റോമക്കാറാര് 10
10
1ഏസുക്കാറാരെ, ഇസ്‌റേല്‌ക്കാറാര് ദെങ്കുഡൊ എന്ത്‌ത്തെ എന്ന് മനേസ്സിലിര്‌ക്ക ആസേമ് സാമിന ബേ്ണ്ട്‌റ ബേ്ണ്ടാമ്. 2സാമിന പറ്റ്യുള്ള കാര്യാത്തിലി അവാര് റമ്പ ഗട്ടിക്കാറാര് എന്ത് എനാക്ക് ഒറേപ്പായി സൊല്ല്യ മുഡ്യു. ആന ണേര്‌മാന അറുവുണ ബെത്തല്ല അവാര് ഗട്ടിക്കാറാര് എന്ത് കാട്ട്‌റാദ്. 3സാമി ണേര്‌മെക്കാറാര് ആക്ക്‌റാദ്‌ണ പറ്റി അവാര് തെര്യാത്തവാര് ആനാദ്‌ണാലെ തമ്മ സെയ്‌ര കാര്യഗണ ബെത്ത് ണേര്‌മെക്കാറാര് ആയ ണോഡിനാര്. അച്ചെ അവാര്‌ണ സാമി ണേര്‌മെക്കാറാര് ആക്ക്‌റാദ്‌ക്ക് അവാര് കെ്ട്ട്‌പഡാലെ. 4എന്ത്‌ക്കെന്റ് സൊന്ന ക്‌റ്‌സ്‌ത്ത് ബന്താദ്‌ണാലെ മോസെ ബെത്ത സാമി സട്ടപഡി അല്ല ഒരു മന്‌സാന സാമി ണേര്‌മെക്കാറാ് ആക്ക്‌റാദ്. ക്‌റ്‌സ്‌ത്ത്‌ണ ണമ്പ്‌റ ഏവാനാമ് സാമി ണേര്‌മെക്കാറാ് ആക്കുവാ്.
ണല്ല സേദിന ണമ്പി ദെങ്ക്‌റാദ്
5മോസെ ബെത്ത സാമി സട്ടപഡി ണേര്‌മെക്കാറാര് ആരാദ്‌ണ പറ്റി മോസെ എ്ള്‌ദി ബെത്തിര്‌ക്കാദ് എച്ചെന്ത: <<അദിലി സൊല്ലിര്‌ക്ക കാര്യഗണൊട്ടുക്ക് സെയ്‌രവാ് അച്ചെ സെയ്‌രാദ്‌ണാലെ പെ്ളേക്കുവാ്>>#ലേവ്യാര് 18:5 എന്ത്‌ത്തെ. 6ആന ണമ്പിക്ക്യാലെ ണേര്‌മെക്കാറാര് ആരാദ്‌ണ പറ്റി സാമി സൊല്ലുസുലാക്കാത്തിലി: <<ക്‌റ്‌സ്‌ത്ത്‌ണ കൂട്ടി ബര്യ <ആര് മേലോഗാക്ക് പോവാര്>#മറ്‌ദെ സൊല്ലുറ സട്ട 30:13 >> എന്ത്‌മ്, 7<<ക്‌റ്‌സ്‌ത്ത്‌ണ സത്തവാര് പട്ടിലിര്‌ന്ത് കൂട്ടി ബര്യ <ബൂമിക്കഡി ആര് പോവാര്>#മറ്‌ദെ സൊല്ലുറ സട്ട 30:13 >> എന്ത്‌മ് ണിമ്മ ണെനേക്ക ബേ്ഡ. 8ആന സാമി സൊല്ലുസുലാക്കാത്തിലി എന്ത സൊല്ലുദ്? <<സാമിന പറ്റ്യുള്ള സേദി ണിന്ന് പട്ടിലിത്തെ ഇര്‌ക്ക്‌ദ്, ണിന്ന് ബായിലിമ് ണെഞ്ചിലിമ്‌ത്തെ.>>#മറ്‌ദെ സൊല്ലുറ സട്ട 30:14 അദ് എമ്മ സൊല്ലുറ ണമ്പിക്കേന പറ്റ്യുള്ള സേദിത്തെ. 9<<ഏസുത്തെ ആണ്ടവാ്>> എന്ത് ബായാറ തുറാന്ത് സൊല്ലുറവാന്‌മ് അവാന സാമി സത്തവാര് പട്ടിലിര്‌ന്ത് ഉജുറേ്ത്തിനാ് എന്ത് മനേസ്സാറ ണമ്പാമ് സെയ്‌രവാ് ദെങ്കുവാ്. 10മനേസ്സിലി ണമ്പ്‌റാദ്‌ണാലെ ണേര്‌മെക്കാറാര് ആരാര്, ബായാറ തുറാന്ത് സൊല്ലുറാദ്‌ണാലെ ദെങ്കി കഡക്കാര്. 11<<അവാന ണമ്പ്‌റ ഒരുത്താന്‌മ് ണാണഗെ്ട്ട് പോഗമാട്ടാ്>>#എസയ്യാ് 28:16 എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക്‌ദല്ല. 12ഈ കാര്യാത്തിലി എഗുദാരെന്തൊ എഗുദാര് അല്ലാത്തവാരെന്തൊ ഇല്ലെ. എല്ല മന്‌സാര്‌ക്ക്‌മ് ആണ്ടവാ് ഒരുത്താ്ത്തെ, തനാണ ബേ്ണ്ട്‌റ ഏവാന്‌ക്ക്‌മ് കൊഡുക്ക്യ ആണ്ടവാ് സമ്പോത്ത ബെത്തിര്‌ക്കവാ്ത്തെ. 13<<ആണ്ടവാനെ, എമാണ കാപാറ്റുഡോമെ എന്ത് സാമിന ബേ്ണ്ടികൊള്ളുറവാര്‌നെല്ല അവാ് ദെങ്ക്‌സുവാ്>>#ജോവേല് 2:32 എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക്‌ദല്ല.
14ആന അവാര് ണമ്പാത്തവാന എച്ചെ ബേ്ണ്ടികൊള്ളുവാര്? തമ്മ കേ്ക്കാത്ത ഒരുത്താന എച്ചെ ണമ്പുവാര്? ആരാറ്റ് സൊല്ലാദെ അവാര്‌ക്ക് എച്ചെ തെര്യു? 15ആരാറ്റ്‌ണ അന്‌പ്പാദെ എച്ചെ സൊല്ല്യ മുഡ്യു. <<ണല്ല സേദിന സൊല്ല്യ ബരവാര്‌ദ് ബരാവു എത്തറ പിര്യ ഉള്ള കാര്യ>>#എസയ്യാ് 52:7 എന്ത് സാമി സൊല്ലുസുലാക്കാത്തിലി എ്ള്‌ദിര്‌ക്ക്‌ദല്ല.
16ആന എല്ലാര്‌മ് ണല്ല സേദിക്ക് തഗ്‌ന്ത പഡി പെ്ളേക്കാലെ <<ആണ്ടവാനെ എമ്മ സൊന്ന സേദിന ആര് ണമ്പിനാര്?>>#എസയ്യാ് 53:1 എന്ത് എസയ്യാ് സാമിദാസ് സൊല്ലിര്‌ക്കാനല്ല. 17അദ്‌ണാലെ ണമ്പിക്കെ ബരാദ് സേദിന കേ്ക്കാദ്‌ണാലെത്തെ, ക്‌റ്‌സ്‌ത്ത്‌ണ പറ്റി സൊല്ലുറാദ് മേലെത്തെ അയ്യി സേദി എജ്ജ്‌റാദ്.
18ണാന് ഒന്റു ണിമാണ കേ്ട്ട്‌കൊള്ളുറെ, അവാര് അയ്യി സേദിന കേ്ക്കലേഗ? കണ്ടിപ്പായിമ് കേ്ട്ടിര്‌ക്കാര്. സാമി സൊല്ലുസുലാക്കാത്തിലി എസയ്യാ് സൊല്ലിര്‌ക്ക പാസെ:
<<അവാര്‌ദ് ജദ്ദ ബൂമി മുച്ചുഡാമ്
അവാര് സൊന്ന ണായ ഉലഗാദ് എല്ല സാരിമ് എജ്ജിര്‌ക്ക്‌ദ്.>>#സാമി പാട്ട് ബുക്ക് 19:4
19ആന ഇസ്‌റേല്‌ക്കാറാര് ഇദ്‌ണ ണെപ്പ്‌കെ്ഡേസാലേഗ എന്ത് ണാന് ണിമാണ കേ്ക്കെ. ഒണ്ണാവദ് ഇദ്‌ണ പറ്റി മോസെ ഇച്ചെ സൊല്ലിര്‌ക്കാ്:
<<ഒരു ജാദി എന്ത് ഗൂഡി സൊല്ല്യ മുഡ്യാത്ത ആള്‌ഗണ ബെത്ത്
ണാന് ണിമാക്ക് കണ്ണ്‌കഡി ബര്‌സുവെ,
അറുവില്ലാത്ത ജാദിഗണ ബെത്ത്
ണാന് ണിമാക്ക് മൊനെ ബര്‌സുവെ.>>#മറ്‌ദെ സൊല്ലുറ സട്ട 32:21
20എസയ്യാ് സാമിദാസ്:
<<എനാണ പരാക്കാത്തവാര് എനാണ കണ്ട്‌പ്‌ഡിത്താര്.
എനാണ പറ്റി കേ്ക്കാത്തവാര്‌ക്ക് ണാന് ബെ്ളിപട്ടെ>>#എസയ്യാ് 65:1
എന്ത് ദയ്യിരത്തോഡെ സൊല്ലിര്‌ക്കാനല്ല. 21ഇസ്‌റേല്‌ക്കാറാര്‌ണ പറ്റി അയാള് സൊല്ലുറാദ് എച്ചെന്ത:
<<എന്ന് പേസ് കേ്ക്കാത്തവാര്‌മ്, എന്നോഡെ തക്കികൊണ്ടിര്‌ക്കവാര്‌മാന ആള്‌ഗണ
സേത്തി ബെക്ക്യ ണാള്‌ക്ക്‌മ് ണാന് കയ്യിരാന്തെ.>>#എസയ്യാ് 65:2
Currently Selected:
റോമക്കാറാര് 10: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
