ରୋମୀ 11
11
ପାର୍ମେଶ୍ୱାର୍ସ୍ ତାଙ୍ଘା ଇସ୍ରାଏଲ୍ ଆଲାରିନ୍ ମା ମଦ୍ରାସ୍
1ହୁଦ୍ଘିଲାଗାନ୍ ଏନ୍ ତେଙ୍ଗ୍ଦାନ୍ କା ପାର୍ମେଶ୍ୱାର୍ସ୍ ତାଙ୍ଘା ନିଜର୍ ଇସ୍ରାଏଲୀ ଆଲାରିନ୍ ଆମ୍ୱେଇ ଚିଚ୍କାଦାସ୍ କାଁଏ? ବିଲ୍କୁଲ୍ ମାଲ୍ଲା! ଏନ୍ହି ତା ଅଣ୍ଟା ଇସ୍ରାଏଲୀ ମୁନୁଷ୍। ଆରୁ ଆବ୍ରାହାମ୍ସ୍କି ବାଉଁଶାନ୍ତାନ୍ ଆରୁ ବିନ୍ୟାମୀନ୍ସ୍କି ପିଢ଼ିନ୍ତାନ୍। 2ପାର୍ମେଶ୍ୱାର୍ସ୍ ତାଙ୍ଘା ଇସ୍ରାଏଲୀ ଆଲାରିନ୍ ମାଲ୍ଲା ଆମ୍ବୁସ୍। ଏକାରିନ୍ କା ଆସ୍ ଆଘ୍ଲିନ୍ତି ଆକ୍କାଚାସ୍। ନିମ୍ ବାଲ୍ଦାରିନ୍ କାଁଏ ପାବିତାର୍ ଶାସ୍ତ୍ରନୁ ଏଲିୟାସ୍କି ବାରେନୁ ଏନ୍ଦେର୍ ଲେଖ୍ଚ୍କା ରାଇ। ଆସ୍ ଇସ୍ରାଏଲୀ ଜାମାର୍ଘି ବିରୁଦ୍ଧ୍ନୁ ପାର୍ମେଶ୍ୱାର୍ସାନ୍ ବିନ୍ତି କାମାଲିୟାସ୍। 3ହେ ପ୍ରାଭୁ, ଆବ୍ଡ଼ାର୍ ନିଙ୍ଘା ନାବୀଜାମାରିନ୍ ପିଟ୍ଟେଇଚାର୍ ଆରୁ ନିଙ୍ଘା ବେଦୀ ଗୁଠିନ୍ ତୋଡ଼େର୍ଚାର୍। ଏକାସାନ୍ ନିଙ୍ଘାଏ ଆରାଧାନା ମାନାଲିୟା। ଏନ୍ ଅଥାନ୍ଖାଲି ବାଛ୍ର୍କାଦାନ୍ ଆରୁ ଆବ୍ଡ଼ାର୍ ଏଙ୍ଗାନ୍ହି ପିଟାଚା ବେଦ୍ଦାଲ୍ନାଏ। 4ଲେକିନ୍ ନିମାଗେ ମନେ ରାଇ କା ପାର୍ମେଶ୍ୱାର୍ସ୍ ଆସିନ୍ ଏନ୍ଦେର୍ ଯାବାବ୍ ଚିଚ୍ଚାସ୍? ଆସ୍ ତେଙ୍ଗିୟାସ୍ କା, “ଏନ୍ ଏଙ୍ଘାଲାଗାନ୍ ସାତ୍ ହାଜାର୍ ମାର୍ଦାନାରିନ୍ ବାଛାବାଚ୍କାନ୍ ଉଇକାଦାନ୍ ଏକାର୍ କା ବାଆଲ୍ ଦେବ୍ତାବନ୍ ଆରାଧାନା ମା କାମ୍ଚାର୍।” 5ହନ୍ନେନ୍ ଇନ୍ନାହି ଇସ୍ରାଏଲ୍ ଜାମାର୍ଘି ଭିତର୍ତି କେତ୍କ ଲୋକ୍ ଆଲାର୍ ପାର୍ମେଶ୍ୱାର୍ସ୍କି ମିଆଁ ବିଶ୍ୱାସ୍ କାମ୍ନାଏ, ଏନ୍ଦେର୍ଗେକା ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ତାଙ୍ଘା କ୍ରିପାତି ଚାଜ୍ଜକାଦାସ୍। 6ପାର୍ମେଶ୍ୱାର୍ସ୍ ତାଙ୍ଘା ଦାୟାତିନ୍ ଆବ୍ଡ଼ାରିନ୍ ଚାଜ୍ଜକାଦାସ୍, ଆବ୍ଡ଼ାର୍ଘି କାମ୍ଚ୍କା ବାନେ ନାଲ୍ଖୁଘି ଲାଗାନ୍ ମାଲ୍ଲା ଚାଜୁସ୍। ଯଦି ଆବ୍ଡ଼ାର୍ଘି ନାଲ୍ଖୁଘି ଲାଗାନ୍ ଚାଜସ୍ନେ ତା ପାର୍ମେଶ୍ୱାର୍ସ୍କି କ୍ରିପାଘି ଏନ୍ଦେର୍ହି ଫାଏଦା ମା ମାନିଦ୍ନେ।
7ଆନ୍ତିନ୍ ଏନ୍ଦେର୍ ମାନ୍ଚା? ଏନ୍ନେକା ଏକା ଇସ୍ରାଏଲୀ ଆଲାର୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନାବେଦ୍ଦାଲିୟାର୍ ଆବ୍ଡ଼ାର୍ ପାର୍ମେଶ୍ୱାର୍ସ୍କି ନଜର୍ନୁ ନିର୍ଦ୍ଦୋଷ୍ ମାନାପଲ୍ଲିୟାରିନ୍। ଲେକିନ୍ ଏକା ଆଲାରିନ୍ ପାର୍ମେଶ୍ୱାର୍ସ୍ ଚାଜ୍ଜକାଦାସ୍ ଆବ୍ଡ଼ାର୍ ଧାର୍ମିକ୍ ମାନ୍ଚାର୍, ଆରୁ ଏକାରିନ୍ ପାର୍ମେଶ୍ୱାର୍ସ୍ ମାଲ୍ଲା ଚାଜୁସ୍ ଆବ୍ଡ଼ାର୍ଘି ମନ୍ବନ୍ କାଠୋର୍ କାମ୍ଚେଇଚାସ୍। 8ଏସ୍କେ କା ପାବିତାର୍ ଶାସ୍ତ୍ରନୁ ଲେଖଚ୍କା ରାଇ, “ପାର୍ମେଶ୍ୱାର୍ସ୍ ଆବ୍ଡ଼ାର୍ଘି ମନ୍ବନ୍ ଶୁନ୍ କାମ୍ଚେଇଚାସ୍। ହୁଦ୍ଘିଲାଗାନ୍ ଆବ୍ଡ଼ାର୍ ହାନ୍ନୁ ରାତେହି ଏରା ପଲ୍ଲନାଇନ୍ ଆରୁ ହେବ୍ଦା ରାତେହି ବୁଝ୍ରା ମେନା ପଲ୍ଲନାଇନ୍। ଆରୁ ଇନ୍ନାତକ୍ହି ଏନ୍ନେନ୍ ମାନାଲିଦ୍।” 9ଆରୁ ଦାଉଦ୍ସ୍ ତେଙ୍ଗ୍ଦାସ୍ କା, “ଆବ୍ଡ଼ାର୍ଘି ହାପ୍ପନାଅନ୍ନାଦ୍ ମାଜା କାମ୍ନାଦ୍, ଆବ୍ଡ଼ାର୍ଘି ଲାଗାନ୍ ଫାନ୍ଦା ମାନ୍ନାଦ୍ କାନାଦ୍। ଆରୁ ଏକାନ୍ ଆବ୍ଡ଼ାର୍ ଆଶୀର୍ବାଦ୍ ସୋଚାଲ୍ନାଏ, ଆଦ୍ କିୟାଁ ଖାତ୍ର୍ନାଘି କାରଣ୍ ମାନ୍ନାଦ୍ କାନାଦ୍। ଆରୁ ଆବ୍ଡ଼ାର୍ ଏକାନ୍ କାମ୍ନାଏ ଆଦ୍ଘି ଲାଗାନ୍ ଆବ୍ଡ଼ାର୍ଗେ ଦଣ୍ଡ୍ ହାଖ୍ଖର୍ନାଦ୍। 10ଆବ୍ଡ଼ାର୍ କାଁଣାର୍ ଲେଖା ରାନାର୍ ଆରୁ ଏନ୍ଦେନ୍ହି ଏରା ପଲ୍ଲନାର୍, ଆରୁ ଆବ୍ଡ଼ାର୍ ତାହ୍ମା ମେଦୁନୁ ଗୁଲାମ୍ ଲେଖା ମୁରୁକ୍ ଯୁକ୍କୁ ଭାର୍ ଉଇକା ରର୍। ହୁଦ୍ଘିଲାଗାନ୍ ତାହ୍ମା ମେଦୁଦ୍ ଜାମାବାକେନ୍ ନୁହ୍କିରୋ।”
11ହୁଦ୍ଘିଲାଗାନ୍ ଏନ୍ ତେଙ୍ଗ୍ଦାନ୍ କା ଇସ୍ରାଏଲୀ ଆଲାର୍ ବିଶ୍ୱାସ୍ ମା କାମ୍ଚାର୍, ହୁଦ୍ଘିଲାଗାନ୍ ପୁରା ନାଶ୍ ମାନ୍ଚାର୍ କେରାର୍ କାଁଏ? ବିଲ୍କୁଲ୍ ମାଲ୍ଲା, ଲେକିନ୍ ଆବ୍ଡ଼ାର୍ ପାର୍ମେଶ୍ୱାର୍ସ୍କି ହୁକୁମ୍ବନ୍ ମା ମାନ୍ଚାର୍, ହୁଦ୍ଘିଲାଗାନ୍ ପାର୍ମେଶ୍ୱାର୍ସ୍ ବିନାଇସ୍ରାଏଲୀରିନ୍ ଛୁଟ୍କାରା ଚିଦାସ୍ ତାକା ଇଦ୍ଘି ଦ୍ୱାର୍ନୁ ଇସ୍ରାଏଲୀର୍ଗେ ହିସ୍ଙ୍ଗା ଲାଗ୍ଗ। 12ଯଦି ଇସ୍ରାଏଲୀ ଜାମାର୍ଘି ବିଶ୍ୱାସ୍ ମା କାମ୍ନା ଆରୁ ଉଦ୍ଧାର୍ବନ୍ ଗ୍ରହନ୍ ମା କାମ୍ନାଘି ଦ୍ୱାର୍ନୁ ବିନାଇସ୍ରାଏଲୀର୍ଗେ ଆଶୀର୍ବାଦ୍ ହାଖ୍ଖରା। ତା ଯଦି ଇସ୍ରାଏଲୀ ଆଲାର୍ ପାର୍ମେଶ୍ୱାର୍ସ୍କି ଉଦ୍ଧାର୍ବନ୍ ଗ୍ରହନ୍ କାମର୍ ତା ଆବ୍ଡ଼ାର୍ଘି ଦ୍ୱାର୍ନୁ ଦୁନିଆଁନ୍ତା ଆଲାର୍ଗେ କେତ୍କ ଭାର୍ପୁର୍ ଆଶୀର୍ବାଦ୍ ହାଖ୍ଖରୋ।
ବିନାଇସ୍ରାଏଲୀର୍ ପାପ୍ତି ବାଛ୍ରର୍
13ଆକ୍କୁନ୍ ନିମା ବିନାଇସ୍ରାଏଲୀରିନ୍ ତେଙ୍ଗାଲ୍ଦାନ୍। ପାର୍ମେଶ୍ୱାର୍ସ୍ ଏଙ୍ଗାନ୍ ବିନାଇସ୍ରାଏଲୀର୍ସାନ୍ ଖାସ୍ଚେଲା ରୁପ୍ନୁ ତାଏକାଦାସ୍। ହୁଦ୍ଘିଲାଗାନ୍ ଏନ୍ ଏଙ୍ଘା ସେବା ନାଲ୍ଖୁବନ୍ ବହୁତ୍ ବାଡ଼୍କା ସୋଚ୍ଦାନ୍। 14ତାକା ଏସ୍କିନ୍ହି ରୀତିତି ଏନ୍ ନିଜର୍ ଇସ୍ରାଏଲୀର୍ଘି ମନ୍ନୁ ନିହ୍ମା ବିନାଇସ୍ରାଏଲୀ ଆବ୍ଡ଼ାର୍ଘି ଦ୍ୱାର୍ନୁ ହିସିଙ୍ଗା କାମ୍ତନ୍। ତାକା ଇସ୍ରାଏଲୀର୍ଘି ଭିତର୍ତି କେତ୍କ ଇସ୍ରାଏଲୀ ଆଲାର୍ ପାପ୍ଘି ଦଣ୍ତ୍ତି ବାଛ୍ରା ଅଙ୍ଗର୍। 15ଏନ୍ଦେର୍ଗେକା ଯେତ୍କବାକେନ୍ ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ଆମ୍ୱେଇଚିଚ୍ଚାସ୍ ତା ଦୁନିଆଁନ୍ତା ଦୁସ୍ରା ଆଲାର୍ ଏକାର୍ ପାର୍ମେଶ୍ୱାର୍ସିନ୍ ବାଲ୍ଲକାଚାର୍ ଆବ୍ଡ଼ାର୍ଘି ପାର୍ମେଶ୍ୱାର୍ସ୍ଗାନେ ବାନେ ସମ୍ୱନ୍ଧ ମାନ୍ଚା। ତା ଯଦି ଇସ୍ରାଏଲୀର୍ ପାର୍ମେଶ୍ୱାର୍ସିନ୍ ଗ୍ରହନ୍ କାମର୍ ତା ଆଦ୍ କେଚ୍ଚକାସ୍ତି ଉଜ୍ଜନା ଲେଖା ମାନକୋ। 16ଯଦି ପାର୍ମେଶ୍ୱାର୍ସ୍କେ ଭେଁଟ୍ ଚାଢ଼ାବାଚ୍କା ପହ୍ଲେ ଆସ୍ମାଦ୍ ବାନେଦ୍ତା ଜାମା ଆସ୍ମାଦ୍ହି ବାନେଦ୍। ଆରୁ ଯଦି ଏକିନ୍ ମାନ୍ନୁଘି ଚେରୁଦ୍ ବାନେଦ୍ତା ଆଦ୍ଘି ଡାହିଁଦ୍ହି ବାନେଦ୍।
17ଇସାନ୍ ଅଣ୍ଟା ମାନ୍ନୁଘି ନମୁନା ଚିଆ କେର୍କିଚି। ମାନ୍ନୁ ଆବ୍ରାହାମ୍ସିନ୍ ତେଙ୍ଗାକେର୍କିଚି। ଡାହିଁ ଇସ୍ରାଏଲ୍ ଆଲାରିନ୍ ଆରୁ ଜଙ୍ଗ୍ଲି ଜାଇତୁନ୍ ବିନାଇସ୍ରାଏଲୀରିନ୍ ତେଙ୍ଗାକେର୍କିଚି। ଇଦ୍ କା ମାନ୍ନୁନ୍ତା ଅଣ୍ଟା ଡାହିଁନ୍ ମୁର୍କିକିରି ଆଦ୍ଘି ଆଡ୍ଡାନୁ ଜଙ୍ଗ୍ଲି ଜାଇତୁନ୍ବନ୍ ଯୋଡ଼ା କେର୍କିଚି। ଆରୁ ମାନ୍ନୁନ୍ତା ଚେରୁଦ୍ ଏକା ଅନ୍ନାମହ୍ନା ଚିଦ୍ ଆଦ୍ ଜଙ୍ଗ୍ଲି ଡାହିଁଦ୍ହି ହାଖ୍ଖୀଦ୍। ହନ୍ନେନ୍ ଇସ୍ରାଏଲ୍ ଆଲାର୍ଗେ ଏକା ଆଶୀର୍ବାଦ୍ ହାଖ୍ଖରି ଆଦ୍ ବିନାୟାହୁଦୀର୍ଗେହି ହାଖ୍ଖରିଦ୍। 18ହୁଦ୍ଘିଲାଗାନ୍ ବାନେ ଡାହିଁ ମୁର୍କିକିରି ଆଦ୍ଘି ଆଡ୍ଡାନୁ ନିମାନ୍ ଜୋଡ଼୍କା ରାଇ ହୁଦ୍ଘିଲାଗାନ୍ ନିମ୍ ବଡ଼୍ପଣି ଆମା ଏଦା। ଆରୁ ଯଦି ବଡ଼୍ପଣି ଏଦ୍ରର୍ ତା ମନେ ଉଇୟା କା ନିମ୍ ଚେରୁନ୍ ଧାରିକିରି ମାଲ୍ଲା ଉୟୁ ଆମ୍ମୁ ମାଲ୍ଲା ଚିଉର୍ ଲେକିନ୍ ଚେରୁଦ୍ ନିମାନ୍ ଧାରିକିରି ଉଇକିଚି। 19ହାଲେ ନିମ୍ ତେଙ୍ଗର୍ କା ଏମାନ୍ ଏସ୍କେ ଜୋଡ଼ାକୋ ହୁଦ୍ଘିଲାଗାନ୍ ଡାହିଁଗୁଠିନ୍ ମୁର୍କାକେରା। 20ଇଦ୍ ସତ୍ତୁଦ୍ କା ଆ ଡାହିଁଗୁଠିନ୍ ମୁର୍କାକେରା ଏନ୍ଦେର୍ଗେକା ଆବ୍ଡ଼ାର୍ ଖ୍ରୀସ୍ତ୍ସିନ୍ ବିଶ୍ୱାସ୍ ମା କାମ୍ଚାର୍, ଲେକିନ୍ ନିମ୍ ଖ୍ରୀସ୍ତ୍ସିନ୍ ବିଶ୍ୱାସ୍ କାମ୍ଚ୍କାର୍, ହୁଦ୍ଘିଲାଗାନ୍ ନିମ୍ ଆବ୍ଡ଼ାର୍ଘି ଆଡ୍ଡାନୁ ରାଦାର୍, ହୁଦ୍ଘିଲାଗାନ୍ ବଡ଼୍ପଣି ଆମା ଏଦ୍ରା ଲେକିନ୍ ପାର୍ମେଶ୍ୱାର୍ସ୍କି ଆଦର୍ କାମା। 21ଆରୁ ଯଦି ପାର୍ମେଶ୍ୱାର୍ସ୍ ଅସ୍ଲି ଡାହିଁବନ୍ ରା ମା ଚିଚ୍ଚାସ୍ତା ନିମାନ୍ହି ରା ମା ଚିଦାସ୍। 22ହୁଦ୍ଘିଲାଗାନ୍ ନିମ୍ ପାର୍ମେଶ୍ୱାର୍ସ୍କି କ୍ରିପା ଆରୁ କାଠୋର୍ ସାଭାବ୍ ଯୋଡ଼େନିନ୍ ଏରା। ଏକାର୍ ଆସ୍କି କାତ୍ଥାନ୍ ମା ମେନ୍ନାଏ ଆବ୍ଡ଼ାର୍ଗେ ଆସ୍ ବହୁତ୍ କାଠୋର୍ ରାଦାସ୍। ଯଦି ନିମ୍ ଆସ୍କି ମିଆଁ ବିଶ୍ୱାସ୍ କାମ୍ତେ ରର୍, ହାଲେ ଆସ୍ ନିହ୍ମା ମିଆଁ କ୍ରିପା କାମସ୍। ଲେକିନ୍ ଯଦି ନିମ୍ ବିଶ୍ୱାସ୍ କାମ୍ନା ଆମ୍ୱର୍ଚର୍ତା ଆସ୍ ନିମାନ୍ହି ଡାହିଁଲେଖା ମୁର୍କିକିରି ଖେବ୍ଡ଼ ଚସ୍। 23ଆରୁ ଯଦି ଇସ୍ରାଏଲ୍ ଆଲାର୍ ଆରୁଅହନ୍ ବିଶ୍ୱାସ୍ନୁ କିର୍ରର୍ ବାରର୍ ତା ଆବ୍ଡ଼ାରିନ୍ ଆରୁଅହନ୍ ମାନ୍ନୁଗାନେ ଜୋଡ଼ାଚାକୋ ଏନ୍ଦେର୍ଗେକା ପାର୍ମେଶ୍ୱାର୍ସ୍ ଆବ୍ଡ଼ାରିନ୍ ଆରୁଅହନ୍ ଯୋଡ଼ା ଅଙ୍ଗ୍ଦାସ୍। 24ଏନ୍ଦେର୍ଗେକା ଯଦି ନିମ୍ ସାଭାବ୍ତି ଜଙ୍ଗ୍ଲି ଜାଇତୁନ୍ଘି ଡାହିଁଲେଖା ରାଚ୍କାର୍, ଲେକିନ୍ ପାର୍ମେଶ୍ୱାର୍ସ୍ ନିମାନ୍ ମୁର୍କିରି ଇଦ୍ଦକା ମାନ୍ନୁଗାନେ ଯୋଡ଼େ ଚିଚ୍ଚାସ୍, ଏକାଦ୍ କା ସାଭାବ୍ଘି ବିରୁଦ୍ଧ ଆରୁ ଏକାଦ୍ କା ଏନ୍ନେ ମାନାପଲ୍ଲିଦ୍। ହୁଦ୍ଘିଲାଗାନ୍ ଏକା ଅସ୍ଲି ଡାହିଁନ୍ ପାର୍ମେଶ୍ୱାର୍ସ୍ ମୁର୍କେ ଚିଚ୍କାଚାସ୍, ଆବନ୍ ଆରୁଅହନ୍ ଯୋଡ଼ା ପଲ୍ଲଦାସ୍ କାଁଏ?
ପାର୍ମେଶ୍ୱାର୍ସ୍ ଜାମାର୍ଘି ମିଆଁ କ୍ରିପା କାମ୍ଦାସ୍
25ହେ ଭାଇ ଆରୁ ବୁହୁଣୀ ଜାମାରୋ, ନିମ୍ ନିଜ୍କେନିଜ୍ ବୁଦ୍ଧିୟାର୍ ଆମା ସୋଚା, ହୁଦ୍ଘିଲାଗାନ୍ ଏନ୍ ଚାହାଁଲ୍ଦାନ୍ କା ନିମ୍ ପାର୍ମେଶ୍ୱାର୍ସ୍କି ନୁଡ୍କା ସତ୍ତୁବନ୍ ଆହା, ଆରୁ ଇ ସତ୍ତୁ ଇଦ୍ କା ଯେତ୍କବାକେନ୍ତକ୍ ବିନାଇସ୍ରାଏଲୀଜାମାର୍ ଏକାରିନ୍ କା ପାର୍ମେଶ୍ୱାର୍ସ୍ ଚାଜ୍ଜକାଦାସ୍ ତାଙ୍ଘା ଚାହାଗେ ମା ବାରର୍ ହତ୍କତକ୍ ଇସ୍ରାଏଲ୍ର୍ଘି ଭିତର୍ତି କେତ୍କ ଆଲାର୍ଘି ମନ୍ କାଠୋର୍ ରଦ୍। 26ଆରୁ ଏନ୍ନେ ଜାମା ଇସ୍ରାଏଲ୍ ଜାମାର୍ ପାପ୍ଘି ଦଣ୍ତ୍ତି ବାଛ୍ରର୍। ଏସ୍କେ କା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ, “ଛୁଡ଼ାବାନାବାଲା ସିୟୋନ୍ସ୍ତି ବାରସ୍। ଆରୁ ଆସ୍ ଇସ୍ରାଏଲୀର୍ଘି ବାଁଉଶାନ୍ତା ଆଲାର୍ଘି ନାଲ୍ଖୁନ୍ ଏକାଦ୍ କା ପାର୍ମେଶ୍ୱାର୍ସ୍କି ନଜର୍ନୁ ବାନେ ମା ଲାଗ୍ଗିଦ୍ ଆ ନାଲ୍ଖୁନ୍ ହାଟାବସ୍।” 27ଆରୁ ଆବ୍ଡ଼ାର୍ ଗାନେ ଏଙ୍ଘାଏ କାତ୍ଥାଚିଚ୍ଚକା ମାନଦ୍ କା ଯେତ୍କବାକେନ୍ ଏନ୍ ଆବ୍ଡ଼ାର୍ଘି ଜାମା ପାପ୍ବନ୍ ଛେମା କାମନ୍ଚନ୍। 28ଢେର୍ ଇସ୍ରାଏଲୀ ଆଲାର୍ ଆକ୍କୁନ୍ ସୁସାମାଚାର୍ଘି ବିରୋଧନୁ ରାନାଏ ଆରୁ ନିନ୍ ବିନାଇସ୍ରାଏଲୀର୍ଘି ଲାଗାନ୍ ଫାଏଦା ମାନ୍ଚା, ହାଲେହି ପାର୍ମେଶ୍ୱାର୍ସ୍ ଇସ୍ରାଏଲ୍ ଜାମାରିନ୍ ବାନେ ହାଖ୍ଖଦାସ୍, ଏନ୍ଦେର୍ଗେକା ଆସ୍ ଇସ୍ରାଏଲୀ ଜାମାର୍ଘି ପୁର୍ଖାରିନ୍ କାତ୍ଥା ଚିଚ୍କାଚାସ୍। ହୁଦ୍ଘିଲାଗାନ୍ ଆବ୍ଡ଼ାର୍ ଅନ୍ଦୁଲ୍ ପାର୍ମେଶ୍ୱାର୍ସ୍କି ଚାହାଗେ ଜରୁର୍ ବାରର୍। 29ଏନ୍ଦେର୍ଗେକା ପାର୍ମେଶ୍ୱାର୍ସ୍ ନା ତା ନିଜର୍ ବାର୍ଦାନ୍ବନ୍ ନିଜେନିନ୍ ହଦାସ୍କାଦାସ୍ ଆରୁ ନେକାନ୍ ମେହ୍ଁଦାସ୍ ଆବ୍ଡ଼ାର୍ଘି ତାର୍ତି ନିଜର୍ ମନ୍ବନ୍ ଏକ୍ଲାହି ମା ବାଦ୍ଲାଦାସ୍। 30ଲେକିନ୍ ପହ୍ଲେ ନିମ୍ ବିନାଇସ୍ରାଏଲୀର୍ ପାର୍ମେଶ୍ୱାର୍ସ୍କି ହୁକୁମ୍ ମା ମାନାଲ୍କାର୍, ଲେକିନ୍ ଆକ୍କୁନ୍ ଆବ୍ଡ଼ା ଇସ୍ରାଏଲୀଜାମାର୍ ପାର୍ମେଶ୍ୱାରସ୍କି ହୁକୁମ୍ ମା ମାନ୍ଚାର୍, ହୁଦ୍ଘିଲାଗାନ୍ ନିହ୍ମା ବିନାଇସ୍ରାଏଲୀର୍ଘି ମିଆଁ ପାର୍ମେଶ୍ୱାର୍ସ୍ କ୍ରିପା କାମ୍ଚାସ୍। 31ହନ୍ନେନ୍ ଇସ୍ରାଏଲୀଜାମାର୍ ଆକ୍କୁନ୍ ହୁକୁମ୍ ମା ମାନ୍ଚାର୍ ତାକା ନିହ୍ମା ବିନାଇସ୍ରାଏଲୀର୍ଘି ମିଆଁ ଏସ୍କେ ଦାୟା କାମାକେରା ହନ୍ନେନ୍ ଇସ୍ରାଏଲ୍ର୍ଘି ମିଆଁହି କ୍ରିପା କାମାକୋ। 32ପାର୍ମେଶ୍ୱାର୍ସ୍ ଜାମା ଆଲାରିନ୍ ହୁକୁମ୍ ମା ମାନ୍ନାଘି ମଉକା ଚିଚ୍ଚାସ୍ ତାକା ଆସ୍ ଅନ୍ଦୁଲ୍ ଜାମାର୍ଘି ମିଆଁ ଦାୟା କାମାଅଙ୍ଗସ୍।
ପାର୍ମେଶ୍ୱାର୍ସ୍କି ସ୍ତୁତି
33ଆରେ, ବାଫ୍ରେ, ପର୍କୁତ୍ନୁ ପାର୍ମେଶ୍ୱାର୍ସ୍ ତାଙ୍ଘା ବୁଦ୍ଧି ଆରୁ ଜ୍ଞାନ୍ତି ଏକାନ୍ କାମ୍ଚ୍କାଦାସ୍ ଆବନ୍ ନେଦ୍ହି ବୁଝ୍ରା ପଲ୍ଲନାଇନ୍। ଆରୁ ଆସ୍କି ନାଲ୍ଖୁ କାମ୍ନାଘି ତାରିକାବନ୍ହି ନେଦ୍ହି ବୁଝ୍ରା ପଲ୍ଲନାଇନ୍। 34ଏନ୍ଦେର୍ଗେକା ପାବିତାର୍ ଶାସ୍ତ୍ରନୁ ଲେଖ୍ଚ୍କା ରାଇ କା ପ୍ରାଭୁସ୍କି ମନ୍ତା ସୋଚ୍ବନ୍ ନେଦ୍ ଆହା ଅଙ୍ଗ୍ନାଏ? ଚାହେ ନେଦ୍ ଆସିନ୍ ସାଲାହ୍ ଚିଆ ଅଙ୍ଗ୍ନାଏ? 35ଚାହେ ନେଦିନ୍ ପହ୍ଲେ ପାର୍ମେଶ୍ୱାର୍ସ୍କେ ଏନ୍ଦ୍ରିନ୍ ଚିଚ୍ଚକାନାଏ କାଁଏ, କା ଆଦ୍ଘି ବାଦ୍ଲା ପାର୍ମେଶ୍ୱାର୍ସ୍ ଆସ୍କେ ଚସ୍? 36ଏନ୍ଦେର୍ଗେକା ଆସିନ୍ ଜାମାକିଛିନ୍ ସିର୍ଜାଚ୍କାଦାସ୍ ଆରୁ ଆସ୍କି ଦ୍ୱାର୍ନୁନିନ୍ ଜାମାକିଛି ମାନିଦ୍। ଆରୁ ଜାମାକିଛି ଆସ୍କିଦ୍। ତାକା ଆବ୍ଡ଼ାଦ୍ ଯୁଗ୍ଯୁଗ୍ ଆସ୍କେ ଆଦର୍ ଚିତେରଦ୍। ଆମେନ୍।
Currently Selected:
ରୋମୀ 11: xis
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
