ୍ କା ଆଶ୍ରା ଚିଦାସ୍ ଆସ୍କି ମିଆଁ ନିମ୍ ବିଶ୍ୱାସ୍ କାମ୍ଦାର୍, ହୁଦ୍ଘିଲାଗାନ୍ ଆସ୍ ନିମାନ୍ ଖୁସୀ ଆରୁ ଶାନ୍ତିତି ଭାର୍ପୁର୍ କାମ୍ନାସ୍। ତାକା ଏକାନ୍ ନିମ୍ ଏକା ଆଶ୍ରା ଏରାଲ୍ଦାର୍ ଆଦ୍ ପାବିତାର୍ ଆତ୍ମାଘି ଶକ୍ତିତି ଆରୁହି ମଜ୍ବୁତ୍ ମାନ୍ନାଦ୍।”
ପାଉଲୁସ୍ ତାଙ୍ଘା ସେବା ନାଲ୍ଖୁଘି ବାରେନୁ ତେଙ୍ଗାଲ୍ଦାସ୍
14ହେ ଏଙ୍ଘା ଭାଇ ଆରୁ ବୁହୁଣୀଜାମାରୋ, ଏଙ୍ଗା ନିଜେ ନିହ୍ମା ମିଆଁ ଭାର୍ଷା ରାଇ କା ନିମ୍ ବାନେ ମତ୍ଲବ୍ ଆରୁ ବୁଦ୍ଧିତି ନିନ୍ଦ୍କା ରାଦାର୍। ଆରୁ ନିମ୍ ଏକ୍ ଦୁସ୍ରାରିନ୍ ଶିଖାବାନାଘି ଲାଇଗ୍ ରାଦାର୍। 15ହାଲେହି ଏନ୍ ନିମାନ୍ କେତ୍କ କାତ୍ଥାନ୍ ମନେ କାମ୍ତାଗେ ସାଫା-ସାଫା ଲେଖ୍ଚ୍କାଦାନ୍ ଏନ୍ଦେର୍ଗେକା ପାର୍ମେଶ୍ୱାର୍ସ୍ ଏଙ୍ଗାଗେ ଅଣ୍ଟା ବିଶେଷ୍ ବାର୍ଦାନ୍ ଚିଚ୍କାଦାସ୍। 16ଆରୁ ଆ ବାର୍ଦାନ୍ ଇଦ୍ କା ଏଙ୍ଗାନ୍ ଯୀଶୁ ଖ୍ରୀସ୍ତ୍କି ସେବକ୍ ମାନାଗେ ଚାଜ୍ଜକା ରାଇ। ଆରୁ ଏନ୍ ବିନାୟାହୁଦୀର୍ଘି ମାଝାନୁ ପାର୍ମେଶ୍ୱାର୍ସ୍କି ସୁସାମାଚାର୍ ଶୁଣାବାନାନୁ ଅଣ୍ଟା ପୁରୋହିତ୍ସ୍ ଲେଖା ନାଲ୍ଖୁ କାମନ୍। ତାକା ବିନାୟାହୁଦୀର୍ ପାର୍ମେଶ୍ୱାର୍ସ୍କି ଲାଗାନ୍ ଗ୍ରହନ୍ କାମ୍ନାଘି ଲାଇଗ୍ ବୁଲି ମାନାଅଙ୍ଗର୍, ଆରୁ ପାବିତାର୍ ଆତ୍ମାତି ପାବିତାର୍ ମାନିକିରି ଆବ୍ଡ଼ାରିନ୍ ପାର୍ମେଶ୍ୱାର୍ସ୍ ଗ୍ରହନ୍ କାମ୍ନାଘି ଲାଇଗ୍ ମାନାଅଙ୍ଗର୍। 17ଏନ୍ ଯୀଶୁ ଖ୍ରୀସ୍ତ୍ସ୍କି ଆଲାନ୍, ଆରୁ ଏନ୍ ପାର୍ମେଶ୍ୱାର୍ସ୍କି ଏକା ସେବା କାମାଲ୍ଦାନ୍, ହୁଦ୍ଘିଲାଗାନ୍ ଏନ୍ କିସ୍ମାତ୍ ବାଲାନ୍ ଆଙ୍ଗେନ୍ ଏନ୍ ନିଜ୍କେନିଜ୍ବନ୍ ବାଡ଼୍କା ସୋଚ୍ଦାନ୍। 18-19ଆରୁ ଏଙ୍ଘା ଦ୍ୱାର୍ନୁ ଖ୍ରୀସ୍ତ୍ସ୍, ବିନାୟାହୁଦୀର୍ଘି ମାଝାନୁ ଏକାନ୍ କାମ୍ଚାସ୍ ଆ କାତ୍ଥାନ୍ ଖାଲି ତେଙ୍ଗାଗେ ଏଙ୍ଘା ହିମ୍ମତ୍ ରାଇ। ତାକା ବିନାୟାହୁଦୀର୍ହି ପାର୍ମେଶ୍ୱାର୍ସ୍ସିନ୍ ମାନର୍। ଆରୁ ଏକା ବଚନ୍ ଏନ୍ ଆବ୍ଡ଼ାରିନ୍ ଶୁଣାବାଚ୍କାନ୍ ଆବନ୍ ମେନିକିରି ଆରୁ ପାବିତାର୍ ଆତ୍ମାଘି ମଦେତ୍ତି ଏକା ଅଦ୍ଭୁତ୍ ନାଲ୍ଖୁ କାମ୍ଚ୍କାନ୍ ଆବନ୍ ଏରିକିରି ଆବ୍ଡ଼ାର୍ ବିଶ୍ୱାସ୍ କାମ୍ଚାର୍। ଏନ୍ନେନ୍ ଏନ୍ ଯେରୁଶାଲେମ୍ତି ହୋଇକିରି ଚାରିପାଖା ଇଲ୍ଲୁରିକୁମ୍ ରାଜୀତକ୍ ଜାମା ଆଡ୍ଡାନୁ ଖ୍ରୀସ୍ତ୍କି ବାରେ ସୁସାମାଚାର୍ ପୁରା-ପୁରା ଶୁଣାବାଚ୍କାନ୍। 20ଆରୁ ଅଣ୍ଟା ଆଡ଼୍ପାଘି ପହ୍ଲେନ୍ତି ନାହିଗାଡ୍ଡି ଆର୍ହ୍ଖାନୁ ଆଡ଼୍ପା କାମ୍ନା ଲେଖା ଏକା ଆଡ୍ଡାନୁ ପହ୍ଲେନ୍ତି ସୁସାମାଚାର୍ ପ୍ରଚାର୍ କାମା କେର୍କିରୋ ଏନ୍ନେ ଆଡ୍ଡାନୁ ଏଙ୍ଗାଗେ ସୁସାମାଚାର୍ ପ୍ରଚାର୍ କାମାଗେ ଇଚ୍ଛା ମାଲ୍ଲାଦିନ୍। ଲେକିନ୍ ଏକାସାନ୍ ଆଲାର୍ ଖ୍ରୀସ୍ତ୍କି ନାମେତକ୍ ମାଲ୍ଲା ମେନୁର୍, ଏନ୍ନେ ଆଡ୍ଡାନୁ ସୁସାମାଚାର୍ ଶୁଣାବାଗେ ଏଙ୍ଘାଏ ବହୁତ୍ ଇଚ୍ଛା ରାଇ। 21ଲେକିନ୍ ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା, “ଏକାର୍ଗେ ଆସ୍କି ସୁସାମାଚାର୍ ମାଲ୍ଲା ଶୁଣାବାକୁ ଆବ୍ଡ଼ାର୍ ସତ୍ତୁବନ୍ ବୁଝରର୍। ଆରୁ ଏକାର୍ ଏକ୍ଲାହି ସୁସାମାଚାର୍ ମାଲ୍ଲା ମେନୁର୍ ଆବ୍ଡ଼ାର୍ ବଚନ୍ବନ୍ ମେନର୍।”
ପାଉଲୁସ୍ ରୋମ୍ କାଲାଗେ ଯୋଜ୍ନା କାମାଲ୍ଦାସ୍
22ଏକା-ଏକା ଆଡ୍ଡାନୁ ସୁସାମାଚାର୍ ମାଲ୍ଲା ମେନୁର୍ ଆବ୍ଡ଼ା ଆଡ୍ଡାନୁ ସୁସାମାଚାର୍ ଶୁଣାବାଲ୍କାନ୍ ହୁଦ୍ଘିଲାଗାନ୍ ନିହ୍ମା ଚାହାଗେ କାଲା ପଲ୍ଲକାନିନ୍। 23ଲେକିନ୍ ଆକ୍କୁନ୍ ଇବ୍ଡ଼ା ରାଜୀଘି ଜାମା ଆଡ୍ଡାନୁ ସୁସାମାଚାର୍ ଶୁଣାବାଗେ ମୁଞ୍ଜକାନ୍। ଆରୁ ବହୁତ୍ ବଛର୍ତି ନିହ୍ମାସାନ୍ କାଲାଗେ ଏନ୍ ବହୁତ୍ ଚାହାଁଲ୍କାନ୍। 24ହୁଦ୍ଘିଲାଗାନ୍ ଯେତ୍କବାକେନ୍ ଏନ୍ ସ୍ପେନ୍ ଦେଶ୍ କନ୍ ତା ନିହ୍ମାଗାନେ ଭେଁଟ୍ ମାନନ୍। ଆରୁ ଏନ୍ ଚାହାଁଲ୍ଦାନ୍ କା କେତ୍କ ଉଲ୍ଲା ନିହ୍ମାଗାନେ ରାନାଘି ଖୁସୀ ହନ୍। ହୁଦ୍ଘିପାଛ୍ଲି ଏନ୍ ସୋଚାଲ୍ଦାନ୍ କା ଏଙ୍ଘା କାନାଘି ଲାଗାନ୍ ମଦେତ୍ କାମର୍। 25ଲେକିନ୍ ଆକ୍କୁନ୍ ତା ଏନ୍ ଯେରୁଶାଲେମ୍ ତା ବିଶ୍ୱାସୀ ଆଲାର୍ଘି ମଦେତ୍ କାମାଗେ କାଲ୍ଦାନ୍। 26ଏନ୍ଦେର୍ଗେକା ମାକିଦୁନିଆଁ ଆରୁ ଆଖାୟା ମଣ୍ତ୍ଲୀନ୍ତା ବିଶ୍ୱାସୀ ଆଲାର୍ ଯେରୁଶାଲେମ୍ ତା ଗରୀବ୍ ବିଶ୍ୱାସୀ ଆଲାର୍ଗେ କେତ୍କ ଦାନ୍ ଚିୟାଗେ ସୋଚ୍କାନାଏ। 27ଆରୁ ଆବ୍ଡ଼ାର୍ ଏନ୍ନେ ଖୁସୀତି କାମ୍ଚାର୍ ଲେକିନ୍ ଏନ୍ନେ କାମାଗେ ଆବ୍ଡ଼ାର୍ଘି ଉଧାର୍ ହର୍। ଏନ୍ଦେର୍ଗେକା ବିନାୟାହୁଦୀର୍ଗେ ଯେରୁଶାଲେମ୍ ତା ୟାହୁଦୀର୍ ଆତ୍ମିକ୍ ଆଶିଷ୍ ମତ୍ଲବ୍ ସୁସାମାଚାର୍ ହାଖ୍ଖର୍କିଚି। ହୁଦ୍ଘିଲାଗାନ୍ ନିମ୍ ବିନାୟାହୁଦୀ ଆଲାର୍ ଆ ୟାହୁଦୀ ଆଲାରିନ୍ ଦାନ୍ ଚିକିରି ମଦେତ୍ କାମ୍ନା କାତ୍ଥା। 28ହୁଦ୍ଘିଲାଗାନ୍ ଏନ୍ ଇ ନାଲ୍ଖୁନ୍ ପୁରା କାମିକିରି ମତ୍ଲବ୍ ଆବ୍ଡ଼ାର୍ଘି ହେଖ୍ଖାନୁ ଦାନ୍ ଚିକିରି, ନିହ୍ମାସାନ୍ କନ୍ ଆରୁ ଆସ୍ତି ସ୍ପେନ୍ଗେ କନ୍। 29ଆରୁ ଏନ୍ ଆହ୍ଦାନ୍ କା ଯେତ୍କବାକେନ୍ ଏନ୍ ନିହ୍ମାସାନ୍ କନ୍ ହତ୍କବାକେନ୍ ଖ୍ରୀସ୍ତ୍ସ୍କି ଆଶୀର୍ବାଦ୍ ନିମାଗେ ଆରୁ ଏଙ୍ଗାଗେ ଭାର୍ପୁର୍ ହାଖ୍ଖର। 30ହେ ଏଙ୍ଘା ଭାଇ ଆରୁ ବୁହୁଣୀଜାମାରୋ ଏନ୍ ନିମାନ୍ ଆର୍ଜୀବିନ୍ତି କାମ୍ଦାନ୍ କା ପ୍ରାଭୁ ଯୀଶୁ ଖ୍ରୀସ୍ତ୍କି ଦ୍ୱାର୍ନୁ ଆରୁ ପାବିତାର୍ ଆତ୍ମାଘି ଦ୍ୱାର୍ନୁ ବାନେ ହାଖ୍ଖଦାର୍। ଆ ବାନେ ହାଖ୍ଖନାତି ଏଙ୍ଘାଲାଗାନ୍ ପାର୍ମେଶ୍ୱାର୍ସାନ୍ ବିନ୍ତି କାମ୍ତେ ରା। 31କା ଏନ୍ ୟାହୁଦୀଆନ୍ତା ଏକା ଆଲାର୍ ପାର୍ମେଶ୍ୱାର୍ସିନ୍ ବିଶ୍ୱାସ୍ ମା କାମ୍ନାଏ ଆବ୍ଡ଼ାର୍ଘି ହେଖ୍ଖାନ୍ତି ଏଙ୍ଗାନ୍ ବାଛାବସ୍। ଆରୁ ଯେରୁଶାଲେମ୍ ତା ବିଶ୍ୱାସୀ ଆଲାର୍ଗେ ଏନ୍ ଏକା ଦାନ୍ ହୋଇକିରି କାଲ୍ଦାନ୍ ଆବନ୍ ଆବ୍ଡ଼ାର୍ ଖୁସୀତି ଗ୍ରହନ୍ କାମର୍। 32ପାର୍ମେଶ୍ୱାର୍ସ୍କି ଇଚ୍ଛା ଲେଖା ଯେତ୍କବାକେନ୍ ଏନ୍ ନିହ୍ମାସାନ୍ ଖୁସୀତି ବାରନ୍ ତା ଜାମାତ୍ ମେଶ୍ରିକିରି ଖୁସୀ ମାନାବତ୍ ଆରୁ ଏକ୍ ଦୁସ୍ରାରିନ୍ ଦିଲାସା ଚିଅତ୍। 33ଏନ୍ ବିନ୍ତି କାମାଲ୍ଦାନ୍ କା ଶାନ୍ତି ଚିନାବାଲା ପାର୍ମେଶ୍ୱାର୍ସ୍ ନିହ୍ମା ଜାମାର୍ଗାନେ ରାନାସ୍। ଆମେନ୍।
Currently Selected:
ରୋମୀ 15: xis
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
