ማርቈስት ወንጌል 14

ፈወነ 14

ላይ እውነ እየሱስት ሽቱ ቓስረጘ

(ማቲ. 26፡1-5፤ ሉቃ. 22፡1-2፤ ይዃ. 11፡45-53)

1ፈዝየይዝመ ቅጣ ዀነው በሊዝ ኪብርጠ ሊጘ ግርቅ እዳጛንድ፣ ካኽነጣነ ኻልቅጢዝመ ወሪትት ኽግ ክንሰጢዝ እየሱስት ፃይጝ ቍውጥጘ መለ ደምዝጛⶖ ዊንⶖ።#ዘፀ. 12፡1-7። 2ኣነጚ፦ «ኽዝቭድ ኣመፅ ጕያየጘ ኣምርበሊዝ ኣቒነ» ይጛⶖ ዊን።

3እየሱስም ቢታንየስ ለምፃም ስሙን የነው እጅሪዝ ጝኒል መድል ጐይ ፅባⶖ ላይ እውነ ንፅዅ ናርደውስዝ ኣስልኑ ጝወየድ ጭቕጘ ኪብረው ሽቱ እቻቐው ኣልቫስጥረውስ ብልቃጥ ፃይር ተርች፤ ብልቃጥድየንትም ኪልድር ሽቱድየንት ጝኣውሪል ቅብስች። 4ጝግል ዊነቊስም ላው ላውድ ኻልክሽጝ ጛስ ጛይ፦ «እኒን ሽቱድ ወረጘ የነት የጝ ቢክነውድ?#ሉቃ. 7፡37-38። 5ሻቘ ላ ዲናርዝ ንየዝ ቅይሽ፣ ጊንዝቭድ ድኽዝ ይውሽትጠ ዊኑ» ይ፤ እውነየንትም ኒቕፍⶖ።

6እየሱስ ግን፦ «ውር ቃጥ ጝርት ቺግርዝርና? በጥን፤ ጚ ይግስ ቀሰው ዊገ ፃቭርኵች። 7ድኽድ ዊትርቅ ክታጅቅ ጛይ፤ በንርነው ግርየይዝቅ ከቭትርነ ቸልድርነኵ፤ ያን ግን ዊትርቅ ክታጅቅ ፅበቅም።#ዘዳ. 15፡11። 8ጚ ቸልደውድየንት ፃቭርኵች፤ ይመቃቭሪዝ ኣቓንስ ማጥን ይሰወነትድ በውርስር ሽቱዝ ቓስርኵች። 9እማንዝ የኵን፤ እን ወንጌልድ ኣልሚልቅ ሲቭክሻንድ ኣውማው ስፍረይልቅ ጝርኻስቭሸነ ኣቕ ድቍሽትጡ» ዩ።

10እንዝ ግረ ፅጭ ሊጘይስ ላውድ ኣስቈረውትቱ ይዅዳ፣ እየሱስት ዲቍስ ይውጠ ካኽነጣነ ኻልቅጢል ፊሩ። 11ጛይም እኒንት ወሽጛንድ ዲስ ይⶖ፤ ጊንዝቭም ይውጥጘ ቃል ጥውⶖ፤ እንዝ ማጥን ጝት ዲቍስ ይውጠ ሚቸው ግርየ ሊሚዳⶖ ዊኑ።

ፈዝየት ድረይዝመ ቅዱስ ቍርቫንዙ ስረትዝ

(ማቲ. 26፡17-25፤ ሉቃ. 22፡7-14፤21-23፤ ይዃ. 13፡21-30)

12ፈዝየይዝመ ቢገ ዝውሽተው ቅጣ ዀነው በሊዙ በወትረ ግርየይዝ ጝክንደጥድ እየሱስ ትጐ ኣልትጝ፦ «ፈዝየት በሊዙ ድረይድየንት ኣውል ኣስልነ በንረኵ?» ይⶖ። 13ጘጝም ጝክንደጢስ ሊጘድዛት፦ «ኻትመይዝጐ ፊጥን፤ ጝጊስም ጭን ኣቝ መውረው እጅር ችጝትርንቅ፤ ጝትም ቲክንጥን። 14እጅርድ ጥወው ጝኒልም ፊትርን ጝኒዝ ወነድየንት፦ ‹ክንሰተድ፦ <ይክንደጢጅቅ ፈዝየት በሊዙ ድረይድየንት ንስ ማጥን ኣቭን ፈወነ ጝንድ ኣውየን የጝ?> የኵ› ይጥን። 15ጘጝም ዲቭሪል ኣስልሽ ወፃሸው ፈራቐው ኣዳራሽ ቓሊስጡ፤ ጝግልም ኣስልጥን» የው እፃቑ።

16ክንደጥድም ጝጊስ ፍጝ ኻትመየንትጐ ፊርጛንድ፣ እጝቅ ዊገድቅ ልክ እየሱስ የጘ ኣስልሽ ችጝ፤ ጝግልም ፈዝየ በሊዙ ድረይድ ኣስልⶖ።

17ኵናንድም እየሱስ ፅጭ ሊጘይጅቅ ኣቕ ተሩ። 18መድል ፅብጛⶖም፦ «እማንዝ የኵን፤ ክታማኽሊስ ላውድ ይት ዲቍስ ይውጡ፤ ጘጝም ነን ይጅቅ ድረይ ዀውድ የጝ» ዩ።#መዝ. 41፡9። 19ጛይም እን ዊገይዝ ኻዝንጝ ቲረቲረዝ፦ «ያንመ ኣጭር ኣጢ? ያንመ ኣጭር ኣጢ?» ይጛⶖ ዋቕርጥጘ ኪርምⶖ። 20እየሱስም፦ «ፅጭ ሊጘይስ ላውድ ጝናንድየንት ይጅቅ ዝብዲል በርሰውድ የጝ። 21እጅር ዅርስ በውርስ ጝማጥን ፃፍሽጘ ክርጡ፤ ዊገድ ግን እጅር ዅርት ዲቍስ ይወው እድየን እጅሪዝ ወየው፤ እድ እጅርድ እዅርሺጝቀ እዳቕ ዊናን ቺዝጠ ዊኑ» ዩ።

22ዅጛⶖ ሲጝቀም ሚድ ጕይ በርኩ፤ ኪልም ጝክንደጢዝ፦ «ኣስጥን እኒን ይስየድ የጝ» የው ይዉ። 23ፅወድየንትም ጒ እደረት ሚዝየንዝ ይዉ፤ እጝቅቅም ዝይⶖ። 24ቈሽም፦ «እኒን ንቕፀቊዝ ማጥን ቅብረው ኣይር ኪዳኒዙ ይብርድ የጝ።#ዘፀ. 24፡8፤ የር. 31፡31-34። 25እማንዝ የኵን፤ እደረት ምጝግስቲዝ ኣይር ወይኒዙ ፍረይስ ዝቅጪስቅ እቸን ግርየንትል ኣሽ ሊጘት እኒንት ዝቀቅም» ዩ። 26እንዝ ግረም መዝሙር ዚምርጝ ደቭረ ዘይት ኣበይዝጐ ፍⶖ።

ቢጥሮስ ኻዲጠጘድ እየሱስ በውርስ ዊግተጘ

(ማቲ. 26፡31-35፤ ሉቃ. 22፡31-34፤ ይዃ. 13፡36-38)

27እየሱስም ጝክንደጢዝ፦ « ‹ምቓድየንት ጣዝጭር፤ ቢቅድም ቢትንሽጥቍ› ይሽት ፃፍሽጘ፤ ክትን እጝቅ ፅጋርትርንቅ፤ ይትም ማልድርን ሰይትርንቅ።#ዘካ. 13፡7። 28ዊገድ ግን ያን ክርጘይስ ጐት ግረ ገሊለ ትጐ ክታት ቃውስ ፊጭር» ዩ።#ማቲ. 28፡16።

29ኣይንድም ቢጥሮስ፦ «እጝቅቅ ፅጋርጝሽ እኳ ያን ግን ፅጋጠቅም!» ዩ። 30እየሱስም፦ «እማንዝ የኵን፤ እኝቸን ኻርሸንስ ጅርወ ሊⶓን#14፡30 ላው ላው ኽፅምትቍ ብራንጥድ፦ «ሊን» የው ቃልድ እጀቍም። ዋቒጘቀ ይት ሸውን ኻዲትር» ዩ። 31ቢጥሮስ ግን፦ «ክረነው እኳ በንዛን ክጅቅ ክጭርጚ ክት ኻድየቅም» ያⶖ ቐናዝ ዊግቱ፤ ላጥድም ጘጝት ዊግት።

እየሱስ ጀተሲማኒስ ፃልየጘ

(ማቲ. 26፡36-46፤ ሉቃ. 22፡39-46)

32እንዝ ግረ እየሱስስመ ጝክንደጢዝ ጀተሲማኒ ይሽተው ስፍረይዝጐ ፊርⶖ፤ ጘጝም ጝክንደጥድዛት፦ «ያን ፃሊጪስቅ እንል ዊንጥን» ዩ። 33ቢጥሮስት፣ ያይቈቭት፣ ይዃንስትም ፃይ ፊሩ፤ ጭቕጘም ኻዝንጠ፣ ጨጝቅሽጠም ኪርሙ። 34ቈሽም፦ «ይኒቭስሸን ክርጘል ኣሽ ጭቕጘ ኻዝንች፤ እንል ኣጥን፤ ነቃቕርንም ሊሚጥን» ዩ። 35ዊትወት ዲቍ የውም ዝቨይል ሊቭ ቸልሸው ኣቕሽ፣ ጚ ሰትሸን ጝጊስ ዲቍራንስ ማጥን ፃልዩ። 36እየሱስም፦ «ኣየወ! እጝቅትቅ ቸልደኵ፤ እኒን ሚከረዙ ፅወድየንት ይጊስ እክልሽ፤ ዊገድ ግን ክት ዊድረውድጚ ያን ዊደውድ ኣቒነ» ዩ።

37ዋጥር ተራንድም ጝክንደጥድዛይ ኽርይጝ ዊን፤ ቢጥሮስትም፦ «ስሙንወ! ኽርይርመኵሩ? ላው ሰት እኳመ ነቃቕር ሊሚደነው ብሩ? 38ፊተነይል ጥዋይርነጘ ቲግይርን ፃልይጥን፤ መንፈስ ኣስልሸው የጝ፤ ስየ ግን ዝላቐረ የጝ» ዩ። 39እንደ ገነም በዊል ፃልየውድየንት ቈሽ ፃልዩ። 40ሊጘት ዋጥር ተራንድም ጝታእልጣንድ ዝመውዝ ዝላቕጝ ዊንጛንስቅ ኽርይጝ ዊን፤ ጝጭስ ዊስጘው ዊገድየንትም ኣርቓቍም ዊንⶖ። 41ሸወትም ተር፦ «ነንምመ ገነ ኽርይርን፣ ፈውርንም እኵርኑ? ነስየስ ኣጥጘች፤ ሰትሸን ችጝርኵች፤ እንወ! እጅር ዅር ኽጥያትኝጢዙ ናኒዝ ዲቍሽት ይወሽትጡ። 42ጕጥን ፊርነ፤ ይት ዲቍስ ይወውድ ተርኵ» ዩ።

እየሱስ ፃይሸጘ

(ማቲ. 26፡47-56፤ ሉቃ. 22፡47-53፤ ይዃ. 18፡3-12)

43ጘጝም ዊግታውⶖ ሲጝቀ ፅጭ ሊጘይስ ላውድ ይዅዳ ተሩ፤ ጝጅቅም ሰይፍዝመ ዱለዝ ፃየቍ፣ ካኽነጣነ ኻልቅጢስ፣ ወሪትት ኽግ ከንሰጢስ፣ ሽመቅሊስ እፃሸቍ ንቕፀቍ እቅ ዊን። 44ይዅዳም፦ «ክትን ደምዝርነው እጅርድ ያን እምቘድ የጝ፤ ጝት ፃይጥን፤ ጣጝቅቅሽርንም ፊስጥን» የው በውርስ ምልክት ይው ዊኑ።

45ጝግል ችጘጘም በውዝ እየሱስትጐ ኣልት፦ «ክንስተወ!» የው እምቑ። 46እቅድም እየሱስት ፃይጝ እፅቍⶖ። 47ጝጋቢል ችብርጝ ዊነቊስም ላውድ ጝሰይፍድየንት ምዝ ኻክናጣነ ኻልቀዝ ኣገልጋይዙ ቀርዝድየንት ቅዝ ማሉ። 48እየሱስም፦ «ወምበዲ ፃየቍዝጘመ ይት ፃይትርነ ሰይፍዝመ ዱለዝ ፃይርን ተትሩ? 49ግሪ ጨቨቅ መቅደስ ጝኒል ክንሳ ክታጅቅ ዊናንድ ፃዪርነቅም፤ ዊገድ ግን ቅዱሳን መፃፋንድ ይጘውድ ፋፅምሻንስ ማጥን እኒን ኣቑ» ዩ።#ሉቃ. 19፡47፤ 21፡37።

50ኣይንድም እጝቅቅ ጝት ማልጝ ሰይⶖ። 51ኵተ ጭቝ ሲረው ላው ውርጋጠም እየሱስት ቲክናⶖ ዊኑ፤ እቅድም እን ውርጋጠድ ፃይጛንድ፣ 52ጝግልድምድየንት ማል መጥማጥ ሰዩ።

እየሱስት ፍርድዙ ሸጐዊል ፊስጘጘ

(ማቲ. 26፡57-68፤ ሉቃ. 22፡54-55፤63-71፤ ይዃ. 18፡13-14፤19-24)

53እየሱስትም ካኽነጣነ ኻልቀይዝጐ ፊስⶖ፤ ጝግልም ካኽነጣነ ኻልቅጥድ፣ ሽመቅልድ፣ ወሪትት ኽግ ክንሰጥድ እጝቅ ኣኽቭሽ። 54ቢጥሮስም እክልድ የው ቲክናⶖ ካኽነጣነ ኻልቀዝ ኻፅሪል ኣሽ ፊሩ፤ ጝግልም ጐይ ኣገልጋያኒጅቅ ልየ ቃውራ ዊኑ። 55ካኽነጣነ ኻልቅጢዝመ ሽጐዊዝቍ ኣቫላንድም ምሉዝ እየሱስት ቍዉስጥጘ ሚዝር ደምዝጛⶖ ዊን፤ ዊገድ ግን ኣውማውትም ችጚየቍ። 56ንቕፀቍ እቅ ኻሽትዝ ሚዝርድጝሽም፣ ጝታቃልድ ግን ላው ኣጠ ቸሊየውም።

57-58ላው ላውድም ጕጝ፦ «እኒን እጅርድ፦ ‹እኒን እቀ ናንዝ ተሲተው መቅደስ ጝንድየንት ፋዝ፣ ሻቘ ግርቅዝ እቀ ናንዝ ተሲቲየው ላየ መቅደስ ጝን ተስጭር› ያንድ ወሽንኵኑን» ይጝ ኻሽትዝ ሚዝርድ።#ይዃ. 2፡19። 59እንም ኣቕ እኳ ጝታሚዝርነይድ ላው ኣቒየውም።

60ካኽነጣነ ኻልቀድም ጕ ጝታበዊል ችብር፦ «እንዛይ እቅድ ክት ኪስጘውድ ወረጘ የጝ? ውር ቃጥስ ዊሰ ይዋር?» የው እየሱስት ዋቕሩ። 61እየሱስ ግን ዝም ዩ፤ ውረውረቅ ዊስየውም፤ ካኽነጣነ ኻልቀድም እንደ ገነ፦ «ብሩክ እደረት ዅር ክርስቶስ ክትመ?» የው ዋቕሩ። 62እየሱስም፦ «የይ ያን የጝ፤ እጅር ዅር ኻይሉ እደረት ለዊል ጐያንድ፣ ሲመይዙ ድምነዝም ተራንድ ቓልትርንቅ» ዩ።#ዳን. 7፡13።

63ካኽነጣነ ኻልቀድም ጝቕምት ኣልቨድየንት ቀድ፦ «እንዝለ ውርት ሚዝር በንዝጣ? 64ጝዛንድ ወሽርንኵርኑ፤ እድስለ ወረጘ ይርና?» ዩ፤ ጛይም፦ «ክርጠ ጥውሸኵ» ይጝ ላው ቃልዝ ፊርድⶖ።#ዘሊ. 24፡16። 65ኣይንድም ላው ላውድ ጝታብፅቕንድ ጝዲጊል ትፍ ይጥጘ ኪርምⶖ፤ ጝልጣንድም ሺፍንጝ ቡጢዝ ጣዝጛⶖ፦ «ክት ጣዘውድ ኣው ኣቐጘ እስቲ ኣርቓ!» ይጛ ዊን፤ ኣገልጋያንድም ጥፊዝ ጣዝጛ ፊስⶖ።

ቢጥሮስ እየሱስት ኻድየጘ

(ማቲ. 26፡69-75፤ ሉቃ. 22፡56-62፤ ይዃ. 18፡15-18፤25-27)

66ቢጥሮስ ሳ ኻፅር ኣቒል ጐይ ፅባ ካኽነጣነ ኻልቀይዝ ጊርዳኒስ ላይሸን ተትር፣ 67ቢጥሮስ ልየ ቃውራⶖ ሲጝቀ ጝት ትክ ይር ቓልችነ፦ «ክትም ናዝሪትቱ እየሱስ ጅቅ ዊንዱ» ይች። 68ቢጥሮስ ግን፦ «ያን ክት ይረውድየንት ኣርቐቅም፤ ዊግትረው ዊገድም ይጭስ ጥዋውም» የው ኻድዩ፤ እኒንትም የው ሚረይዝጐ ፉ፤ ኣይንድም ጂርወ ዋቑ።

69ጊርድሸንም ጝት ቓልዳንድ ጝግል ችብረቊዝ፦ «እን እጅርድ ጛጊስ ላውድ የጝ» ይር እንደ ገነ ዊግትች። 70ቢጥሮስ ግን እንደ ገነ ኻድዩ፤ ዊትው ዊንጘጘም ጝግል ችብረቍ እቅድ ቢጥሮስት፦ «ክት ገሊለቱ እጅር ኣራንስቅ እርግጥ ጛጊስ ላውድ የጝ» ይⶖ። 71ቢጥሮስ ግን፦ «ክትን ይርነው እጅርድየንት ያን ኣርቐቅም» ያ ጝቕምት እፃⶖ ፃርጠ ኪርሙ። 72በውዝም ጂርወ ሊጘት ዋቑ፤ ቢጥሮስም፦ «ጂርወ ሊን ዋቒጝቀ ሸውን ኻዲትር» የው እየሱስ ዊግተው ቃልድየንት ትዝ ዩ፤ ኣይንድም ኽርር የው ሊዙ።

Currently Selected:

ማርቈስት ወንጌል 14: ኽምጣኣኪ

Highlight

Copy