1 തിമത്തോസ് 1
1
പവുലോസ് തിമത്തോസ്‌ണ ബിനാത്ത്‌റാ്
1-2ക്‌റ്‌സ്‌ത്ത് ഏസുണ ണമ്പിക്കെ ബെത്തിര്‌ക്കാദ്‌ണാലെ എനാക്ക് സൊന്ത മഗാനായിര്‌ക്ക തിമത്തോസെ, ണമാണ കാപാറ്റ്‌റ സാമിമ് ണമ്മ ണെഞ്ചഡെ ബെത്തിര്‌ക്ക ക്‌റ്‌സ്‌ത്ത് ഏസുമ് തന്ത അദിഗാരത്തിലി ക്‌റ്‌സ്‌ത്ത് ഏസുദ് അപ്പൊസലാ് ആയിര്‌ക്ക പവുലോസ് എ്ള്‌ദ്‌റാദ്.
ണമ്മ്‌ദ് അപ്പനാന സാമിമ് ണമ്മ് ആണ്ടവനാന ക്‌റ്‌സ്‌ത്ത് ഏസുമ് ണിനാക്ക് പ്‌ണ്ണ്യാമ് സെയ്‌ഡൊ, ണിന്നോഡെ ഗവാമ് പഡുഡൊ, ണിനാണ ണിമ്മദ്യോഡേമ് ബെക്കുഡൊ.
ണേര്‌മെ അല്ലാത്ത കാര്യഗണ പഡ്‌സ്‌റാദ്‌ണ സൂസാരിത്ത്‌ക്കൊള്ളുഡൊ
3ണാന് മക്കദോനിക്ക് പോഗാട്ടി ണിനാക്ക് സൊന്ന പാസെതാനെ ണീ എപ്പെസോസ് പട്ടണാത്തിലി തങ്കുഡൊ എന്ത് ഇപ്പ്‌മ് ണാന് ണിനാക്ക് സൊല്ലുറെ. അദ് എന്ത്‌ക്കെന്റ അദിലിര്‌ക്ക പഗ്‌ദി ആള്‌ഗ സാമി സൊല്ലുസുലാക്കാത്തിലി ഇല്ലാത്ത കാര്യഗണ സൊല്ലി ണേരല്ലാത്ത കാര്യഗണ ആള്‌ഗാക്ക് പഡ്‌സ്‌റാര്. 4ണേരല്ലാത്ത കദെഗണാമ് മൂട്ടുമുറില്ലാത്ത കാല്‌കെ്ളെഗണ പറ്റി സൊല്ലുറാദ്‌മ്‌ത്തെ അവാര്‌ക്ക് കാര്യ. ഇദെല്ല ആള്‌ഗാക്ക് തറ്‌ക്കാത്തെ ബര്‌സു. അദല്ലാദെ ഏസു ക്‌റ്‌സ്‌ത്തോഡെ ബെത്തിര്‌ക്ക ണമ്പിക്കേലി സെയ്‌ര സാമി ബേലെ ഒന്റുമല്ല. അദ്‌ണാലെ അച്ച്‌ള കാര്യഗ പഡിസ്യ ണീ അവാര്‌ണ ബ്‌ഡാഗെ ബേ്ഡ. 5ഏസു ക്‌റ്‌സ്‌ത്ത്‌ണ ണമ്പ്‌റവാര് സീവാ് ബ്‌ട്ട് ണഡാക്കുഡൊ എങ്കാദ്‌ക്ക് ബേ്ണ്ടിത്തെ ണാന് ണിനാക്ക് അച്ചെ കല്‌പനെ തന്താദ്. അയ്യി സീവാ് കള്ളകവാഡ് ഇല്ലാത്താദ്‌മ്, <<ണീ കുറ്റക്കാറാ് അല്ല>> എന്ത് സൊല്ലി തരാദ്‌മാന മനേസ്സിലിര്‌ന്ത്‌മ്, ണേര്‌മാന ണമ്പിക്കേലിര്‌ന്ത്‌മ്‌ത്തെ ബരാദ്. 6ആന പഗ്‌ദി ആള്‌ഗ ഇദ്‌ഗണെല്ല തള്ളി എക്കി അര്‌ത്ത ഇല്ലാത്ത ണായഗ സൊല്ലി ണേരണ ബീ്ത്തി എക്ക്‌റാര്. 7അവാര് സൊല്ലുറാദ് എന്തായെന്റ് തമാക്ക് താനെ തെര്യ. അവാര് ഒറേപ്പായി പഡ്‌സ്‌റ കാര്യഗ ഇന്നാദെന്ത് തെരിരാദില്ലെ. എന്ത്‌ട്ട് ഗൂഡി ഇവാര് സാമി സട്ടണ പഡിസ്യാത്തെ ആസെപഡ്‌റാര്.
8മോസെ ബെത്ത സാമി സട്ടണ അദേ പഡിക്ക് പഡ്‌സ്‌റദാനാക്കി അയ്യി സട്ട ണല്ലാദ്‌ത്തെ എന്ത് ണമാക്ക് തെര്യു. 9ഈ സാമി സട്ട ബെത്തിര്‌ക്കാദ് സാമി പിര്യാക്ക് പെ്ളേക്കവാര്‌ക്ക് ബേ്ണ്ടി അല്ല എന്ത് ണമാക്ക് തെര്യു. പിന്നെ ഇദ് തന്തിര്‌ക്കാദ് ആര്‌ക്ക് ബേ്ണ്ടി എന്ത് സൊന്ന, സാമി സട്ടാക്ക് മീ്റി ണഡാക്കവാര്‌ക്ക്‌മ്, സാമിക്കിര്‌ക്ക അദിഗാരാക്ക് കെ്ട്ട്‌പട്ട് ണഡാക്കാത്തവാര്‌ക്ക്‌മ്, സാമിന പറ്റി ണെനേവില്ലാത്തവാര്‌ക്ക്‌മ്, കുറ്റ സെയ്‌ദ് ണഡാക്കവാര്‌ക്ക്‌മ്, കീ്ട്ടുവ ബെത്ത് ണഡാക്കവാര്‌ക്ക്‌മ്, സാമി ബക്‌ദി ഇല്ലാത്തവാര്‌ക്ക്‌മ്, അവ്വപ്പലണ കൊലെ സെയ്‌രവാര്‌ക്ക്‌മ്, കൊലെക്കാറാര്‌ക്ക്‌മ്, 10ബേസ്യാഡ്‌റവാര്‌ക്ക്‌മ്, ആണ് ആണോഡേമ് പെ്ണ്ണ് പെ്ണ്ണോഡേമ് ഉറാങ്ക്‌റവാര്‌ക്ക്‌മ്, ആള്‌ഗണ പ്‌ഡിത്തെ്ഡ്‌ത്ത് പോരവാര്‌ക്ക്‌മ്, ഉറുട്ടു സൊല്ലി ണഡാക്കവാര്‌ക്ക്‌മ്, പൊയ്യി സൊല്ലി സത്ത്യ സെയ്‌രവാര്‌ക്ക്‌മ് ബേ്ണ്ടിത്തെ ബെത്തിര്‌ക്കാദ്. അവാര്‌ക്ക് താനേമല്ല ണേരാന ബുദ്ദിണായഗാക്ക് മീ്റി എന്താമ് സെയ്‌രവാര്‌ക്ക്‌മ് സേന്ത്‌ത്തെ. 11ആള്‌ഗണ പഡിസ്യ ബേ്ണ്ടി സാമി എനാക്ക് ഒപ്പഡിത്തിര്‌ക്ക ണല്ല സേദിലി ഈ ബുദ്ദിണായഗ ഒട്ടുക്ക് ഇര്‌ക്ക്‌ദ്. ഈ ണല്ല സേദിന ബാഗ്യക്കാറാ്ന്‌മ് അമ്‌സത്തോഡെ ഇര്‌ക്കവാന്‌മാന സാമിത്തെ എനാക്ക് സൊല്ലി തന്താദ്.
സാമിക്ക് ബേ്റ്‌വെന്താദ്‌ണാലെ പവുലോസ് ണണ്ണി സൊല്ലുറാ്
12തന്ന് ബേലെന ണാന് സെയ്‌വെ എന്ത് ണമ്പി എനാണ തന്ന് ബേലേക്ക് ബേ്ണ്ടി എ്ഡ്‌ത്ത് ബെത്താദ്‌ക്ക് ണാന് ണമ്മ്‌ദ് ആണ്ടവാ് ക്‌റ്‌സ്‌ത്ത് ഏസുക്ക് ണണ്ണി സൊല്ലുറെ. അയ്യി ബേലെന സെയ്യ എനാക്ക് ബില തന്താദ്‌ക്ക്‌മ് ണണ്ണി സൊല്ലുറെ. 13ണാന് ഏസുണ ണമ്പാത്ത മുദ ക്‌റ്‌സ്‌ത്ത് ഏസുണ കുറ്റ സൊല്ലികൊണ്ട്‌മ്, ഏസുണ ണമ്പി ണഡാക്കവാര്‌ണ കൊഡിമെപഡ്‌സികൊണ്ട്‌മ്, അക്ക്‌റ്‌മ സെയ്‌ദ് കൊണ്ട്‌മ് ഇര്‌ന്തെ. ഇച്ചെ സെയ്‌രാദെല്ല തപ്പെന്ത് തെര്യാദിര്‌ന്താദ്‌ണാലേമ്, ഏസുണ ണമ്പാത്താദ്‌ക്ക് മുദ സെയ്‌ദണാലേമ്, സാമിക്ക് എനാണ ബേ്റ്‌വെന്ത്‌ദ്. 14ണമ്മ്‌ദ് ആണ്ടവാ് എപ്പ്‌മ് എനാണ അളാവുക്ക് മീ്റി ഗവപഡ്‌റാ്. അദേപാസെ അളാവുക്ക് മീ്റി എന്നോഡെ സീവാന്‌മ് ബ്‌ഡ്‌റാ്. അച്ചെ തനാണ ണമ്പ്യാമ് അഡ്‌ത്തവാരോഡെ സീവാ് ബ്‌ട്ട് ണഡാക്ക്യാമ് എനാണ കയ്യിതാങ്ക്‌റാ്. ഇദൊട്ടുക്ക് ണമാക്ക് കെ്ഡേത്താദ് എച്ചെന്ത് സൊന്ന ക്‌റ്‌സ്‌ത്ത് ഏസോഡെ ഒന്റായിര്‌ക്കാദ്‌ണാലെത്തെ.
15ഇച്ചെ ഒരു സൊല്ലു ഇര്‌ക്ക്‌ദ്: <<പാവ സെയ്‌രവാര്‌ണ ദെങ്ക്‌സ്യ ബേ്ണ്ടി ക്‌റ്‌സ്‌ത്ത് ഏസു ഉലഗാക്ക് ബന്താ്.>> ഈ സൊല്ലു ണേര്‌മ് ണമ്പ്യമുഡിരാദ്‌മ്‌ത്തെ. ആന അയ്യി കുറ്റ സെയ്‌രവാരിലി മ്‌ഗ്‌ന്ത കുറ്റക്കാറാ് ണാന്‌ത്തെ. 16അച്ചെ ആയിര്‌ന്ത് ഗൂഡി സാമി എനാണ ഗവപട്ടാ്. എന്ത്‌ക്കെന്റ, ഏസു ക്‌റ്‌സ്‌ത്ത് എത്തറാഗൊ പൊറുക്കാ് എങ്കാദ്‌ണ എനാക്ക് കാട്ടി തര്യ ബേ്ണ്ടിത്തെ. ഏസുണ ണമ്പി എപ്പേക്ക്‌മ് ഇര്‌ക്ക പെ്ളേപ്പ് കെ്ഡേസ്യ പോരവാര്‌ക്ക് ഇദേപാസെ പൊറിമെ കെ്ഡേക്കു എന്ത് കാട്ട്യ ബേ്ണ്ടി സാമി എനാണ എ്ഡ്‌ത്ത് ബെത്തിര്‌ക്കാ്. 17കാലാകാലമായി ആള്‌റ റാജാവുമ്, എപ്പേക്ക്‌മ് അളിവില്ലാത്തവാന്‌മ്, ആര്‌ക്ക്‌മ് കാണ്യ മുഡ്യാത്തവാന്‌മ് ആയിര്‌ക്ക ഒരേ ഒരു സാമി, എപ്പേക്ക്‌മ് ബെല്ല്യവാന്‌മ്, പേര്‌പെര്‌മെ ഉള്ളവാന്‌മ് ആയിര്‌ക്കുഡൊ. ആമെ.
18അയ്യ തിമത്തോസെ, ണിനാണ പറ്റി സാമിദാസ് ണേരാത്തിലി സൊന്നാദ്‌ക്ക് ഒത്തു ബരാദ് പാസെ ണാന്‌മ് ണിനാക്ക് ഈ കാര്യഗണ സൊല്ലുറെ. ഈ ണല്ല സേദിക്ക് ബേ്ണ്ടി ഒരു പഡെയാളിന പാസെ ജുദ്ദ സെയ്യ ഈ ണായഗ ണിനാക്ക് കയ്യിതാങ്കായി ഇര്‌ക്കുഡൊ. 19അദ്‌താനെമല്ല ഏസു ക്‌റ്‌സ്‌ത്തോഡെ ഇര്‌ക്ക ണമ്പിക്കേലി ണീ ഒറേപ്പുള്ളവാനായിര്‌ക്ക്യാമ്, മനേസ്സ് ണേര് എന്ത് സൊല്ലുറ കാര്യഗണ സെയ്യാമ്, ഇദ് ണിനാക്ക് ഉവഗാരപഡുഡൊ. മനേസ്സ് ണേര് എന്ത് സൊല്ലുറ കാര്യഗണ ബെലേക്ക് എ്ഡ്‌ക്കാത്ത പഗ്‌ദി ആള്‌ഗ സാമ്യോഡിര്‌ക്ക ണമ്പിക്കേന ബ്‌ട്ട് തള്ളിനാര്. 20ഗുമനോസുമ്, അലക്ക്‌സന്താറ്‌മ് ഈ കൂട്ടാക്ക് പട്ടവാര്‌ത്തെ. അവാര് സാമിന കുറ്റ സൊല്ലാദെ ഇര്‌ക്കുഡൊ എന്ത് പഡിക്ക്യ ബേ്ണ്ടി ണാന് അവാര്‌ണ സെയിത്ത്യാ് കയ്യിക്ക് കൊഡുത്തിര്‌ക്കെ.
Currently Selected:
1 തിമത്തോസ് 1: സാമിദ് സേദി
Highlight
Share
Copy
Want to have your highlights saved across all your devices? Sign up or sign in
New Life Literature
