പിലിപ്പ്യക്കാറാര് 2
2
ക്‌റ്‌സ്‌ത്ത്‌ണ പാസെ തണിമെക്കാറാരായി ഇരിരി
1ണിമ്മ ക്‌റ്‌സ്‌ത്ത്‌ണ ണമ്പി പെ്ളേക്കാദ്‌ണാലെ ണിമാക്ക് ദയ്യിര ഇര്‌ക്ക്‌ദല്ല? ക്‌റ്‌സ്‌ത്ത് ണിമ്മോഡെ സീവാ് ബ്‌ഡ്‌റാദ്‌ണാലെ ണിമാക്ക് ണിമ്മദി ഇര്‌ക്ക്‌ദല്ല? ണിമ്മാമ് സാമിണിഗാല്‌മ് ഉറാവു ബെത്ത് ണഡാക്കേരല്ല? ക്‌റ്‌സ്‌ത്ത് ണിമ്മോഡെ കറ്‌മ്മ പ്‌ഡിത്ത് ഗവപട്ടാനല്ല? 2അദ്‌ണാലെ ണിമ്മ ഒരേ ണായത്തോഡേമ് ആങ്കീങ്ക് സീവാ് ബ്‌ട്ട്‌മ് ഒരേ എ്ണ്ണത്തോഡേമ് ഒത്തിമോഡേമ് ഇര്‌ന്ത് എനാണ റമ്പ പിര്യപൊങ്ക്യ ബെക്കുഡൊ. 3ണിമ്മ ഒരു കാര്യ സെയ്‌ഗാട്ടി ണിമാണ ബെല്ല്യവാ് ആക്ക്യ ബേ്ണ്ട്യൊ ഏസിക്കാട്ട്യ ബേ്ണ്ട്യൊ ഒരു കാര്യാമ് സെയ്യ ബേ്ഡ. അദ്‌ക്ക് ബഡ്ഡി ണിമ്മ തണിമെക്കാറാരായി ണഡാന്ത് അഡ്‌ത്തവാര്‌ണ ണിമാണ ബ്‌ഡ ബെല്ല്യവാരായി ണെനേത്ത് കൊണ്ട് സെയ്‌ഡൊ. 4ണിമാക്ക് ണല്ലാദ് കെ്ഡേക്കാദ്‌ണ മാട്ട് ണെനേക്കാദെ അഡ്‌ത്തവാര്‌ക്ക്‌മ് ണല്ലാദ് കെ്ഡേക്കാദ്‌ണ ഗൂഡി ണെനേത്ത്‌കൊള്ളുഡൊ.
5ക്‌റ്‌സ്‌ത്ത് ഏസുദ് മനേസ്സ് എച്ചെഗൊ അദേപാസെ ആയിര്‌ക്കുഡൊ ണിമ്മ്‌ദ് മനേസ്സ്‌മ്.
6ക്‌റ്‌സ്‌ത്ത് ഏസു സാമി ആയിര്‌ന്ത് ഗൂഡി,
സാമിക്കിര്‌ക്ക പദാവിപട്ടാത്തിലി ഇര്‌ക്കുഡൊ എന്ത് ണെനേക്കാദെ,
7അദ്‌ഗണെല്ല ബേ്ഡ എന്ത് തള്ളി,
ഒരു പണ്ണ്യക്കാറാന പാസെ,
ഒരു മന്‌സാനായി പ്‌റാന്താ്.
8ക്‌റ്‌സ്‌ത്ത് ഏസു മന്‌സാനായി പെ്ളേക്കാട്ട്യെ,
സാമി സൊല്ലുപഡിക്ക് ഇര്‌ക്ക്യ ബേ്ണ്ടി,
താന് താനെ തണിന്ത് കൊഡുത്താ്,
കുരുസ്‌ക്കെ സേത്തി ആണി അഡിത്ത് കൊല്ല്യ ബ്‌ട്ടാ്.
9അദ്‌ണാലെ സാമി ക്‌റ്‌സ്‌ത്ത് ഏസുണ ഉജുറേ്ത്തി,
എല്ല പദാവിപട്ടാക്ക്‌മ് ബ്‌ഡ ഉജാന്ത പദാവിപട്ട കൊഡുത്ത്,
എല്ലാര്‌ണ ബ്‌ഡ ബെല്ല്യവാ് ആക്കിനാ്.
10അദ്‌ണാലെ മേലോഗാത്തില്യവാര്‌മ് ബൂലോഗത്തില്യവാര്‌മ്
ബൂമിക്കഡില്യവാര്‌മ് ക്‌റ്‌സ്‌ത്ത് ഏസുദ് കാല്‌ക്ക് ബീ്വാര്.
11അപ്പാനായിര്‌ക്ക സാമിന മദ്‌സ്യ ബേ്ണ്ടി
മുച്ചുഡ മന്‌സാര്‌ഗാമ് ഏസു ക്‌റ്‌സ്‌ത്ത്‌ത്തെ ആണ്ടവാ് എന്ത് തമ്മ് ബായാലെ സൊല്ലുവാര്.
കേ്ഡ്‌ഗെ്ട്ട ഉലഗാത്തിലി ണിമ്മ ണല്ലവാരായി പെ്ളേരി
12അദ്‌ണാലെ എനാക്ക് മെച്ച്‌പ്‌ഡിത്തവാരെ, ണിമ്മ് പാവാക്ക് കെ്ഡേക്ക ദണ്ടണേലിര്‌ന്ത് ണിമാണ സാമി ദെങ്ക്‌സിനാ്. അദ്‌ണാലെ ണിമ്മ അദ്‌ക്ക് തഗ്‌ന്ത ദിന്‌സിലി പെ്ളേക്കുഡൊ. മുന്നുക്ക് പാവ സെയ്യാദെ സാമി സൊല്ലുപഡിക്ക് പെ്ളേത്തിര്‌ന്ത പാസെ ഇന്നിമ് പെ്ളേത്ത് കൊണ്ടിര്‌ക്കുഡൊ. ണാന് ണിമ്മ്‌ദൊപ്പ ഇര്‌ക്കാട്ടിമ് ഇല്ലാദെ ഇര്‌ക്കാട്ടിമ് ണിമ്മ സാമിന അഞ്ചി സദ്‌റബെ്ട്ടി കൊണ്ട് പാവ സെയ്യാദെ പെ്ളേത്ത് കൊണ്ടിര്‌ക്കുഡൊ. 13എന്ത്‌ക്കെന്റ സാമി ആസെപഡ്‌റാദ്‌ണ സെയ്യ ണിമാക്ക് ആസെ തരാദ് സാമിത്തെ. അദ്‌ണ സെയ്യ ണിമാക്ക് ബില തരാദ്‌മ് സാമിത്തെ.
14ണിമ്മ എല്ല കാര്യഗാമ് സെയ്‌ഗാട്ടി സാഡി സൊല്ലാദേമ് തറ്‌ക്കാദേമ് ഇരിരി. 15-16അച്ചെ സെയ്‌ദ കേ്ഡ്‌ഗെ്ട്ട് പാവ സെയ്‌ദ് കൊണ്ടിര്‌ക്ക ആള്‌ഗ പട്ടിലി ആര്‌ക്ക്‌മ് കുറ്റ സൊല്ല്യ മുഡ്യാത്ത ദിന്‌സിലിമ് കള്ളകവാഡ് ഇല്ലാത്ത ദിന്‌സിലിമ് ഒരു കുറ്റകൊറേമ് ഇല്ലാത്ത സാമിദ് പ്‌ള്ളെഗ ആയി ണിമാണ കാണ്യ മുഡ്യു. എപ്പേക്ക്‌മ് ഇര്‌ക്ക പെ്ളേപ്പ്‌ണ പറ്റി സൊല്ലുറ ണല്ല സേദിക്ക് ണിമ്മ കെ്ട്ട്‌പട്ട് ണഡാക്കേരല്ല. ഇച്ചെ ഇര്‌ക്ക ണിമ്മ ബാനാത്തിലി ബെ്ള്ളിഗ പൊരിന്തിര്‌ക്ക പാസെ കേ്ഡ്‌ഗെ്ട്ട് പാവ സെയ്‌ദ് കൊണ്ടിര്‌ക്ക ആള്‌ഗ പട്ടിലി ബെ്ള്‌സഗ ആയി ഇര്‌ക്കേര്. അച്ചെ ണാന് ഓരാഡിനാദ്‌മ് പാഡ്‌പട്ടാദ്‌മ് ബെ്റ്‌ദെ ആഗാലെ എന്ത് ക്‌റ്‌സ്‌ത്ത് തിലിമ്പി ബര ണാളിലി ണിമാണ പറ്റി എനാക്ക് പെര്‌മെപഡ്യ മുഡ്യു. 17സാമ്യോഡെ ണമ്പിക്കെ ബെത്ത് കൊഡിമെപഡ്‌റ ണിമ്മ് പെ്ളേപ്പ് സാമിക്ക് മെച്ച്‌പ്‌ഡിത്ത ഒരു പലിന പാസെത്തെ. അച്ചെ പെ്ളേക്ക ണിമാക്ക് ബേ്ണ്ടി എന്ന് ഉജുറുണ കൊഡുക്ക്യ ഗൂഡി എനാക്ക് പിര്യാത്തെ. ണാന് ണിമ്മ്‌ദൊപ്പ പിര്യപൊങ്കുവെ. 18അദേപാസെ ണിമ്മാമ് പിര്യപൊങ്കിരി, എന്ന്‌ദൊപ്പ പിര്യപൊങ്കിരി.
പവുലോസ്‌ദ് എ്ണേവുക്കാറാരാന തിമത്തോസ്‌മ് എപ്പ്‌റാത്തോസ്‌മ്
19ആണ്ടവാ് ഏസുക്ക് ആസെ ഇര്‌ക്കദാനാക്കി തിമത്തോസ്‌ണ പൊത്തന ണിമ്മ് പട്ട്‌ക്ക് സൊല്ലിബ്‌ഡുഡൊ എന്ത് ണാന് ണെനേക്കെ. അച്ചെ അവാ് ണിമാണ ണോഡി ബന്ത് ണിമാണ പറ്റ്യുള്ള സേദിഗണ സൊല്ലി എനാണ പിര്യപഡ്‌സുവാ്. 20ണിമ്മ ണലമായി ഇര്‌ക്കുഡൊ എന്ത് ണെനേവു ഇര്‌ക്ക ഒരു ആള് തിമത്തോസ് അല്ലാദെ ബേ്റെ ആര്‌മ് എനാക്ക് ഇല്ലെ. 21എന്ത്‌ക്കെന്റ ബാക്കി ആള്‌ഗ എല്ല തമാക്ക് മുക്ക്യമാന കാര്യഗ ഏദൊ അദ്‌ണാത്തെ ണോഡുറാര്. ആന ഏസു ക്‌റ്‌സ്‌ത്ത്‌ക്ക് മുക്ക്യമാന കാര്യഗ ണോഡുറാദില്ലെ. 22ആന അവാ് ണല്ല മനേസ്സ്‌ക്കാറാ്ത്തെ എന്ത് ണിമാക്ക് തെര്യുമല്ല. ഒരു മഗാ് അപ്പാന്‌ദ് ഒപ്പ ബേലെ സെയ്‌ര പാസെ അവാ് എന്ന്‌ദൊപ്പ എജേന്ത് ണല്ല സേദിന സൊല്ലിര്‌ക്കാ്. 23അദ്‌ണാലെ ജെയിലിലിര്‌ക്ക എന്ന് കാര്യ ഇനി എച്ചെ ആവു എന്ത് തെരിന്താദ്‌മ് അവാന ണിമ്മ് പട്ട്‌ക്ക് സൊല്ലിബ്‌ഡ്യ ണാന് ആസെപഡ്‌റെ. 24ണാന്‌മ് ണിമ്മ് പട്ട്‌ക്ക് സട്ടന ബര്യ ആണ്ടവാ് എനാണ കയ്യിതാങ്കുവാ് എന്ത് എനാക്ക് ഒറേപ്പിര്‌ക്ക്‌ദ്.
25എപ്പ്‌റാത്തോസ് എന്ന് എ്ണേവുക്കാറാന്‌മ്, ഒരു പഡെയാളിന പാസെ ണല്ല സേദി സൊല്ല്യ ബേ്ണ്ടി എന്ന്‌ദൊപ്പ ബേലെ സെയ്‌ദവാന്‌മ്‌ത്തെ. എനാക്ക് ഉദാവി സെയ്യ ബേ്ണ്ടി ണിമ്മ സൊല്ലിബ്‌ട്ട അയാള്‌ണ ണിമ്മ് പട്ട്‌ക്കെ താനെ സൊല്ലിബ്‌ഡ്‌റാദ് ണല്ലാദ്‌ത്തെ എന്ത് ണാന് ണെനേത്തെ. 26എന്ത്‌ക്കെന്റ അവാ് ണിമാണ പിന്നേമ് കാണ്യ റമ്പ ആസേമ് പട്ടാ്. താന് ണോയി ക്‌ഡാന്ത സേദി ണിമാക്ക് തെരിന്താദ്‌ണാലെ അവാ് റമ്പ സങ്കഡപഡാമ് സെയ്‌ദാ്. 27അവാ് ണോയി പ്‌ഡിത്ത് സായ ആനാദെല്ല ണേര്‌ത്തെ. ആന സാമിക്ക് അവാന കറ്‌മ്മ പ്‌ഡിത്ത് ണോയിന തെ്ള്‌സിനാ്. അച്ചെ അവാന തെ്ള്‌സിനാദ്‌ണാലെ അവാ് താനേമല്ല എന്ന് സങ്കഡാക്ക് മേല് സങ്കഡ ബരാദിര്‌ക്ക്യ എന്നോഡേമ് സാമിക്ക് കറ്‌മ്മ പ്‌ഡിത്ത്‌ദ്. 28അദ്‌ണാലെ ണാന് അവാന ണിമ്മ് പട്ട്‌ക്ക് ബ്‌ഡ്യ റമ്പ ആസെപട്ടെ. അച്ചെ അവാന ണിമാക്ക് പിന്നേമ് കണ്ട് പിര്യപൊങ്ക്യാമ് മുഡ്യു അക്കുളെ ണിമാണ പറ്റി എനാക്ക് ഇര്‌ക്ക അങ്കലാപ്പ്‌ണ കൊറേക്ക്യാമ് മുഡ്യു. 29ആണ്ടവാന്‌ക്ക് മെച്ച്‌പ്‌ഡിത്ത ഇവാന ണിമ്മ പിര്യപിര്യാത്ത് തങ്കാരിക്കുഡൊ. ഇച്ച്‌ളവാര്‌ണ ണിമ്മ മദിക്കുഡൊ. 30എന്ത്‌ക്കെന്റ ക്‌റ്‌സ്‌ത്ത്‌ദ് ബേലേക്ക് ബേ്ണ്ടി അയാള് സായ പക്ക ആനാ്. എമ്മാട്ടൊ ഇര്‌ക്ക ണിമാക്ക് എനാണ കയ്യിതാങ്ക്യ മുഡ്യാത്ത കാര്യഗണ സെയ്യ ബേ്ണ്ടിത്തെ അയാള് തന്ന് ഉജുറുണ ബെലെ ബെക്കാദെ ഈങ്ക് ബന്താദ്.
Currently Selected:
പിലിപ്പ്യക്കാറാര് 2: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
