2 കൊരിന്ത്യക്കാറാര് 12
12
പവുലോസ്‌ക്ക് ബന്ത കജട്ടഗാമ് സാമി പ്‌ണ്ണ്യാമ്
1അവാനവാന പറ്റിതാനെ പെര്‌മെപഡ്‌റാദ് ഉവഗാര ഇല്ലെ. ആനാല്‌മ് എനാക്ക് അച്ചെ സെയ്‌ദെ തീരുഡൊ. ആണ്ടവാ് എനാക്ക് തന്ത തോറ്റഗണാമ് കാട്ടി തന്ത കാര്യഗണാമ് പറ്റി ണാന് ഇനി സൊല്ല്യ പോരെ: 2ക്‌റ്‌സ്‌ത്തോഡെ ഒന്റായിര്‌ക്ക ഒരു മന്‌സാന പറ്റി എനാക്ക് തെര്യു. അവാന പദിണാല് ബര്‌സാക്ക് മുദ മൂണാവദ് മേലോഗാക്കെ എ്ഡ്‌ത്ത് പോനാ്. സരിഗലാത്തോഡെഗൊ ഇനി സരിഗല ഇല്ലാദെത്തേഗൊ എ്ഡ്‌ത്ത് പോനാദ് എന്ത് എനാക്ക് തെര്യ. ആന സാമിക്ക് തെരിദ്. 3ഈ മന്‌സാന മൂണാവദ് മേലോഗ എന്ത് സൊല്ലുറ പറ്‌ദിസെമാട്ട് എ്ഡ്‌ത്താ് എന്ത് എനാക്ക് തെര്യു. സരിഗലാത്തോഡെഗൊ അല്ലാദെത്തേഗൊ എന്ത് എനാക്ക് തെര്യ. ആന സാമിക്ക് തെരിദ്. 4മന്‌സാന്‌ക്ക് സൊല്ലി ഗെലിസ്യ മുഡ്യാത്താദ്‌മ് ണാവാലെ സൊല്ല്യ പാങ്കില്ലാത്താദ്‌മാന കാര്യഗണ അവാ് കേ്ട്ടാ്. 5ഈ മന്‌സാന പറ്റി ണാന് പെര്‌മെപഡുവെ. ആന എനാണ പറ്റി ണാന് ഒന്റുക്ക്‌മ് തഗ്‌ദി ഇല്ലാത്തവാ് എങ്ക ദിന്‌സിലിത്തെ പെര്‌മെപഡ്‌റെ. 6ണാന് പെര്‌മെപട്ടാല്‌മ് ബുദ്ദിഗെ്ട്ടവാ് ആഗമാട്ടെ. എന്ത്‌ക്കെന്റ ണാന് സൊല്ലുറാദ് ണേര്‌ത്തെ. ണാന് സൊല്ലുറാദ്‌ണ കേ്ട്ട്‌മ് ണാന് സെയ്‌രാദ്‌ണ കണ്ട്‌മ് അല്ലാദെ ആര്‌മ് എനാണ പെര്‌മെപഡുഡൊ എന്ത് ണാന് ആസെപഡ്‌റാദില്ലെ.
7എനാക്ക് ബന്ത അദിസ്യമാന തോറ്റഗണ സൊല്ലി ണാന് റമ്പ പെര്‌മെപഡാദിര്‌ക്ക്യ ബേ്ണ്ടി എന്ന് സരിഗലണ ഒരു മുള്ളു കുത്തുറ പാസെ ഇര്‌ക്ക കജട്ടണ ണാന് പട്ട്‌കൊണ്ട് ഇര്‌ക്കെ. ഇദ് എനാണ കജട്ടപഡിസ്യ ബെത്തിര്‌ക്ക സെയിത്ത്യാന്‌ദ് ദൂദാ്ത്തെ. 8ഇദ് എനാണ ബ്‌ട്ട് പോയ ബേ്ണ്ടി ണാന് മൂണ് ബെജെ ആണ്ടവാന ബേ്ണ്ടിനെ. 9ആന <<എന്ന് പ്‌ണ്ണ്യ ണിനാക്ക് മദി, ഇനി മുഡ്യ എന്ത് സൊല്ലുറ ഗള്യേക്ക് ണിനാക്ക് എന്ന് സക്‌ദി തെഗേന്ത് ബര്‌ദ്>> എന്ത്‌ത്തെ ആണ്ടവാ് എനാക്ക് സൊന്നാദ്. അദ്‌ണാലെ എനാക്ക് ഇര്‌ക്ക കൊറേന പറ്റി റമ്പ പെര്‌മെപഡുവെ. എന്ത്‌ക്കെന്റ എന്ന് കൊറെണാലെ ക്‌റ്‌സ്‌ത്ത്‌ക്ക് റമ്പ സക്‌ദി കാട്ട്യ മുഡ്യു. 10അദ്‌ണാലെ ക്‌റ്‌സ്‌ത്ത്‌ക്ക് ബേ്ണ്ടി കൊറെ ഉള്ളവാ് ആയിര്‌ക്ക്യാമ് ണാണഗെ്ഡ്യാമ് കജട്ടപഡ്യാമ് കൊഡിമെപഡ്യാമ് ബുദ്ദിമുട്ട്യാമ് ണാന് പിര്യ ഉള്ളവാ്ത്തെ. എന്ത്‌ക്കെന്റ കൊറെ ഉള്ളവാ് ആയിര്‌ക്കാട്ടി താനെ ക്‌റ്‌സ്‌ത്ത്‌ദ് സക്‌ദ്യാലെ ണാന് സക്‌ദ്യുള്ളവാനായിര്‌ക്കെ.
പവുലോസ് കൊരിന്ത്യക്കാറാര്‌ണ പറ്റി അര്‌ക്കപഡ്‌റാ്
11ണിമ്മാത്തെ എനാണ ബുദ്ദിഗെ്ട്ടവാന പാസെ സെയ്യ ബെത്താദ്. ണിമ്മ എനാണ പെര്‌മെപട്ടിര്‌ന്തിര്‌ക്കുഡൊ. എന്ത്‌ക്കെന്റ ണാന് ഒന്റുമല്ലാത്തവാ് ആനാല്‌മ് <<ബെല്ല്യ ബെല്ല്യ അപ്പൊസലല>> എന്ത് സൊല്ലുറവാര്‌ണ ബ്‌ഡ ണാന് സിന്നവാനല്ല. 12ണാന് ണിമ്മ് പട്ടിലി അഡ്യാളഗാമ് അദിസ്യഗാള്‌മാന മ്‌ഗ്‌ന്ത കാര്യഗാമ് സെയ്‌ദിര്‌ക്കെ. ഇദ് ണാന് ഒരു അപ്പൊസലാ് എന്ത് തെ്ളുവു തര്‌ദല്ല? 13ണാന് ണിമ്മോഡെ ഇര്‌ന്ത് എന്ന് സിലാവുക്കായി ണിമാണ ബുദ്ദിമുട്ടുസാലെ. ആന ബേ്റെ ഏസുക്കാറാര് കൂട്ടാത്തിലിര്‌ന്ത് ണാന് എന്ന് സിലാവുക്കായി ഏറ്റെ. അദല്ലാദെ ണാന് ബേ്റെ എന്ത കുറ്റ സെയ്‌ദെ? ഈ കുറ്റണ സെറ്റെ പൊറുക്കുഡൊ.
14ഇദാ ണോഡിരി, മൂണാവദ്‌മ് ണിമ്മ് പട്ട്‌ക്കെ ബര്യ ഒരുങ്കിര്‌ക്കെ. അച്ചെന്ത് സൊല്ലി ണിമാണ ണാന് ബുദ്ദിമുട്ടുസമാട്ടെ. ണിമ്മോഡെ ഇര്‌ക്കാദ് ഒന്റുമ് എനാക്ക് ബേ്ഡ, ണിമാണാത്തെ എനാക്ക് ബേ്ഡു. അവ്വപ്പലാക്ക് കൊഡുക്ക്യ സേത്തി ബെക്കാദ് പ്‌ള്ളെഗ അല്ല. അവ്വപ്പലാത്തെ പ്‌ള്ളെഗാക്ക് കൊഡുക്ക്യ ബേ്ണ്ടി സേത്തി ബെക്കാദ്. 15ണിമാണ കയ്യിതാങ്ക്യ ബേ്ണ്ടി ണാന് എനാക്ക് ഇര്‌ക്കാദ്‌ണ മുച്ചുഡ പിര്യപിര്യാത്ത് സിലാവാക്കുവെ. അദ്‌താനെമല്ല ണിമാണ കയ്യിതാങ്ക്യ ബേ്ണ്ടി ണാന് എനാണ താനേമ് പിര്യപിര്യാത്ത് ഒപ്പഡിത്ത് തരുവെ. ണാന് ണിമാണ റമ്പ സീവാ് ബ്‌ഡ്‌റാദ്‌ണാലെ ണിമ്മ ലേസെന്താല് സീവാ് ബ്‌ഡുവേര? 16ണാന് ണിമാണ ബുദ്ദിമുട്ടുസാലെ എന്ത് ണിമ്മ താനെ സമ്മദിക്കേര്. ആന ലേസ ആള്‌ഗ ണാന് ഓസണെക്കാറാ് എന്ത് ണെനേത്ത് ണിമാണ മയാക്കി ഏമാത്ത്‌റവാ് എന്ത് എനാണ പറ്റി സൊല്ലുറാര്. 17ണാന് ണിമ്മ് പട്ട്‌ക്ക് സൊല്ലിബ്‌ട്ടവാര്‌ണ ബെത്ത് ണിമാക്ക് ഇര്‌ക്ക എന്താറ്റ്‌ണ ണാന് ഏമാത്തി എ്ഡ്‌ത്തേന? 18ണാന് തീത്തോസ്‌ണ ണിമ്മ് പട്ട്‌ക്ക് സൊല്ലിബ്‌ട്ടെ. അയാള്‌ദ് ഒപ്പ ബേ്റെ ഒരു ഏസുക്കാറാനാമ് സൊല്ലിബ്‌ട്ടെ. തീത്തോസ് ണിമ്മ്‌ദ് എന്താറ്റ്‌ണ ഏമാത്തി എ്ഡ്‌ത്താന? ഒരേ ണെനേപ്പിലിത്തെ എമ്മ റണ്ട് ആള്‌മ് സെയ്‌രേരല്ല, ഒരേ സട്ട്‌മെ്ട്ടിലിത്തെ ണഡാക്കേരല്ല?
19എമ്മ ഇപ്പ്‌മ് എമാണ ണിമ്മ് മുന്തുക്ക് കുറ്റ ഇല്ലാത്തവാര് എന്ത് കാട്ട്യ ഓരാഡ്‌റേര് എന്ത് ണിമ്മ ണെനേക്കേര? ഇല്ലേഗെ ഇല്ലെ. സാമി മുന്തുക്ക് എച്ചെ ണായ പേസുഡൊ എന്ത് ക്‌റ്‌സ്‌ത്ത് ആസെപഡ്‌റാനൊ അദേപാസെത്തെ എമ്മ ണായ പേസ്‌റാദ്. എനാക്ക് മെച്ച്‌പ്‌ഡിത്ത എന്ന് എ്ണേവുക്കാറാരെ, എമ്മ ഈ സെയ്‌രാദെല്ല ണിമ്മ് ണമ്പിക്കേലി ണിമാണ ഒറേപ്പാക്ക്യാത്തെ. 20ണാന് ണിമ്മ് പട്ട്‌ക്ക് ബര്‌ഗാട്ടി ണാന് ആസെപഡാത്ത ദിന്‌സിലി ണിമാണ കാണുവെ എന്ത്‌മ് ണിമ്മ ആസെപഡാത്ത ദിന്‌സിലി ണിമ്മ എനാണ കാണുവേര് എന്ത്‌മ് ണാന് അഞ്ച്‌റെ. ആങ്കീങ്ക് മല്ല്‌സണ്ടെ, എര്‌സ, മുട്ടെ്റ്‌പ്പ്, അവാനവാ് കാര്യഗണ മാട്ട് ണോഡുറാദ്, അഡ്‌ത്തവാര്‌ണ ണാണഗെ്ഡ്‌സ്‌റാദ്, ണൊണ്ടു സൊല്ലുറാദ്, ആര്‌ക്ക്‌മ് ഒദുങ്കാദെ ഇര്‌ക്കാദ്, കലമ്പാല് ഉണ്ടാക്ക്‌റാദ് അച്ചെ ഇദ്‌ഗെല്ല ണിമ്മ് പട്ടിലി ഇര്‌ക്കുമൊ എന്ത് ണാന് അഞ്ച്‌റെ. 21എമ്മ ഈ ബെജെ ബര്‌ഗാട്ടി ണിമ്മ് മുന്തുക്ക് ബെത്ത് സാമി എമാണ ണാണഗെ്ഡ്‌സുവാനൊ എന്ത്‌മ് ണാന് അഞ്ച്‌റെ. കെ്ട്ട പെ്ളേപ്പ്, ബേസ്യാഡി ണഡാക്കാദ്, കാമാക്ക് അഡിപട്ട് കണ്ടപഡിക്ക് ണഡാക്കാദ്‌ഗാക്കെല്ല സിക്കി സാമി സാരി തില്‌മ്പാദെ ഇര്‌ക്കവാര്‌ണ പറ്റി ദുക്കപഡ്‌റ ഗെദി ബരുമൊ എന്ത്‌മ് ണാന് അഞ്ച്‌റെ.
Currently Selected:
2 കൊരിന്ത്യക്കാറാര് 12: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
