ഗലാത്ത്യക്കാറാര് 5
5
പിന്നേമ് പണ്ണ്യക്കാറാര് താനെ ആഗാദി
1സട്ടഗാക്ക് ആളാഗാദെ ഇര്‌ക്ക്യ ബേ്ണ്ടിത്തെ ക്‌റ്‌സ്‌ത്ത് ണമാണ ബ്‌ഡ്‌സിനാദ്. പിന്നേമ് ണിമ്മ പണ്ണ്യ ബേലേക്ക് സിക്കാദെ ഒറേത്ത് ണിന്റ്‌കൊള്ളിരി.
2പവുലോസാന ണാന് സൊല്ലുറാദ്‌ണ ണിമ്മ കേ്ളിരി: ണിമ്മ സുന്നത്ത് സാത്ത്‌റ കളിത്ത് കൊണ്ട ക്‌റ്‌സ്‌ത്ത് സെയ്‌ദാദ്‌ണ കൊണ്ട് ണിമാക്ക് ഒരു ഉവഗാരാമില്ലെ. 3സുന്നത്ത് സാത്ത്‌റ കളിക്ക്യ പോര ആള്‌ഗാക്ക് ണാന് പിന്നേമ് സൊല്ലുറെ. അവാര് മോസെ ബെത്ത സാമി സട്ടാത്തിലി സൊല്ലിര്‌ക്ക കാര്യഗണ ഒട്ടുക്ക് സെയ്‌ദിര്‌ക്കുഡൊ. 4മോസെ ബെത്ത സാമി സട്ടാത്തിലി സൊല്ലിര്‌ക്ക കാര്യഗണ സെയ്‌ദ് സാമി തമാണ ണേര്‌മെക്കാറാര് ആക്ക്യ ബേ്ണ്ടി ആസെപഡ്‌റ ണിമ്മ ക്‌റ്‌സ്‌ത്തോഡിര്‌ന്ത് ഒരേപെ്ട്ട് പ്‌റ്‌ന്തെക്കാമ് സെയ്‌ദേര്. സാമി ണിമാക്ക് സെയ്‌ദ പ്‌ണ്ണ്യണ ണിമ്മ ബേ്ഡ എന്ത് ബെത്തേര്. 5ആന ക്‌റ്‌സ്‌ത്തിലി ണമ്പിക്കെ ബെത്തിര്‌ക്കാദ്‌ണാലെ സാമി എമാണ ണേര്‌മെക്കാറാര് ആക്കിനാനെന്ത് സാമിണിഗാല് ണമാക്ക് ഒറേപ്പ് തര്‌ദ്. അദ്‌ക്ക് ബേ്ണ്ടി എമ്മ ണെഞ്ചഡെ ബെത്ത് കാത്തിര്‌ക്കേര്. 6ക്‌റ്‌സ്‌ത്ത് ഏസുണ ണമ്പി പെ്ളേക്കാദ്‌ണാലെ സുന്നത്ത് സാത്ത്‌റ കളിത്താദൊ കളിക്കാത്താദൊ അല്ല ബെല്ല്യ കാര്യ. ക്‌റ്‌സ്‌ത്ത് ഏസുണ ണമ്പി പെ്ളേക്കാദ്‌ണാലെ ണമ്മ ബ്‌ട്ടിര്‌ക്ക സീവാ്ത്തെ ബെല്ല്യ കാര്യ.
7ണിമാക്ക് സൊല്ലി തന്ത സാമി സൊല്ലുസുലാക്കണ ണിമ്മ ണലമായി ണമ്പി ണഡാന്തേര്. ആന അയ്യി സത്ത്യാക്ക് കെ്ട്ട്‌പട്ട് ണഡാക്കാദിര്‌ക്ക്യ ണിമാണ തഡ്‌ത്താദ് ആര്? 8ണിമാണ ഒളേത്ത സാമി അല്ല അച്ചെ തഡ്‌ത്താദ്. 9കലേസി ബെത്ത മാവുക്ക് ലേസ പുളിത്ത മാവുണ ഇക്കിന അയ്യി മാവു മുച്ചുഡ പുളിത്തെക്കു. <<ണേരല്ലാത്ത ബുദ്ദിണായ പുളിത്ത മാവുക്ക് സമ.>> 10ണാന് സൊല്ലുറ ഈ കാര്യണ പറ്റി ണിമ്മ കുറ്റ സൊല്ലമാട്ടേര് എന്ത് എനാക്ക് ണിമാണ പറ്റി ഒറേപ്പുണ്ടു. അയ്യി കാര്യാത്തിലി ണാന് ആണ്ടവാന ണമ്പ്‌റെ. ണിമാണ തെറ്റ് സെയ്യ ബെക്ക ആരാനാല്‌മ് സെരി അവാന സാമി ദണ്ടിക്കുവാ്.
11ആന ഏസുക്കാറാരാന എന്ന് എ്ണേവുക്കാറാരെ, സുന്നത്ത് സാത്ത്‌റ കളിക്ക്യ ണാന് ഇപ്പ്‌മ് സൊന്നാക്കി ണാന് എന്ത്‌ക്ക് കൊഡിമെപഡ്‌റാദ്? ക്‌റ്‌സ്‌ത്ത് കുരുസിലി സത്ത് ണമാക്ക് ബേ്ണ്ടി സെയ്‌ദ കാര്യണ ണമ്പുഡൊ എന്ത് സൊല്ലുറാദ്‌ക്ക് ബഡ്ഡി സുന്നത്ത് സാത്ത്‌റ കളിക്കുഡൊ എന്ത് സൊല്ലിര്‌ന്ത ണാന് എഗുദാര് കണ്ണ്‌ക്ക് കുറ്റക്കാറാ് ആയിര്‌ക്കമാട്ടെ. 12തെറ്റ് സെയ്യ ബെക്ക ആരാനാല്‌മ് സെരി അവാര് ണിമ്മ് കൂട്ടാത്തിലിര്‌ന്ത് ഒരേപെ്ട്ട് ഒയിന്തെക്കുഡൊ എന്ത് ണാന് ആസെപഡ്‌റെ.
13ഏസുക്കാറാരാന എന്ന് എ്ണേവുക്കാറാരെ, ണിമ്മ ആങ്കീങ്ക് സീവാ് ബ്‌ട്ട് കയ്യിതാങ്കി ണഡാക്ക്യ ബേ്ണ്ടി സട്ടഗാക്ക് പണ്ണ്യക്കാറാരായിര്‌ന്ത ണിമാണ ഏസു ക്‌റ്‌സ്‌ത്ത് അദിലിര്‌ന്ത് ബ്‌ഡ്‌സിനാ്. അച്ചെ ഇര്‌ക്ക ണിമ്മ ണിമ്മ് സരിഗല സുഗാക്ക് ബേ്ണ്ടി പാവ സെയ്യാദി. 14<<ണിമ്മ ണിമാണ സീവാ് ബ്‌ഡ്‌റ പാസെ അഡ്‌ത്തവാര്‌ണാമ് സീവാ് ബ്‌ഡുഡൊ>>#ലേവ്യാര് 19:18 എന്തിര്‌ക്ക ഒരേ ഒരു സട്ടണ സെയ്‌ദ് ണഡാന്ത മോസെ ബെത്ത സാമി സട്ടാത്തിലി സൊല്ലിര്‌ക്ക എല്ല കാര്യഗാക്ക്‌മ് കെ്ട്ട്‌പട്ട് ണഡാക്കാമ്. 15ആന ഈ സട്ടണ മറാന്ത് ബേ്ണ്ട്‌ഗ ആങ്കീങ്ക് കഡിത്ത് ബ്‌ന്ത് സാര പാസെ ണിമ്മാമ് പെ്ളേക്കദാനാക്കി ണിമ്മ ഒരേപെ്ട്ട് കെ്ട്ട് തള്ളുവേര്. അദ്‌ണാലെ സൂസാരിത്ത് ഇര്‌ന്ത്‌കൊള്ളിരി.
സാമിണിഗാല്‌ക്ക് കെ്ട്ട്‌പട്ട് ണഡായിരി
16ണിമ്മ സാമിണിഗാല്‌ദ് ആസെപഡി ണഡാന്ത് കൊള്ളിരി, അച്ചെ ണഡാന്താക്കി ണിമ്മ്‌ദ് പിര്യാക്ക് ബേ്ണ്ടി പാവ സെയ്യ ണിമ്മ പോഗ മാട്ടേര് എന്ത് ണാന് സൊല്ലുറെ. 17ണിമ്മ പിര്യപഡ്‌റ കാര്യഗ അല്ല സാമിണിഗാല് പിര്യപഡ്‌റാദ്. സാമിണിഗാല് പിര്യപഡ്‌റ കാര്യഗ അല്ല ണിമ്മ പിര്യപഡ്‌റാദ്. ഇദ് റണ്ട്‌മ് ഒന്റായി എ്ണേഗമാട്ട. അദ്‌ണാലെ ണിമ്മ പിര്യപഡ്‌റ കാര്യഗ സെയ്യ ണിമാക്ക് മുഡ്യമാട്ട. 18ണിമ്മ സാമിണിഗാല്‌ക്ക് കെ്ട്ട്‌പട്ട് ണഡാക്കദാനാക്കി ണിമ്മ മോസെ ബെത്ത സാമി സട്ടാക്ക് ആളല്ല.
19മന്‌സാര് പിര്യപഡ്‌റ കെ്ട്ട കാര്യഗ: ബേസ്യാഡ്‌റാദ്, ആഡ്‌മാഡ്‌ണ പാസെ ഏ്റി ണഡാക്കാദ്, ആണ് പെ്ണ്ണ് ആങ്കീങ്ക് ആസെ ബെത്ത് ണഡാക്കാദ്, 20സെലേന കുമ്മുഡ്‌റാദ്, മന്ത്‌റ സെയ്‌രാദ്, ആങ്കീങ്ക് ഏദ് ബെത്ത് ണഡാക്കാദ്‌മ്, മല്ല്‌സണ്ടെ കെ്ട്ട്‌റാദ്‌മ്, കണ്ണ്‌കഡി, അഡ്‌ത്തവാര്‌ദ് ഗൂഡി ബേ്ഡു എന്ത് ആസെപഡ്‌റാദ്, മൊനെപഡ്‌റാദ്, പ്‌ഡ്യാറപ്‌ഡിക്കാദ്, ആള്‌ഗണ ബേ്റെബേ്റെ കൂട്ടഗ ഉണ്ടാക്കി കച്ചി പ്‌റ്‌ക്കാദ്, 21എര്‌സ ബെത്ത് ണഡാക്കാദ്, കുഡിക്കാദ്, കുഡിത്ത് കൂത്താഡി ണഡാക്കാദ് ഇച്ചെ സെയ്‌ര പല കാര്യഗാമ്‌ത്തെ. ഇച്ച്‌ള ആള്‌ഗണ സാമി ആള്‌റാദ്‌ക്കുള്ള ബാഗ്യ കെ്ഡേക്കമാട്ട എന്ത് ണാന് ണിമാക്കെ മുദ സൊന്ന പാസെ ഇപ്പ്‌മ് സൊല്ലുറെ.
22ആന സാമിണിഗാല്‌ക്ക് കെ്ട്ട്‌പട്ട് ണഡാക്കവാര്‌ദ് പളാക്കഗ: അവാര് സീവാ് ഇര്‌ക്കവാര്‌മ്, പിര്യത്തോഡെ ഇര്‌ക്കവാര്‌മ്, ണിമ്മദ്യോഡെ ഇര്‌ക്കവാര്‌മ്, പൊറിമോഡെ ഇര്‌ക്കവാര്‌മ്, ഗവപഡ്‌റവാര്‌മ്, ഉവഗാര സെയ്‌രവാര്‌മ്, ണമ്പ്യമുഡിരവാര്‌മ്, 23തണിമെ ഉള്ളവാര്‌മ്, അവാനവാ് ആസെന അഡാക്കി ബെക്കവാര്‌മ്‌ത്തെ. ഇച്ചെ പെ്ളേക്കവാര്‌ണ ദണ്ടിക്ക്യ ഒരു സട്ടാമ് ഇല്ലെ. 24ക്‌റ്‌സ്‌ത്ത് ഏസുക്ക് പട്ടവാര് തമ്മ്‌ദ് പാവ സെയ്‌ര പെ്ളേപ്പ്‌ണ കുരുസ്‌ക്കെ സേത്തി ആണി അഡിത്ത് കൊന്റാര്. 25സാമിണിഗാല്‌ത്തെ ണമാക്ക് പുദ്യ ഉജുറുണ തന്താദ്. അദ്‌ണാലെ അയ്യി സാമിണിഗാല്‌ക്ക് കെ്ട്ട്‌പട്ട് ണഡായിരി. 26ണമ്മ ആങ്കീങ്ക് പോട്ടിക്ക് ണിന്റ് കൊണ്ട്‌മ് എരസ ബെത്ത് കൊണ്ട്‌മ് ണാന്‌ത്തെ ബെല്ല്യവാ് എന്ത് മേനാമ്പ് കാട്ടി ണഡാക്ക്യാമ് പാങ്കില്ലെ.
Currently Selected:
ഗലാത്ത്യക്കാറാര് 5: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
