ማርቈስት ወንጌል 7

ፈወነ 7

እየሱስ ኣይዅዳኒዝ ኣቅለ ወግድ ተቃውምሸጘ

(ማቲ. 15፡1-9)

1እንዝ ግረ ፈሪሳኒዝመ እየሩሳልየምስ ተረቍ ላው ላው ወሪትት ኽግ ክንሰጥዝ እየሱስትል ተርጝ ኣኽቭሽⶖ። 2ጛይም እየሱስት ክንደጢስ ላው ላውድ ዊር የነው ስረትድ በርጝ የነትም ጝታናንድ እቓሪጝቀ ዅጛንድ ቓልⶖ። 3ፈሪሳኒዝመ ኣይዅዳኒዝ እጝቅ ኣቅለ ወግድየንት ሊሚድጛንስ ማጥን ጝታናንድ ቐናዝጝ ቓሪጘውዝየ ቍም ዊንⶖ። 4ኣርየይስ ዋጥርጛንድም እቓርጝ ዊር ዪይጘውዝየ ቍም ዊን፤ እኒዝጘም ወኝጨድየንት፣ መስርድየንት፣ ሽኻንድየንት፣ ኣረትድየንት ቓሰነውዝመ ላየ ንቕፀው ወግዝ ኻየቍ ዊንⶖ።

5ፈሪሳኒዝመ ወሪትት ኽግ ክንሰጢዝም፦ «ክክንደጥድ ውር ቃጥ የጝ ይናቅለ ወግድየንት ሸረነውዝ ጝታናንድ እቓሪጝቀ ሚ ዅጘውድ?» ይጝ ዋቕርⶖ።

6ጘጝም፦ «ይሳያስ ክትን ተክዘጢዝ ማጥን

‹እኒን ኽዝቭድ ጝምቸይዝ ይት ኪብርዘኵ፤

ጝእዘንድ ግን ይጊስ እክልደው የጝ።#እሳ. 29፡13።

7ይት ጊነዝ ኣምልክጘኵ፤

ጝታክንድጝድም እቅ ሰራሽጘው ስረት ጭቝ የጝ›

የው እማንዝ ዊግትኩ። 8እደረት ትዛዝድ በትርን እቀ ወግ ሊሚድርነኵ» ዩ።

9እንደ ገነም እንት ዩ፦ «ክታቕምት ወግድየንት ሊሚድትርነ ማጥን እደረት ትዛዝድየንት በረነው ቀሰውመ? 10ሙሴ፦ ‹ኪር ክኘት ኪብርዝ፤ ጚርት ዊንም ጝኘት ዛሸውድቅ ክርጘዝ ቐፃሽነ› የውኩ።#ዘፀ. 20፡12፤ 21፡17፤ ዘሊ. 20፡9፤ ዘዳ. 5፡16። 11ክትን ግን ላው እጅር ጚርት ዊንም ጝኘት እርዲ የነው በር፦ ‹ያን ክታጭስ ነቅጨ ጥውሸው ከቨድቅ ቍርቫን የነትም እደረስ ኣልሰነው ሚቨ ፃቭኩን› ይሽ፣ 12ክትንም እኒን እጅርድ ጝኘስም ኣነ ጚርስ ውረውረ ዊገቅ ፃቭጠ ፊቅዳይርነቅም። 13እንዝ ኣይንትዝም ክታዅለይዝ ዲቈዲቍስርነው ወጊዝ ማጥን ይርን እደረት ቃልድየንት ሸርድርነኵ፤ እኒዝጘም እኒንት ተከው ላየ ንቕፀው ዊገ ፃቭርነኵ።»

14ቈሽም ኽዝቭድየንት ጝጐ ጭጝ፦ «ወጭጥን! ክታእጝቅቅም ኣስክስጥን። 15ቢዘይስ ጊዝው ኣቒል ጥወው፣ እጅር ኣርክሰው ውረውረቅ እጀውም፤ ኽሽስ እጅር ኣርክሰውድ ጝቕም እጅሪስ ቢዘትጐ ፈው ዊገድ የጝ። 16[ወሸው ቀርዝ ፃየው ፅብሽ ወሽነ]»#7፡16 ላው ላው ብራንጥ መፃፋን እግዘ 16 ቈሽጘኵ፤ ቃልድም 4፡23 ተከው የጝ። ዩ።

17እየሱስ ኽዝቭድየንት በር ጝኒል ጥወት ግረ ጝክንደጥድ፦ «እኒን ተከድ ወረጘ የነት የጝ?» ይጝ ዋቕር። 18ጘጝም፦ «ክትንም እኒን ዊገድየንት ኣስክሲርነቅመ? ቢዘይስ ጊዝውል ጥወው እጅር ኣርክሰው ውረውረቅ እጀውም። 19እዘኒል ኣዪጝቀ ጊዝውል ጥወኵ፤ ጝዝ ግረም ጝሰወነቲዝ ፈኵ» ዩ፤ እየሱስ እንት የው ዊግተነውዝ እጝቅ ዅረድቅ ንፅዅ ኣቀጘ ጋልፁ።

20እንደ ገነም፦ «እጅሪስ ፈውድቅ እጅርድየንት ኣርክሰኵ። 21ኣቒ እጅርዝ እዘኒስ ፈቍድ፣ ጭቓ ኻሰቭ፣ ሻርሙጠነው፣ ስⶓነው፣ እጅር ቍወነው፣ 22ጝውነት ዲጊል ፊረነው፣ ስግቭግቭየነው፣ ጭቕት፣ ኻጝሰነው፣ ደራሸነው፣ ምቀኝደነው፣ ሽⶖ ድሰነው፣ ትቪት፣ ሲዝው፣ ጛይ። 23እንዛይ ጭቕ ዊቅድ እጝቅ እጅሪስ ፍጘኵ፤ እጅርድየንትም ኣርክስጘኵ» ዩ።

ሲሩፊኒቃንወ እውነት እምንትድ

(ማቲ. 15፡21-28)

24እየሱስም ጝጊስ ጕ ጢረውስ ኻትመይዝ ጣቂል ችጝሸው ኪዊል ፊሩ፤ ላው ጝንልም ጥዉ፤ ጝግል ፅበጘም ኣውማውቅ ኣርቕጠ በኒየውም፤ ኣነጚ ሲውርሽጠ ቸሊየውም። 25ኣይንድም መልወ ጝርቝረየን ርኵስ መንፈስዝ ፃይሽረይ ላይ እውነ እየሱስ ተረጘ ወሽር በውዝ ተትር ጝልኵጣኒል ሊቭች። 26እውነየንም ጝርእዅርሽንድ ግሪክትወ ሲሩፊኒቃነ ዊግነ ዊንች፤ ጚይም ጝርቝረቲስ ጋኒንድ ፊሳንስ ማጥን እየሱስት ጨውች። 27ጘጝ ግን፦ «ዅሊዙ ዅረድየንት ግፅጝዝ ማለነው ጥውሻውም፤ በዊል ዅልድ እፍጥጚስ ዅጝነ» ዩ።

28ጚይም፦ «የይ ኣደረወ! ግፅጝም ቃል መዲዝ ሳይል ኣቕጝ ዅልድ ዅጛንድ ማልጘውድየንት ዅጘኵ» ይች።

29ጘጝም፦ «ቀሰው ዊግትርኵሩ እንዝ ማጥን ፊጥ፤ ጋኒንድም ክቝረቲስ ፍኩ» ዩ። 30ጚይም ጝርጝን ዋጥርድራንድ ጝርቝረ ኣረቲል ኽርይር፣ ጋኒንድም ጝርት ሊቅ ችጝች።

እየሱስ ዲቋር ድደም ኣቐው እጅር ቓዘጘ

31እንዝ ግረም እየሱስ ጢረውስስ ጕ ሲዱነቱ ፃቭ ፅቃ ኻትመ ይሽተው ኻግሪዝ ዲቍ ገሊለ ባኽሪዝጐ ተሩ። 32ጝግልም እቅ ዲቋር ድደም ኣቐው እጅር ጝጐ ነስⶖ፤ እየሱስትም ጝናንድ እጅሪዝ ዲጊል ፃቫንስ ጨውⶖ። 33እየሱስም እጅርድድየንት እቂስ ቲዝ ፊስ ጝዘፍርንጥድ እጅሪዝ ቀርዝጣኒል ድዉ፤ ትፍ የውም እጅሪዝ ላቕድየንት ዳቑ።

34ሲመይ ትጐም ቓላⶖ ቃትቱነ፦ «የፍታኽ!» ዩ፤ ትርጕምድም፦ «ቢጭ» የነት የጝ። 35በውዝም ጝቀርዝጣንድ ቢትⶖ፤ ጝላቕድም እኪር ዊርሸው ዊግተነው ኪርሙ። 36እየሱስም እኒንት ኣውማውስቅ ድቋይጘጘ ኣዙ፤ ኣቕሽም ጘጝ፦ «ድቍትርነ» የው ኣዘጘ ኣይጝቀ ዊገድየንት ጭቕጘ ጂጝዝ። 37ኽዝቭድም ጭቕጘ ዲንቅሸነውዝ፦ «ፃቨው ዊገድቅ ቀሰው የጝ፤ ዲቍራንድ ወሽጥጘ፣ ዊግትጝ ቸላቍድዛትም ዊግትጥጘ ፃቭኩ» ይⶖ።

Currently Selected:

ማርቈስት ወንጌል 7: ኽምጣኣኪ

Highlight

Copy