ፊልሙነስ 1
1
ፈወነ 1
1ክርስቶስ እየሱስትቍዝ እፁጨር ያን ባውሎስቲስ፣ ይናዝን ጢመቲወስቲስም፦ ቀንሸው ይናዝን ይናጅቅም ላብጠ ሰራሸው ፊልሙነስ፣ 2ይናስን ኣፍብየስ፣ ክጝኒል ፅብረይ ምከንሸንስ፣ ይናጅቅ ክርስቶስት ዊተድረ ኣቐው ኣርኪባስም እፃሽተው እፃ።#ቈላ. 4፡17።
3ይናኣይር እደረቲስ፣ ይናኣደረ እየሱስ ክርስቶስቲስም ፃገዝመ ዲግተይዝ ክታጅቅ ኣነ።
4ይፀለውቲዝ ክት ትዝያⶖ ዊትርቅ ይኣምላክት ሚዝየንዘኵን። 5ምላሰንድም ኣደረ እየሱስትል ፃይረው እምንትድ፣ ምመናንዚም ፃይረው ፍቅርድ ወጭኩን። 6ክርስቶስትውዝ ፃይነው ቀሰው ዊገድቅ ቐናዝር ተረድሽትራንስ፣ ክእምንትድየንትም ላጢዝ ሚዝርድራ ቲጊራንስ ፃልየኵን። 7ይዝንወ! ቅዱሳነ እዘንድ ክቍዝ ታድሽታንስቅ፣ ክፍቅርድ ይጭስ ኽየው ዲስተዝመ ዲብሰዝ ነይኩ።
8እንዝ ማጥን ፃቭተ ጥውሸውድየንትቅ ፃቭራንስ ኣዝጨ ክርስቶስትውዝ ድፍረት ፃቀር ኣቓንም እኳ፣ 9ያን ግን ፍቅርዝ ዋቕረኵን፤ ነስየ ያን ሽሚር፣ ነን ቈሽ እየሱስ ክርስቶስት እፁሸተ ኣቐር ባውሎስ፣ 10ወኽኒ ጝንል ፅባⶖ መንፈስዝ እዅረው ይዅር ኣናሲመስት ማጥን ጨወኵን።#ቈላ. 4፡9። 11እንዝ ሚቅ ጣቅማው ዊኑ፤ ነን ግን ክግስም ኣነ ይግስ ጣቅመው ኣቕኩ።
12ኣቓንስቅም ይእዘነው ኣቐው ኣናሲመስት ክጐ ዊስ እፃቕኩን። 13ወንጌልዝቊዝ እንል እፁጭ ፅባⶖ፣ ክምትክ ኣቕ ይት ኣግልግላንስ ማጥን ይቕምስ እዳዝጨ በን ዊኑን። 14ዊገድ ግን ክት ፃቭረው ቀሰው ሰቭድቅ፣ ውድየተዝጚ ግድየተዝ ኣቓየጘ ክት ማኽርዚጝቀ ውረውረም ፃቨቅ። 15ምናልቫች ኣናሲመስ ክጊስ ዊቱ ግርየ ቲተውድ ነስየ ዊትርቅ ክጅቅ ፅባንስ ኣጠት። 16ነስየ ኣገልጋይዝጘ ኣዪጝቀ ኣገልጋይዝ ኒየ ኣቐው ቀንሸው ክዝን የጝ፤ ይግስ ቀንሸው የጝ፤ ኽሽ ክግስ ቈሽ እኒስ ዲቈው ስየዝም ኣነ ኣደረትውዝ ጭቕጘ ቀንሸው ክዝን የጝ።
17ነስየ ይት ክዝንትጘ ፃቭር እግዝረውዝየ ይት ለምትራንትጘ ፃቭር ጝትም ለምጭ። 18ጘጝ ክት ቢድለው ዊገ ፅብሽ፣ ዊንም ክጊስ ቢን ፃይ ፅብሽ እኳ ጝቢንድ ይዲጊል ማል። 19ያን ባውሎስ «ጝቢንድዛትም ያን ይቕም ኪፍጭር» ይር ይናኒዝ ፃፍኩን፤ ክት ክቕም እኳ ይቢኑ ኣረጘ ያን ኣጅስጨ በነቅም። 20ይዝንወ! ይት ኣደረትውዝ ጣቅምራንስ በነኵን፤ ኣለቀይ ይዘንድየንትም ክርስቶስትውዝ ዲስ ሽ። 21ኣዚትረር ኣረጘ ተማምንጭ፣ ዋቕረዊስ ዲቈውም ፃቭረር ኣረጘ ኣርቕ ፃፈኵን።
22እኒስም ላየ፣ ክታፀለውትድ ዊሰ ችጝ ክታጐ ተጨ ቲስፈ ፃቫንስቅ ይፈወነ ጝን ኣስልጥን። 23ይጅቅ ክርስቶስ እየሱስት እፁሸተ ኣቐው ይባፍረ ዲግተ ኣልሰኵ።#ቈላ. 1፡7፤ 4፡12። 24ቈሽም ይጅቅ ላብጠ ሰራሸቍ ማርቈስ፣ ኣርስጥረኰስ፣ ዲማስ፣ ሉቃስ ዲግተ ኣልስጘኵ።#ኻወ. 12፡12፤25፤ 13፡13፤ 15፡37-39፤ 19፡29፤ 27፡2፤ ቈላ. 4፡10፤14፤ 2ጢመ. 4፡10-11።
25ኣደረ እየሱስ ክርስቶስት ፃገድ ክታመንፈሲጅቅ ኣነ፤ ኣሚን።
Currently Selected:
ፊልሙነስ 1: ኽምጣኣኪ
Highlight
Share
Copy
Want to have your highlights saved across all your devices? Sign up or sign in