റോമക്കാറാര് 6
6
പാവ സെയ്യാത്ത പെ്ളേപ്പ്
1അദ്‌ണാലെ ഇദ്‌ണ പറ്റി ണമ്മ എന്ത സൊല്ല്യ? സാമി സേത്തി സേത്തി പ്‌ണ്ണ്യ സെയ്‌ദ് കൊണ്ടിര്‌ക്ക്യ പാവ സെയ്‌ദ് കൊണ്ടിര്‌ക്കുഡൊ എന്ത? 2അച്ചെ സെയ്യാഗെ പാങ്കില്ലെ. പാവ സെയ്‌ര കാര്യാത്തിലി കല്ല് ബെത്തെക്കിന ണമ്മ ഇന്നിമ് എച്ചെ പാവ സെയ്‌ദ് കൊണ്ട് പെ്ളേക്ക്യ മുഡ്യു? പാവാക്ക് ണമ്മ സത്തവാര്‌ത്തെ. 3ഏസു ക്‌റ്‌സ്‌ത്തോഡെ ഒന്റായി എജേയ ബേ്ണ്ടി ണമ്മ തണ്ണിക്ക് മുളുഗി എ്ന്താമ്. അച്ചെ തണ്ണിക്ക് മുളുഗി എ്ന്ത ണമ്മ അവാ് സത്താദ്‌ണ പാസെ ണമ്മാമ് സത്താമ് എന്ത് ണിമാക്ക് തെര്യാഗ? 4അച്ചെ അവാ് സാവുക്ക് എജേന്തവാരാന ണമ്മ തണ്ണി മുളുക്കാത്തിലി അവാന്‌ദൊപ്പ സാഗാമ് സെയ്‌ദാമ് പൊദേക്കാമ് സെയ്‌ദാര്. അച്ചെ ക്‌റ്‌സ്‌ത്ത്‌മ് സത്ത് അപ്പനാന സാമിദ് മ്‌ഗ്‌ന്ത സക്‌ദിലി ഉജുറെ്ന്ത് പുദ്യ പെ്ളേപ്പ് കെ്ഡേത്ത പാസെ ണമാക്ക്‌മ് പുദ്യ പെ്ളേപ്പ് കെ്ഡേക്ക്യ ബേ്ണ്ടിത്തെ.
5ക്‌റ്‌സ്‌ത്ത് സത്ത സാവുക്ക് ണമ്മാമ് എജേരദാനാക്കി അവാ് സത്തിര്‌ന്ത് ഉജുറെ്ന്ത പാസെ ണമ്മാമ് ഉജുറെ്ന്തില. 6അദ്‌ണാലെ ഇനി ണമ്മ പാവ സെയ്‌രാദ്‌ക്ക് ആളായിര്‌ന്ത ണമ്മ് പാവ സരിഗല പാവ പളാക്ക ഇല്ലാദായ ബേ്ണ്ടി പാവ സെയ്‌ദ് ണഡാന്ത ണമ്മ്‌ദ് പള്യ പെ്ളേപ്പ്‌ണ ക്‌റ്‌സ്‌ത്ത്‌ദൊപ്പ കുരുസ്‌ക്കെ സേത്തി ആണി അഡിത്താമ് എന്ത് ണമ്മ കണക്കാക്ക്‌റാമ്. 7അച്ചെ സത്തവാ് പാവ സെയ്‌ര പെ്ളേപ്പിലിര്‌ന്ത് തപ്പ്‌സി കഡാന്തിര്‌ക്കാ്.
8ണമ്മ ക്‌റ്‌സ്‌ത്ത്‌ദൊപ്പ സത്തിര്‌ന്ത അവാന്‌ദൊപ്പ പെ്ളേക്കില എന്ത് ണമ്പ്‌റാമ്. 9ക്‌റ്‌സ്‌ത്ത് സത്ത് ഉജുറെ്ന്താദ്‌ണാലെ ഇനി അവാന്‌ക്ക് സാവില്ലെ, ഇനി സാവുക്ക് അവാന ആള്യ മുഡ്യ എന്ത് ണമാക്ക് തെരിദല്ല. 10ഏസു ണമ്മ് പാവാക്ക് ബേ്ണ്ടി ഒരേ ഒരു ജമ്പ് സത്താ്. ഇനി ണമ്മ് പാവാക്ക് ബേ്ണ്ടി സായ തേവില്ലെ. അവാ് പെ്ളേക്കാദൊ സാമിക്ക് ബേ്ണ്ടിത്തെ.
11അദേപാസെ ണിമ്മാമ് പെ്ളേക്കുഡൊ. സത്തവാര്‌ക്ക് പാവ സെയ്യ മുഡ്യാത്ത പാസെ ണിമ്മാമ് പാവ സെയ്യ മുഡ്യാത്തവാര് എന്ത്‌മ് ക്‌റ്‌സ്‌ത്ത് ഏസുവാലെ സാമിക്ക് ബേ്ണ്ടി പെ്ളേക്കവാര്‌ത്തെ എന്ത്‌മ് ണിമ്മ ണെനേത്ത്‌കൊള്ളിരി. 12അദ്‌ണാലെ അളിന്ത് പോര ണിമ്മ് സരിഗല ആസെപഡ്‌റ കെ്ട്ട ആസെഗണ സെയ്‌ദ് പാവാക്ക് ആളാഗാദിര്‌ക്ക്യ ണോഡികൊള്ളിരി. 13ണിമ്മ സത്തിര്‌ന്ത് ഉജുറെ്ന്തവാര് ആനാദ്‌ണാലെ ണിമ്മ് സരിഗലണ സാമി ആസെപഡ്‌റ കാര്യഗ സെയ്യ ബേ്ണ്ടി സാമിക്ക് ആളാക്കി ബെയ്യിരി. ണിമ്മ് സരിഗല ആസെപഡ്‌റ കെ്ട്ട കാര്യഗ സെയ്‌ദ് കൊണ്ട് ണിമ്മ് സരിഗലണ പാവാക്ക് ആളാക്കി ബെക്കാദി. 14എന്ത്‌ക്കെന്റ മോസെ ബെത്ത സാമി സട്ടണ ണോഡികൊണ്ടല്ല ണിമ്മ പെ്ളേക്കാദ്. സാമി സെയ്‌ര പ്‌ണ്ണ്യണ ണോഡികൊണ്ട്‌ത്തെ ണിമ്മ ഇപ്പ് പെ്ളേക്കാദ്. അദ്‌ണാലെ ണിമ്മ ഇനി പാവാക്ക് ആളാഗാദി.
ണേര്‌മെക്കാറാരായി പെ്ളേക്ക്യ കഡാമെപട്ടവാര്
15അപ്പ് എന്ത സൊല്ല്യ? ണമ്മ മോസെ ബെത്ത സാമി സട്ടണ ണോഡികൊണ്ടല്ല സാമി സെയ്‌ദ പ്‌ണ്ണ്യണ ണോഡികൊണ്ട് പെ്ളേക്കാദ്‌ണാലെ പാവ സെയ്‌ഡൊ എന്ത? അച്ചെ സെയ്യാഗെ പാങ്കില്ലെ. 16ആരാറ്റ് സൊല്ലുപഡി ണഡാക്ക്യ ണിമ്മ ണിമാണ താനെ ഒപ്പഡിത്ത് കൊഡുത്ത് അവാന്‌ദ് സൊല്ലുപഡി ണഡാന്ത ണിമ്മ അവാന്‌ക്ക് ആളായിര്‌ക്കുവേര്. അദേപാസെ പാവാക്ക് ണിമ്മ ആളാന ണിമ്മ സാവുക്ക് ആളാവേര്. സാമി സൊല്ലുപഡി ണിമ്മ ണഡാന്ത ണേര്‌മെക്കാറാര് ആവേര്. 17-18ഇദ്‌ക്ക് മുദ പാവ സെയ്‌രാദ്‌ക്ക് ആളായിര്‌ന്ത ണിമാണ പാവ ആണ്ടിര്‌ന്ത്‌ദ്. ആന എമ്മ പഡിസി തന്ത ബുദ്ദിണായഗണെല്ല ണിമ്മ മനേസ്സാറ ഏറ്റ്‌കൊണ്ട് പാവ സെയ്‌രാദ്‌ണ തള്ള്യെക്കിനേര്. അച്ചെ ണിമ്മ ണേരാന കാര്യഗ സെയ്‌രാദ്‌ക്ക് പണ്ണ്യക്കാറാര് ആനാദ്‌ണാലെ ണാന് സാമിക്ക് ണണ്ണി സൊല്ലുറെ.
19ണിമാക്ക് അത്തറ ണെപ്പ്‌കെ്ഡേസ്യ മുഡ്യാത്താദ്‌ണാലെ ണാന് ണിമാക്ക് തെരിര ദിന്‌സിലി സൊല്ലുറെ, ണിമ്മ ഒരു ഗള്യേലി ണിമ്മ് സരിഗലാത്തില്യ ഒരൊരു ബാഗഗണ കെ്ട്ട കാര്യഗാക്ക്‌മ് മാനതാന ഇല്ലാത്ത കാര്യഗാക്ക്‌മ് ഒപ്പഡിത്ത് കൊണ്ട് കെ്ട്ട കാര്യഗ സെയ്‌ദിര്‌ന്തേര്. ആന ഇപ്പ് ണിമ്മ അദേപാസെ ണിമ്മ് സരിഗലാത്തില്യ ഒരൊരു മൂട്ടുമുറിഗണ സുത്താപ്പുള്ളാദ് ആക്ക്യ ബേ്ണ്ടി ണേര്‌മെ ഉള്ള കാര്യഗാക്ക് ആളാക്കി ഒപ്പഡിത്ത് കൊഡിരി.
20ണിമ്മ പാവാക്ക് ആളായിര്‌ന്ത ഗള്യേലി ണേര്‌മെ ഉള്ള കാര്യഗാക്ക് സെറ്റെ ഗൂഡി എജേഗാദെ ഇര്‌ന്തേര്. 21അയ്യി ഗള്യേലി ണിമ്മ സെയ്‌ദ കാര്യഗണ ണെനേക്കാട്ടി ഇപ്പ് ണിമാക്ക് ണാണ താനെ പ്‌ഡിക്ക്‌ദ്. അച്ചെ സെയ്‌ദണാലെ ണിമാക്ക് എന്ത പല കെ്ഡേത്ത്‌ദ്? അദ്‌ഗാക്കെല്ല കഡേസിലി സാവുത്തെ. 22ആന ഇപ്പ് ണിമ്മ പാവ സെയ്‌രാദ്‌ണ തള്ളി സാമിക്ക് പണ്ണ്യക്കാറാര് ആയിര്‌ക്കേര്. അദ്‌ക്കുള്ള പല ണിമ്മ സുത്താപ്പുള്ളവാരായി തീര്‌റാദ്‌മ് കഡേസിലി ണിമാക്ക് എപ്പേക്ക്‌മ് ഇര്‌ക്ക പെ്ളേപ്പ് കെ്ഡേക്കാദ്‌മ്‌ത്തെ. 23പാവ സെയ്‌ദാദുക്കുള്ള കൂലി സാവുത്തെ. ആന സാമി തര ദാന എങ്കാദ് ണമ്മ് ആണ്ടവനാന ഏസു ക്‌റ്‌സ്‌ത്തോഡെ ഇര്‌ന്ത് കെ്ഡേക്ക എപ്പേക്ക്‌മ് ഇര്‌ക്ക പെ്ളേപ്പ്‌ത്തെ.
Currently Selected:
റോമക്കാറാര് 6: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
