കൊലോസ്യക്കാറാര് 1
1
1-2ക്‌റ്‌സ്‌ത്ത് ഏസുണ ണമ്പി സാമിക്ക് പട്ടവാരായി പെ്ളേക്ക കൊലോസ്യ പട്ടണാത്തില്യവാര്‌ക്ക്, സാമി ആസെപഡി ഏസു ക്‌റ്‌സ്‌ത്ത്‌ദ് അപ്പൊസലാ് ആന പവുലോസ്‌മ് ണമ്മ്‌ദ് ഏസുക്കാറാ് തിമത്തോസ്‌മ് എജേന്ത്, എ്ള്‌ദ്‌റ എ്ള്‌ത്ത്.
ണമ്മ്‌ദ് അപ്പനാന സാമി ണിമാക്ക് പ്‌ണ്ണ്യാമ് സെയ്‌ഡൊ ണിമാണ ണിമ്മദ്യോഡേമ് ബെക്കുഡൊ.
ണണ്ണി സൊല്ലികൊണ്ടുള്ള പരേസ
3-4ക്‌റ്‌സ്‌ത്ത് ഏസോഡെ ഒറേത്ത ണമ്പിക്കെ ബെത്ത് സാമിക്ക് പട്ടവാരായി പെ്ളേക്കവാരാന ണിമ്മ സീവാ് ബ്‌ഡ്‌റേര് എന്ത് എമ്മ കേ്ട്ടിര്‌ക്കേര്. അദ്‌ണാലെ ണിമാക്ക് ബേ്ണ്ടി പരേസ്‌ഗാട്ട്യെല്ല ണമ്മ് ആണ്ടവാ് ഏസു ക്‌റ്‌സ്‌ത്ത്‌ദ് അപ്പനാന സാമിക്ക് എമ്മ എപ്പ്‌മ് ണണ്ണി സൊല്ലുറേര്. 5ഏസുണ പറ്റ്യുള്ള ഈ ണല്ല സേദിന ണിമ്മ കേ്ട്ട് അദ്‌ണ ണേര് എന്ത് ണമ്പി, ണിമ്മ ഇച്ചെ സീവാ് ഇര്‌ക്കവാരായിമ് ണമ്പിക്കുള്ളവാരായിമ് പെ്ളേക്കേര്. അദ്‌ക്കുള്ള സൊത്തു ണിമാക്ക് മേലോഗാത്തിലി പേ്ണ്‌സി ബെത്തിര്‌ക്കാദുണ്ട്. 6സാമി മന്‌സാന ഗവപഡ്‌റാ് എങ്ക ണല്ല സേദിന ണിമ്മ കേ്ട്ട് തെരിന്ത ണാളിലിര്‌ന്ത് ണിമ്മ സാമിക്ക് ബേ്ണ്ടി പെ്ളേത്ത് അദ്‌ക്കുള്ള ഗുണ കാട്ട്‌റ പാസെ, ഈ ഉലഗ മുച്ചുഡ ഈ ണല്ല സേദി ഇപ്പ് പാസി ണിമാണ പാസെ ഉലഗാത്തിലി എത്തിന്യൊ ആള്‌ഗ സാമിക്ക് ബേ്ണ്ടി ഗുണ ഉള്ളവാരായി പെ്ളേക്കാര്. 7എമാക്ക് മെച്ച്‌പ്‌ഡിത്തവാന്‌മ് എമ്മ്‌ദൊപ്പ എജേന്ത് ണമ്പ്യമുഡിരവാനായി ഏസു ക്‌റ്‌സ്‌ത്ത്‌ക്ക് ബേലെ സെയ്‌രവാന്‌മാന എപ്പപ്‌റോസോഡെ ഇര്‌ന്ത്‌ത്തെ ണിമ്മ മുദമുദായി ണല്ല സേദിന പറ്റി പഡിത്താദ്. 8സാമിണിഗാല് ഉദാവ്യാലെ ണിമ്മ സീവാ് ബ്‌ട്ട് ണഡാക്കാദ്‌ണ പറ്റി എമാക്ക് അയാള്‌ത്തെ സൊന്നാദ്.
9അദ്‌ണാലെ ഈ കാര്യഗണ കേ്ട്ട ണാളിലിര്‌ന്ത് സാമി ആസെന പറ്റി തെര്യ റമ്പ അറുവുള്ളവാര് ആയ ബേ്ണ്ടിമ് ണിമ്മ് ണിഗാല്‌കുട്ടിക്ക് ബേ്ഡുമാന എല്ല അറുവുലിമ് ണിമ്മ മ്‌ഗ്‌ന്തവാര് ആയ ബേ്ണ്ടിമ് എമ്മ ഒപ്പ ണിമാക്ക് ബേ്ണ്ടി പരേസ്‌റേര്. 10അദല്ലാദെ താനെ സാമിന പറ്റി തെരിര അറുവിലി മ്‌ഗ്‌ന്തവാരായി സാമിക്ക് മെച്ച്‌പ്‌ഡിത്ത ദിന്‌സിലി ണല്ല കാര്യഗ സെയ്‌ദ് ക്‌റ്‌സ്‌ത്ത്‌ണ പാസെ ണല്ല ഗുണ ഉള്ളവാരായി പെ്ളേക്ക്യ ബേ്ണ്ടിമ് പരേസ്‌റേര്. 11അദ് പറ്റാദെ താനെ ക്‌റ്‌സ്‌ത്ത് തനാക്ക് ബന്ത കജട്ടണ പിര്യപിര്യാത്ത് എച്ചെ താങ്കിനാനൊ അദേപാസെ ണിമ്മാമ് ണിമാക്ക് ബര കജട്ടഗണ പൊറിമോഡെ താങ്ക്‌റാദ്‌ക്ക് ബേ്ഡുമാന സക്‌ദി കെ്ഡേക്ക്യ ബേ്ണ്ടിമ് പരേസ്‌റേര്. 12-13ഇ്റ്‌ട്ട്‌ണ പാസെ ഇര്‌ക്ക പാവ സെയ്‌ര പെ്ളേപ്പിലിര്‌ന്ത് സാമി ണിമാണ ബ്‌ഡ്‌സി തനാക്ക് മെച്ച്‌പ്‌ഡിത്ത മഗാന്‌ദ് ണാഡ്‌ക്കെ ണിമാണ സേത്തി ബെത്തിര്‌ക്കാ്. അദ്‌താനെമല്ല ബെ്ള്‌സണ പാസെ ഇര്‌ക്ക സാമിക്ക് പട്ടവാര് പെ്ളേക്ക ണാഡിലി ണിമാക്ക് ബേ്ണ്ടി പേ്ണ്‌സി ബെത്തിര്‌ക്ക പങ്ക് കെ്ഡേക്ക്യ ബേ്ണ്ടി സാമി ണിമാണ തഗ്‌ദിര്‌ക്കവാര് ആക്കിനാ്. അദ്‌ണാലെ അപ്പനാന സാമിക്ക് ണിമ്മ ണണ്ണി സൊല്ലിരി. 14അയ്യി മഗാന ബെത്ത്‌ത്തെ സാമി ണമ്മ് പാവണ തീത്താദ്‌മ് ഇ്റ്‌ട്ട്‌ണ പാസെ ഇര്‌ക്ക പാവാക്ക് സിക്കി അളിന്ത് പോര പെ്ളേപ്പിലിര്‌ന്ത് ണമാണ ബ്‌ഡ്‌സി എ്ഡ്‌ത്താദ്‌മ്.
ക്‌റ്‌സ്‌ത്ത്‌ത്തെ തലെകോഡി മഗാ്
15ഇന്നാരമാട്ട്‌ക്ക്‌മ് ആര്‌ക്ക്‌മ് കാണ്യ മുഡ്യാത്ത സാമിദ് ഉരുവാത്തെ ക്‌റ്‌സ്‌ത്ത്. അദ്‌താനെമല്ല ദ്‌ട്ടിസി ബെത്തിര്‌ക്ക എല്ലാദ്‌ക്ക്‌മ് അവാ്ത്തെ തലെകോഡി മഗാ്. 16എന്ത്‌ക്കെന്റ മേലോഗാത്തിലിമ്, ബൂലോഗാത്തിലിമ്, കാണ്യമുഡിരാദ്‌ണാമ്, കാണ്യമുഡ്യാത്താദ്‌ണാമ് അച്ചെ എല്ലാമെ അവാനാലെ സാമി ദ്‌ട്ടിസിനാ്. ഈ ഉലഗണ ആള്‌റ അദിഗാരഗണാമ് കാണ്യ മുഡ്യാത്ത ഉലഗണ ആള്‌റ അദിഗാരഗണാമ് അവാനാലെത്തെ ദ്‌ട്ടിസിനാദ്. അവാന്‌ക്ക് ബേ്ണ്ടിത്തെ ദ്‌ട്ടിസിനാദ്. 17ഒന്റുണാമ് ദ്‌ട്ട്‌സാത്ത മുദാഗെ ഇര്‌ന്തവാ്ത്തെ ആണ്ടവാ്. ദ്‌ട്ടിസിര്‌ക്കാദ് എല്ലാമെ ആണ്ടവാനാലെത്തെ ഒന്റുക്ക് സേത്തി ബെത്തിര്‌ക്കാദ്. 18അയാള് എല്ലാദ്‌ക്ക്‌മ് മുമ്പനായിര്‌ക്ക്യ ബേ്ണ്ടി സത്തവാര് പട്ടിലിര്‌ന്ത് ഉജുറെ്ന്തവാന്‌മ് തന്ന് സരിഗല ആയിര്‌ക്ക ഏസുക്കാറാര് കൂട്ടാക്ക് തലെ ആയിര്‌ക്കവാന്‌മ്‌ത്തെ. 19-20സാമിക്കിര്‌ക്ക എല്ല ഗുണഗാമ് ക്‌റ്‌സ്‌ത്ത്‌ക്ക് ഇര്‌ക്കുഡൊ എന്ത് ണെനേത്ത്, ക്‌റ്‌സ്‌ത്ത് കുരുസിലി സൂസിന സോരെന ബെത്ത് ബൂമിലിമ് മേലോഗാത്തിലിമ് ഇര്‌ക്ക എല്ലാര്‌ദ്‌മ് പഗേന തീത്ത് അവാര്‌ണ തന്നോഡെ റാജി കൂഡിസിനാ്.
21മുന്നുക്ക് ണിമ്മ കെ്ട്ട കാര്യഗ സെയ്‌ദ് സാമ്യോഡിര്‌ന്ത് ണിമ്മ പ്‌റ്‌ന്തെക്കിര്‌ന്തേര്. അച്ചെ സാമിമ് ണിമ്മാമ് പഗെക്കാറാര് ആയിര്‌ന്തേര്. 22ആന ഏസു മന്‌സാനായി ബന്ത് സത്താദ്‌ണാലെ സാമി ണിമാണ കുറ്റകൊറെ ഇല്ലാത്തവാര്‌മ് സാമിക്ക് പട്ടവാര്‌മ് കെ്ട്ടെ്ണ്ണ ഇല്ലാത്തവാര്‌മ് ആക്കി ണമാണ തനാക്ക് എ്ണേവുക്കാറാര് ആക്കി ബെത്തിര്‌ക്കാ്. 23അദ് എച്ചെന്ത ഏസു ക്‌റ്‌സ്‌ത്ത്‌ദ് അയ്യി ണല്ല സേദിന ബ്‌ഡാദെ കഡേസിമാട്ട്‌ക്ക് അദ്‌ണ ഒറേപ്പോഡെ ണമ്പി പെ്ളേത്താക്കി ണിമാക്ക് സാമ്യോഡെ ഉറാവു ബെത്ത് ണഡാക്ക്യ മുഡ്യു. അയ്യി ണല്ല സേദിന ഉലഗാത്തിലിര്‌ക്ക ആള്‌ഗാക്കൊട്ടുക്ക് ഇപ്പ് സൊല്ലുറാര്. അദേ സേദിന സൊല്ലുറ ബേലെത്തെ പവുലോസ് എങ്ക ണാന്‌മ് സെയ്‌രാദ്.
ഏസുക്കാറാര് കൂട്ടാക്ക് ബേ്ണ്ടി പവുലോസ് ബേലെ സെയ്‌രാ്
24അദ്‌ണാലെ ഏസുക്കാറാര് കൂട്ട ആയിര്‌ക്ക ണിമാക്ക് ബേ്ണ്ടി പട്ട കജട്ടണ ണെനേത്ത് ണാന് പിര്യപൊങ്ക്‌റെ. എന്ത്‌ക്കെന്റ ഏസുക്കാറാര് കൂട്ട എങ്ക തന്ന് സരിഗലാക്ക് ബേ്ണ്ടി ക്‌റ്‌സ്‌ത്ത് പട്ട കൊഡിമെഗാക്ക് ണാന് പങ്ക്‌ക്കാറാ് ആരെ. 25-26എന്ത്‌ക്കെന്റ മുന്തുക്കേത്ത കാലാത്തിലി സാമിന പറ്റി തെര്യാദിര്‌ന്ത കാര്യഗണൊട്ടുക്ക് ഇപ്പ് ഏസുക്കാറാര് കൂട്ടാക്ക് സൊല്ലികൊഡുക്ക ബേലെന സെയ്യ സാമി എനാണ തെരിന്തെ്ഡ്‌ത്തിര്‌ക്കാ്. 27ഏസു ക്‌റ്‌സ്‌ത്ത്‌ണാലെ സാമിക്കെ എജേയ ഉള്ള ബാഗ്യ ഈ ഉലഗാത്തില്യുള്ള എല്ല ജാദിഗാക്ക്‌മ് കെ്ഡേക്ക സേദി ഇന്നാരമാട്ട്‌ക്ക്‌മ് തെര്യാദിര്‌ന്ത്‌ദ്. ആന ഏസുക്കാറാര് കൂട്ടാക്ക് അദ്‌ണ ഇപ്പ് സൊല്ലികൊഡുക്ക്യ സാമി ആസെപട്ടാ്. അദ്‌ണാലെ ഏസുണ ണമ്പി സാമ്യോഡെ ഉറാവു ബെത്ത് ണഡാക്കാദ് ണിമാക്ക് കെ്ഡേത്ത ബെല്ല്യ ബാഗ്യാത്തെ.
28അദ്‌ണാലെ എമ്മ ക്‌റ്‌സ്‌ത്ത്‌ണ പറ്റി എല്ല ആള്‌ഗാക്കേമ് സൊല്ലികൊണ്ട് ഇര്‌ക്കേര്. സാമി എമാക്ക് തന്തിര്‌ക്ക എല്ല ബുദ്ദിനാമ് ബെത്ത് ഏസുണ പാസെ ആയ അറുവു കൊഡുക്ക്യ ഉള്ളവാര്‌ക്ക് അറുവു കൊഡുത്ത്‌കൊണ്ട്‌മ് ബുദ്ദി സൊല്ലികൊഡുക്ക്യ ഉള്ളവാര്‌ക്ക് ബുദ്ദി സൊല്ലികൊഡുത്ത്‌കൊണ്ട്‌മ് ഇര്‌ക്കേര്. 29അച്ചെ ക്‌റ്‌സ്‌ത്ത് തര സക്‌ദിന ബെത്ത് കൊണ്ട് എനാക്ക് അയാള് തന്ത ബേലെന സെയ്‌ദ് മുഡിക്ക്യ ണാന് റമ്പ ഓരാട്ട ഓരാഡ്‌റെ.
Currently Selected:
കൊലോസ്യക്കാറാര് 1: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
