1 തിമത്തോസ് 3
3
ഏസുക്കാറാര് കൂട്ടാത്തില്യ മൂപ്പല
1ഇച്ചെ ഒരു സൊല്ലുണ്ടു: <<ഒരുത്താ് ഏസുക്കാറാര് കൂട്ടാദ് മൂപ്പാ്നായ ആസെപട്ടാക്കി ബെല്ല്യൊരു ബേലെ സെയ്യാത്തെ ആസെപഡ്‌റാദ്>> ഈ സൊല്ലു ണേര്‌മ് ണമ്പ്യമുഡിരാദ്‌മ്‌ത്തെ. 2ആന മൂപ്പാ് ആര്‌ക്ക്‌മ് കൊറെ സൊല്ല്യ ഇല്ലാത്തവാന്‌മ്, ഒരേ പെ്ണ്ടോഡെ ഇര്‌ക്കവാന്‌മ്, കെ്ട്ട ആസെഗാക്ക് ആളാഗത്തവാന്‌മ്, ആള്‌ഗ മദിക്കവാന്‌മ്, ബരവാര് പോരവാര്‌ണ സൊക്കാന തീറ്റ്യൂട്ടി ബ്‌ഡ്‌റവാന്‌മ്, ണലമായി പഡിസ്യ മുഡിരവാന്‌മ് ആയിര്‌ക്കുഡൊ. 3അയാള് ഊറിന മുന്തിരി സാരണ മൊത്തനാക്ക് കുഡിക്കാത്തവാന്‌മ്, അഡിന്തഡിക്കാറാന്‌മ് ആയ പാങ്കില്ലെ. ആന അയാള് തണിമെക്കാറാന്‌മ് ആയിര്‌ക്കുഡൊ. ആള്‌ഗോഡെ തറ്‌ക്കാത്തവാന്‌മ്, പണാക്ക് ബേ്ണ്ടി ആസെപാഡ് ഇല്ലാത്തവാന്‌മ് ആയിര്‌ക്കുഡൊ.
4അയാള് തന്ന് കൂരെകാഡ് കാര്യണ ണലമായി ണോഡി ണഡാത്ത്‌റവാന്‌മ്, എല്ല കാര്യഗാത്തിലിമ് തനാണ മദിത്ത് തന്ന് സൊല്ലുപഡി ണഡാക്ക്യ തന്ന് മക്കമറിഗണ പഡ്‌സ്‌റവാന്‌മ് ആയിര്‌ക്കുഡൊ. 5അവാനവാ് കൂരെകാഡ്‌ഗണ ണോഡി ണഡാത്ത്യ മുഡ്യാത്തവാ് പിന്നെച്ചെ ഏസുക്കാറാര് കൂട്ടണ ണോഡി ണഡാത്ത്യ മുഡ്യു? 6ആന ഏസുണ ഇപ്പ് ണമ്പിര്‌ക്ക പുദുക്ക ആള്‌ഗണ മൂപ്പാനാക്ക്യ പാങ്കില്ലെ. എന്ത്‌ക്കെന്റ തനാക്ക് പദാവി കെ്ഡേത്താദ്‌ണാലെ താന്‌ത്തെ ബെല്ല്യവാ് എന്ത് പെര്‌മെപട്ട് സെയിത്ത്യാന്‌ക്ക് കെ്ഡേത്ത അദേ ദണ്ടണേക്ക് സിക്കുവാ്. 7മൂപ്പാന ഏസുക്കാറാര് കൂട്ടതാനെമല്ല ഏസുണ ണമ്പാത്തവാര് ഗൂഡി മദിക്കവാനായിര്‌ക്കുഡൊ. അപ്പ്‌ത്തെ അയാള് ണല്ല പേര്‌മ് ബാങ്കുവാ്, സെയിത്ത്യാന്‌ദ് സദിക്ക് സിക്കാമ് മാട്ടാ്.
മൂപ്പലാദൊപ്പ ഏസുക്കാറാര് കൂട്ടാത്തില്യ കാര്യഗണ ണോഡുറവാര്
8അദേപാസെ മൂപ്പലാദൊപ്പ ഏസുക്കാറാര് കൂട്ടാത്തില്യ കാര്യഗണ ണോഡുറവാര്‌മ്, ആള്‌ഗ മദ്‌സ്‌റവാര്‌മ്, ഒരു ണായ സൊന്ന അദേപാസെ സെയ്‌രവാര്‌മ്, ഊറിന മുന്തിരി സാര മൊത്തനാക്ക് കുഡിക്കാത്തവാര്‌മ്, പണാക്ക് ബേ്ണ്ടി ആങ്കാരാക്ക് ഇക്കാത്തവാര്‌മ് ആയിര്‌ക്കുഡൊ. 9സാമി അവാര്‌ക്ക് കാട്ടി കൊഡുത്ത ണമ്പിക്കേന ബ്‌ഡാദെ <<ണാന് കുറ്റക്കാറാ് അല്ല>> എന്ത് മനേസ്സ് സൊല്ലുറ ദിന്‌സിലി അവാര് പെ്ളേക്കുഡൊ. 10ഇച്ച്‌ള ആള്‌ഗണ അവാര് ണല്ലവാര കെ്ട്ടവാര എന്ത് മുദ സോദണെ സെയ്‌ഡൊ. അച്ചെ സോദണെ സെയ്‌ദ് അവാര് കുറ്റക്കാറാര് അല്ലാദെ പോനാത്തെ അവാര്‌ണ ഈ ബേലേക്ക് എ്ഡ്‌ത്ത് ബെക്കുഡൊ.
11അദേപാസെ അവാര്‌ദ് പെ്ണ്ടച്ചിലണ ആള്‌ഗ മദിക്കവാര്‌മ്, ണൊണ്ടു സൊല്ലാത്തവാര്‌മ്, കെ്ട്ട ആസേക്ക് ആളാഗാത്തവാര്‌മ്, എല്ല കാര്യാത്തിലിമ് ണമ്പ്യമുഡിരവാര്‌മ് ആയിര്‌ക്കുഡൊ.
12മൂപ്പലാദൊപ്പ ഏസുക്കാറാര് കൂട്ടാത്തില്യ കാര്യഗണ ണോഡുറവാന്‌മ് ഒരേ പെ്ണ്ടോഡെ ഇര്‌ക്കവാ് ആയിര്‌ക്കുഡൊ. അയാള് തന്ന് മക്കമറിഗണാമ്, കൂരെകാഡ്‌ഗണാമ് ണലമായി ണോഡി ണഡാത്ത്‌റവാന്‌മ് ആയിര്‌ക്കുഡൊ. 13ഇച്ചെ മൂപ്പലാദൊപ്പ ഏസുക്കാറാര് കൂട്ടാത്തില്യ കാര്യഗണ ണോഡുറവാര് ഒളുങ്ക തമ്മ് ബേലെന സെയ്‌രദാനാക്കി അവാര്‌ക്ക് ണല്ല മദ്‌പ്പ്‌മ് കെ്ഡേക്കു. ക്‌റ്‌സ്‌ത്ത് ഏസോഡെ ഇര്‌ക്ക ണമ്പിക്കേന ദയ്യിരത്തോഡെ ആള്‌ഗാക്ക് സൊല്ലികൊഡുക്ക്യാമ് മുഡ്യു.
ബെല്ല്യ കാര്യ
14-15ണിന്ന് പട്ട്‌ക്ക് സട്ടന ബരുഡൊ എന്ത് ണാന് ആസെപഡ്‌റെ. ആന ണാന് ബര്യ ണാളാനാക്കി, ണീ എന്തണെല്ല തെരിന്തിര്‌ക്കുഡൊ എന്തിര്‌ക്ക കാര്യഗണ ണാന് ണിനാക്ക് എ്ള്‌ദ്‌റെ. അച്ചെ അയ്യി കാര്യഗണ തെരിരദാനാക്കി ഉജുറുള്ള സാമിദ് കൂരെ ആയിര്‌ക്ക ഏസുക്കാറാര് കൂട്ടാത്തില്യ ആള്‌ഗ എച്ചെ പെ്ളേക്കുഡൊ എന്ത്‌മ് ണിനാക്ക് തെര്യു. തറേമ് കമ്പ്‌മ് ഒരു കൂരേന ഒറേപ്പാക്കി ണില്ല്‌സ്‌റ പാസെ തറേമ് കമ്പ്‌മ് ആയിര്‌ക്ക ഏസുക്കാറാര് കൂട്ട സത്ത്യണ ഒറേപ്പിസി ണില്ല്‌സ്‌റാര്.
16മറേന്തിര്‌ക്ക ബെല്ല്യ കാര്യണാത്തെ ണമ്മ ണമ്പിര്‌ക്കാദ് എന്ത് എല്ല ആള്‌ഗാക്ക്‌മ് സൊല്ല്യ മുഡ്യു.
ഏസു ക്‌റ്‌സ്‌ത്ത് മന്‌സാനായി ബന്താ്,
ക്‌റ്‌സ്‌ത്ത് ആരെന്ത് സാമിണിഗാല് കാട്ടി തന്ത്‌ദ്.
അയാള് ദൂദാര് കണ്ണ്‌ക്ക്‌മ് കാട്ടിനാ്.
എഗുദാര് അല്ലാത്ത ജാദിഗ പട്ടിലി അയാള്‌ണ പറ്റി സൊന്നാര്.
ഉലഗാത്തില്യ മന്‌സാര്‌ഗ അയാള്‌ണ ണമ്പിനാര്.
അമ്‌സത്തോഡെ അയാള്‌ണ മേലോഗാക്ക് എ്ഡ്‌ത്താ്.
Currently Selected:
1 തിമത്തോസ് 3: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
