ሉቃስት ወንጌል 1

ፈወነ 1

ወንጌሊዙ ፃፍሸነይዝ ምላሰንድ

1ኪብርሸው ቲወፍለውስወ! ይናግል ኣቐው ዊገይዙ ታሪክድ እንዝ ሚቅ ንቕፀቍ እቅ ፃፍጥጘ ሚኵርጝኵ። 2እኒን ታሪክድ ይናጭስ ዲቍስጝ ነየቍድም በውገይስ ኪርም ጝታቕም ጝታእልጣኒዝ ቓለቍ ወንጌሊዝ ኣገልጋያን ዊነቍድ ጛይ። 3ያንም በውረይስ ኪርም እጝቅትቅ ሚርምረት ግረ ታሪክድ ቃውሰ ቲክነይዝ ፃፍ ነቃን ይጭስ ቀሰው ተክ እትሉ። 4እኒንት ፃቭጨ በነውድም ክት ክንድረው ክንድጝድ እማንተው ኣቐጘ ኣርቕተ ማጥን የር የጝ።

ጣምቀተ ይዃንስት እዅርሽንድ መላክ ገቭርየል በውግስ ደቈጘ

5ይዅዳት ንጕስ ኺረውድስት ዚምኒዝ ኣቭየት ሰሙኒል ሚድቭሸው ዘካርያስ ይሽተው ላው ካኽን ዊኑ፤ ጝውነየንም የልሳቭየጥ ይሽትረይ ኣረውንት ዊግኒዝወ ዊንች።#1ዚመ. 24፡10። 6ጝታቪሉጝም ኣደረት ትዛዝመ ኽግዝ ፅበቍ ነቐፈ እጀቍ እቅ ዊን፤ እደረት በዊልም ፃድቃን ዊን። 7ኣነጚ የልሳቭየጥ ማኽን ዊንዳንስቅ ዅር እጀቍም ዊን፤ ጝታቪሉጝቅም ጊንጝ ዊን።

8ዘካርያስም ጝምድቪዙ ቲረይዝ እደረት በዊል ክኽንትዝ ኣግልግላንድ፣ 9ካኽነጣነ ስረቲዝጘ እደረት መቅደሲል ጥው እጣን ኣጥንጠ ማጥን ጝጭስ እፀ ችጙ። 10እጣን ኣጥነነው ሰትድ ችጛንድም ኽዝቭድቅ ቢዘይል ችብር ፃልያ ዊኑ። 11ኣደረት መላክም እጣን ጥይሰነው መሰወየይዝ ለዊዝጐቱ ችብር ዘካርያስስ እትሉ። 12ዘካርያስም መላክድየንት ቓላንድ ዳጝግፅ ጐውትዝ ስርሹ። 13መላክድ ግን እንት ዩ፦ «ዘካርያስወ! ጐውተ ክፀለውትድ ወይሽትኩ፤ ክውነ የልሳቭየጥም ግልወ ዅር እዅርቲ፤ ጝሽድም፦ «ይኳንስ» ይር ጭጝትር። 14ክትም ጭቕጘ ዲስ ይትር፤ ጝእዅርሸነዊዝም ንቕፀቍ እቅ ዲስ ይጥቍ። 15ኣደረት በዊልም ኽየው ኣጡ፤ ወይንዙ ሚዝዝመ ላየ እራዘው ዝየነውድቅ ስሪስቅ ዝያውም፤ ገነ ጝኘት ማፅንቲል ፅባ መንፈስ ቅዱስዝ እቻጡ።#ዘዅ. 6፡3። 16እስራየልት ኽዝቪስም ንቕፀቍድ ጝታኣምላክ እደረ ትጐ ዊስጡ። 17ኣደረስ ጥውሸው ኽዝቭ ኣስልጠ ማጥን፣ ቈሽም ኣቅሊዙ እዘንድ ጝታቝርትጐ፣ ኣደረስ ኣዚታቍድም ፃድቃኒዙ ጥቨቪዝጐ ዊስጠ ማጥን ይልያስት መንፈስዝመ ኻይልዝ ኣደረት በዊል ፃጝጡ።»#ምል. 4፡5-6።

18ዘካርያስ ግን፦ «ያን ሽሚር እጅር የጝ፤ ይውነም ጝርእድሚድ ትክቭሽኩ፤ እደስለ ክት ይረዊዙ ዊገድ ወረጘዝ የጝ ኣርቕጨ ቸለውድ?» ዩ። 19መላክድም፦ «ያን እደረት በዊል ችብጠር ገቭርየል የጝ፤ ክጅቅ ዊግትጨ፣ እኒን ኣቭዝርተድም ክጭስ ኣቭዝርስጨ ማጥን እደረቲስ እፃጭ ተጥኩን።#ዳን. 8፡16፤ 9፡21። 20ክት ግን ጝጊዝየድ ችጛንድ ፋፅምሸው ይቃልድ ኣምኒረርም፤ ኣቓንስቅም እን ይቃልድ ፋፅምሽጢስቅ ድደ ኣትር፤ ዊግተነውም ቸላርም» ዩ።

21ኽዝቭድም ዘካርያስ መቅደስ ጝኒስ ደያንስቅ ጊርምሻ ሊሚዳ ዊኑ። 22ጘጝም መቅደስ ጝኒስ ፋንድ ዊግተነ ባንስቅ ኽዝቭድ መቅደሲስ እትለ ቓለጘ ኣስክሱ፤ ጘጝም ምልክትዝ ዊግተነው ኪርሙ፤ እነይም ድደ ኣቕ ፅቡ። 23ዘካርያስም ጝኣግልግለነዊዙ ሰሙንድ ኻትሻንድ ጝጝን ፊሩ። 24-25እንዝ ግረም ጝውነ የልሳቭየጥ ጊዙርች፤ እንትም ይች፦ «እደረ ጝምኽርቲዝ ይት ዲብስ እኒን ቀሰው ዊገድ ፃቩ፤ እቀ ማኽሊስም ይነቐፈድ እድጐ እክልሱ» ይር ኣኰ ርፍ ኣጢስ ጭቭትር ጐይች።

ማርያም እየሱስት እዅርተጘድ መላክ ገቭርየል ኣቭዝርሰጘ

26እንቅ ኣቐው ዋልጠትረ ርፊዝም መላክ ገቭርየል እደረቲስ ናዝሪት የነይ ገሊለት ኻትመትል እፃሹ። 27እፃሸውድም ዳዊትት ዊግንዙ ዮሴፍ የነው እጅርል ወግሽትር ዊንደይ ጝርሽድ ማርያም የነይ ላይ ድጝግልትል የጝ።#ማቲ. 1፡18። 28መላክድም ጚ ፅብረዊል ጥው፦ «ፃገዝ እቻረርወ! ዲስ ይ! እደረ ክጅቅ የጝ፤ ክት እቍኒስቅ ቲትር በርክሽረር የጝ» ዩ። 29ማርያምም ጝት ቓልዳንድ ጝዊገይዝ ዳጝግፅር፦ «እኒን ኣወየው ዲግተ የጝፈ!» ይራ ኻስቨነው ኪርምች። 30መላክድም፦ «ማርያምወ! እደረቲስ ፃገ ችጝርኵሩ፤ ጐውተ። 31እንወ ጊዝውርትር፤ ግልወ ዅርም እዅርትር፤ ጝሽድም እየሱስ ይትር።#ማቲ. 1፡21። 32ጘጝም ኽየው ኣጡ፤ ልውል እደረት ዅርም ይሽትጡ፤ ኣደረ ኣምላክም ጚር ዳዊትት ዙፋንድየንት ይውጡ።#2ሳሙ. 7፡12-13፤ 16፤ እሳ. 9፡7። 33ያይቈቭት ዚረይልም ዘላልም ኒግስጡ፤ ጝምጝግስትድም ኻትሸነ እጀውም» ዩ።#2ሳሙ. 7፡12-13፤ 16፤ እሳ. 9፡7። 34ማርያምም መላክድየንት፦ «ያን ግልወ ኣርቐቅም፤ እደስለ እን ዊገድ ኣወይ የጝ ኣቐውድ?» ይች። 35መላክድም፦ «መንፈስ ቅዱስ ክግል ተርጡ፤ ልውል እደረት ኻይልም ክት ገርድጡ፤ ኣቓንስቅም ክጊስ እዅርሸው ኽፃንድ ቅዱስ የጝ፤ እደረት ዅርም ይሽትጡ። 36ክዚምድ የልሳቭየጥ እኳ ማኽን ይሽትራ ፅብር ነን ጝርጊንትዝ ግልወ ዅር ጊዙትርኵች፤ ጊዙትረትም ነን ዋልጠ ርፍ የጝ። 37እደረስ ቸልሻው ዊገ እጀውም» ዩ።#ዘፍ. 18፡14። 38ማርያምም፦ «እንወ! ያን ኣደረት ኣገልጋይ የጝ! ክቃሊዝጘ ይግስ ኣና!» ይች፤ ጝዝለም መላክድ ጝርጊስ ቲት ፊሩ።

ማርያም የልሳቭየጥት ዋቕርተ ፊትረጘ

39ማርያምም ኣይንት ሳብጢዝ ቃዝየዝ ጕር ዲቀ ይዅዳ ኻግሪል ችጝሽረይ ላይ ኻትመትል ፊርች። 40ዘካርያስት ጝኒልም ጥውር የልሳቭየጥስ ዲግተ ይውች። 41የልሳቭየጥም ማርያምት ድመድ ወሽራንድ ሽልድ ጝርማፅንቲል ፅበጘ በጕሩ፤ የልሳቭየጥትልም መንፈስ ቅዱስ እቻቑ። 42ጝርድመድም ኣጕስ ሽር፦ «ክት እቍኒስቅ ቲትር በርክሽረር የጝ፤ ክማፅንቲዙ ዅርድም በርክሸው የጝ። 43ይኣደረ ትኘ ይት ገቭስተ ተትረውድ ያን ኣው የጝ? 44ክዲግተድ ገነ ወጫንድ ይማፅንቲዙ ሽልድ ዲስተዝ በጕሩ። 45ኣደረ ዊግተው ቃልድ ፋፅምሽጠጘ ኣምንደር ክት ቀቫሽረር የጝ» ይች።

ማርያምት ሚዝየነዙ ፀለውትድ

46ማርያምም እንት ይች፦ «ይኒቭስሸን ኣደረት ኪብርዘች።#1ሳሙ. 2፡1-10። 47ይመንፈስሸንም ይቓዘተ ኣቐው ይኣምላክትውዝ ዲስ የች። 48ያን ጝኣገልጋይሸንት ውርድየትድ ቓልኩነ፤ ነስየ ይት ነንስ ኪርም ዅለድቅ፦ ‹ቀቫሸረይ› ይጡ።#1ሳሙ. 1፡11። 49ኻይሉ ኣደረ ይጭስ ኽየው ዊገ ፃቭኩ፤ ጝሽድም ቅዱስ የጝ። 50ጝስቝርትድም ጝት ጐውተቊዝ ዅላዅሊልቅ ኣሽ ፅብጡ። 51ጝኻይሉ ናኒዝ ኽየው ሰቭ ሰራሽኩ፤ ጝታኻሰቪዝ ኲረቍ ትቪትኝጥድዛት ቢትንኩ። 52ቅመትድዛት ጝታዙፋኒስ ጊምዝኩ፤ ትኽትነ ፃየቍድዛት ግን ንየስ ንየስ ሸውኩ።#እየቭ. 5፡11፤ 12፡19። 53ግድርደቍድ ጝበርክቲዝ እቭስኩ፤ ኻፍታማንድ ግን ጝታባደው ናን በርስኩ። 54-55ይናኣቅሊዝ ዊግተጘ ኣቭርኻምስመ ጝዚረይዝ ዘላልምዙ ጝስቝርትድየንት ትዝ ያ ጝኣገልጋይ እስራየልት እርዲ የውኩ።#ዘፍ. 17፡7። 56ማርያምም ሻቘ ርፍ ኣጠ የልሳቭየጥ ጅቅ ጐይር በትር ጝርጝን ዋጥርች።

ጣምቀተ ይዃንስ እዅርሸጘ

57የልሳቭየጥም ጝርእዅረነ ግርየድ ችጛንድ ግልወ ዅር እዅርች። 58ጝርግፂዝመ ጝርዚምዳኒዝም ኣደረ ጝስቝርትድ ጝርስ ኒቒሰጘ ወሽጛንድ ጝርጅቅ ዲስ ይ። 59ኽፃንድ እዅርሸው ሰውጠትረ ግርየይዝም ጊርዝጥጘ ኣኽቭሽ፤ ጝሽድም ጚርት ሽዝ ዘካርያስ ይጝ ፊስጥጘ በን።#ዘሊ. 12፡3። 60ጝኘ ግን፦ «ኣየውም ይዃንስ ይሽትነ» ይች። 61ጛይም፦ «ክዚምዳኒስ እን ሽዝ ጭጝሸው ላው እጅርቅ እጀዊ ውረ» ይ። 62ጚርትም፦ «ጝሽድ ኣው ይሽጠ በንረኵ» ይጝ ሚርየዝ ዋቕር። 63ጘጝም ፃፈነው ብራነ ዋቕር፦ «ጝሽድ ይዃንስ የጝ» የው ፃፉ፤ እጝቅቅም እን ዊገይዝ ጊርምሽ። 64ዘካርያስም ኣይንድ ጝኣንደቨትድ እኪት ዊግተነው ቸሉ፤ እደረትም ሚዝየንዝጠ ኪርሙ። 65ጝታግፅድቅም ጐውትዝ ስርሽ፤ እን ዊገድም ዲቀ ይዅዳ ኻግሪልቅ ወይሽቱ። 66ወሸው እጅርድቅ፦ «እን ኽፃንድ ወረጘ ኣጡ ኣጢ?» ያ ዊገድ ጝእዘኒዝ ፃያ ዊኑ፤ ኣደረት ናንሸንም ጝጅቅ ዊንች።

ዘካርያስት ትንቪትድ

67ኽፃኒዝ ዚር ዘካርያስም መንፈስ ቅዱስዝ እቻቕ እንት ያ ትንቪት ዊግትጠ ኪርሙ፦ 68«ጝኽዝቭድ ገቭስ ቓዛንስቅ እስራየልት ኣምላክ እደረ ሚዝየንሽትነ። 69-70ኽፅምስ ኪርም ቅዱሳን ነቭያታኒዙ ምቸይዝ ዊግተጘ ጝኣገልጋይ ዳዊትት ዚረይስ ይናጭስ ኽየው ቓዘተ ጕስኩ። 71ቓዝጠ በነውድም ይናፃለታኒስመ ይናት ሽክተቊዙ ናኒስቅ የጝ። 72እኒንትቅ ፃቨውድም ይናቅሊዝ ስቝርት ፃቭጠጘ፣ እንዝ ሚቅ ዊግት ዊነው ቅዱስ ኪዳንድም ፋፅምጠጘድ ቓሊስጠ በን የጝ። 73እኒን ቃል ኪዳንድየንትም ይናኣይር ኣቭርናኻምስ ፃርዝ ይው ዊኑ። 74እንም ይናፃለታኒስ ኻርነይ ፍን ጐውቲጝቀ እደረት ኣግልግልነ ማጥን የጝ። 75እኒዝጘም ይናዚምኒዝቅ እደረት በዊል ቅድስነዝመ ፅድቅዝ ፅብነ ማጥን የጝ። 76ቈሽም ክት ኽፃን ክተ! ልውል እደረት ነቭይ ይሽትር፤ ጝጒደነድ ኣስልተ ማጥን ኣደረት በዊል ፃጝረር የጝነ።#ምል. 3፡1። 77ቈሽም ጝታኽጥያቲስ ይቅርተ ችጝጥጘ ማጥን ኽዝቪዝ ጝታቓደነይዙ ኣርቕትድ ይውትር። 78ይናኣምላክ ሳቝረተ፣ ርዅርዅም ኣቓንስቅ ይናግል ቓድትዙ ኰረ ሲመይስ ኣቭርኽጠ ፃቭጡ። 79ጝብርኻንድም ጥመዝመ ክርጘዙ ፃመይል ፅበቊዝ ኣቭርኽጡ፤ ይናልኵጣንድዛትም ዲግተዙ ጒደነይዝ ሚሪጡ።» 80ኽፃንድም ሊግዙ፤ መንፈስ ቅዱስዝም ጣጝክሩ፤ እስራየልት ኽዝቪዝ እትልጢስቅም በራኸል ፅቡ።

Currently Selected:

ሉቃስት ወንጌል 1: ኽምጣኣኪ

Highlight

Copy