എപ്പെസോസ്‌ക്കാറാര് 3
3
പവുലോസ് സാമിന ണമ്പ്‌റവാര്‌ദ് അപ്പൊസലാ്
1പവുലോസ് എങ്ക എനാക്ക് ഇപ്പ് ണിമാക്ക് ബേ്ണ്ടി ജെയിലിലിര്‌ക്ക്യ ഉള്ള ബാഗ്യ കെ്ഡേത്തിര്‌ക്ക്‌ദ്. എന്ത്‌ക്കെന്റ എഗുദാര് അല്ലാത്ത ജാദിഗ ആയിര്‌ന്ത ണിമാക്ക് ണല്ല സേദിന സൊന്നാദ്‌ണാലേമ് ക്‌റ്‌സ്‌ത്ത് ഏസു സൊന്ന പഡി ണഡാന്താദ്‌ണാലേമ്‌ത്തെ.
2അദ്‌താനെമല്ല ണിമാക്ക് ണല്ല സേദിന സൊല്ലുറ ബേലെ സെയ്യ സാമി എനാക്ക് പ്‌ണ്ണ്യ സെയ്‌ദ പാസെ ണിമാക്ക്‌മ് സാമി പ്‌ണ്ണ്യ സെയ്‌ദിര്‌ക്കാ് എന്ത് ണിമാക്ക് തെര്യുമല്ല. 3സാമി ഇന്നാരമാട്ട്‌ക്ക്‌മ് ബെ്ള്യെ സൊല്ലാദെ ബെത്തിര്‌ന്ത കാര്യണ എനാക്ക് സൊല്ലി തന്താ്. ഈ കാര്യണ പറ്റി എ്ള്‌ത്തിലി മുദതാനെ ണാന് ണിമാക്ക് സുരുക്കാത്തിലി എ്ള്‌ദിര്‌ക്കെ. 4ണാന് ഈ എ്ള്‌ത്തിലി മുദ എ്ള്‌ദിന അയ്യി കാര്യണ ണിമ്മ പഡിത്ത് ണോഡിന ക്‌റ്‌സ്‌ത്ത്‌ണ പറ്റി ആള്‌ഗാക്ക് ണേരാത്തി തെര്യാദെ ഇര്‌ന്ത കാര്യഗ എനാക്ക് എത്തറാക്ക് തെര്യു എന്ത് ണിമാക്ക് ണെപ്പ്‌കെ്ഡേക്കു. 5-6അദ് എച്ചെന്ത ഏസു ക്‌റ്‌സ്‌ത്താലെ സാമി ഇസ്‌റേല്‌ക്കാറാര്‌ക്ക് എന്ത എല്ല തരുവെ എന്ത് ബാക്ക് കൊഡുത്താനൊ അയ്യി ണല്ല സേദിന ണിമ്മാമ് ണമ്പി, ഇന്നാരമാട്ട്‌ക്ക്‌മ് സാമിക്ക് അന്ന്യ ജാദിക്കാറാരായി പെ്ളേത്ത് ബന്ത ണിമ്മാമ് അവാര്‌ക്ക് എജേന്ത് പങ്ക്‌ക്കാറാരായി അവാര്‌ക്ക് കൊഡുത്ത ബാക്ക്‌ക്ക് ഉരിമെക്കാറാര് ആനേര്. ഇദ്‌ണ സാമി ഇപ്പിര്‌ക്ക തന്ന്‌ദ് സാമിദാസ്‌ഗാക്ക്‌മ് അപ്പൊസലലാക്ക്‌മ് തന്ന് ണിഗാലാലെ സൊല്ലികൊഡുത്ത പാസെ മുദ പെ്ളേത്തിര്‌ന്തവാര്‌ക്ക് സൊല്ലികൊഡുക്കാലെ.
7സാമി പ്‌ണ്ണ്യ സെയ്‌ദാദ്‌ണാലെത്തെ ഈ ണല്ല സേദിന ണിമാക്ക് സൊല്ലി തരുഡൊ എങ്ക ബേലെന എനാക്ക് സെയ്‌രാദ്‌ക്കുള്ള ബാഗ്യ കെ്ഡേത്താദ്. അദ്‌ണ സെയ്യ ഉള്ള സക്‌ദി സാമി എനാക്ക് തന്താദ്‌ണാലെത്തെ ണാന് ഈ ബേലെക്കാറാ് ആനാദ്. 8ക്‌റ്‌സ്‌ത്ത്‌ണ ബെത്ത് ഇന്നാരമാട്ട്‌ക്ക്‌മ് സൊല്ലി തരാദിര്‌ന്ത ഈ അറുവു എത്തറ ബെല്ല്യാദ്? സാമിക്ക് ബേ്ണ്ടി പ്‌റ്‌ത്ത് ബെത്തിര്‌ക്ക എത്തിന്യൊ ആള്‌ഗ കൂട്ടാത്തിലി ണാന് ബെല്ല്യവാനല്ല. അച്ചെ ഇര്‌ന്ത് ഗൂഡി അയ്യി ണല്ല സേദി സൊല്ലുറ ബേലെന സെയ്യ എനാക്ക് സാമി പ്‌ണ്ണ്യ സെയ്‌ദാ്. 9എന്ത്‌ക്കെന്റ, എല്ലാദ്‌ണാമ് ദ്‌ട്ടിസിന സാമി, ഇന്നാരമാട്ട്‌ക്ക്‌മ് സൊല്ലി തരാദിര്‌ന്ത അയ്യി ണല്ല സേദിന എല്ലാര്‌മ് കേ്ട്ട് അറുവുക്കാറാര് ആക്ക്‌റ ബേലെന സാമി എനാക്ക് തന്തിര്‌ക്കാ്. 10ഏസുക്കാറാര് കൂട്ട ആയിര്‌ക്ക ണമാണ ബെത്ത്, സാമി ഇന്നാരമാട്ട്‌ക്ക്‌മ് സൊല്ലാദെ ബെത്തിര്‌ന്ത തന്ന്‌ദ് ഈ അറുവുണ എത്തറ ബെല്ല്യാദെന്ത് മാഗെ ലോഗണ ആണ്ട്‌കൊണ്ടിര്‌ക്ക കെ്ട്ട ണിഗാല്‌ഗാക്ക് സാമി കാട്ടി കൊഡുത്താ്. 11അദ് ണമ്മ് ആണ്ടവാ് ഏസു ക്‌റ്‌സ്‌ത്ത്‌ണ ബെത്ത് ഉലഗണ ദ്‌ട്ട്‌സാത്ത മുദ ഇര്‌ന്തെ സാമി സെയ്‌ദ് ബര കാര്യാത്തെ. 12അച്ചെ ഏസു ക്‌റ്‌സ്‌ത്ത്‌ണ ണമ്പിനാദ്‌ണാലെ അഞ്ചാദെ ണല്ല ദയ്യിരത്തോഡെ ണമാക്ക് സാമി പട്ട്‌ക്ക് പോയ മുഡ്യു. 13അദ്‌ണാലെ ണാന് ണിമാക്ക് സൊല്ലുറാദ് എന്തെന്റ് സൊന്ന, കജട്ടപഡ്‌റാദ്‌ണാലെ ണിമാക്ക് ഈ പെര്‌മെപഡ്‌റാദ്‌ക്കുള്ള പെ്ളേപ്പ് കെ്ഡേത്ത്‌ദ്. ണാന് ഇപ്പ് ജെയിലിലിര്‌ന്ത് കജട്ടപഡ്‌റാദ്‌ണ ണെനേത്ത് ണിമ്മ സോറ്റു പോഗാദെ ഇരിരി.
ക്‌റ്‌സ്‌ത്ത് ബ്‌ട്ടിര്‌ക്ക സീവാ്
14-15അദ്‌ണാലെ മേലോഗാത്തിലിമ് ബൂലോഗത്തിലിമ് ഇര്‌ക്ക മുച്ചുഡ ആള്‌ഗണാമ് ഏസുദ് പേരിലി ഒരേ ഒരു കുലാക്ക് ആക്കിന സാമിന ണെനേത്ത് ണാന് സന്ത് ഊന്റി പരേസ്‌റാദ് എന്തായെന്റ് സൊന്ന, 16അയ്യി സാമിക്കിര്‌ക്ക പേര്‌പെര്‌മെ എത്തറ ബെല്ല്യാദൊ അദ്‌ക്ക് തഗ്‌ന്ത ദിന്‌സിലി സാമി തന്ന് ണിഗാലാലെ ണിമ്മ്‌ദ് മനേസ്സ്‌ണ ദയ്യിരപഡ്‌സുഡോമെ. 17-18ക്‌റ്‌സ്‌ത്താലെ സാമിക്ക് ബേ്ണ്ടി പ്‌റ്‌ത്ത് ബെത്തിര്‌ക്കവാരോഡെ ണിമ്മ എ്ണേന്ത് പെ്ളേക്കാദ്‌ണാലെ അയ്യി സാമി സീവാ് എത്തറ ഉജാന്താദ്, എത്തറ മ്‌ഗ്‌ന്താദ്, എത്തറ ബെല്ല്യാദ് എന്തുള്ള കാര്യ ണിമ്മ തെരിന്തിര്‌ക്കവാര് ആഡോമെ. അദ്‌ണ ണിമ്മ് പെ്ളേപ്പിലി എത്തറ ബെല്ല്യാദെന്ത് ണെനേത്ത് ണിമ്മ ക്‌റ്‌സ്‌ത്തോഡെ ബെത്തിര്‌ക്ക ണമ്പിക്ക്യാലെ ക്‌റ്‌സ്‌ത്ത് ണിമ്മ് ണെഞ്ച്‌ണ തന്ന്‌ദ് കൂരെ ആക്കികൊള്ളുഡോമെ. 19ഇച്ചെ ഉള്ള സാമിന ണിമ്മ സൊക്കാന തെരിന്ത് കൊള്ള്യാമ് എല്ല അറുവുണ ബ്‌ഡ ഏസു ക്‌റ്‌സ്‌ത്ത്‌ക്കിര്‌ക്ക സീവാ് എത്തറ ഉജാന്താദ് എന്ത കാര്യണ തെരിന്തിര്‌ക്കവാരായി കൊള്ളുഡോമെ.
20-21ഇച്ചെ തന്ന് സക്‌ദിലി ഏസു ക്‌റ്‌സ്‌ത്താലെ തന്ന്‌ദ് ഏസുക്കാറാര് കൂട്ട ആന ണമാണ ആണ്ട് ബര സാമി എപ്പേക്ക്‌മ് പേര്‌പെര്‌മെ ഉള്ളവാനായിര്‌ക്കുഡൊ. ണമ്മ സാമിന കേ്ക്കാദ്‌ണ ബ്‌ഡാമ് കേ്ക്ക്യ ണെനേക്കാദ്‌ണ ബ്‌ഡാമ് ബെല്ല്യ കാര്യഗ സെയ്‌ദ് തര്യ മുഡിര ഒരേ സാമി എപ്പേക്ക്‌മ് പേര്‌പെര്‌മെ ഉള്ളവാനായിര്‌ക്കുഡൊ. ആമെ.
Currently Selected:
എപ്പെസോസ്‌ക്കാറാര് 3: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
