2 കൊരിന്ത്യക്കാറാര് 8
8
മനേസ്സാറ കൊഡുക്ക ദറ്‌മ്മ
1ഏസുക്കാറാരെ, മക്കദോനിലിര്‌ക്ക ഏസുക്കാറാര് കൂട്ടഗാക്ക് സാമി സെയ്‌ദ പ്‌ണ്ണ്യണ പറ്റി ണിമാക്കെ സൊല്ല്യ ണാന് ഇപ്പ് ആസെപഡ്‌റെ. 2സെര്യാന കൊഡിമെഗ ബന്ത് സോദണെ പട്ട ഈ ഏസുക്കാറാര് കൂട്ടഗ ഏ്ളെഗ ആയിര്‌ന്താര്. അപ്പ്‌മ് അവാര് മനേസ്സാറ റമ്പ ദറ്‌മ്മ കൊഡുക്ക്യ എത്തറാഗൊ പിര്യ ഉള്ളവാര് ആയിര്‌ന്താര്. 3ആര്‌മ് സൊല്ലാദെ താനെ തമാക്ക് മുഡിന്ത അളാവുക്ക്‌മ് അദ്‌ക്ക് മീ്റിമ് അവാര് ദറ്‌മ്മ കൊഡുത്താര് എന്ത് എനാക്ക് താനെ തെര്യു. 4എഗുദ ണാഡില്യ സാമിക്ക് പട്ടവാര്‌ക്ക് ദറ്‌മ്മ കൊഡുക്ക കാര്യാക്ക് തമാണ പങ്ക്‌ക്കാറാര് ആക്ക്യ ബേ്ണ്ടി എമ്മോഡെ അവാര് ബേ്ണ്ടിനാര്. 5എമ്മ ണെനേത്താദ്‌ക്ക്‌മ് അദിഗ അവാര് ദറ്‌മ്മ സെയ്‌ദാര്. അവാര് മുദ തമാണ താനെ ആണ്ടവാന്‌ക്ക് ഒപ്പഡിത്താര്. പ്‌റ സാമി ആസെപഡി എമാക്ക്‌മ് തമാണ ഒപ്പഡിത്താര്. 6അദ്‌ണാലെ ണിമ്മ കൊഡുക്ക്യ ണെനേത്തിര്‌ക്ക ദറ്‌മ്മ സേത്തി തെഗേസ്യ എമ്മ തീത്തോസ്‌ക്ക് സൊന്നേര്. ഈ കാര്യഗ സെയ്യ പ്‌ഡിത്താദ് തീത്തോസ് താനെ? 7സാമ്യോഡെ ബെത്തിര്‌ക്ക ണമ്പിക്കെ, സാമി സൊല്ലുസുലാക്കണ സൊല്ലുറാദ്, സാമിന പറ്റ്യുള്ള അറുവു, എല്ല കാര്യഗാമ് ബെ്ഡ്‌ബെ്ഡ്‌ത്ത് ണോഡി ണഡാത്ത്യുള്ള മനേസ്സ്, എമ്മോഡെ ബ്‌ട്ടിര്‌ക്ക സീവാ്, ഇച്ചെ ഈ കാര്യഗളിലി എല്ല ണിമ്മ മ്‌ഗ്‌ന്തവാര് ആയിര്‌ക്ക പാസെ ദറ്‌മ്മ സെയ്‌ര കാര്യാത്തിലിമ് ണിമ്മ മ്‌ഗ്‌ന്തവാര് ആയിരിരി.
8ണാന് ണിമാക്ക് ദറ്‌മ്മ സെയ്യ ബേ്ണ്ടി കല്‌പനെ ബെത്തല്ല ഇച്ചെ സൊല്ലുറാദ്. ബേ്റെ ഏസുക്കാറാര് കൂട്ടഗ ദറ്‌മ്മ സെയ്‌ര കാര്യാത്തിലി ബെ്ഡ്‌ബെ്ഡ്‌ത്തിര്‌ക്ക പാസെ ണിമ്മ അഡ്‌ത്തവാരോഡെ എത്തറ സീവാ് ബ്‌ഡ്‌റേര് എന്ത് എനാക്ക് തെരിഡൊ. അദ്‌ക്ക് ബേ്ണ്ടിത്തെ ണാന് ഇച്ചെ സൊല്ലുറാദ്. 9ണമ്മ് ആണ്ടവാ് ഏസു ക്‌റ്‌സ്‌ത്ത് ണമാക്ക് എത്തറ പ്‌ണ്ണ്യ സെയ്‌ദാ് എന്ത് ണിമാക്ക് തെര്യു. ക്‌റ്‌സ്‌ത്ത് സൊത്തുക്കാറാ് ആയിര്‌ന്താ്. അച്ചായിര്‌ന്ത് ഗൂഡി ണിമാണ സൊത്തുക്കാറാര് ആക്ക്യ ബേ്ണ്ടി അയാള് ഏ്ളെ ആനാ്.
10പോന ബര്‌സ ഇര്‌ന്തെ ദറ്‌മ്മ സെയ്യ പ്‌ഡിത്ത കാര്യണ ഇപ്പ് സെയ്‌ദ് മുഡിക്കാദ് ണല്ലാദായിര്‌ക്കു എന്ത്‌ത്തെ ണാന് സൊല്ലുറ ണായ. എല്ല ഏസുക്കാറാര് കൂട്ടഗാക്ക് മുദ ദറ്‌മ്മ സെയ്യാമ് അച്ചെ സെയ്യ ആസെപട്ട് ബന്താദ്‌മ് ണിമ്മാത്തെ. 11അദ്‌ണാലെ ഇപ്പ് ദറ്‌മ്മ സേത്ത്യ പ്‌ഡിത്താദ്‌ണ സേത്തി മുഡിരി. അച്ചെ ണിമ്മ മുദ ബെ്ഡ്‌ബെ്ഡ്‌ത്ത് ഇര്‌ന്താദ്‌ക്ക് തഗ്‌ന്ത പാസെ ണിമ്മ കൊഡിരി. ണിമാക്ക് മുഡിന്ത അളാവുക്ക്‌മ് കൊഡിരി. 12ണിമാക്ക് കൊഡുക്ക്യ മുഡിരാദ്‌ണ ണിമ്മ പിര്യപിര്യാത്ത് കൊഡിരി. അച്ചെ കൊഡുത്താക്കി സാമിക്ക് മെച്ച്‌പ്‌ഡിക്കു.
13ണിമാണ ബുദ്ദിമുട്ടിസികൊണ്ട് എഗുദ ണാഡില്യ സാമി പ്‌ള്ളെഗാക്ക് ദറ്‌മ്മ സെയ്‌ഡൊ എന്ത് അല്ല, എല്ലാര്‌മ് ഒരേ സമ ഉള്ളവാര് ആയിര്‌ക്കുഡൊ എന്ത്‌ത്തെ ണാന് ആസെപഡ്‌റാദ്. 14ഇപ്പ് ണിമാക്ക് എക്കസക്ക ഇര്‌ക്കാദ്‌ണാലെ അദിലിര്‌ന്ത് അവാര്‌ക്ക് ബേ്ഡുമാനാദ് കൊഡുത്ത് കയ്യിതാങ്കുഡൊമല്ല. ണിമ്മ അച്ചെ സെയ്‌ദാക്കി ഒരു ബേ്ള്യെ ണിമ്മ ഇല്ലാത്തവാര് ആഗാട്ടി അവാര്‌ക്ക് ണിമാണ കയ്യിതാങ്ക്യ മുഡ്യു. അച്ചെ എല്ലാര്‌മ് ഒരേ സമ ഉള്ളവാര് ആയില. 15സാമി സൊല്ലുസുലാക്കാത്തിലി: <<മൊത്തനാക്ക് പൊറിക്കിനാവാന്‌ക്ക് അളാവുക്ക് മീ്റി കെ്ഡേക്കാലെ, ലേസ താനെ പൊറിക്കിനാവാന്‌ക്ക് കൊറേവു ഒന്റുമ് ഇര്‌ക്കാലെ>>#പയണ 16:18 എന്ത് സൊല്ലിര്‌ക്ക പാസെത്തെ.
തീത്തോസ്‌മ് അയാള്‌ദ് ഒപ്പ ഇര്‌ക്കവാര്‌മ്
16ണിമ്മ് കാര്യാത്തിലി എനാക്ക് ഇര്‌ക്ക അദേ ബെ്ഡ്‌ബെ്ഡ്‌പ്പ്‌ണ തീത്തോസ്‌ദ് മനേസ്സ്‌ക്ക്‌മ് കൊഡുത്ത സാമിക്ക് ണാന് ണണ്ണി സൊല്ലുറെ. 17എന്ത്‌ക്കെന്റ എമ്മ സൊന്നാദ്‌ക്ക് താനേമല്ല അവാ് ണിമ്മ് പട്ട്‌ക്ക് ബരാദ് ണിമ്മ് കാര്യാത്തിലി അവാന്‌ക്ക് മ്‌ഗ്‌ന്ത ബെ്ഡ്‌ബെ്ഡ്‌പ്പ് ഇര്‌ക്കാദ്‌ണാലെ അവാ് തന്ന് പിര്യാത്തിലി താനെ ണിമ്മ് പട്ട്‌ക്ക് ബര്യ മുഡിവാക്കിനാ്. 18ഏസുക്കാറാനാന ഒരുത്താന ഗൂഡി എമ്മ തീത്തോസ്‌ദ് ഒപ്പ സൊല്ലിബ്‌ഡ്‌റേര്. ണല്ല സേദിന സൊല്ലി ണഡാക്കവാ്ത്തെ അവാ്. അദ്‌ണാലെ അവാന എല്ല ഏസുക്കാറാര് കൂട്ടഗാമ് മദ്‌സ്‌റാര്. 19അദ്‌താനെമല്ല, എമ്മ ഈ ദറ്‌മ്മണ എ്ഡ്‌ത്ത് പോഗാട്ടി എമ്മ്‌ദ് ഒപ്പ ബര്യ ഏസുക്കാറാര് കൂട്ട അവാന തെരിന്തെ്ഡ്‌ത്തിര്‌ക്കാര്. എമ്മ എ്ഡ്‌ത്ത് പോര ഈ ദറ്‌മ്മ ആണ്ടവാന മദ്‌സ്‌റാദ്‌മ് ദറ്‌മ്മ സെയ്‌ര കാര്യാത്തിലി എമ്മ ബെ്ഡ്‌ബെ്ഡ്‌ത്ത മനേസ്സുള്ളവാര് എന്ത് കാട്ട്‌റാദ്‌മ്‌ത്തെ. 20എമ്മ സെയ്‌ര ഈ ദറ്‌മ്മ സേത്ത്‌റ കാര്യാത്തിലി ബേ്റെ ആര്‌മ് എമാണ പറ്റി കുറ്റ സൊല്ലാദെ ഇര്‌ക്ക്യ ബേ്ണ്ടിത്തെ എമ്മ ഇച്ചെല്ല സെയ്‌രാദ്. 21ആണ്ടവാന്‌ദ് മുന്തുക്ക് താനേമല്ല, മന്‌സാര്‌ദ് മുന്തുക്ക്‌മ് സെരി ആയിര്‌ക്ക കാര്യ സെയ്‌ഡൊ എങ്കാദ്‌ത്തെ എമ്മ്‌ദ് ഓരാട്ട.
22അദ്‌ണാലെ അവാര്‌ദൊപ്പ ബേ്റെ ഒരു ഏസുക്കാറാന ഗൂഡി എമ്മ സൊല്ലിബ്‌ഡ്‌റേര്. സോദണെ സെയ്‌ര ഗള്യേലെല്ല ബെ്ഡ്‌ബെ്ഡ്‌പ്പുള്ളവാ് എന്ത് അവാ് കാട്ടി തന്താ്. അദ്‌താനെമല്ല, ണിമ്മ സേത്ത്‌റ ഈ ദറ്‌മ്മ കാര്യാത്തിലി അവാന്‌ക്ക് ണല്ല ഒറേപ്പുള്ളാദ്‌ണാലെ അവാനാമ് ഇവാര്‌ദ് ഒപ്പ സൊല്ലിബ്‌ഡ്‌റേര്. 23തീത്തോസ്‌ണ പറ്റി സൊല്ല്യ പോന, ണാന് ണിമ്മ് പട്ടിലി ബേലെ സെയ്‌ഗാട്ടി എന്ന്‌ദൊപ്പ ഇര്‌ന്തവാന്‌മ് എന്ന്‌ദൊപ്പ എ്ണേന്ത് ബേലെ സെയ്‌ദവാന്‌മ്‌ത്തെ. അവാനോഡെ ബര ഏസുക്കാറാര്, ഏസുക്കാറാര് കൂട്ട സൊല്ലിബ്‌ട്ടവാര്‌മ് ക്‌റ്‌സ്‌ത്ത്‌ണ മദിക്കവാര്‌മ്‌ത്തെ. 24അദ്‌ണാലെ ണിമാക്ക് ഇര്‌ക്ക സീവാന്‌ക്ക് തഗ്‌ന്ത പാസേമ് എമ്മ ണിമാണ പറ്റി പെര്‌മെപഡ്‌റ കാര്യഗാക്ക് തഗ്‌ന്ത പാസേമ് ണിമ്മ ഈ ബരവാര്‌ക്ക് കാട്ടി കൊഡുക്കുഡൊ. അച്ചെ എല്ല ഏസുക്കാറാര് കൂട്ടഗാക്ക്‌മ് ണിമാണ പറ്റി എമ്മ സൊല്ലുറാദ് ണേര്‌ത്തെ എന്ത് തെര്യു.
Currently Selected:
2 കൊരിന്ത്യക്കാറാര് 8: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
